Read Kono MATIU 10 Bible Online

MATIU 10 - Kono bible

MATIU 10

¹Chɛ gbakɔ, mbɛ Chisɔsi‑a a fɛ denɛ n chee, an mɔ tan kun ma fea ni. A‑a an chee, a‑a gbasaya be wan an ma, nyina yama n gbain koe a mɔɛ n fɛ. A yɛ to, a‑a gbasaya be wan an ma, mɔɛ n baun koe a an 'na gbandi n gbɛɛ ɔ.

²A 'a sɔ mɔ tan kun ma fea chɛ n tɔɛ n fan nɛ. A saa tɔɛ an nɛ Saimɔn, a na‑a tɔ dɔ mende be min ma a ɔ, Pita, ni Saimɔn dɔɛ kaima Anduu. Chimisi ni a dɔɛ Chɔn, miin ni kai Sɛbɛdi 'a denɛ n na.

³Fiipi ni Batɔɔmiu. Matiu, min ni pawa bia mɔɛ a, ni Tɔmɔsi. Chimisi, kai Afiɔsi 'a denɛ, ni Tadayɔsi.

⁴Saimɔn min ni chɛnyɛ ma chɛɛ chɛ mɔɛ a, ni Chudasi Isikayɔti, min na‑a danka Chisɔsi ma tachɛ a.

⁵A fɛ den tan kun ma fea chɛ nu, Chisɔsi‑a an sɔ wan ta koe a, a 'a wai chɛ koe a. A‑a an na si wan, a ɔ, “Wo ta Chu mɔɛ n tena, an fan maen mu yɔ sa nu, miin chen gba ɔ chɛenɛ ɛ an ti n ma, koe min na mu, an‑na an kan kɔ sɔ Yataa a. Wo ma ta kaina, Chu mɔɛ n mbe ee kaina. A yɛ to, wo ma ta Samayia duu n dɔ.

⁷Wo ta Chu mɔɛ n fan tena, mbɛ wo‑a a fɔ an ye, mbɛ Yataa‑a a kuu sɔ a 'a mansa wai chɛ‑a dunya ɔ.

⁸Wo gbandi mɔɛ n baun, mbɛ wo‑a fɔɛ a yɛ chɛ n sun da a, miin faenɛ ɛ. Wo mɔɛ chɛ n baun, gboo ma gbandi yama ɛ miin ma, mbɛ wo‑a nyina yama n gbain mɔɛ n fɛ. N‑na gbasaya chɛ be wo ma gbama an na. N ma fen bia ni wo boo ɔ. Chɛ an fɛ mu, wo wɛɛ, wo ta, wo ni mɔɛ n deman. Wo ma an dɔ tisa fen kɔ fen ko a.

⁹Ni wo sin ma‑a ta‑a, wo ma ta fen kɔ fen na wo boo ɔ. Wo ma ta kɔpɔ a,

¹⁰wo ma basachi bia wo boo a, wo ma tu tungbɔɛ a, wo ma doma fea ya, wo ma kɔɔwa fea ya. A mu min na, wo e ma‑a wai chɛ‑a mɔɛ min ko a, an mɔɛ chɛ an mbe wo da kɔ‑a.

¹¹“Ni wo ta‑a duu kan kɔ kan dɔ, wo ta wo ni wo ya a kan mɔɛ a, min mbe dɔn‑da a ni a boo si wo kɔɔ. Ni a‑a a boo si wo kɔɔ, wo ma a 'a sondaya a, aan wo ni bɔ an duu chɛ ɔ.

¹²Ni wo don‑da chen chɛ a, wo nɔ mɔɛ n dua.

¹³Ni an‑na wo bia chɛndɛ, an mbe dua‑a wan. Chɛɛ ni an ma wo bia ni chɛndɛ, an mbe fo‑a wan dua chɛ a.

¹⁴Chɛɛ ni mɔ ɔ mɔ ma a boo si ni wo kɔɔ an chen chɛ a, ni mɔ ɔ mɔ ma a boo si ni wo kɔɔ an duu chɛ ɔ, ni an ma an too ma sɔ ni wo ma, wo bɔ nɔ. Ni wo ma‑a bɔ‑a, wo wo chenɛ a gbɔngbɔn fifii chɛ a, min mbe a ɔ yian an na, mbɛ an‑na koe min ma ka, a ma nyin.

¹⁵N ni a ma din wo tena, mɔ yama chɛ nu suun Sɔdɔn duu ɔ, an fea Komoa[15] a, an mbe ee tɔɔya‑a, Yataa ɛ dunya gbɛmbo‑a tee min na, yɔ chɛ nu an duu chɛ ɔ, an mbe tɔɔya‑a buɛ min dɔ.”

¹⁶Chisɔsi‑a a fɔ a 'a sɔ mɔɛ n ye, a ɔ, “N yen ko wo a ta‑a, wo e ma‑a wan nɔ yɔ ni sa bɔ‑a kui n tɛ. Chɛ an‑na a fɔ, wo yiima a ni sɛn. A yɛ to, wo ni tea a tachɛ ko ɔ ko ɔ, wo e min ma‑a.

¹⁷Wo wo kun ma fɛn, a mu min na, an mbe wo bia‑a wan, an ni ta wo a gbakoo n chen kɔɔ. An mbe yɛ‑a wan to, an ni wo gbasi an 'na samun chɛ chenɛ n na.

¹⁸An mbe wo bia‑a wan, an ni ta wo a chɛnyɛ ti n tena, an mbe ta‑a wan wo a mansa wa n chen kɔɔ. An mbe chɛ n ma‑a wo a n bakoe an na. Chɛɛ wo e kun‑da wan Yataa 'a sakana bai chɛndɛ ɔ yian‑da mɔɛ chɛ n na, miin ma Chu mɔ a.

¹⁹Ni an na‑a wo a, mansa n chen kɔɔ, wo ma wo faa gbaa wo fɔ bai ko a, ni a fɔ buɛ ko a. A mu min na, an tima chɛ a, wo e bai ma sɔn‑da wan, wo e min fɔ‑a.

²⁰Koe min na mu, wo e ma tena ka bai min fɔ‑a, a ee ma tena wo wandi an fɔ bai a. Chɛɛ a bai chɛ n mbe ka tena Yataa Nyina an tena. Fa Yataa ɛ a a na‑a wan, a ni bai chɛ n don wo da a, a fɔ koe a.

²¹“Mɔɛ n mbe an suun ma nyɔɛ n be‑a wan, an fa koe a. Fa n mbe an 'na denɛ n be‑a wan, denɛ n bɛɛ ni yɛ, an ni an woo mɔɛ n be.

²²Mɔɛ n gbɛɛ mbe too‑a wan wo a, a mu min na, n fɛ mɔɛ mu wo a. Chɛɛ i wɛn mbe i faa bia‑a aan a danka a, Yataa ɛ i baun‑da wan.

²³Ni an‑na ko yawaenɛ sa wo ma duu min dɔ, wo ben bui a, a ta duu dɔ mende ɔ. Ka n ni chɛ ma din wo tena. Wo ee Chu duu chɛ n na bɛn‑da, mbɛ tima che‑a n na koe a. N fan, Mɔ Gbu 'a Denɛ, n mbe na‑a tima min na.

²⁴“Kan chɛ mɔɛ benden mu a 'a kan denɛ ma. Bɔi denɛ wɛɛ, an na ma kan ni, an fea a ti a.

²⁵An mbe kan chɛ mɔɛ bia buɛ min dɔ, an mbe a 'a kan denɛ wɛɛ bia ka wan. Bɔi denɛ wɛɛ, an mbe a ti bia buɛ min dɔ, an mbe a wɛɛ bia ka wan. An‑na suun ya ɔ sɔɛ chee ka buɛ min dɔ, an dɔ, Bɛɛsɛbu[16], an mbe sika a to nyɔn chee koe a tɔ dɔ mende a suun chɛ ɔ?

²⁶“Chɛ an‑na a fɔ, wo ma chian an mɔɛ chɛ n ma. Koe min na mu, boo kundu ee to doma kɔɔ, ɛ bɔ wan ya a ma tee dɔndɔ a.

²⁷N‑na bai min tɛnsɛ ka wo tena mmɔ dechee a, wo an dɔ yian baa kun tɛ. N‑na wo too wɛwɛɛ bai miin na ka, wo an fɔ dunya ye, wo kuiɛ ma sɛenɛ a.

²⁸Wo ma chian mɔ gbu ma wo fa ko a. Ɛ wo fa‑a wan, chɛɛ a ee ko ɔ ko ma‑a wo nyina a, min mbe wo ɔ. Wo chian Yataa dɔndɔ gbe an ma. An mbe mɔ gbu fa, mbɛ a‑a a nyina wɛɛ, a‑a a a ta ta ɔ, ɛ minda kaina.

²⁹Baa ee soenɛ ma mɔ gbu ya a. Chɛɛ a dɔndɔ wɛɛ ee fa, mɔɔ ni Fa Yataa dɔn‑da a ma.

³⁰Wo sin benden mu kaka soenɛ n ma. Wo kundi nan fan bɛɛ wo kun ma, Fa Yataa‑a a danɛ sɔn fan. Chɛ an‑na a fɔ, wo ma chian mɔ gbu ma.”

³²Chisɔsi ɔ te to an nu ma, a ɔ, “Mɔ ɔ mɔ min mbe dɔn‑da fanka ɔ, mbɛ n fɛ mɔɛ mu a a, n bɛɛ n mbe dɔn‑da wan an mɔɛ chɛ wakoe ma Fa ya kɔɔ banda bu ɔ, gbɛmbo tee ma.

³³Chɛɛ ni mɔ ɔ mɔ‑a a fɔ fanka ɔ, mbɛ n fɛ mɔ ma a a, n bɛɛ n mbe a fɔ‑a wan Fa ye banda bu ɔ, gbɛmbo tee ma, mbɛ n bɛɛ n fɛ mɔ ma an mɔɛ chɛ a.”

³⁴Chisɔsi‑a a fɔ to an ye, a ɔ, “A ma ma wo yii ma, mbɛ n na‑a dunya chɛ ɔ, min mbe a ma, kuiɛ a kanɛ ni ma mɔɛ n tɛ ɔ. N ma na ni an na, chɛɛ n na‑a dɔfasanɛ an na an tɛ ɔ.

³⁵N na‑a denɛ kaima n bɛ an fa n na, n ni an na chɛɛ. Denɛ musuma n bɛ an de n na, n ni an na chɛɛ. Den 'na musu n bɛ an de mɔɛ n na, n ni an bɛɛ a chɛɛ.

³⁶Wo chɛɛ ma nyɔɛ gbau gbau n mbe ma‑a wo 'a chen na mɔɛ n fan na.

³⁷“Mɔ ɔ mɔ kan kɔ kan, i wɛn toen mu i ni bea n fɛ, i yii ka i fa a, i ni i yii ka i de a, mbɛ i bea‑a n fɛ. A yɛ to, mɔɔ ni i‑a i yii ka i 'a den kaienɛ a, ni i 'a den musuenɛ, mbɛ i bea‑a n fɛ.

³⁸Ni mɔɛ min mbe ee a ma bɛn‑da mɔnɛ ɔ bia koe a n ko a, ni fa koe a, a e na to bea‑a n fɛ, an mɔɛ chɛ ee che ma‑a n fɛ denɛ a.

³⁹Ni mɔ ɔ mɔ ban‑da bea koe a n fɛ, a wandi fɔɛ ma kanda koe a, an mɔɛ chɛ ee kuɔ fɔ fɔɛ ma sɔn‑da. Chɛɛ mɔɛ min mbe a yii bɔ‑a a fɔɛ ɔ n ko a, an mɔɛ chɛ ɛ kuɔ fɔ fɔɛ ma sɔn‑da wan.”

⁴⁰Chisɔsi‑a a fɔ gbɛ an ye, a ɔ, “Ni mɔ ɔ mɔ‑a a boo si wo kɔɔ, a ma a si ni wo dechee an kɔɔ, chɛɛ a‑a a si ka n fan kɔɔ. A sin to, mɔɛ min mbe a boo si‑a n kɔɔ, a ma a si ni ka n dechee an kɔɔ, chɛɛ a‑a a si ka Yataa an kɔɔ, min‑na n sɔ.

⁴¹Mɔ ɔ mɔ min mbe a boo si‑a Yataa 'a gbonka chɛ mɔɛ kɔɔ, koe min na mu, a dan‑da a a, mbɛ Yataa 'a gbonka chɛ mɔɛ mu a a, Yataa ɛ tɔnɔnɛ be‑a wan an mɔɛ chɛ ma, yɔ ɛ min nyɔn sima be a 'a gbonka chɛ mɔɛ nu ma. Ni mɔ ɔ mɔ‑a a boo si mɔɛ kɔɔ, min tanden mu Yataa tena, a mu koe min na, a tandenɛ ɛ Yataa a, Yataa ɛ tɔnɔnɛ be‑a wan an mɔɛ chɛ ma, yɔ ɛ min nyɔn sima be mɔɛ chɛ ma, min tanden mu a a.

⁴²N ni a ma din wo tena, mbɛ ni mɔ ɔ mɔ‑a yii chima kɔpu dɔndɔɛ wɛɛ be n fɛ denɛ den tachɛen bɛɛ ma, koe min na mu, ɛ n 'na fɛ dencha a, Yataa ɛ tɔnɔnɛ be‑a wan mɔɛ chɛ ma.”