Read Kono MATIU 15 Bible Online

MATIU 15 - Kono bible

MATIU 15

¹Chɛ gbakɔ, Chu mɔɛ chɛ nu, miin ni Fayisii n na, an bɛ Chu n 'na sawa kan mɔɛ dɔ n na, an ka‑a wan Chuusaɛn duu ɔ, mbɛ an na‑a Chisɔsi tena. Mbɛ an‑na a fɔ, an dɔ,

²“Mmɔ woo mɔɛ n‑na kanɛ min to mmɔ boo ɔ, a nyin fan mɔ ɔ mɔ ko a. Chɛɛ i fɛ denɛ n‑na an fandi bɔ kan chɛ kɔɔ. Koe min na mu, an mbe ee an boo a ko a chia ma, yɔ kan chɛ‑a a fɔ buɛ min dɔ, mɔɛ e na daunɛ chɛ. I‑a chɛ yen ka ma?”

³Mbɛ Chisɔsi ɔ, “Wo ta sin, wo e Yataa 'a sawa to wan, mbɛ wo bea‑a wo ta kanɛ fɛ. Wo‑a chɛ yen ka ma?

⁴Yataa 'a sawa yen ko, a ɔ, wo ni kooya be wo fa ma, a basan wo de a. A yɛ to, ni mɔ ɔ mɔ‑a bai yama sa a fa ma ni a de, wo ni an mɔɛ chɛ fa.

⁵Chɛɛ wo tana, wo e mɔɛ n kan fan, an ni a fɔ an fa n ye, a basan an de n na, an dɔ, an toen ni an ni fenɛ min be an ma, min ma gbɔsɔɛ ɛ an ma, an ban‑da a be‑a Yataa ma.

⁶Wo ɔ te, mbɛ a ma din ni mɔɛ chɛ ma, ko chɛ koe a a fa ye, a basan a de a. Chɛ ɛ a ɔ yian fan, mbɛ wo‑a wo ta kanɛ a sɛ Yataa ta sawa kun ma.

⁷Wo wan, nɛnɛn fea ti nu. Yataa 'a gbonka chɛ mɔɛ Aisaya teayaen fan ni suun, a na‑a bai sa kɛn a si wo ma, a ɔ,

⁸‘Yataa ɔ te, a ɔ, wo e basɔmaya be dechee a ma wo da ɔ wan, chɛɛ a wakoe ee wo faa ɔ.

⁹Wo e samun gbama an chɛ a tena, koe min na mu, wo e mɔɛ n kan gbɛ wo ta kanɛ an na, wo e ta‑a a ma‑a yɔ a 'a sawa‑a a fɔ ka wan.’ ”

¹⁰Mbɛ Chisɔsi‑a mɔ fanka chɛ chee a tena, mbɛ a‑a a fɔ an ye, a ɔ, “Wo gbɛɛ wo wo too ma sɔ n da a bai ma, a yɛ to, wo ni a ɔ gbɛ.

¹¹Mɔ gbu e min don i da a, an mbe ee a ma, i ma ni nyamui Yataa ya kɔɔ, fɔ e min‑na bɔ i da ɔ.”

¹²Mbɛ a fɛ denɛ n gbɛn‑da a ma, mbɛ an dɔ, “I‑a ɔ sɔn fan, mbɛ i‑a bai min fɔ ka, a don‑da wan Fayisii mɔɛ chɛ n ma kaka?”

¹³Mbɛ a ɔ, “Fa min mbe banda bu ɔ, ɛ nyan fen kan kɔ kan kuu bɔ‑a wan, a ma min chin ni.

¹⁴Wo faa ma gbaa Fayisii mɔɛ chɛ n ko a. An maen fan mu yɔ ya te tɔɛ nu, miin toen mu an ni chia yian an bɔ ya te tɔɛ n na. Ni ya te tɔɛ‑a chia yian ya te tɔɛ a, an fea gbɛɛ ɛ bea wan sonɛ ɔ chia kuu a.”

¹⁵Mbɛ Pita ɔ, “Bai chɛ fasai wɛ nn ye, i‑a min fɔ ka, a si mɔɛ ma nyamui koe ma.”

¹⁶Mbɛ Chisɔsi ɔ, “Wo e ka n fɛ wan, chɛɛ chɛ gbɛɛ ɔ, wo 'a yiima tɛ ɔ dɔɔ.

¹⁷Fen kɔ fen mɔ gbu ɛ min daun, ɛ yii mɔ bu ɔ wan, mbɛ a ta‑a kumbai a kanɛ ɔ. Wo ma chɛ ɔ sɔn?

¹⁸Chɛɛ bai min mbe bɔ mɔ gbu da ɔ, ɛ ka mɔ yiima ɔ wan. A sin fan mbe mɔ ma nyamui Yataa ya kɔɔ.

¹⁹A mu min na, ko yama gbɛɛ ɛ bɔ mɔ gbu yiima an dɔ. A ni ma mɔ fa koe an na, kanka chɛ ko mu, fania fɔ mu, ni tɔ ɔ tɛ yama chɛ. A yɛ to, a ni ma waa ma basan koe a mɔɛ a, wo ee fuu ɔ min na, ni ko tɛ koe wɛɛ.

²⁰Koe chɛ n gbɛɛ fan mbe a ma, mɔ gbu ma ni nyamui Yataa ya kɔɔ. Chɛɛ daun chɛ koe a, ni mɔ ma i boo a ko ni a chia ma, a ee a ma mɔ ma ni nyamui Yataa ya kɔɔ.”

²¹Chɛ gbakɔ, Chisɔsi bɔ‑a wan nɔ, an bɛ a fɛ denɛ n na, mbɛ an ta‑a Taya tanda ɔ, ni Sidon.

²²Mbɛ a tima chɛ a, musu dɔndɔ ni wan an tanda chɛ ɔ, min ni Kenaan mɔɛ a. A na‑a wan Chisɔsi tena. A bun‑da yee tɛ‑a, a ɔ, “I wɛn bɔ‑a Mansa Defidi 'a dambi ɔ, chinchin n ma. Mansa, n 'na den musuma gbandien mu a yama boo a, nyina yama ɛ a tɔɔ tena.”

²³Chɛɛ Chisɔsi nii ma koɔ ni musu chɛ tena ɛnden bɛɛ a. Mbɛ a fɛ denɛ n gbɛn‑da a ma, mbɛ an dɔ, “A fɔ musu chɛ ye, a ni ka mmɔ fɛ a 'a yee wa tɛ chɛ a.”

²⁴Mbɛ Chisɔsi‑a a fɔ musu chɛ ye, a ɔ, “Yataa‑a n sɔ Chu mɔɛ n fan ko a dechee, an fan mbe yɔ sa nu miin toenɛ a ɔ. Chɛɛ a ma n sɔ ni mɔ dɔ gbɛɛ n tena.”

²⁵Chɛɛ musu chɛ na‑a wan, mbɛ a bea‑a a chen na disa‑a, a ɔ, “Mansa, basan n ma.”

²⁶Mbɛ a ɔ, “A ma nyin mɔ ni den mɛsɛ n 'na daun fenɛ bɔ an da a, i ni a be wuu n ma.”

²⁷Mbɛ musu chɛ ɔ, “Mansa, i‑a tea fɔ. Chɛɛ wuu miin bɛɛ ɛ ma si ɔ den mɛsɛ n baima, ni an da a pɛɛ bea‑a duu ma, an mbe a daun fan.”

²⁸Mbɛ Chisɔsi ɔ te gbɛ, “E. Bɔɔɛ, i 'a danaya n ko a, a da a koo. I toen mu koe min na, n mbe a chɛ‑a wan i ye.” A tima chɛ a, Yataa‑a a 'a den chɛ baun fan.

²⁹Mbɛ Chisɔsi ni ma, an bɛ a fɛ denɛ n na, an bɔ‑a wan nɔ, mbɛ an ta‑a Kadidi yii wa chɛ a sanɛ. An sɛ‑a wan nɔ kɔnkɔ dɔndɔ ɔ, mbɛ a si‑a nɔ.

³⁰Mɔ sɛsɛ a sɔn‑da wan a ma. Mɔɛ chɛ n na‑a wan gbandi mɔ sɛsɛ a. Dɔ n namaaenɛ ɛ, dɔ nu, an fiondenɛ ɛ, dɔ n mumundenɛ ɛ, dɔ n boo faenɛ ɛ an ma, a basan an chenɛ a. An na‑a an gbɛɛ a Chisɔsi chen kɔɔ, a sin, a‑a an gbɛɛ baun fan.

³¹Mɔɛ chɛ n gbɛɛ tɛnɛ‑a wan a a, kɛn Chisɔsi‑a chɛ ma. An‑na a ɔ yen mumunɛ n koɔ‑a, namaa n tachɛ‑a, mbɛ ya te tɔɛ n‑na kaina yen. An‑na a ɔ yen fan to, miin bɛɛ boo n faen ni an ma, an baun‑da, a basan chɛ n na, miin chenɛ n faen ni an ma. Chɛ ko a, an‑na tando be wan Yataa ma, Chu mɔɛ n ni Yataa min fai.

³²Mbɛ Chisɔsi‑a a fɛ denɛ n chee wan kaina dɔndɔ, a ɔ, “Mɔɛ chɛ n ma chinchinden mu n ye. Tee sawa an nɛ ka gbɛ, an mbe nɛ mmɔ fɛ, daun fen mbe ee nɔ. Ni n‑na a ma sunɛ an ni ta an kɔnkɔ tɔɛ a, an mbe ka‑a wan an chenɛ kɔɔ chia a, an ni bɔn a ma.”

³³Mbɛ an dɔ, “Mɔ ee che daun fenɛ sɔn‑da nɛ kan kɔ kan, fuin chɛ ma, mɔ ɛ mɔ fanka chɛ da kɔ min na.”

³⁴Mbɛ a ɔ, “Biidi yuu ɛ nɛ wo boo ɔ?” An dɔ, “Biidi gbugbu wɔnfea an mbe nn boo ɔ, ni nyɛ mɛsɛ ɛnden.”

³⁵Mbɛ a‑a a fɔ mɔɛ chɛ n gbɛɛ tɛtɛ ye, a ɔ an ni si duu ma, mbɛ an gbɛɛ si‑a.

³⁶An si‑a kɛn, a‑a biidi wɔnfea chɛ ya, a basan nyɛ mɛsɛ ɛnden chɛ a, mbɛ a‑a Yataa wai bɔ daun fen chɛ ko a. Mbɛ a‑a a ɔ kai kai, biidi chɛ basan nyɛ a, mbɛ a‑a a be a fɛ denɛ n ma, mbɛ an bɛɛ‑a a du du mɔɛ chɛ n gbɛɛ tɛtɛ ma.

³⁷An gbɛɛ‑a an bu fa daunɛ chɛ wan. Mbɛ a fɛ denɛ n‑na mɔɛ chɛ n da tɔɛ a sɔn sɔn, a bɛn‑da wan samba sɛmbɛnden wɔnfea da a faenɛ ma gban.

³⁸Mɔ kaima miin na‑a an daun fen chɛ daun, an danɛ taen fan ni mɔ wu naanin dɔ. Musu n bɛ den mɛsɛ n na, an na‑a daunɛ chɛ wan, chɛɛ an nii ma an dan ni.

³⁹Mbɛ Chisɔsi‑a a saa mɔɛ chɛ n na, an yɛ‑a an baa nu. A wan ni ma, ni a fɛ denɛ nu, an sɛ‑a wan dɛndɛ ɔ, mbɛ an ta‑a Makadan tanda ɔ.