Read Kono MATIU 16 Bible Online

MATIU 16 - Kono bible

MATIU 16

¹Tima ɛnden gbakɔ, Chu mɔɛ nu, miin ni Fayisii n na, an bɛ chɛ n na, miin ni Sadusii n na, an na‑a wan Chisɔsi tena. An toen ni an ni a bia a chen kɔ. Chɛ‑a a ma wan, an‑na a ɔ tisa, an dɔ, a ni kamaya koe ma an ye, min mbe a ɔ yian, mbɛ a 'a gbasaya kaen ni Yataa an tena.

²Chɛɛ a ɔ, “Ni banda yawa‑a tee bea ma, a a fiandenɛ ɛ, wo‑a a fɔ wan, wo ɔ, ‘Sinan banda ɛ nyan‑da wan, a mu min na, banda yawa‑a.’

³Tee dɔ n na, ni banda ɔ ka‑a, wo e banda yen fan a yawaenɛ ɛ, a maenɛ ɛ to digbi digbi. Ni chɛ ma‑a, wo‑a a fɔ wan, wo ɔ, ‘Sona ɛ na‑a wan bi. A mu min na, banda yawa‑a, a sin sona gbiienɛ ɛ to.’ Wo e banda ma fɛn fan, mbɛ wo‑a a ɔ sɔn, ni ɛ nyan tena wan, chɛ ma, ni a ee nyan tena. Wo e chɛ n dɔ gbɛ wan, chɛɛ wo ee sanche koe n dɔ gbɛ, miin mbe ma tena.

⁴Wo mɔ bonda chɛ sima nu, wo yau yama yama, wo sin mbe ee dan ko a. Chɛ an fɛ mu, wo e n dɔ tisa tena kamaya koe ma koe a. Chɛɛ wo ee tɔmɔsi dɔndɔ wɛɛ ma sɔn‑da, mɔɔ dechee Yataa‑a tɔmɔsi min na ben a 'a gbonka chɛ mɔɛ Chona a, a 'a mɔɛ n tena.” Mbɛ Chisɔsi‑a an to, mbɛ a ta‑a.

⁵Chisɔsi n bɛ a fɛ denɛ n na, an sɛ‑a wan dɛndɛ ɔ, mbɛ an‑na yii wa chɛ tɛ a kaka dɔndɔɛ ma. Chɛɛ a fɛ denɛ n na‑a nyina wan ta koe a daun fenɛ a an boo ɔ.

⁶Mbɛ Chisɔsi ɔ an nu ma, “Yisinɛ min mbe mmɔ 'a mɔɛ chɛ n boo ɔ, miin mu Fayisii n na, an bɛ Sadusii n na, wo wo kun ma fɛn a boo ɔ.”

⁷Mbɛ an bun‑da a tɛnsɛ‑a an nyɔn tɛ ɔ, an dɔ, “A‑a chɛ fɔ, a mu min na, mmɔ nyina‑a mmɔ ma na ni biidi a mmɔ boo ɔ.”

⁸Chɛɛ Chisɔsi na‑a a ɔ sɔn fan, an ni koe min tɛnsɛ tena an nyɔn tɛ ɔ. Mbɛ a‑a a fɔ an ye, a ɔ, “Wo 'a danaya ɔ dɔɔ n ko a. Ni chɛ ma, wo yiima nii ta biidi ko ɔ.

⁹Wo ma n dɔ gbɛ nin bɛ. Wo wandi gbu, wo‑a a ɔ sɔn fan, n‑na mɔ kaima wu duu da kɔ buɛ min dɔ biidi gbugbu duu a. Chɛ to‑a wan wo yii ma. Mɔ a yen, wo nyina‑a, n‑na mɔ kaima wu naanin chɛ n bɛɛ da kɔ buɛ min dɔ biidi gbugbu wɔnfea a. Gba si tena fea chɛ gbɛɛ ɔ, a tɔɛ an mbe to. A tɔɛ chɛ min sin to‑a, a‑a samba sɛsɛ a fa wan gban.

¹¹N‑na a fɔɛ min chɛ wo ye, n dɔ, yisinɛ min mbe Fayisii chɛ n boo ɔ, an bɛ Sadusii chɛ n na, n dɔ, wo ni wo kun ma fɛn a a, n mbe ee bai sa tena a si biidi an ma. Wo ni che wan chɛ ɔ gbɛ‑a. Ka n mbe yɛ to n da a kuiɛ ɔ, an 'na yisin chɛ an boo ɔ, wo wo kun ma fɛn a a.”

¹²Mbɛ an‑na a ɔ gbɛ wan gbɛ, mbɛ a ni an na si tena a si kanɛ an ma, Fayisii chɛ n ni min chɛ mɔɛ n na, an bɛ Sadusii n na. Chɛɛ a nii koɔ tena a si yisinɛ an ma, an mbe min chɛ biidi ɔ.

¹³Chisɔsi ta‑a Sisayea Fiipai tanda ɔ, an bɛ a fɛ denɛ n na. Mbɛ a‑a a fɔ an ye, a ɔ, “Mɔɛ n ta yiima ɔ, n fan, Mɔ Gbu 'a Denɛ, n mu nyɔn na?”

¹⁴Mbɛ an dɔ, “Mɔɛ dɔ n mbe a fɔ tena wan, mbɛ i mu Chɔn fan na, min ni yii chɛ mɔɛ n kunɛ ɔ, Yataa chia a. Dɔ n sin mbe a fɔ wan, mbɛ i mu Yataa 'a gbonka chɛ mɔ dɔndɔ an na suun, min tɔ mu Idaicha. Mbɛ dɔ n sin dɔ, Yataa 'a gbonka chɛ mɔɛ chɛ wɛɛ suun, min tɔ ni Chɛyimaya, a mu i a. Dɔ n mbe ta‑a a fɔ‑a, an dɔ, Yataa 'a gbonka chɛ mɔɛ dɔ gbɛɛ mu i a.”

¹⁵Mbɛ a‑a a fɔ to, a ɔ, “Chɛɛ wo wandi gbu, wo ta yiima ɔ, n mu nyɔn na?”

¹⁶Mbɛ Saimɔn Pita ɔ, “I mu Chasi an na, nn kun ka mansa. Yataa min mbe ee fa kuɔ fɔ ko a, a 'a denɛ mu i wan na.”

¹⁷Mbɛ Chisɔsi ɔ, “I duaen ba mu, Saimɔn, Chɔn 'na denɛ. A mu min na, mɔ gbu an ma koe chɛ ɔ yian ni i a. Fa min mbe banda bu ɔ, an‑na a ɔ yian i a.

¹⁸I tɔɛ ma sien mu Pita, min fasaien mu, faa gbanɛ a. Mɔɛ miin mbe an kai fa‑a n na, an mbe ma‑a wan yɔ chenɛ. N ni a ma din i tena, mbɛ n sin mbe chen chɛ sɔ‑a faa gban chɛ an ma. Gbasaya kan kɔ kan mbe ee ma‑a saya boo ɔ chen chɛ kun ma.

¹⁹N mbe gbasaya be‑a wan i ma mɔɛ chɛ n kun ma, miin mbe Yataa 'a mansaya kɔɔ. Ni i ma dɔn ni ko ɔ ko ma dunya chɛ ɔ, Yataa wɛɛ ee dɔn‑da a koe chɛ ma. Chɛɛ ni i dɔn‑da ko ɔ ko ma dunya chɛ ɔ, Yataa wɛɛ ɛ dɔn‑da wan an koe chɛ ma.”

²⁰Mbɛ Chisɔsi‑a a fɛ denɛ n na si gbau gbau, a ɔ, an ma a ɔ yian mɔ ɔ mɔ a, mbɛ an mu Chasi a, mɔɛ n kun ka mansa.

²¹A ka gbɛ an tima chɛ ma, Chisɔsi‑a a kuu sɔ wan a ɔ yian‑da a fɛ denɛ n na, mbɛ Yataa ta tima ɛ na tena wan che‑a a ta koe a Chuusaɛn duu ɔ. A ɔ, a sin nɔ mu mɔɛ n mbe an kun puin‑da a ma. A ɔ, nɔ chɛnyɛ gbakoo n ni ma, ni nɔ Chu n tɛ mɔɛ nu Yataa a, an 'na mansa nu, an bɛ Chu n 'na sawa kan mɔɛ n na, an mbe a bia‑a wan. A ɔ, mbɛ an‑na a a tɔɔya, mbɛ an yɛ‑a, an‑na a be a fa mɔɛ n ma. A ɔ, chɛɛ ni an‑na a fa, an ni a tɔn, a ɔ, tee fea a sawan bɔɛ ma, Yataa ɛ a kɔɔ sɔ‑a wan a ka saya ɔ.

²²Mbɛ Pita‑a Chisɔsi pɛn, a ɔ, an ni sɔ an fea a. An sɔ‑a kɛn, mbɛ Pita‑a a fɔ a ye, a ɔ, “I ma dua chɛ a, i fa koe a. Yataa wɛɛ ee dɔn‑da i ni fa.”

²³Chɛɛ Chisɔsi‑a a ya a mun, a ɔ Pita ma, “Ka n fɛ, e ka Sitana 'a wai an chɛ tena. E ee ka basan tena wan n ma. Koe min na mu, mɔ gbu yiinachii an mbe ka i ɔ. Yataa ta yiinachii ma chɛ a.”

²⁴Mbɛ a ɔ an gbɛɛ ma, “Ni mɔ ɔ mɔ toen mu a ni bea n fɛ, an mɔɛ chɛ ni nyina a faa ma koe n ma. Mbɛ a‑a a ma bɛn mɔnɛ ɔ bia koe a n ko a, a basan fa koe a.

²⁵Koe min na mu, ni mɔ ɔ mɔ ban‑da bea koe a n fɛ, a wandi fɔɛ ma kanda koe a, an mɔɛ chɛ ee kuɔ fɔ fɔɛ ma sɔn‑da. Chɛɛ mɔɛ min mbe a yii bɔ‑a a fɔɛ ɔ n ko a, an mɔɛ chɛ ɛ kuɔ fɔ fɔɛ ma sɔn‑da wan.

²⁶Dunya chɛ ma nyanɛ gbɛɛ, min mbe a ma, mɔ ni a sɔn bɛɛ, mɔ ni fo kuɔ fɔ fɔɛ a, tɔnɔn ma a a. Fen kɔ fen mbe ee nɔ, mɔ gbu ɛ che min be‑a, kuɔ fɔ fɔɛ ko a.

²⁷Chɛ an fɛ mu, wo ma ka n fɛ. Koe min na mu, n fan, Mɔ Gbu 'a Denɛ, n mbe na‑a wan to dunya chɛ ɔ, nn bɛ n 'na maeka n na. Ni nn sin ma‑a na‑a, nn mbe ma‑a wan man‑da Fa Yataa 'a manɛ a. An tima chɛ a, n mbe mɔ ɔ mɔ pawa‑a wan a 'a wai ko a, ɛ min chɛ‑a.

²⁸N ni a ma din wo tena, mbɛ mɔɛ dɔ nu nɛ sɔ ɔ sanche, an mbe ma‑a wan fɔɛ ɔ aan an ni chɛ ɔ yen. An mbe a ɔ yen‑da wan n fan, Mɔ Gbu 'a Denɛ, n mbe na‑a tima min na n 'na mansaya ɔ.”