Read Kono MATIU 18 Bible Online

MATIU 18 - Kono bible

MATIU 18

¹A tima chɛ a, Chisɔsi fɛ denɛ n na‑a wan a tena, an dɔ, “Nyɔn mbe ma‑a mɔ chenama a, mɔɛ chɛ n tɛ ɔ, miin mbe Yataa 'a mansaya kɔɔ?”

²Mbɛ Chisɔsi‑a den mɛsɛ ɛndenɛ chee, mbɛ a na‑a a tena. Den den chɛ na‑a kɛn Chisɔsi tena, a‑a a ma wan, a sɔ‑a an gbɛɛ ya kɔɔ.

³Mbɛ Chisɔsi ɔ, “N ni a ma din wo tena, ni wo ma wo sɔnɛ mun ni, wo ni ma yɔ den mɛsɛ nu, wo ee don‑da Yataa 'a mansaya kɔɔ.

⁴Mɔɛ min mbe ma‑a mɔ chenama a, mɔɛ chɛ n tɛ ɔ Yataa 'a mansaya kɔɔ, ɛ ma‑a mɔɛ an na, min mbe a wandi a yii‑a yɔ den mɛsɛ chɛ.

⁵A sin, ni mɔ ɔ mɔ‑a a boo si den den chɛ nyɔn sima kɔɔ n tɔɛ ɔ, a‑a a boo si ka n fan kɔɔ.”

⁶Chisɔsi ɔ, “Chɛɛ n fɛ denɛ den tachɛen bɛɛ, miin kai faen mu n na, mɔ ɔ mɔ kan kɔ kan, i wɛn mbe an na dɛ‑a ko yama ɔ, i‑a ko yama ma. Ɛ nyan‑da wan i mɔɛ chɛ ko a, an ni sen kanɛ chii i kan na, mbɛ an‑na i a dɛ yii wa ɔ.

⁷A yau gba mɔɛ n ko a dunya ɔ, a mu min na, koe n mbe wan nɔ, miin mbe an na dɛ‑a ko yama ma ɔ. Ko yama gbu n mbe ma wan, chɛɛ a yau gba mɔɛ chɛ ko a, min mbe a bɔ mɔ gbu a dɛ‑a ko yama ma ɔ.

⁸“A sin, ni i boo‑a i a dɛ ko yama ɔ, a tɛ a a, i ni a a dɛ. Ni i chenɛ wɛɛ‑a i a dɛ ko yama ɔ, a wɛɛ tɛ a a, i ni a a dɛ. Koe min na mu, tamban tɔɛ wɛɛ ɛ kuɔ fɔ fɔɛ ma sɔn‑da wan, ni a ma dɛ ni ko yama ɔ. Chɛɛ a ma nyin, i boo fea a kandenɛ ni ma, a basan i chen fea a, mbɛ i ta‑a ta ɔ, min mbe ee dufɛn kuɔ fɔ ko a.

⁹Ni i ya nan fan bɛɛ‑a i a dɛ ko yama ɔ, a bɔ, i ni a a dɛ. A nyin i ni kuɔ fɔ fɔɛ ma sɔn, ya dɔndɔɛ wɛɛ a. Chɛɛ a yau, i ya a kan denɛ ni ma, mbɛ i ta‑a ta ɔ.”

¹⁰Chisɔsi ɔ te to, “Wo wo kun ma fɛn. Wo ma wo ya a yii n fɛ denɛ den tachɛen bɛɛ ma. N ni a ma din wo tena, mbɛ maeka n mbe wan an boo ɔ banda bu ɔ, tɛɛ ee miin tɛ an bɛ Fa Yataa a.[25]

¹²“Ka wɛ n ni wo ɔ tisa. Ni sa chɛmɛ dɔndɔ ma‑a wo dɔndɔ wɛɛ boo ɔ, mbɛ dɔndɔɛ to‑a a ɔ, a ee to ka. Chɛɛ ɛ sa bi kɔnɔntɔ kun ma kɔnɔntɔɛ chɛ n to wan daun chɛ‑a kɔnkɔɛ kaa fɛ, mbɛ a ta‑a a ya a kan‑da dɔndɔɛ chɛ a min to‑a ka a ɔ. A ee ma ka wan?

¹³N ni a ma din wo tena, mbɛ ni a‑a sa dɔndɔɛ chɛ yen, a bu ɔ dia‑a wan kaka a ko a, a ben sa bi kɔnɔntɔ kun ma kɔnɔntɔɛ chɛ n ma, miin ma to ni ka a ɔ.

¹⁴A chia dɔndɔ gbe chɛ a mu, Fa Yataa wɛɛ, min mbe banda bu ɔ, a ma to ni n fɛ denɛ den tachɛen bɛɛ ni fo kuɔ fɔ fɔɛ a.”

¹⁵Mbɛ Chisɔsi ɔ, “Wo wɛn mbe ka n fɛ, ni i bɔɛ‑a ko yama ma i a, ta a tena wo fea gbe a, mbɛ i‑a a ɔ yian a a, a‑a koe min ma i a. Ni a dɔn‑da a 'a ko yama ma gba chɛ ma, mbɛ wo fea ma‑a to a a kuiɛ dɔndɔɛ ɔ.

¹⁶Chɛɛ ni a ma dɔn ni a 'a ko yama ma gba chɛ ma, ta to a tena wo bɛ mɔ fea, sawa a. A mu min na, a nyɛnden fan mu Yataa 'a gboo ɔ, a ɔ, ‘Ni an‑na kunɛ si mɔ ɔ mɔ kun ma, siiya fea, sawa an mbe bɔ a ma, an mbe e na to kaa a tɛ‑a, a si an bai chɛ ma.’

¹⁷Ni chɛ wɛɛ ma‑a, chɛɛ a ma dɔn ni a 'a ko yama ma gba chɛ ma to, a ma siibia gbɛ chɔchi gbu ɔ. Ni a ma a too ma sɔ ni gbɛ chɔchi mɔɛ n bɛɛ ma, ka a fɛ, a bia yɔ mɔɛ min ma Yataa sɔn.

¹⁸“Mbɛ n ni a ma din wo tena, mbɛ ni wo ma dɔn ni ko ɔ ko ma dunya chɛ ɔ, Yataa wɛɛ ee dɔn‑da a koe chɛ ma. Chɛɛ ni wo dɔn‑da ko ɔ ko ma dunya chɛ ɔ, Yataa wɛɛ ɛ dɔn‑da wan an koe chɛ ma.

¹⁹“N ni a ma din to wo tena. Ni wo mɔ fea gbe wɛɛ dɔn‑da nɛ dunya chɛ ɔ ko dɔndɔɛ ma koe a, mbɛ wo‑a Fa Yataa ɔ tisa an koe chɛ ko a, ɛ a ma‑a wan wo ye.

²⁰Koe min na mu, ni mɔ fea, sawa bɛn‑da kaina min n 'na fɛ dencha ɔ, n bɛɛ n mbe ma‑a wan nɔ an tɛ ɔ.”

²¹Mbɛ Pita gbɛn‑da Chisɔsi ma, a ɔ, “Mansa, nn fɛn mbe ka i fɛ, ni dɔndɔ‑a ko yama ma n na gba sɛsɛ ko a, gba yuu ko a mu, n mbe n boo bɔ‑a a ɔ? N ni n boo bɔ a ɔ, gba wɔnfea an ko a?”

²²Mbɛ Chisɔsi‑a a ma din a tena, a ɔ, “A an, i ma a to nɔ gba wɔnfea dechee. Chɛɛ a to nɔ tima kan kɔ kan na, ni a‑a ko yama ma i a.

²³A mu min na, Yataa 'a mansaya maen fan mu yɔ min ma‑a tai chɛ ɔ. Mansa dɔndɔ toen ni a ni a ɔ sɔn, ni a 'a kuiɛ min nyɔn sima ni a 'a wai chɛ mɔ kan kɔ kan ma.

²⁴An to‑a kɔndi chɛ an bɔ tena, mbɛ an na‑a a 'a wai chɛ mɔ dɔndɔ a a tena. Kuiɛ ni wan an wai chɛ mɔɛ chɛ ma min ni kɔpɔ ma chianden ba a.

²⁵Chɛɛ fen na tenden nii kamin chɛ boo ɔ. Chɛ‑a a ma wan, mbɛ mansa chɛ‑a a fɔ, a ɔ, an ni a ma tachɛ yɔncha ɔ. A wan ni ma, a 'a musu, a 'a denɛ nu, a basan fen kɔ fen na min ni a boo ɔ, an ni an gbɛɛ ma tachɛ, mansa chɛ 'a kuiɛ bɔɛ a.

²⁶Mbɛ kamin chɛ bea‑a mansa chɛ chen na, mbɛ a‑a a disa, a ɔ, ‘Fa, i dimu, i faa bia n na. N mbe i 'a kuiɛ chɛ gbɛɛ bɔ‑a wan.’

²⁷Mansa chɛ chinchin‑da wan a ma, mbɛ a‑a a boo bɔ kuiɛ chɛ gbɛɛ ɔ, a ɔ, a ni ta.

²⁸“Chɛɛ kamin chɛ ta‑a kɛn dechee, mbɛ a‑a a bɔ wai chɛ mɔ dɔndɔ tan. A 'a kuiɛ ni wan a ma kɔpɔɛ a min sɛmbɛnden ni ɛnden na. Mbɛ a‑a a bɔɛ chɛ bia a kanɛ a fɔin, a ɔ, ‘N 'na kuiɛ min gbɛɛ ɛ i ma, a bɔ bi.’

²⁹Mbɛ a bɔɛ wai chɛ mɔɛ chɛ bea‑a a chen na, mbɛ a‑a a disa, a ɔ, ‘I faa bia n na, n mbe i 'a kuiɛ gbɛɛ bɔ‑a wan.’

³⁰Chɛɛ a ma dɔn ni. A‑a min ma, a‑a a bɔɛ chɛ a dɛ pimbi chenɛ a, aan a ni a 'a kuiɛ bɔ tima min na.

³¹A bɔ wai chɛ mɔɛ chɛ n‑na chɛ ɔ yen kɛn, an faa yɔn‑da wan kaka. Mbɛ an ta‑a wan mansa chɛ tena, mbɛ an‑na ko ɔ ko ɔ yian a a.

³²Mbɛ mansa chɛ‑a an kamin chɛ gbu chee. A na‑a kɛn, mbɛ mansa chɛ ɔ, ‘I wan mɔ yama wa chɛ, n‑na n boo ka n 'na kuiɛ a, min ni i ma, a mu min na, i‑a n disa.

³³I wɛɛ ni kun fan i ni chinchin i bɔɛ chɛ ma, yɔ n chinchin‑da buɛ min dɔ i ma.’

³⁴Mansa chɛ faa tɛ‑a wan a ɔ benden ba a. Mbɛ a‑a an kamin chɛ a dɛ pimbi chenɛ a. A ɔ, an ni a a mɔnɛ aan a ni kuiɛ chɛ gbɛɛ bɔ a nyɔ na.”

³⁵Mbɛ Chisɔsi ɔ te gbɛ, “Ni wo ma chinchin ni wo bɔɛ n ma, wo ni wo boo bɔ an 'na ko yama n dɔ, Fa Yataa wɛɛ, ɛ a ma‑a ka wan wo wɛɛ a, yɔ mansa chɛ‑a a ma buɛ min dɔ kamin chɛ a.”