Read Kono MATIU 19 Bible Online

MATIU 19 - Kono bible

MATIU 19

¹Chisɔsi ban‑da kɛn koɔ‑a mɔɛ chɛ n tena, a bɔ‑a Kadidi chɛnyɛ ɔ, mbɛ a yɛ‑a Chudia chɛnyɛ ɔ. A na‑a Chɔdan yii an tɛ, mbɛ a ta‑a Chudia.

²Mɔ sɛsɛ bea‑a wan a fɛ nɔ, a sin‑na mɔɛ chɛ n gbɛɛ baun fan, miin gbandien ni an tɛ ɔ.

³Chu mɔɛ chɛ dɔ nu, miin ni Fayisii n na, an na‑a wan a tena. An toen ni an ni a bia a chen kɔ. Mbɛ an dɔ, “Nn toen mu nn ni a ɔ sɔn, ni mmɔ 'a sawa dɔnden fan mu musu si kai ni a boo ka a 'a musu a, yɔ a toen mu a a buɛ min dɔ.”

⁴Mbɛ Chisɔsi ɔ, “Ɛ wan n yii ma, mbɛ wo‑a a kan fan Yataa 'a gboo ɔ, mbɛ dunya a dan tima a, Yataa‑a mɔ gbu nyan fea an na, kai an fea musu a.

⁵Chɛ an fɛ mu, Yataa‑a a fɔ, a ɔ, ‘Ni mɔ kaima‑a musu fuu, ɛ a de to wan, a basan a fa a, mbɛ an chɛ‑a an nyɔn dɔ, an fea a 'a musu a. A sin, an fea chɛ, an mbe ma‑a wan mɔ dɔndɔɛ a.’

⁶Chɛ‑a a ɔ yian fan, mbɛ mɔ fea ma to an na, chɛɛ mɔ dɔndɔ gbe mu gbɛ an na. Chɛ an fɛ mu, fuu ɔ, ni Yataa‑a mɔ fea chɛ an nyɔn dɔ, mɔ ɔ mɔ kan kɔ kan ma an tɛ du.”

⁷Mbɛ Fayisii chɛ n dɔ te to, “Chɛɛ Mosisi‑a sawa min sa, a dɔnden fan mu, nn ni nn 'na musu n boo ka. Koe min na mu, sawa chɛ ɔ te, mɔɛ e i 'a musu boo ka wan, ni i‑a siiya gboo be a ma, min mbe a ɔ yian, mbɛ i wan‑na i boo ka a a. Fen ko a mu, chɛ ɛ ma?”

⁸Chisɔsi ɔ, “Wo 'a tooɔgbɛa, an‑na a ma, Mosisi dɔn‑da wo ni wo boo ka wo 'a musu n na. Chɛɛ a nii ka wan Yataa yii ma, tima min na a‑a dunya a dan.

⁹A sin, n ni a ma din wo tena, mbɛ ni mɔ ɔ mɔ‑a a boo ka a 'a musu a, ko dɔ mende ko a, min ma waa ma basan koe a kai dɔ mende a, mbɛ a‑a musu dɔ gbɛɛ si, a‑a waa ma basan musu a, a ee fuu ɔ min na, Yataa ya a.”

¹⁰Mbɛ a fɛ denɛ n‑na a fɔ a ye, an dɔ, “O, ni musu si ɛ ka wan, mbɛ a nyin mɔ ma musu si.”

¹¹Mbɛ Chisɔsi ɔ, “Mɔɛ gbɛɛ an mbe ee bai chɛ ɔ bia, mɔɔ dechee Yataa basan‑da miin ma.

¹²A mu min na, ko sɛsɛ ɛ wan nɔ, min mbe a ma, mɔ kaima dɔ n mbe ee che musu si‑a. Mɔ kaima dɔ n mbe wan nɔ, an‑na an suun an kai chiayaenɛ an na. Mɔɛ dɔ n sin 'na kai chiaya kaen mu an fian mɔ gbu n fan na. Mɔɛ dɔ n sin ma dɔn ni an ni musu si, a mu min na, an toen mu an ni an fɔɛ gbɛɛ be Yataa 'a mansaya ta koe a ya ɔ ma. Mɔɛ miin mbe kun an ni bai chɛ ɔ bia, an ni a ɔ bia.”

¹³Mbɛ mɔɛ dɔ n na‑a wan an 'na den mɛsɛ n na Chisɔsi tena. An toen ni a ni a boo bun an kun ma, a ni samunɛ chɛ an ko a. Chɛɛ a fɛ denɛ chɛ n‑na chɛ ɔ yen kɛn, an‑na mɔɛ chɛ n na gban fan.

¹⁴Chɛɛ Chisɔsi ɔ, “Wo ma an ma bai. Wo a ma den mɛsɛ n ni na n tena. Koe min na mu, mɔɛ miin maen mu yɔ den mɛsɛ chɛ nu, Yataa an mbe ma‑a an 'na mansa a.”

¹⁵Mbɛ Chisɔsi‑a a boo bun den mɛsɛ chɛ n ma, dɔndɔ dɔndɔɛ a, ɛ ta‑a an dua‑a. Mbɛ a ka‑a an kaina chɛ, a ta‑a.

¹⁶Tima dɔndɔ a, kamin dɔndɔ na‑a wan Chisɔsi tena, mbɛ a ɔ, “Ticha, n mbe ko chɛndɛ minan nyɔn sima ma, min mbe a ma, n ni kuɔ fɔ fɔɛ ma sɔn?”

¹⁷Mbɛ Chisɔsi ɔ, “Fen mu i toen mu n fan ni a ɔ yian i a, ni koe min nyin a ma koe a? Yataa dɔndɔ gbe an mu mɔ chɛndɛ a. Ni i toen mu i ni kuɔ fɔ fɔɛ ma sɔn, mbɛ don a 'a sawa n kɔɔ.”

¹⁸Mbɛ kamin chɛ ɔ, “Sawa minan nu mu?” Chisɔsi ɔ, “Yataa ɔ te, wo ma mɔ fa, ni sawa ma min fɔ ni, a ɔ, wo ee waa ma basan mɔɛ a, wo ee fuu ɔ min na, a ɔ, wo ma kanka chɛ, a ɔ, wo ma fania fɔ mɔ ɔ mɔ ma,

¹⁹a ɔ, wo ni kooya be wo fa ma, a basan wo de a, mbɛ a ɔ, wo ni to wo 'a mɔɛ n na, yɔ wo toen mu buɛ min dɔ wo wandi a.”

²⁰Mbɛ kamin tɔngbɔɛ chɛ ɔ, “Sawa chɛ n gbɛɛ biaen fan mu gbɛ n boo ɔ. Fen to‑a to, n mbe min ma, a ka sawa chɛ n ma, i‑a miin ma dan ka?”

²¹Mbɛ Chisɔsi ɔ, “Ni i ma to ni tɔmbɛ sima wɛɛ ni ma i ma Yataa tena, ta, i ni i boo fenɛ n gbɛɛ ma tachɛ. Mbɛ i‑a a kɔpɔɛ chɛ ya, i‑a a be yɔn tɔɛ n ma. Chɛ‑a a ma wan, i ni nyanɛ ma sɔn banda bu ɔ. Ni i‑a chɛ ma, mbɛ i na‑a i ma‑a n fɛ denɛ a.”

²²Kamin tɔngbɔɛ chɛ‑a bai chɛ a min kɛn, mbɛ a ta‑a faayɔnɛ ɔ. Koe min na mu, nyan tɔ wa ni a a.

²³Kamin tɔngbɔɛ chɛ ta‑a kɛn, mbɛ Chisɔsi‑a a fɔ a fɛ denɛ n ye, a ɔ, “N ni a ma din wo tena, mbɛ a ɔ gbɛ nyan tɔɛ n ko a, an ni don Yataa 'a mansaya kɔɔ.

²⁴Ka wɛ n mbe a ma din to wo tena, mbɛ a ɔ gbɛ kaka nyan tɔɛ ko a, a ni don Yataa 'a mansaya kɔɔ, a ni ben ninchi don koe ma miichi woe a.”

²⁵An‑na bai chɛ a min kɛn, a‑a an da a fa wan gban. Mbɛ an dɔ, “Mbɛ nyɔn mbe bauncha chɛ ma sɔn‑da gbɛ?”

²⁶Mbɛ Chisɔsi‑a an gbɛɛ ma fɛn, mbɛ a‑a a fɔ an ye, a ɔ, “Mɔ gbu ee che koe chɛ n ma‑a, chɛɛ Yataa ɛ che wan ko ɔ ko ma‑a.”

²⁷Mbɛ Pita ɔ, “A yen ko, nn‑na nn kan kɔ sɔ fen kɔ fen na, mbɛ nn bea‑a i fɛ. Yataa ɛ tɔnɔnɛ minan nyɔn sima be‑a nn ma?”

²⁸Mbɛ Chisɔsi ɔ, “Wo dan a a, mbɛ a tɔnɔnɛ ɛ koa‑a wan. Tima min na Yataa 'a dunya nama chɛ ɔ na tena, n fan, Mɔ Gbu 'a Denɛ, n mbe si‑a n 'na mansa sea a. Wo wɛɛ wo mɔ tan kun ma fea chɛ nu, wo e si‑a wan mansa sea tan kun ma fea n na. Mbɛ wo ma‑a mansa n na dambi tan kun ma fea chɛ n ko a Chu mɔɛ n tɛ ɔ.

²⁹Chenɛ, suun ma nyɔɛ nu, woo mɔɛ nu, denɛ nu, a basan sɛnɛ n na, an nyin fan. Chɛɛ mɔɛ min mbe an dɔndɔ wɛɛ to‑a n ko a, Yataa ɛ a kɔ‑a wan an fen chɛ a, a si tena chɛmɛ dɔndɔ ni a kun ma a a. A sin, Yataa ɛ kuɔ fɔ fɔɛ be‑a wan to a ma.

³⁰Chɛɛ mɔ sɛsɛ nu, miin mbe sɔ ɔ ya ɔ sanche, Yataa ɛ an na yɛ‑a wan gbaa a. Mɔɛ miin mbe gbaa sanche, Yataa ɛ an sɔ‑a wan ya ɔ dunya nama chɛ ɔ.”