Read Kono MATIU 2 Bible Online

MATIU 2 - Kono bible

MATIU 2

¹Chisɔsi na‑a suun gbɛ Bɛtɛɛn duu ɔ wan, Chudia chɛnyɛ ɔ. Mansa Ɛdɔdi[1] 'a tima kɔɔ ni. A tima chɛ a, a yen ko, yiimatɛ tɔɛ n na‑a Chuusaɛn duu ɔ, a ka tee bɔ, chɛnyɛ ɔ yansama ɔ.

²Mbɛ an dɔ, “Den toa chɛ ɛ mende, min suunden mu ma koe a Chu mɔɛ n 'na mansa wa a? Koe min na mu, nn‑na a tɔmbuaka yen fan pan tee bɔ, a sin, nn na‑a, nn ni tando be a ma.”

³Mansa Ɛdɔdi‑a chɛ a min kɛn, a ma‑a wan a ma faayɔn ba a, an bɛ Chuusaɛn mɔɛ n gbɛɛ a.

⁴Mbɛ a‑a Chu n tɛ mɔɛ nu Yataa a, an 'na mansa n gbɛɛ, a‑a an na kan, a basan Chu n 'na sawa kan mɔɛ n na. A‑a an dɔ tisa, an ni a ɔ yian a a, ni Chasi suun‑da kaina min, kunka mansa chɛ.

⁵Mbɛ an dɔ, “Ɛ suun tena Bɛtɛɛn fan, Chudia chɛnyɛ ɔ. A mu min na, Yataa 'a gbonka chɛ mɔɛ chɛ na‑a a nyɛn ka wan, a ɔ,

⁶‘Yataa ɔ, Wo wan Bɛtɛɛn mɔɛ nu, Chuda tanda ɔ, duu pɛɛ ma wo 'a duu a, duu gbau gbau n tɛ ɔ Chuda. An dɔ mu, ya ɔ sɔɛ ɛ bɔ tena, min mbe n 'na Isɔɛɛ[2] mɔɛ n kun ma fɛn‑da.’ ”

⁷Mbɛ Mansa Ɛdɔdi‑a sonda chɛ n chee, miin‑na tɔmbuaka sɔn ka. An dechee chɛ tɛ ɔ, a‑a a ɔ gbɛ chɛndɛ chɛ a ka an na, tɔmbuaka chɛ bɔ‑a tima min gbu a.

⁸Mbɛ a‑a an na ta Bɛtɛɛn, a ɔ, “Wo ta, wo ni wo ya a kan den chɛ a chɛndɛ chɛ. Ni wo‑a a yen, wo na a ɔ yian n na, min mbe a ma, n bɛɛ n ni ta tando be a ma.”

⁹Chɛ gbakɔ, mbɛ an‑na chia bia, an ta‑a. An to‑a ta an na, mbɛ an‑na an tɔmbuaka yen to, an na‑a min yen pan tee bɔ. A ta‑a an ya ɔ aan, mbɛ a sɔ‑a chidi kaina chɛ kun ma, den toa chɛ ni kaina min.

¹⁰An‑na tɔmbuaka chɛ yen kɛn, an‑na buɔdia min bɔ, a da a ni koo.

¹¹An don‑da kɛn chen chɛ a, mbɛ an‑na den chɛ tan, an fea a de Mɛi a. Mbɛ an‑na an kumbai gbangban, an‑na tando be a ma. An‑na samba n na bɔ, samba baa gbɛɛ ma nu, an na‑a miin na den toa chɛ ye. Sanu ni wan nɔ, ni fen kunyɛ a diama fea, an ni miin chee, an dɔ, fankinsɛnsi, ni dɔndɔɛ min tɔ ni maa.

¹²Mbɛ Yataa‑a an na si wan cho ɔ, mbɛ an ma bɔ Mansa Ɛdɔdi waa chia a. An‑na chia dɔ mende ya wan, an yɛ‑a.

¹³Yiimatɛ tɔɛ chɛ n taenɛ gbakɔ, Mansa Yataa 'a maeka na‑a Chosɛfi tena cho ɔ. Mbɛ a ɔ, “Chosɛfi, i a sɔ, i ni den chɛ ya, an fea a de a, i ni i nun a ta Ichipi chɛnyɛ ɔ. Wo ma na, aan ni tima min na, n mbe a fɔ‑a i ye, na koe a. Koe min na mu, Mansa Ɛdɔdi ɛ na tena wan a ya a kan‑da den chɛ a, a ni a kasaa.”

¹⁴Mbɛ a‑a a a sɔ, a‑a den chɛ ya, ni a de, an‑na an nun su ɔ, an‑na tachɛ bun a ma Ichipi chɛnyɛ ɔ.

¹⁵A sin, an mbe to‑a nɔ wan aan Mansa Ɛdɔdi ni fa. Chɛ ɛ ma‑a, min mbe a ma, Yataa da a kuiɛ ni bɔ a a, a na‑a min na ben suun a 'a gbonka chɛ mɔɛ a. Mbɛ ɛ na‑a wan a 'a denɛ chee‑a, a bɔ Ichipi chɛnyɛ ɔ.

¹⁶Mbɛ Mansa Ɛdɔdi faa gbandia‑a, a‑a a ɔ yen kɛn, mbɛ yiimatɛ tɔɛ chɛ n‑na yaa an na tachɛ a a. Mbɛ a‑a mɔɛ n sɔ, Bɛtɛɛn duu ɔ, a basan a tanda chɛ gbɛɛ ɔ a, denɛ n fa koe a. Den kaima kan kɔ kan, a ka a den toaya ɔ, a ta san fea ɔ, an mbe a fa wan. A‑a a ma, yɔ yiimatɛ tɔɛ chɛ n na‑a tima min nyɔn sima yian a a.

¹⁷Chɛ ɛ a ma‑a wan, Yataa 'a gbonka chɛ mɔɛ Chɛyimaya na‑a min fɔ, a ni bɔ a a.

¹⁸A na‑a a fɔ wan, a ɔ, “Di chɛ kuiɛ a yen ko bɔ‑a Dama duu ɔ, di gbafi gbafi chɛ kuiɛ. Dechɛɛ an mbe ka di chɛ‑a a 'a denɛ n ko a, a a ee che maun‑da, pimbi ban‑da don‑da an tɛ.”

¹⁹Mbɛ Mansa Ɛdɔdi fa‑a. A faenɛ gbakɔ, mbɛ Mansa Yataa 'a maeka na‑a Chosɛfi tena cho ɔ Ichipi chɛnyɛ ɔ.

²⁰Mbɛ a‑a a fɔ a ye, a ɔ, “Chosɛfi, i a sɔ, i ni den chɛ ya, an fea a de a, i ni yɛ Isɔɛɛ mɔɛ n 'na chɛnyɛ ɔ. Koe min na mu, miin ni den chɛ fɛ a yama boo a, an fa‑a.”

²¹Mbɛ a‑a a a sɔ, a‑a den chɛ ya, a basan a de a, an bun‑da yɛ‑a Isɔɛɛ mɔɛ n 'na chɛnyɛ ɔ.

²²Chɛɛ a‑a a a min kɛn, mbɛ Akɛdaɔsi an yɛ‑a a fa Ɛdɔdi gbaa mansaya ɔ, Chudia chɛnyɛ ɔ, a chian‑da ta koe a nɔ. A sin, a na‑a dasi ma sɔn fan cho ɔ, min‑na a ma, a ta‑a Kadidi chɛnyɛ ɔ.

²³Mbɛ a ta‑a, a si‑a Nasaɛti duu ɔ. Chɛ‑a a ma wan, Yataa na‑a min na ben a 'a gbonka chɛ mɔɛ n dɔ, a ni bɔ a a. A ɔ, “An mbe na‑a a chee‑a wan Nasaɛti mɔɛ a.”