Read Kono MATIU 23 Bible Online

MATIU 23 - Kono bible

MATIU 23

¹Chɛ gbakɔ, mbɛ Chisɔsi koɔ‑a mɔ fanka chɛ tena, a basan a fɛ denɛ n na, a ɔ,

²“Yataa‑a sawa min be Mosisi ma, a fasai koe wo tena, a gbasaya ɛ mmɔ 'a sawa kan mɔɛ n fan boo ɔ, a basan mɔɛ chɛ n na, miin mu Fayisii n na.

³Chɛ an‑na a fɔ, wo kooya be an ma. A yɛ to, ni an‑na ko ɔ ko fɔ wo ye a ma koe a, wo a ma. Chɛɛ wo ma bea an chɛ chɛ wai fɛ. A mu min na, an mbe min fɔ wo ye, a si mɔɛ e Yataa 'a sawa a wai buɛ min dɔ, an fandi ee a ma ka.

⁴An mbe suun fanka ma si wan mɔɛ n kun ma, chɛɛ an fandi ee fen kɔ fen bia an boo wɛɛ a.

⁵An toen mu an ni an fandi ɔ yian ko ɔ ko ɔ, an mbe min ma. An 'na ma bɛn chɛ buɛ wɛɛ, an ni a ɔ ben fan, a ɔ yian koe a, mbɛ an‑na Yataa sɔn, a ni ben an bɔ n ma.[30]

⁶Ni an ta‑a daun chɛ bɛnɛ wɛɛ ɔ, an toen mu si koe a gbakoo n fan tɛ. Mmɔ 'a samun chɛ chenɛ n bɛɛ a, an toen mu si tena ma benden ba an na.

⁷Ni an ta‑a machiti an dɔ, an toen mu mɔɛ n ni basɔmaya kɔndɔnɛ chɛ an na. An toen mu mɔɛ n ni an chee, an dɔ, kan mɔ.

⁸Chɛɛ wo dɔndɔ wɛɛ ma dɔn mɔɛ n ni wo chee, kan mɔ, koe min na mu, wo gbɛɛ mu mɔ dɔndɔɛ n fan na. A sin, kan mɔ dɔndɔ gbe an mbe wo ko a.

⁹Wo ma mɔ ɔ mɔ dɔ mende chee dunya chɛ ɔ, wo ɔ, fa. A mu min na, wo Fa ɛ dɔndɔ gbe, min mbe banda bu ɔ.

¹⁰Wo ma a ma mɔ ɔ mɔ ni wo chee, kun ti a. A mu min na, mɔ dɔndɔ gbe an mbe nɔ, min mu wo kun ti a. An nɛ n na, n fan, kunka mansa.

¹¹Ni wo dɔndɔ wɛɛ min toen mu a ni ma mɔ chenama a wo tɛ, an mɔɛ chɛ ni a wandi ma bɔi denɛ a, wo tɔɛ n gbɛɛ ko a.

¹²Koe min na mu, ni mɔ ɔ mɔ‑a a wandi a sɛ, Yataa ɛ a mɔɛ chɛ a yii‑a wan. Chɛɛ ni mɔ ɔ mɔ‑a a wandi a yii, Yataa ɛ a mɔɛ chɛ a sɛ‑a wan.”

¹³Mbɛ Chisɔsi‑a a fɔ, a ɔ, “Wo wan sawa kan mɔɛ chɛ nu, wo wan Fayisii nu, koe min mbe wo tan‑da, a yau gba wo ko a. Nɛnɛn fea ti mu wo a. Koe min na mu, wo ban‑da don koe a Yataa 'a mansaya kɔɔ, mbɛ wo‑a chia tɛ wo bɔ n bɛɛ ya ɔ don koe a nɔ.[31]

¹⁵“Wo wan sawa kan mɔɛ chɛ nu, wo wan Fayisii nu, koe min mbe wo tan‑da, a yau gba wo ko a. Nɛnɛn fea ti mu wo a. Su ni tee a, wo e sɔ ɔ wo chenɛ a, mɔ yanɛ a kan kɔ kan. Ni wo‑a mɔ dɔndɔ ma sɔn, wo fɛ den chɛ a, wo e chia a ka wan a ko a gbadan, min mbe a ma, wo bɛ ni ta ta ɔ. Ni wo sin ta‑a, gbɛmbo ee ma‑a a ma, koe min na mu, wo ban‑da a ma‑a wo kan mɔ a, ko yama ma ɔ.

¹⁶“Wo wan ko sɔn bai chɛ nu, koe min mbe wo tan‑da, a yau gba wo ko a. Wo e mɔɛ n kan‑da koe n na, wo wandi ma miin dɔ gbɛ ni. Wo ɔ, ni mɔɛ‑a a gboo Yataa 'a kata ɔ, a ma ma chian ni, a ni che chɛ ɔ, yɔ ni mɔɛ‑a a gboo sanu chɛ an dɔ, min mbe Yataa 'a kata ɔ.

¹⁷Wo wan ko sɔn bai wooen ba chɛ nu. Sanu chɛ ɛ Yataa 'a kata ɔ wan. Ni sanu chɛ ee Yataa 'a kata chɛ ɔ, Yataa ta ma a a. Chɛ an‑na a fɔ, Yataa 'a kata ma chianden mu a ben sanu chɛ ma.

¹⁸Wo e mɔɛ n kan fan to, wo ɔ, ni mɔɛ‑a a gboo gbengbe ma, an mbe yasi minda kaina Yataa tena, a ma ma chian ni, a ni che chɛ ɔ, yɔ ni a‑a a gboo yasi wandi ɔ.

¹⁹Wo wan ko sɔn bai chɛ nu. Yasi bɔ tena ma chianden mu, a ni ben yasi wandi ma.

²⁰Chɛ an fɛ mu, mɔ ɔ mɔ, min mbe a gboo gbengbe chɛ ma, a‑a a gboo ka fen kɔ fen fan dɔ, min mbe gbengbe chɛ ma.

²¹A sin, ni mɔ ɔ mɔ‑a a gboo Yataa 'a kata ɔ, a‑a a gboo ka Yataa wandi an dɔ, min ta mu an kata chɛ a.

²²A sin to, ni mɔ ɔ mɔ‑a a gboo banda bu ɔ ɔ, a‑a a gboo ka Yataa 'a mansaya sea chɛ an dɔ, a basan Yataa a, a wɛn mbe si ɔ an mansaya sea chɛ a.

²³“Wo wan sawa kan mɔɛ chɛ nu, wo wan Fayisii nu, koe min mbe wo tan‑da, a yau gba wo ko a. Nɛnɛn fea ti mu wo a. Ko chɛndɛ yen ko, wo e min ma. Boo fen kan kɔ kan, wo e min sɔn, wo e a du wan si tena tanɛ a, mbɛ wo‑a si tena dɔndɔ be Yataa ma. Boo fenɛ tatayaenɛ wɛɛ, wo e Yataa kɔ wan a ɔ. Chɛɛ wo ma wo gbɔsɔ ni bea koe a a 'a sawa chenama wa an fɛ. Wo ma wo gbɔsɔ ni tea koe n ma koe a wo bɔɛ n na. Chinchimaya ee wo ɔ wo bɔɛ n ko a, mbɛ a sin to, wo ma danaya ni wo bɔɛ n tena. Koe chɛ n gbɛɛ, wo an ma. A sin to, wo a a tun wo boo fenɛ n be koe a Yataa ma.

²⁴Wo wan ko sɔn bai chɛ nu, wo e mɔɛ n kan‑da koe n na, wo wandi ma miin dɔ gbɛ ni. Wo e tima ya wan bea koe a Yataa 'a sawa mɛsɛ mɛsɛ n fɛ, yɔ wo e tima ya buɛ min dɔ, fen chɛ n ma soan koe a, wo e miin min, wo ma na tumbu n kanun. Chɛɛ wo ma wo gbɔsɔ ni bea koe a, a 'a sawa chenama an fɛ.

²⁵“Wo wan sawa kan mɔɛ chɛ nu, wo wan Fayisii nu, koe min mbe wo tan‑da, a yau gba wo ko a. Nɛnɛn fea ti mu wo a. Wo e wan yɔ kɔpu chɛ nu, miin kɔɛ koenɛ ɛ ka, chɛɛ an bu ɔ nɔɔenɛ ɛ. Wo faa n dɔ ma gbɛ ni. Wo e mɔɛ n boo fenɛ bɔ wan an boo ɔ, bemaya ɔ, a sin to wo gbɔsɔen mu wo wandi an ko a dechee.

²⁶Wo ko sɔn bai ya Fayisii nu, wo wo 'a kɔpu bu pɛn dɔ ko, an mbe a ma, a ni gbɛ fo.

²⁷“Wo wan sawa kan mɔɛ chɛ nu, wo wan Fayisii nu, koe min mbe wo tan‑da, a yau gba wo ko a. Nɛnɛn fea ti mu wo a. Wo e wan yɔ kamba nu miin nyin an baa ma chia a, chɛɛ an bu ɔ, mɔ kuu dechee n fan mbe nɔ, a basan fen tui kan kɔ kan na.

²⁸Wo wɛɛ wo e ka wan. Wo bɔen mu mɔɛ n na miin tanden mu Yataa tena. Chɛɛ wo faa ɔ ma gbɛ ni. Nɛnɛn fea ti mu wo a, mbɛ a yɛ to, ko yama ma mɔɛ mu wo a.

²⁹“Wo wan sawa kan mɔɛ chɛ nu, wo wan Fayisii nu, koe min mbe wo tan‑da, a yau gba wo ko a. Nɛnɛn fea ti mu wo a. Yataa 'a gbonka chɛ mɔɛ chɛ nu suun, wo‑a an kamba n ma bɛn nyima nyima, a basan mɔɛ chɛ n na, miin tanden ni Yataa tena.

³⁰Wo ɔ, ni wo na‑a bɔ suun wo bemba n ta bemba n ta tima an na, wo ɔ, wo nii basan‑da an ma Yataa 'a gbonka chɛ mɔɛ chɛ n fa koe a suun ɛnden bɛɛ a.

³¹Wo wandi gbu wo da a kuiɛ an mu sii a wo wandi ko a, a mu min na, wo ban‑da dɔn‑da a ma, mbɛ wo bemba n fan‑na Yataa 'a gbonka chɛ mɔɛ chɛ n fa suun.

³²Wo wo bemba n ta bemba n 'na wai a ban fan gbɛ, an na‑a wai min kuu sɔ suun.

³³Wo yauaen ba chɛ nu yɔ ka. Wo ee kun wo ni wo kunɛ bɔ Yataa 'a mɔnɛ kɔɔ min mbe wo ko a. Yataa ɛ wo a ta‑a wan ta ɔ.

³⁴Chɛ an fɛ mu, n yen ko Yataa 'a gbonka chɛ mɔɛ n na na‑a wo tena. N mbe dɔ sɔ tɔɛ n bɛɛ a na‑a wan, a basan Yataa 'a sawa kan mɔɛ n na. Chɛɛ wo e an dɔ n fa‑a wan kɔn gbengbandenɛ ma, wo ni dɔ n fa chia dɔ mende a, mbɛ wo‑a dɔ n bosa mmɔ 'a samun chɛ chenɛ n na. A tɔɛ n sin, wo e an gbain‑da wan a bɔ duu kan kɔ kan dɔ, an mbe ta‑a kaina.

³⁵Chɛ ɛ a ma‑a wan, wo ni tɔɔya ma sɔn. Wo e tɔɔya‑a wan mɔɛ chɛ n gbɛɛ fa koe a suun, miin nii ma ko yama kan kɔ kan ma ni. Wo e tɔɔya‑a wan Ebɛɛ 'a saya ko a suun, aan a ta mɔɛ dankama 'a saya ma, min ni kai Baakia 'a denɛ Sakaaya a. An na‑a Sakaaya chɛ fa nɛ Yataa 'a kata chɛ an dɔ, Yataa 'a chen chɛ n tɛ yasi minda gbengbe chɛ a.

³⁶N ni a ma din wo tena, mbɛ an na‑a mɔɛ chɛ miin gbɛɛ fa suun, a tɔɔya chɛ ɛ ma‑a wo mɔ bonda chɛ n sima an ma.”

³⁷Mbɛ Chisɔsi ɔ, “Wo wan Chuusaɛn mɔɛ nu, wo‑a a tun Yataa 'a gbonka chɛ mɔɛ n fa koe a. A yɛ to, Yataa ɛ a 'a sɔ mɔɛ miin na na wo tena, wo‑a a tun to an bon koe a, an ni fa. Tima sɛsɛ ko a, n toen ni, n ni wo a sɔn sɔn kaina dɔndɔɛ, yɔ tɛ kuinsa ɛ a 'a denɛ n don buɛ min dɔ a kambanɛ kɔɔ. Chɛɛ wo ma dɔn ni n ye.

³⁸A yen ko gbɛ, Yataa 'a chen chɛ a senɛ to‑a, a sin pombonɛ mu gbɛ.

³⁹N ni a ma din wo tena, mbɛ a ka sanche ma, wo ee n yen‑da to, aan a ta tima chɛ ma, wo e a fɔ tima min na, wo ɔ, Mansa Yataa ni mɔɛ chɛ dua, min mbe na‑a a tɔɛ ɔ.”