Read Kono MATIU 3 Bible Online

MATIU 3 - Kono bible

MATIU 3

¹Tima che‑a wan, mbɛ Chɔn, min mbe yii chɛ mɔɛ n kunɛ ɔ, Yataa chia a, a na‑a fuinɛ ma, Chudia chɛnyɛ ɔ. Mbɛ a bun‑da Yataa 'a bai sa‑a mɔɛ n tena.

²A ɔ, “Wo wo kan kɔ sɔ wo 'a ko yama n na, wo ni wo ya a mun Yataa ma. A mu min na, Yataa 'a mansaya ɔ yian tima, ɛ gbɛ mmɔ ma chenɛ da a wan.”

³Chɔn chɛ ni, Yataa 'a gbonka chɛ mɔɛ Aisaya na‑a bai sa a si min ma. Aisaya na‑a a fɔ wan, a ɔ, “Mɔɛ yen ko gbonka chɛ‑a fuinɛ ma, a ɔ, mɔɛ n ni tan Yataa tena. A ɔ, an ni an fandi n dɔ bɛn Mansa Yataa ya ɔ, yɔ an mbe chia ɔ bɛn buɛ min dɔ an 'na mansa n ya ɔ.”

⁴Chɔn ma chiien ni koa min na, a nyanden ni soe[3] ti an na. A bu tɛ chiien ni soe gboo an na, a 'a daun fenɛ sin ni kondonɛ an na, a basan kumin tuu a.

⁵Mɔɛ n na‑a wan a tena, a ka Chuusaɛn duu ɔ, ni Chudia chɛnyɛ tɔɛ n dɔ, a basan Chɔdan yii 'a sanɛ a.

⁶An dɔn‑da an 'na ko yama n ma, fanka ɔ den. Mbɛ Chɔn‑na yii chɛ an kunɛ ɔ, Yataa chia a, Chɔdan yii ɔ.

⁷Chɔn‑na a ɔ yen, mbɛ Chu mɔ kuun chɛ nu, an ni miin chee Fayisii[4] nu, a basan chɛ n na, miin ni Sadusii[5] a, an na‑a a tena. An dɔ, a ni yii chɛ an kunɛ ɔ, Yataa chia a. Chɛɛ a ɔ, “Wo yauaen ba chɛ nu, yɔ ka. Wo ee che wo nun‑da Yataa 'a mɔnɛ ma, min mbe wo ko a.

⁸Wo chɛ chɛ wai n ni a ɔ yian, mbɛ wo‑a wo kan kɔ sɔ wo 'a ko yama n na.

⁹Wo ma wo yii na chii kafai be koe a, mbɛ Ebeami cheeya mu wo a. A ni ma wo yii ma, mbɛ Yataa ɛ kun fan a ni sen chɛ n ya, a ni Ebeami cheeya n nyan an dɔ.

¹⁰Ni kɔnɛ ma gbɔ chɛndɛ be ni, mɔɛ ɛ a tɛ wan a suu ma, mbɛ a‑a a minda. Wo gbɛɛ wo maen fan mu yɔ kɔnɛ nu. Yataa 'a yende a saen fan mu wo dɔ n tɛ koe a wo suu ma, wo wɛn mbe ee ko chɛndɛ ma‑a.

¹¹N fan, n mbe yii an chɛ wo kunɛ ɔ, min mbe a ɔ yian, mbɛ wo‑a wo kan kɔ sɔ wo 'a ko yama n na. Chɛɛ mɔ dɔndɔ ɛ na tena n gbaa, a benden mu n ma kaka. N gbu sin mbe ee che a 'a kɔɔwa wɛɛ bia koe a. A tana, ɛ Yataa Nyina a na‑a wan ma koe a wo fɛ, wo wɛn mbe wo kan kɔ sɔ‑a wo 'a ko yama n na. Chɛɛ wo wɛn mbe ee wo kan kɔ sɔ‑a wo 'a ko yama n na, ɛ wo a ta‑a wan ta ɔ.

¹²Ɛ mɔ gbu gbɛɛ gbɛmbo‑a wan. Ɛ mɔ gbu chɛndɛ n bɔ‑a wan a yama n ya a, yɔ sɛnɛ sa mɔɛ ɛ fenɛ ɔ fɛ buɛ min dɔ, a pofe bɔ koe a a chɛndɛ ya a. Ɛ a pofe a dɛ‑a wan, mbɛ a‑a a chɛndɛ si tena ɔ bɛn. Ɛ mɔ yama n tɔɔya‑a wan kuɔ fɔ ta ɔ, yɔ mɔɛ ɛ a fonɛ minda buɛ min dɔ ta a.”

¹³A tima chɛ a, Chisɔsi bɔ‑a wan Kadidi chɛnyɛ ɔ, mbɛ a ta‑a Chɔdan yii da a, min mbe a ma, Chɔn ni yii chɛ a kunɛ ɔ, Yataa chia a.

¹⁴Chɛɛ Chɔn toen ni kɛn a ni a ma, Chisɔsi yiima ni mun, a ɔ, “I ma chɛ ma n na. A ma bɛnden mu, i wan ni yii chɛ n kunɛ ɔ, Yataa chia a. I wan mbe ee na to n tena, n ni yii chɛ i kunɛ ɔ, Yataa chia a.”

¹⁵Chɛɛ Chisɔsi ɔ, “I ma n kɔɔsa bia. A ma yɔ n‑na a fɔ buɛ min dɔ i ye a ma koe a. Ni mɔ‑a a ma buɛ chɛ ɔ, mɔ ɛ ma‑a ka Yataa faa ma koe an ma‑a.” Mbɛ Chɔn dɔn‑da.

¹⁶A‑a yii chɛ kɛn dechee Chisɔsi kunɛ ɔ, Yataa chia a, Chisɔsi bɔ‑a wan yii ɔ. Mbɛ a yen ko, banda da a ka‑a a ya a a, mbɛ a‑a Yataa Nyina yen, ɛ yii‑a yɔ bugbɔɛ, mbɛ a si‑a a ma.

¹⁷Mbɛ a yen ko, kuiɛ a min‑da a ka banda bu ɔ, a ɔ, “N 'na denɛ an nɛ, a ko a di n ye kaka. N faa chimaen mu a ko a chɛndɛ chɛ.”