Read Kono MATIU 5 Bible Online

MATIU 5 - Kono bible

MATIU 5

¹Chɛ gbakɔ, mbɛ Chisɔsi‑a a ɔ yen, mbɛ fanka fanka chɛ a sɔn‑da a ma, a sɛ‑a kɔnkɔɛ a. A si‑a kɛn nɔ, mbɛ a fɛ denɛ n gbɛn‑da a ma.

²Mbɛ a‑a a kuu sɔ an kan‑da, a ɔ,

³“Mɔɛ miin‑na a ɔ sɔn chia ee nɔ, mɔɔ ni Yataa basan‑da an ma, an duaen mu. Yataa an mbe ma‑a an 'na mansa a.

⁴“Mɔɛ miin mbe di chɛ‑a, an duaen mu. Yataa ɛ di ka‑a wan an ya a.

⁵“Mɔɛ miin dɔ ma fasi ni, an duaen mu. Yataa ɛ duu gboo chɛ gbɛɛ be‑a wan an ma, an ta a.

⁶“Mɔɛ miin mbe an faa gbɛɛ chɛ‑a Yataa faa ma koe ma koe a, an duaen mu. Yataa ɛ faachima be‑a wan an ma.

⁷“Mɔɛ miin mbe chinchin an bɔɛ n ma, an duaen mu. Yataa ɛ chinchin‑da wan an ma.

⁸“Mɔɛ miin faa ɔ gbɛen mu, an duaen mu. An mbe Yataa yen‑da wan.

⁹“Mɔɛ miin mbe mɔɛ n tɛ ɔ bɛn, an duaen mu. Yataa ɛ an ya‑a wan a 'a denɛ n na.

¹⁰“Mɔɛ miin mbe ko yawaenɛ ɔ yen‑da, Yataa faa ma koe ma koe a, an duaen mu. Yataa an mbe ma‑a an 'na mansa a.

¹¹“Ni mɔɛ n‑na ko yawaenɛ sa wo ma, an ni wo main, an ni fania yama kan kɔ kan fɔ wo ma, n fan, n bakoe a, wo duaen mu.

¹²Wo bu ɔ ni dia kaka, koe min na mu, Yataa ɛ tɔnɔnɛ chenama sa tena ɔ bɛn‑da wan wo ko a banda bu ɔ. Wo wo faa bia, a mu min na, an‑na ko yawaen dɔndɔ gbe chɛ an sa suun Yataa 'a gbonka chɛ mɔɛ n ma, an‑na min sa ka wo wɛɛ ma.”

¹³Chisɔsi ɔ, “Wo maen fan mu yɔ kuiɛ mɔ gbu gbɛɛ ko a dunya chɛ ɔ. Chɛɛ ni kuiɛ ɔ sɛ‑a, mɔ ee che to i ni a ma a dia ni yɛ a ɔ. A ma nyin to fen kɔ fen ko a. A nyin dechee mɔ ni a a dɛ baa ma, mɔɛ n mbe tɛn tɛn a ɔ kaina.

¹⁴“Wo maen fan mu yɔ sanku manɛ, mɔ gbu gbɛɛ ko a dunya chɛ ɔ. Duu wa min mbe sɔ ɔ kɔnkɔ a yansama kun tɛ, a ee che nun‑da.

¹⁵Mɔ ɔ mɔ ee dambo a man, mbɛ a‑a a don samba kɔɔ. Chɛɛ ɛ a si kaina wan, ɛ manɛ be kaina mɔ ɔ mɔ ma chenɛ bu ɔ.

¹⁶A sin, mbɛ i wan, i wɛn maen mu yɔ sanku manɛ, i bɔɛ mɔ gbu n ko a, a ma i 'a manɛ ni man i bɔɛ mɔ gbu n tɛ ɔ, min mbe a ma, an ni a ɔ yen, e wai chɛndɛ min chɛ tena. Chɛ an mbe a ma‑a, an ni tando be Fa Yataa ma, min mbe banda bu ɔ.”

¹⁷Chisɔsi ɔ, “A ma ma wo yii ma, mbɛ n na‑a a fɔ koe an na mɔɛ n ye, mbɛ an ma an too ma sɔ to sawa chɛ n ma, Yataa‑a miin be suun Mosisi ma, a basan bai chɛ na, min be‑a Yataa 'a gbonka chɛ mɔɛ n ma. N ma na ni chɛ an na. Chɛɛ n na‑a, min mbe a ma, sawa chɛ nu, a basan gbonka chɛ mɔɛ chɛ n 'na bai n na, an ni bɔ a a.

¹⁸Koe min na mu, n ni a ma din wo tena, mbɛ tima min na dunya chɛ gbɛɛ ɛ wɛ nɔ, sawa chɛ ɛnden bɛɛ ee ka a a, aan bai miin fɔ‑a a ɔ, an ni bɔ a a.

¹⁹Mɔɛ min mbe sawa chɛ pɛɛ ɛnden bɛɛ yɔn‑da, ɛ ta‑a mɔɛ n kan‑da a yɔn koe ma, a ee nyan‑da a ko a. Yataa ɛ a mɔɛ chɛ ma‑a wan mɔ pɛɛ ɛndenɛ a, mɔ gbu n tɛ, miin mbe na‑a don‑da a 'a mansaya kɔɔ. Chɛɛ mɔɛ min mbe bea‑a sawa chɛ fɛ, a ni mɔ dɔ mende n kan a a, ɛ nyan‑da wan a ko a. Yataa ɛ a mɔɛ chɛ ma‑a mɔ chenama an na, mɔ gbu n tɛ, miin mbe na‑a don‑da a 'a mansaya kɔɔ.

²⁰N mbe a fɔ tena wo ye, mbɛ wo ee don‑da Yataa 'a mansaya kɔɔ, mɔɔ ni wo‑a wo sɔɛ don Yataa faa ma koe ma koe a, a ben Chu n 'na sawa kan mɔɛ chɛ n ma, an bɛ Fayisii n na.”

²¹Chisɔsi ɔ, “A ɔ yianden fan mu wo a, Yataa na‑a min fɔ suun mɔɛ n ye. A ɔ, ‘Wo ma mɔ fa, ni sawa ma min fɔ ni. Mɔ ɔ mɔ min mbe mɔɛ fa‑a, ɛ gbɛmbo‑a wan.’

²²Chɛɛ n mbe sanche gbɛ a fɔ tena wo ye, mbɛ ni mɔ ɔ mɔ faa tɛ‑a a ɔ benden ba a a,[7] a suun ma nyɔɛ ma, an mɔɛ chɛ ɛ gbɛmbo‑a wan. Mɔ ɔ mɔ min mbe bai yama sa‑a a suun ma nyɔɛ ma, an mɔɛ chɛ ta gbɛmbo kɔ ɛ gbɛ‑a wan, Chu kuti wa ɔ. A sin, mɔ ɔ mɔ min mbe a fɔ‑a a suun ma nyɔɛ ma, a ɔ, ‘Yataa sɔn bai mu a a,’ a mɔɛ chɛ nɛnɛ ɛ ta‑a ta an dɔ, ni a fa‑a.

²³Chɛ an‑na a fɔ, ni i ma‑a na‑a i 'a yasi a Yataa 'a kata ɔ, mbɛ a puin‑da i yii ma, mbɛ i na‑a ko yama ma wan i suun ma nyɔɛ a,

²⁴i 'a yasi chɛ to nɔ, yasi minda gbengbe chɛ ya kɔɔ. Mbɛ i ta‑a a ya kɔɔɛ a, mbɛ i‑a a ma wo tɛ bai sa‑a, wo fea i suun ma nyɔɛ chɛ a. E yɛ‑a wan gbɛ, i ni i 'a yasi chɛ bɔ Yataa tena.

²⁵“A ma i ma gbɔsɔɛ a, bai ni sa wo tɛ bui chɛ a, wo fea i koɔ nyɔɛ a, a e na to bɔ‑a sawa chen kɔɔ. Ni chɛ ma, i koɔ nyɔɛ ɛ i be‑a wan sawa kun ti ma, min mbe i a ben‑da sawa kun ma fɛn mɔɛ n tena, mbɛ an‑na i sa pimbi chenɛ a.

²⁶N ni a ma din i tena, mbɛ e ee bɔ‑a pimbi chen chɛ a aan, kɔpɔɛ chɛ dankama gbɔdɛ, an mbe i a bɔnɔ‑a min na, i ni a be.”

²⁷Chisɔsi ɔ, “Wo‑a a a min fan, min na‑a fɔ suun, mbɛ mɔ ee waa ma basan mɔɛ a, wo ee fuu ɔ min na.

²⁸Chɛɛ n mbe sanche gbɛ a fɔ tena wo ye, mbɛ ni mɔ ɔ mɔ‑a musu ma fɛn aan, musu koe ni puin i yii ma musu chɛ ko a, mbɛ a mɔɛ chɛ‑a waa an ma basan ka musu a, a faa ɔ, a ee fuu ɔ min na.

²⁹Chɛ an‑na a fɔ, ni i boo nyima ɔ ya, an mbe i a dɛ tena ko yama ɔ, a bɔ, i ni a a dɛ. Ɛ nyan fan i ni fo i sɔna dɔndɔ a, a ni ben i ta koe ma i sɔna gbɛɛ a kandenɛ a ta ɔ.

³⁰Ni i boo nyima ɔ boo, an bɛɛ ɛ i a dɛ tena ko yama ɔ, a tɛ a a, i ni a a dɛ. Ɛ nyan fan i ni fo i sɔna dɔndɔ a, a ni ben i ta koe ma i sɔna gbɛɛ a kandenɛ a ta ɔ.”

³¹Chisɔsi ɔ, “A fɔen fan mu to, mbɛ ni mɔ ɔ mɔ‑a a boo ka a 'a musu a, a mɔɛ chɛ ni siiya gboo be an musu chɛ ma. An mbe a ɔ yian, mbɛ a wan mɔ kaima chɛ wandi, an‑na a boo ka musu chɛ a.

³²Chɛɛ n mbe gbɛ sanche a fɔ tena wo ye, mbɛ ni mɔ ɔ mɔ‑a a boo ka a 'a musu a, ko dɔ mende ko a, min ma waa ma basan koe a kai dɔ mende a, mbɛ an mɔɛ chɛ, a‑a musu chɛ ma waa ma basan mɔɛ a kai dɔ mende a, Yataa ya a. A sin, ni mɔ kaima dɔ mende‑a an musu bonda chɛ si musu a, mbɛ a wan mɔ kaima chɛ wɛɛ‑a waa an ma basan ka mɔ dɔ mende 'a musu a, Yataa ya a.”

³³Chisɔsi ɔ, “Wo na‑a a min fan, min fɔ‑a to suun mɔɛ n ye. Ni wo‑a wo gboo ko ɔ ko ma Mansa Yataa tena, wo ma wo da a kuiɛ yɔn, wo an koe chɛ ma.[8]

³⁴Chɛɛ n mbe gbɛ sanche a fɔ tena wo ye, wo ma wo gboo ɛnden bɛɛ a. Wo ma wo gboo banda bu ɔ ɔ, a mu min na, Yataa 'a mansaya sea an nɛ.

³⁵A yɛ to, wo ma wo gboo dunya chɛ wɛɛ ɔ, a mu min na, Yataa chenɛ sɔ tena an nɛ. N mbe ee baa, wo ni wo gboo Chuusaɛn duu ɔ. Yataa Mansa Wa an ta mu a a.

³⁶N mbe ee baa to, i gboo koe ma i wandi kunɛ ɔ, a mu min na, e ee che i kundi dɔndɔ wɛɛ fin‑da, chɛ ma, i ni a ma a ni gbɛ.

³⁷Wo e min ma, an mu yɔ chɛ, ni wo dɔn‑da gbɛ koe min ma, wo dɔn a ma wo faa gbɛɛ a. A sin, ni wo ma dɔn ni koe min ma a saa a, wo ma yɛ to, wo ni dɔn a ma a danka a. Bai dɔ mende kan kɔ kan, min mbe bɔ‑a wo da a a ben chɛ ma, Sitana an mbe a ma‑a wo ni a fɔ.”

³⁸Chisɔsi ɔ, “Wo‑a a a min fan, min na‑a fɔ suun, mbɛ ni mɔɛ‑a mɔ dɔ mende ya bɔ, an mbe a wɛɛ ta ya bɔ wan. Ni a‑a mɔ dɔ mende nyinɛ bɔ, an mbe a wɛɛ ta nyinɛ bɔ wan.

³⁹Chɛɛ n mbe gbɛ sanche a fɔ tena wo ye, wo ma wo ta ɔ nyɔn mɔ ɔ mɔ ma, min mbe ko yama ma‑a wo a. Ni mɔ ɔ mɔ‑a wo boo nyima ɔ gbanɛ ɔ gbasi, wo wo man dɔ gbanɛ wɛɛ a mun, a ni a wɛɛ ɔ gbasi.

⁴⁰Ni mɔɛ‑a wo ma siibia wo 'a wanda fɛsi ko a, wo a be a ma, a basan wo 'a doma kai wɛɛ a.

⁴¹A yɛ to, ni soya mɔɛ‑a a din wo ma ta koe a a 'a feanka a mai dɔndɔ ko a, wo ta a a mai fea.

⁴²Ni mɔ ɔ mɔ‑a wo ɔ tisa a deman koe a, wo a deman. Ni mɔɛ toen mu to wo ni kuiɛ be a ma fenɛ a, min mbe wo boo ɔ, wo a be a ma.”

⁴³Chisɔsi ɔ, “Wo‑a a a min fan, min na‑a fɔ suun, mbɛ wo ni to wo 'a mɔɛ n na, mbɛ wo too‑a wo ko don ma nyɔɛ n na.

⁴⁴Chɛɛ n mbe gbɛ sanche a fɔ tena wo ye, wo ko don ma nyɔɛ n ko a ni dia wo ye, a sin, wo ni samunɛ chɛ chɛ n ko a, miin mbe ko ma gbaaenɛ sa‑a wo ma.

⁴⁵Ni wo‑a chɛ ma, wo e ma‑a wan Fa Yataa, min mbe banda bu ɔ, a gbɔgbɔɔ denɛ n na. Koe min na mu, a wan Yataa dɔndɔ gbe chɛ, an mbe a ma, mɔ yama n mbe tee ma sɔn, an basan mɔ chɛndɛ n bɛɛ a. Ɛ a ma wan to, mbɛ mɔɛ chɛndɛ n‑na sona ma sɔn, an basan mɔ yama n bɛɛ a.

⁴⁶Chɛɛ ni wo to‑a dechee mɔɛ n na, miin toen mu wo a a, wo ee tɔnɔn ma sɔn chɛ ko a Yataa a. Koe min na mu, mɔɛ miin mbe pawa kain,[9] an mbe a ma ka wan.

⁴⁷Ni wo e chia ɔ bɔɛ chɛndɛ chɛ dechee wo suun ma nyɔɛ n fan na, tɛ bɔ ee wo ma, wo bɛ mɔ dɔ mende n na. Koe min na mu, mɔɛ miin bɛɛ ma Yataa sɔn, an mbe a ma ka wan.

⁴⁸Chɛ an‑na a fɔ, koadia ma ban wo faa ɔ mɔ dɔ mende n ko a, yɔ koadia ee ban buɛ min dɔ Fa Yataa, min mbe banda bu ɔ, a faa ɔ.”