Read Kono MATIU 6 Bible Online

MATIU 6 - Kono bible

MATIU 6

¹Chisɔsi ɔ, “Ni wo ma‑a a sɔ‑a wo 'a Yataa fai manda n fɛ, wo ma a ma fanka ɔ den. Ni wo‑a chɛ ma, Fa Yataa, min mbe banda bu ɔ, a ee na‑a tɔnɔn kan kɔ kan be‑a wo ma.

²“Chɛ an‑na a fɔ, ni wo ma‑a wai nyima chɛ‑a yɔn tɔɛ n na, wo ma a ma yɔ mɔɛ chɛ nu, miin‑na an fandi ya mɔ chɛndɛ a, min mu ka mɔ chɛndɛ ma an na. Ni an ma‑a wai nyima chɛ‑a yɔn tɔɛ n na, Chu n 'na samun chɛ chenɛ n na, an mbe a ma wan, mɔ ɔ mɔ ni a ɔ yen, an mbe koe min chɛ tena. Ni an ma‑a wai nyima chɛ‑a an na dani n bɛɛ ma, an mbe a ma ka wan, min mbe a ma, mɔɛ n gbɛɛ ni an tando. N ni a ma din wo tena, mbɛ an ban‑da an 'na tɔnɔnɛ gbɛɛ ma sɔn‑da.

³Chɛɛ a sin, ni i ma‑a wai nyima chɛ‑a yɔn tɔɛ n na, a ɔ nun, i ma a ma mɔ dɔ mende kan kɔ kan ni a ɔ sɔn.

⁴Chɛ ɛ a ma‑a wan, i 'a wai nyima ni ma nun dɔ koe a. A sin, Fa Yataa, min‑na nun dɔ koe kan kɔ kan dɔ sɔn, ɛ a tɔnɔnɛ be‑a wan i ma.”

⁵Chisɔsi ɔ, “Ni wo toen mu wo ni samunɛ chɛ, wo ma a ma yɔ mɔɛ chɛ nu, miin‑na an fandi ya mɔ chɛndɛ a, min mu ka mɔ chɛndɛ ma an na. A mu min na, an toen mu sɔ koe a, Chu n 'na samun chɛ chenɛ n na, a basan dani tɔnfɛ n na. An mbe chɛ ma, min mbe a ma, mɔ ɔ mɔ ni an yen samun chɛ‑a. N ni a ma din wo tena, mbɛ an ban‑da an 'na tɔnɔnɛ gbɛɛ ma sɔn‑da.

⁶Chɛɛ a sin to, ni i ma‑a samunɛ chɛ‑a, don i 'a dumu ɔ, i ni a da a tɔn, mbɛ i‑a samunɛ chɛ Fa Yataa tena, e ee min yen. A sin, Fa Yataa, min‑na nun dɔ koe kan kɔ kan dɔ sɔn, ɛ a tɔnɔnɛ be‑a wan i ma.

⁷“A sin, ni wo ma‑a samunɛ chɛ‑a, wo ma yɛ bai dɔndɔ gbe ɔ si tena sɛsɛ, yɔ mɔɛ chɛ nu, miin ma Chu mɔ n na. Ɛ wan an yii ma, mbɛ Yataa ɛ an 'na samunɛ a min‑da wan, ni an‑na samun dɔ yansama chɛ.

⁸Chɛɛ wo ma ma, yɔ an mbe buɛ min dɔ. Koe min na mu, Fa Yataa‑a a ɔ sɔn fan, fenɛ miin sɔɛ ɛ wo a, pɛn wo e na to a ɔ tisa‑a.

⁹Ni wo toen mu wo ni samunɛ chɛ, wo‑a a fɔ, wo ɔ, ‘Fa Yataa, i wɛn mbe banda bu ɔ, mɔ ɔ mɔ ni tando be i ma.

¹⁰A ɔ ma yansan to, i ni ma mansa a dunya chɛ gbɛɛ kun ma. I faa ma koe, mɔ ɔ mɔ ni a ma dunya chɛ ɔ, yɔ ɛ buɛ min dɔ banda bu ɔ.

¹¹Nn kɔ nn daun fenɛ a tee chɛ a.

¹²I boo bɔ nn 'na ko yama n dɔ, yɔ nn bɛɛ, nn mbe nn boo bɔ buɛ min dɔ ko yama n dɔ, an mbe miin ma nn na.

¹³I ma dɔn ko ɔ ko ni a ma, nn ni ko yama ma. Chɛɛ i ni nn tanka Sitana ma, nyina yama.[10]’ ”

¹⁴Chisɔsi ɔ, “Samunɛ ɛ chɛ ka wan, koe min na mu, ni wo‑a wo boo bɔ mɔɛ n 'na ko yama an dɔ, an‑na miin ma wo a, Fa Yataa wɛɛ, min mbe banda bu ɔ, ɛ a boo bɔ‑a wan wo 'a ko yama n dɔ.

¹⁵Chɛɛ ni wo ma wo boo bɔ ni mɔ dɔ mende n 'na ko yama ɔ, Fa Yataa wɛɛ, a ee a boo bɔ‑a wo 'a ko yama ɔ, wo‑a miin ma.”

¹⁶Chisɔsi ɔ, “Ni wo‑a sunɛ bia, wo ma wo ya kɔɔɛ ma digbi digbi, yɔ mɔɛ chɛ n mbe a ma buɛ min dɔ, miin‑na an fandi ya mɔ chɛndɛ a, min mu ka mɔ chɛndɛ ma an na. Ni an ma‑a sunɛ bia‑a, an mbe a ɔ yian fan an ya kɔɔɛ ma mɔɛ n na, mbɛ an mbe ka ko gbɛɛ ma wa an dɔ bia tena. N ni a ma din wo tena, mbɛ an ban‑da an 'na tɔnɔnɛ gbɛɛ ma sɔn‑da.

¹⁷Chɛɛ ni wo ma‑a sunɛ bia‑a tima ɔ tima, wo wo ya a ko, wo ni tu kunyɛ a diama sin wo kunɛ a, mbɛ wo‑a a ɔ bɔ fɛsi fɛsi.

¹⁸Chɛ ɛ a ma‑a wan, mɔ dɔ mende ee a ɔ sɔn, mbɛ wo e sunɛ ɔ wan. Chɛɛ Fa Yataa, mɔ ɔ mɔ ee min yen, ɛ a ɔ sɔn‑da wan. A sin, Fa Yataa, min‑na nun dɔ koe kan kɔ kan dɔ sɔn, ɛ a tɔnɔnɛ be‑a wan i ma.”

¹⁹Chisɔsi ɔ, “Wo ma wo 'a nyanɛ a sɔn nɛ dunya chɛ ɔ, chisi n mbe an yɔn kaina min, an mbe kasa‑a kaina. Wo ma a a sɔn kaina, kanka n mbe min te, mbɛ an‑na a kanka.

²⁰Chɛɛ i 'a nyanɛ a sɔn banda bu ɔ, i wandi ko a. Nɔ tana, chisi n mbe ee an yɔn, n mbe ee baa, kasa ni an bia. A sin, kanka n bɛɛ ee nɔ te, an ni an kanka.

²¹Koe min na mu, i 'a nyanɛ ɛ ma‑a sa ɔ kaina, i faa ɛ ma‑a nɔ wan tima ɔ tima.”

²²Chisɔsi ɔ, “Mɔ gbu ya ɛ wan yɔ dambo manɛ a gboo ko a. Ni mɔ ya a kaenɛ ma‑a gboden, a gboo gbɛɛ ɛ ma manɛ an dɔ.

²³Chɛɛ ni a ya a pimbienɛ ma‑a, a gboo gbɛɛ ɛ ma pimbi an dɔ. Chɛ an‑na a fɔ, ni fenɛ min sin mu dambo a i gboo gbɛɛ ko a, ɛ pimbi ɔ, e pimbi min dɔ, a da a koo kaka.”

²⁴Chisɔsi ɔ, “Mɔ ɔ mɔ ee che ma‑a wai chɛ mɔɛ a kun ti fea kɔɔ. Ni chɛ ma‑a, dɔndɔɛ ko a ee dia a ye a ni che dɔndɔɛ ɔ. Ɛ kooya be‑a wan dɔndɔɛ ma, a ni ben a bɔɛ ma. Chɛ an fɛ mu, e ee che wai chɛ‑a Yataa ye, mbɛ i‑a wai chɛ kɔpɔɛ wɛɛ ye dɔndɔ a.

²⁵“Chɛ an‑na a fɔ, n mbe a fɔ tena wo ye, mbɛ wo ma wo gbɔsɔ wo da a daun fen ko a, a basan wo min yii a, ma koe a fɔɛ ɔ. N mbe ee baa, wo ni wo gbɔsɔ wo gboo ko a, wo e fen chii. Koe min na mu, mɔ gbu fɔɛ ma daun fenɛ dechee an na, a yɛ to, koa dechee an ma koe a mɔ gbu gboo ko a.

²⁶Wo konde n yen bɛ, an mbe ee chin fen chin, n mbe ee baa, an ni a a sɛ bea a. Chɛɛ chɛ gbɛɛ ɔ, Fa Yataa, min mbe banda bu ɔ, ɛ an da kɔ wan. Wo nan gbu sin benden mu kaka konde n ma.

²⁷Wo dɔndɔ wɛɛ, faa ni gbaa boo ɔ boo a 'a fɔɛ ko a, chɛ ee a ma tima kundu ɛnden bɛɛ ni sa a kun ma.

²⁸“N ma chia yen ni a ɔ, koe min mbe a ma, wo faa ɛ gbaa chii koa koe a. Wo fia ɔ kɔn chɛ n yen bɛ, miin mbe fu, an mbe koa buɛ min dɔ. An mbe ee wai chɛ, an sin mbe ee koa nyan an fandi ko a.

²⁹Chɛɛ n mbe a fɔ tena wo ye, mbɛ mansa Sɔɔmon[11] nyanden ni wɛɛ boo ɔ boo, koa nii a ma min ni nyin a ni che kɔn fu chɛ n dɔ.

³⁰Yataa an mbe kɔnɛ chɛ n ma chii, kɔnɛ min mu ɛ nɛ bi, mbɛ sinan a tɛ‑a, mbɛ wo‑a a minda. Ni ɛ ka wan, wo ma chii koe tana, a mu a ma gbɔsɔɛ an na. Wo 'a danaya ɔ dɔɔ gba.

³¹“Chɛ an‑na a fɔ, wo faa ma gbaa tima ɔ tima, wo ni bun a fɔ‑a, wo ɔ, wo e fen daun‑da, chɛ ma, wo e fen min‑da, chɛ ma, wo e fen chii‑a.

³²A mu min na, wo Fa Yataa‑a a ɔ sɔn fan, mbɛ wo gbɔsɔen fan mu chɛ n gbɛɛ ko a. Mɔɛ miin ma Yataa sɔn, an fan faa ɛ gbaa tima ɔ tima fen chɛ n ko a.

³³Chɛɛ wo e min ma, wo a ma wo ma gbɔsɔɛ a don koe a Yataa 'a mansaya kɔɔ, wo ni a faa ma koe ma. Ni wo‑a chɛ ma, ɛ to‑a wan nɔ, a ni fen chɛ n gbɛɛ be wo ma, miin ma gbɔsɔɛ ɛ wo ma.

³⁴Chɛ an‑na a fɔ, wo faa ma gbaa sinan ko a. A mu min na, sinan faagbaa bɛnden mu sinan fan ko a. Bi yakɔɔtawa, a‑a a bɔ bi tee chɛ ko a.”