Read Kono MAKI 10 Bible Online

MAKI 10 - Kono bible

MAKI 10

¹Chisɔsi ka‑a kɛn Kapanaun duu ɔ, a ta‑a wan Chudia chɛnyɛ ɔ, a ta Chɔdan yii gbaa chia a. Mbɛ fanka a kan‑da to a ma. A sin, yɔ a ni a ma buɛ min dɔ, a na‑a an kan fan.

²A sin, Chu mɔɛ dɔ nu, miin ni Fayisii n na, an na‑a wan a tena. An toen ni an ni a bia a chen kɔ. Mbɛ an dɔ, “Nn toen mu nn ni a ɔ sɔn, ni mmɔ 'a sawa dɔnden fan mu musu si kai ni a boo ka a 'a musu a.”

³Mbɛ Chisɔsi ɔ, “Sawa minan mbe Yataa 'a gboo ɔ, Mosisi na‑a min fɔ wo ye, a ma koe a?”

⁴Mbɛ an‑na a fɔ, an dɔ, “Mosisi‑a sawa min sa, a dɔnden fan mu nn ni nn 'na musu n boo ka. Koe min na mu, sawa chɛ ɔ te, e i 'a musu boo ka wan, ni i‑a siiya gboo be a ma, min mbe a ɔ yian, mbɛ i wan‑na i boo ka a a.”

⁵Mbɛ Chisɔsi ɔ, “Wo 'a tooɔgbɛa, an‑na a ma, Mosisi‑a sawa chɛ n nyɛn wo ko a.

⁶Chɛɛ Yataa 'a gboo ɔ te, mbɛ dunya a dan tima a, Yataa na‑a mɔ gbu fea an nyan, kai an fea musu a.

⁷Yataa 'a gboo ɔ te to, a ɔ, ‘Chɛ an fɛ mu, ni mɔ kaima‑a musu fuu, ɛ a de to wan, a basan a fa a, mbɛ an chɛ‑a an nyɔn dɔ, an fea a 'a musu a.’

⁸A ɔ, ‘A sin, an fea chɛ, an mbe ma‑a wan mɔ dɔndɔɛ a.’ Chɛ‑a a ɔ yian fan, mbɛ mɔ fea ma to an na, chɛɛ mɔ dɔndɔ gbe mu gbɛ an na.

⁹Chɛ an fɛ mu, fuu ɔ, ni Yataa‑a mɔ fea an chɛ an nyɔn dɔ, mɔ ɔ mɔ kan kɔ kan ma an tɛ du.”

¹⁰An yɛ‑a kɛn chenɛ a, a fɛ denɛ n‑na a ɔ tisa wan to, a si musu ɔ ban koe dɔndɔ gbe chɛ ma.

¹¹Mbɛ a ɔ an ma, “Mɔ kaima kan kɔ kan, min mbe ban‑da a 'a musu ɔ, a ni dɔ gbɛɛ si, a‑a waa an ma basan ka musu a, a ee fuu ɔ min na, Yataa ya a.

¹²Musu wɛɛ, ni a ban‑da a chɛɛ ɔ, a ni kai dɔ gbɛɛ sɔn, a wɛɛ‑a waa an ma basan ka kai a, a ee fuu ɔ min na, Yataa ya a.”

¹³Chɛ gbakɔ, mɔɛ dɔ n na‑a wan an 'na den mɛsɛ n na Chisɔsi tena. An toen ni a ni a boo bun an kun ma, a ni samunɛ chɛ an ko a. Chɛɛ a fɛ denɛ n‑na chɛ ɔ yen kɛn, an‑na mɔɛ chɛ n na gban fan.

¹⁴Chɛɛ Chisɔsi bu ɔ nii ma dia ni, chɛ ɔ yen koe a. Mbɛ a ɔ an ma, “Wo a ma den mɛsɛ n ni na n tena. Wo ma an ma bai. Koe min na mu, mɔɛ miin maen mu yɔ den mɛsɛ chɛ nu, Yataa an mbe ma‑a an 'na mansa a.

¹⁵N ni a ma din wo tena, mbɛ ni mɔ ɔ mɔ ma dɔn ni, a ni don Yataa 'a mansaya kɔɔ yɔ den mɛsɛ chɛ nu, an mɔɛ chɛ ee che ma‑a Yataa ta a.”

¹⁶Mbɛ Chisɔsi‑a den mɛsɛ chɛ n ya dɔndɔ dɔndɔɛ a. Ɛ an si a kaa ma, ɛ a boo bun an ma, ɛ ta‑a an dua‑a.

¹⁷Chisɔsi‑a a kuu sɔ kɛn ta‑a, a bɔ an kaina chɛ, kamin dɔndɔ na‑a bui chɛ‑a, mbɛ a bea‑a a chen kɔɔ. Mbɛ a ɔ, “Ticha, i wɛn mu mɔ chɛndɛ a, n mbe fen ma, n ni kuɔ fɔ fɔɛ ma sɔn?”

¹⁸Mbɛ Chisɔsi ɔ a ma, “E ma ka ma i ni n chee mɔ chɛndɛ a? Mɔ ɔ mɔ ma mɔ chɛndɛ a, mɔɔ dechee Yataa dɔndɔ gbe.

¹⁹I‑a sawa n sɔn fan, Yataa‑a miin be Mosisi ma. A ɔ, wo ma mɔ fa, ni sawa ma min fɔ ni. A ɔ, wo ma waa ma basan mɔɛ a, wo ee fuu ɔ min na, a ɔ, wo ma kanka chɛ, a ɔ, wo ma fania fɔ mɔ ɔ mɔ ma. A yɛ to, a ɔ, wo ma mɔ kafa, a sin, wo ni kooya be wo fa ma, a basan wo de a.”

²⁰Mbɛ kamin chɛ ɔ, “Ticha, n mbe wan sawa chɛ n gbɛɛ bia tena, aan a ka n den mɛsɛ tɔɛ ma a sɔ sanche ma.”

²¹Mbɛ Chisɔsi‑a kamin chɛ ma fɛn, a wakoe a dia‑a a ye. Mbɛ a ɔ kamin chɛ ma, a ɔ, “Ko dɔndɔ an to‑a, e min ma gbɛ. Ta, i ni i boo fenɛ gbɛɛ ma tachɛ. Mbɛ i‑a an kɔpɔɛ chɛ ya, i‑a a be yɔn tɔɛ n ma. Chɛ‑a a ma‑a wan, i ni nyanɛ ma sɔn banda bu ɔ. Ni i‑a chɛ ma, mbɛ i na‑a, i ma‑a n fɛ denɛ a.”

²²Kamin chɛ‑a bai chɛ a min kɛn, a ya kɔɔɛ ma‑a wan yama yama, mbɛ a yɛ‑a a waa a, faayɔn ba ɔ. Koe min na mu, nyan tɔ wa ni a a.

²³Mbɛ Chisɔsi‑a a fɛ denɛ n gbɛɛ ma fɛn a 'a tindanɛ, mbɛ a ɔ an ma, “A ɔ gbɛ kaka nyan tɔɛ n ko a, an ni don Yataa 'a mansaya kɔɔ.”

²⁴Chisɔsi fɛ denɛ n da ɔ gbaa‑a wan, a si a da a bai chɛ ma. Chɛɛ Chisɔsi ɔ an ma, “N 'na denɛ nu, don koe a Yataa 'a mansaya kɔɔ, a ɔ gbɛ ka.

²⁵A ɔ gbɛ kaka nyan tɔɛ ko a, a ni don Yataa 'a mansaya kɔɔ, a ni ben ninchi[19] don koe ma miichi woe a.”

²⁶Mbɛ bai gbu, a‑a an da a fa gban. Mbɛ an dɔ, “Mbɛ nyɔn mbe bauncha chɛ ma sɔn‑da gbɛ?”

²⁷Mbɛ Chisɔsi‑a an gbɛɛ ma fɛn, mbɛ a‑a a fɔ an ye, a ɔ, “Mɔ gbu ee che chɛ chɛ‑a, chɛɛ Yataa tana, ɛ an chɛ. Koe min na mu, Yataa ɛ che wan ko ɔ ko ma‑a.”

²⁸Mbɛ Pita bun‑da a fɔ‑a, a ɔ, “A yen ko, nn‑na nn kan kɔ sɔ fen kɔ fen na, mbɛ nn bea‑a i fɛ.”

²⁹Mbɛ Chisɔsi ɔ, “Ka n mbe chɛ ma din wo tena. Chenɛ ni ma, ni suun ma nyɔɛ nu, de nu an bɛ fa n na, denɛ nu, a basan sɛnɛ n na, an nyin fan. Chɛɛ mɔɛ min mbe chɛ dɔndɔ wɛɛ to‑a n ko a, a ni a to sakana bai chɛndɛ chɛ ko a,

³⁰Yataa ɛ a kɔ‑a wan. Fen chɛ n gbɛɛ sanche, chenɛ n ni ma, suun ma nyɔɛ nu, de nu an bɛ denɛ n na, a basan sɛnɛ n na, Yataa ɛ a kɔ‑a wan an na dunya chɛ ɔ, si tena chɛmɛ dɔndɔ ko a. Chɛɛ a tima dɔndɔ gbe chɛ kɔɔ, ko ma gbaaenɛ ɛ si‑a wan an na. A sin, Yataa ɛ kuɔ fɔ fɔɛ be‑a wan an ma dunya nama ɔ, min mbe na tena.

³¹Chɛɛ mɔɛ sɛsɛ nu, miin mbe sɔ ɔ ya ɔ sanche, Yataa ɛ an na yɛ‑a wan gbaa a. Mɔɛ miin sin mbe gbaa sanche, Yataa ɛ an sɔ‑a wan ya ɔ.”

³²Mbɛ an‑na chia bia, a sɛ Chuusaɛn duu ɔ. Chisɔsi an ni sɔ ɔ an ya ɔ. A sin, an da ɔ gbaaen fan ni. Mɔɛ chɛ n bɛɛ, miin ni a fɛ, chiandia ni wan an dɔ. Mbɛ a‑a a fɛ den tan kun ma fea chɛ n ya, a ta‑a an na kaina, an dechee, mbɛ a bun‑da a ɔ yian‑da an na, a si koe n ma, miin ni na tena a tan‑da Chuusaɛn duu ɔ.

³³Mbɛ a ɔ, “Mmɔ yen ko ta‑a gbɛ Chuusaɛn duu ɔ. An mbe n fan, Mɔ Gbu 'a Denɛ, an mbe n bia tena wan nɔ, mbɛ an‑na n ma tachɛ Chu n tɛ mɔɛ nu Yataa a, an 'na mansa n ma, a basan Chu n 'na sawa kan mɔɛ n na. An mbe kaa a tɛ‑a wan n bakoe ma, n fa koe a, mbɛ an‑na n be mɔɛ chɛ n ma, miin ma Chu mɔ n na.

³⁴A sin, an mbe n ma yɛn‑da wan, an ni an da yii chɛ n ma, an ni n bosa pien, mbɛ an‑na n fa. Chɛɛ ni an‑na chɛ ma, tee fea, a sawan bɔɛ ma, n mbe n kɔɔ sɔ‑a wan a ka saya ɔ.”

³⁵Mbɛ Chimisi n fea Chɔn na, kai Sɛbɛdi 'a denɛ nu, an na‑a Chisɔsi tena. Mbɛ an dɔ, “Kan mɔ, nn toen mu, nn ni i ɔ tisa, i ni koe an chɛ nn ye.”

³⁶Mbɛ Chisɔsi ɔ, “Fen koe sima mu, wo toen mu n ni min chɛ wo ye?”

³⁷Mbɛ an dɔ, “Tima min na e si‑a i 'a mansa sea ɔ, i 'a mansa wai chɛ koe a, nn toen mu nn dɔndɔ ni si i boo nyima ɔ, mbɛ dɔndɔ si‑a i manɛ ɔ.”

³⁸Chɛɛ Chisɔsi ɔ, “Wo ma a ɔ sɔn wo e fen dɔ tisa tena. Wo e kun fan wo ni ko yawaen chɛ ɔ bia, n mbe na tena min dɔ bia‑a?”

³⁹Mbɛ an dɔ, “Mm, nn mbe kun fan.” Mbɛ Chisɔsi ɔ an ma, “Ko yawaen chɛ, min mbe na tena n tan‑da, ɛ wo wɛɛ tan‑da wan.

⁴⁰Chɛɛ n mbe ee che n faa ma ya‑a, si koe a n baima n 'na mansaya ɔ. Fa Yataa an‑na an si tena chɛ ɔ bɛn, mɔɛ chɛ n ko a, a‑a a boo sɔ miin ma.”

⁴¹A fɛ den tanɛ tɔɛ chɛ n‑na bai chɛ a min kɛn, Chimisi an fea Chɔn‑na min fɔ, an faa tɛ‑a wan an ma.

⁴²Chɛɛ Chisɔsi‑a an gbɛɛ chee kaina dɔndɔ, mbɛ a ɔ, “Wo faa ma tɛ. Wo‑a a ɔ sɔn fan, mbɛ mansa nu, mɔɛ chɛ n ko a, miin ma Chu mɔ n na, an mbe an 'na gbasaya yian fan an na. An 'na ya ɔ sɔɛ n bɛɛ, gbasaya ɛ ka wan an boo ɔ an kun ma.

⁴³Chɛɛ a ee ka wo tɛ ɔ. Ni wo dɔndɔ wɛɛ toen mu, a ni ma mɔ chenama a wo tɛ, an mɔɛ chɛ ni a wandi ma bɔi denɛ a, wo gbɛɛ ko a.

⁴⁴Ni wo dɔndɔ wɛɛ sin toen mu to, a ni ma ya ɔ sɔɛ a, a tɔɛ chɛ n gbɛɛ ko a, an mɔɛ chɛ wɛɛ ni ma an 'na yɔnɛ a.

⁴⁵Koe min na mu, n fan, Mɔ Gbu 'a Denɛ wɛɛ, n ma na ni, mɔɛ n ni wai chɛ n ko a. Chɛɛ n na‑a, min mbe a ma, n ni mɔɛ n ma wai n chɛ. A yɛ to, n ni yɛ, n ni n fɔɛ be mɔ gbu n kun ka koe a.”

⁴⁶Mbɛ an che‑a Chɛiko duu ɔ. Chisɔsi n mbe kɛn bɔ‑a nɔ, an bɛ a fɛ denɛ n na, ni mɔ fanka miin ni an fɛ, an‑na kamin dɔndɔ tan fan si ɔ, chia kunɛ a. A tɔ ni Batimayɔsi, kai Timayɔsi 'a denɛ. Fion tɔɛ ni, a sin ni fenɛ an fuin.

⁴⁷A‑a a a min kɛn, mbɛ Chisɔsi, min ka‑a Nasaɛti duu ɔ, an mbe ka ben tena, a‑a yee tɛ gbankon, a ɔ, “Chisɔsi, i wɛn bɔ‑a Mansa Defidi 'a dambi ɔ,[20] chinchin n ma!”

⁴⁸Mbɛ mɔ sɛsɛ nu nɔ, an sɔnkɔ‑a wan a ma, an dɔ, a ni a da a tɔn. Chɛɛ a tima gbu a ni gbɛ, a‑a yee tɛ a ben a saa ma, a ɔ, “I wɛn bɔ‑a Mansa Defidi 'a dambi ɔ, chinchin n ma!”

⁴⁹Mbɛ Chisɔsi sɔ‑a, mbɛ a‑a a fɔ, a ɔ, “Wo a chee n ye.” Mbɛ an‑na ya te tɔɛ chɛ chee, an dɔ, “I faa ma yɔn, i kɔɔ sɔ, a yen ko i chee‑a.”

⁵⁰Mbɛ a‑a a 'a doma kun ma doma bɔ, a‑a a a dɛ. Mbɛ a tin‑da buɔdia a, a ta‑a Chisɔsi tena.

⁵¹Mbɛ Chisɔsi ɔ, “I toen mu n ni fen ko chɛ i ye?” Mbɛ ya te tɔɛ chɛ ɔ, “Kan mɔ, a ma n ya a ni ka.”

⁵²Mbɛ Chisɔsi‑a a fɔ a ye, a ɔ, “Ta, e ta tena kaina min, i 'a danaya‑a i baun.” A ya kɔɔɛ a, kamin chɛ‑a kaina yen gbadan, mbɛ a‑a a sɔ Chisɔsi fɛ, a 'a tachɛ chia ma.