Read Kono MAKI 6 Bible Online

MAKI 6 - Kono bible

MAKI 6

¹Mbɛ Chisɔsi ka‑a an kaina chɛ. A yɛ‑a a waa a, Nasaɛti duu ɔ, an bɛ a fɛ denɛ n na.

²Chu n 'na suin tee ma, Chisɔsi‑a mɔɛ n kan fan an 'na samun chɛ chenɛ a. Mɔɛ n ni kɔkoo wan nɔ, a ni kanɛ chɛ tena tima min na. An sin, kɛn an ban‑da a da a kuiɛ a min‑da, a 'a kan chɛ buɛ‑a an da a fa wan. An dɔ, “A e na ka mende kan chɛ buɛ bonda chɛ a? Yiimatɛ chɛ sima, min been mu ka a ma, kɔndɔfii mu. Mɔ ma a ɔ sɔn, ɛ kamaya ko wa chɛ n ma buɛ min dɔ.”

³Mbɛ an dɔ, “N bɔ, ka wɛ, kapinda gbama an nɛ. Mɛi 'a denɛ an nɛ. Nyɔn ma a dɔɛ n sɔn? Chimisi ni ma, ni Chosɛfi, ni Saimɔn, a basan Chudasi a. Mmɔ bɛ an mbe sɛ, mmɔ ɛ yii, mmɔ bɛ a tensa n na.” Chɛ‑a a ma wan, an nii ma an boo si ni a kɔɔ.

⁴Chɛɛ Chisɔsi ɔ an ma, mbɛ, “Mɔɛ n mbe basɔmaya be wan Yataa 'a gbonka chɛ mɔɛ ma kaina dɔ mende nu. Chɛɛ basɔmaya ee a ma, a ta suun duu ɔ, a ee ma a ma, a tuna tuna n tena, ni a suun chenɛ wandi gbu da a.”

⁵A nii ma kun ni, kamaya ko kan kɔ kan ma koe a nɔ. A‑a min ma dechee, a na‑a a boo bun gbandi mɔɛ dɔ n fan ma, mbɛ an baun‑da.

⁶A ɔ sɔn koe Chisɔsi boo ɔ, mbɛ a 'a mɔɛ n ma dan ni a a podon, tɛnɛ ko wa ni. Mbɛ Chisɔsi ta‑a duu n dɔ, nɔ a a tindanɛ. A ta‑a mɔɛ n kan koe a, a si Yataa ma.

⁷Mbɛ a‑a a fɛ den tan kun ma fea chɛ n na kan, a‑a an sɔ, fea fea a. A‑a gbasaya be an ma, nyina yama n gbain koe a mɔɛ n fɛ.

⁸A ɔ an ma, “Wo ma ta fen kɔ fen na wo boo ɔ ta chɛ ɔ, mɔɔ tachɛ chɛ tun gbɔɛ. Wo ma ta daun fen na, wo ma ta bɔɔɛ a, wo ma ta kɔpɔ wɛɛ a wo 'a pɔchiti n dɔ.

⁹Wo kɔɔwa n fan don wo chenɛ n na, chɛɛ wo ma ta doma dɔ gbɛɛ a.”

¹⁰A ɔ te to an ma, “Ni an‑na wo yia chen kan kɔ kan na, wo ma an chen chɛ an na aan, wo ni bɔ an duu chɛ ɔ.

¹¹Ni wo ta‑a duu kan kɔ kan dɔ, min dɔ mɔɛ n ma an boo si ni wo kɔɔ, an gbu ma an too ma sɔ ni wo da a kuiɛ ma, wo bɔ nɔ. Ni wo ma‑a bɔ‑a, wo wo chenɛ a gbɔngbɔn fifii chɛ a, min mbe ma‑a dasi a an tena, mbɛ an mbe ka a ma an na Yataa faa ni tɛ an ma.”

¹²Mbɛ an gbɛɛ ta‑a, an‑na Yataa bai sa, an dɔ, an ni an kan kɔ sɔ an 'na ko yama n na.

¹³An‑na nyina yama sɛsɛ gbain fan mɔɛ n fɛ. A yɛ to, an‑na tu sin fan gbandi mɔɛ n ma, an‑na an baun gbandi n dɔ.

¹⁴Chisɔsi ma tɔ chɛndɛ ta‑a wan kan kɔ kan. Mbɛ a che‑a Mansa Ɛdɔdi[10] ma, a‑a a ma tɔɛ a min. Mɔɛ dɔ n ni a fɔ wan, an dɔ, “Chɔn min ni yii chɛ mɔɛ n kunɛ ɔ, Yataa chia a, an yɛ‑a ka to fɔɛ ɔ. Chɛ an fɛ mu, gbasaya chɛ sima ɛ a boo ɔ, kamaya ko chɛ n ma koe a.”

¹⁵Dɔ n sin, an dɔ, “Idaicha an nɛ.” Dɔ n sin bɔ‑a nɔ, an dɔ, “Yataa 'a gbonka chɛ mɔɛ an nɛ, yɔ gbonka chɛ mɔɛ chɛ n dɔndɔ suun pɔɔ.”

¹⁶Mansa Ɛdɔdi na‑a a ma tɔɛ a min kɛn, a ɔ, “Chɔn fan nɛ. N na‑a a ma wan, an‑na Chɔn kunɛ tɛ a a. Chɛɛ a‑a a kɔɔ sɔ to, a ka saya ɔ.”

¹⁷Mansa Ɛdɔdi wandi gbu, an na‑a mɔɛ n sɔ Chɔn bia‑a. A sin fan‑na a fɔ, an ni a sa yɔɔɛ a, pimbi chenɛ a. Mansa Ɛdɔdi na‑a chɛ ma Ɛdɔdiyasi an fɛ, a dɔɛ Fiipi 'a musu. A na‑a chɛ ɔ sɔn bɛɛ boo ɔ boo, a‑a a ma wan a 'a musu a.

¹⁸Chɔn gboo ɔ nii ma fa ni, a fɔ koe a Mansa Ɛdɔdi ye pɛpɛ, mbɛ tea ko nii ma, a ni a dɔɛ a musu bɔ a boo ɔ.

¹⁹Chɛ ko a, Chɔn ko don‑da wan Ɛdɔdiyasi ma kaka, a sin, a toen ni an ni Chɔn fa. Chɛɛ Mansa Ɛdɔdi an na‑a a ma, a nii kun Chɔn fa koe a.

²⁰Mansa Ɛdɔdi chianden fan ni Chɔn bakoe ma. Koe min na mu, Chɔn ni mɔ tandenɛ an na, Yataa chen kɔɔ, min ni tenchen Yataa ko a. Chɛ na‑a a ma wan, Mansa Ɛdɔdi‑a a konde gbain. A toen ni a too ma sɔ koe a, Chɔn ni ma koɔ‑a. Chɛɛ chɛ gbɛɛ ɔ, a da a bai ni Mansa Ɛdɔdi kɔndɔ fii wan, tima ɔ tima ko a.

²¹A danka a, Ɛdɔdiyasi‑a chia yen Chɔn ma. Mansa Ɛdɔdi suun tee che‑a, mbɛ a‑a daun chɛ bɛnɛ ɔ bɛn, a 'a mɔ chenama n ko a. A 'a chɛnyɛ mansa nu, soya n ya ɔ sɔɛ nu, a basan gbakoo n na, miin ni Kadidi chɛnyɛ ɔ.

²²Mbɛ Ɛdɔdiyasi 'a den musuenɛ ta‑a bɛn chɛ ɔ, a‑a a don nyima nyima. Chɛ‑a a ma wan, Mansa Ɛdɔdi bu ɔ dia‑a, an bɛ a 'a sonda n na. Chɛ ko a, Mansa Ɛdɔdi ɔ a ma, “I toen mu, n ni fen ko chɛ i ye? Ko ɔ ko e n dɔ tisa‑a min chɛ koe a i ye, n mbe an chɛ‑a.”

²³Mansa Ɛdɔdi‑a a kai wan, fanka chɛ ɔ den, gba sɛsɛ ko a. A ɔ, “A ni ma n ma gboo a, ni n ma fen kɔ fen be ni i ma, e n dɔ tisa‑a min ko a. A ni ma n 'na chɛnyɛ chɛ tɔnfɛ dɔndɔɛ wɛɛ a.”

²⁴Mbɛ den musuen chɛ bɔ‑a, a ta‑a a kun puin a de ma, a ɔ, “N de, n ni a ɔ tisa fen ko chɛ koe a n ye?” A de ɔ, “Chɔn, min ni yii chɛ mɔɛ n kunɛ ɔ, Yataa chia a, a kunɛ.”

²⁵Den chɛ yɛ‑a bui‑a mansa tena, mbɛ a ɔ, “Chɔn, min mbe yii chɛ mɔɛ n kunɛ ɔ, Yataa chia a, a kunɛ. N toen mu an na, sanche wɛɛ i gba chɛ ɔ, an ni a be n ma piiti ɔ.”

²⁶Bai chɛ na‑a a ma wan, mansa faa yɔn‑da kaka. Chɛɛ a nii che to ban‑da, koe min na mu, a ban‑da gbɛ a kai‑a fanka ɔ, a‑a sonda n gbɛɛ tɛ ɔ.

²⁷Chɛ ko a, soya mɔɛ min ni a baima, a‑a a sɔ wan dɔndɔ gbe. A ɔ, an ni na Chɔn kunɛ a. Mbɛ soya mɔɛ chɛ ta‑a pimbi chen chɛ a, mbɛ a‑a Chɔn kunɛ tɛ a a.

²⁸Mbɛ a na‑a a kun chɛ a, ɛ sa ɔ piiti ɔ. Mbɛ a‑a a be den musuen chɛ ma. Mbɛ a ta‑a, a‑a a be a de ma.

²⁹Chɔn fɛ denɛ n‑na a fa koe a min kɛn, an na‑a wan, an‑na a su ya, an ta‑a a a, mbɛ an‑na a tɔn.

³⁰Mbɛ Chisɔsi 'a sɔ mɔɛ chɛ n yɛ‑a, an‑na a tan. An‑na a ɔ yian fan a a, an na‑a koe min gbɛɛ ma, a yɛ to, an na‑a mɔɛ n kan buɛ min dɔ.

³¹A tima chɛ a, mɔ sɛsɛ ni na wan, an mbe Chisɔsi tan, an mbe yɛ, an mbe na. Chɛ na‑a a ma wan, an bɛ a fɛ denɛ n na, tima wɛɛ gbu nii nɔ, daun chɛ koe wɛɛ a. Mbɛ a ɔ, “Mmɔ ta kaina, mmɔ dechee, mmɔ ɛ mmɔ suin kaina, tima kunduen ko a.”

³²Mbɛ an dechee si‑a dɛndɛ ɔ, an ta‑a pɔɔ, mɔ ɔ mɔ nii kaina min.

³³Chɛɛ chɛ gbɛɛ ɔ, mɔ sɛsɛ na‑a an ta koe kɔɔ sɔn fan, an sin na‑a a ɔ sɔn fan, mɔɛ min nyɔn sima ni ka ta‑a. Chɛ ko a, mɔɛ n ka‑a wan duu n gbɛɛ ɔ, an ta‑a an chenɛ ma, an ya ɔ. A sin, an‑na a fo wan Chisɔsi ya ɔ, an bɛ a fɛ denɛ n na.

³⁴Chisɔsi bɔ‑a dɛndɛ ɔ kɛn, mbɛ a‑a mɔ fanka wa chɛ yen. Mbɛ chinchimaya koa‑a a faa ɔ, an ko a. Koe min na mu, a na‑a an yen fan, yɔ sa nu, miin kun ma fɛn mɔ ee. Mbɛ a bun‑da an kan‑da ko sɛsɛ a.

³⁵Tee bea ma, a fɛ denɛ n na‑a wan a tena, an dɔ, “Kan mɔ, tima taen mu gbɛ. A sin, nɛ chɛ ee duu baima.

³⁶Ɛ nyan fan i ni mɔɛ chɛ n na ta konko chɛ n dɔ mmɔ 'a tindanɛ, an ni daun fenɛ san, a daun koe a.”

³⁷Chisɔsi ɔ, “Wo wandi gbu, wo fen den be an ma, an ni a daun.” Mbɛ an dɔ, “Wuo! Nn mbe ee kun kau sɛi pawa[11] ma sɔn‑da, nn ni biidi samba sɛsɛ san, an da kɔ koe a.”

³⁸Mbɛ a ɔ an ma, “Wo ta, wo ni a ɔ yen, ni biidi yuu ɛ wo boo ɔ.” An ta‑a kɛn, an‑na a ɔ gbɛ, an yɛ‑a wan, an dɔ, “Fenɛ min mbe dechee nɛ nn boo ɔ, an mu biidi duu a, ni nyɛ fea.”

³⁹Mbɛ Chisɔsi ɔ a fɛ denɛ n ma, a ɔ, an ni a ma, mɔɛ chɛ n ni si, an kuunɛ ma bin gbii ɔ.

⁴⁰Mbɛ mɔɛ chɛ n si‑a an gbee ma ta‑a, mɔ chɛmɛ dɔndɔ, dɔndɔ, ni mɔ bi duu, duu.

⁴¹Mbɛ a‑a biidi duu chɛ ya, a basan nyɛ fea chɛ a, a‑a a ya a si banda a, mbɛ a‑a tando be Yataa ma daun fen chɛ ko a. Mbɛ a‑a biidi chɛ ɔ kai kai, mbɛ a‑a a be a fɛ denɛ n ma, a du du koe a mɔɛ chɛ n ma. Mbɛ a fɛ den chɛ n‑na a ɔ du du mɔɛ chɛ n ma. Nyɛ fea chɛ wɛɛ, a‑a a ɔ du du wan mɔɛ gbɛɛ ma.

⁴²Mɔ ɔ mɔ‑a daunɛ chɛ wan, a bu fa‑a gban.

⁴³Mbɛ a fɛ denɛ n‑na an da tɔɛ a sɔn. An da tɔɛ chɛ, biidi basan nyɛ a, a bɛn‑da wan samba fa tan kun ma fea.

⁴⁴Mɔ kaima miin ni an tɛ ɔ, miin‑na daun chɛ chɛ, an mɔ wu duu ni.

⁴⁵Mbɛ Chisɔsi fɛ denɛ nu, an ban‑da mɔɛ chɛ n da tɔɛ chɛ a sɔn‑da. A ya kɔɔɛ a, a‑a an na ta a ya ɔ. An ta‑a dɛndɛ ɔ, yii kaka dɔndɔɛ ma, a don Besaida duu ɔ. A wandi sin to‑a a saa‑a mɔ fanka chɛ n na, an ta koe a an baa nu.

⁴⁶A‑a a saa kɛn mɔɛ chɛ n na, mbɛ a sɛ‑a kɔnkɔ dɔndɔ kun tɛ, a dɔndɔ gbe, samunɛ chɛ koe a.

⁴⁷Fitii che‑a ka wan, a dɔndɔ gbe ɛ nɔ tun tindi ma. Chɛɛ dɛndɛ chɛ sin, a ni gbɛ yii wa chɛ tɛ tɛ ma wan, a fɛ den chɛ n na.

⁴⁸Sayi ma pimbi ɔ, tɛ kɔn saa n konchee tima a, Chisɔsi‑a a ɔ yen fan, mbɛ a fɛ denɛ n ni tɔɔya tena wan an 'na dɛndɛ wii koe a. Koe min na mu, an ni ta tena fia ya teen ma wan. Chɛ na‑a a ma wan, Chisɔsi tachɛ‑a yii chɛ a tan den tan den, a ta a fɛ den chɛ n tena. Ɛnden fan na‑a to, a ni ben an ma.

⁴⁹Chɛɛ an‑na a yen kɛn na‑a yii chɛ a, an yiima a ma ko ni. An‑na yee tɛ wan, an dɔ, “Fuɛ yen ko na‑a e!”

⁵⁰Chiandia‑a an gbɛɛ gboo fa wan gban, an‑na a yen kɛn. Mbɛ a ya kɔɔɛ a, Chisɔsi koɔ‑a an tena, a ɔ, “Wo sɛmbɛ ka kaina chɛ an yee tɛ‑a. N fan mu, wo ma chian.”

⁵¹Mbɛ a sɛ‑a dɛndɛ ɔ an baima, mbɛ fia wa chɛ ɔ tɛ‑a. An fɛ den chɛ n da ɔ gbaa‑a wan, koe chɛ n na.

⁵²Koe min na mu, an nii ma a ɔ gbɛ ni, biidi gbugbu duu da a koa‑a koe Chisɔsi boo ɔ, a sien mu koe min ma.

⁵³Mbɛ an‑na yii wa ɔ tandin, an che‑a tindi ma kaina dɔndɔ, min tɔ ni Kɛnesayɛti. Mbɛ an‑na dɛndɛ yuu chii nɔ.

⁵⁴An to‑a bɔ tena wan dɛndɛ ɔ, a ya kɔɔɛ a, mbɛ nɔ mɔɛ nu, an‑na a ɔ sɔn mbɛ Chisɔsi ɛ wan an tɛ ɔ.

⁵⁵Mbɛ an ben‑da defe an tanda chɛ gbɛɛ ɔ. A sin, ni an na‑a Chisɔsi ma tɔɛ a min kan kɔ kan, an ni na wan, an mbe a tan gbandi mɔɛ n na, sa ɔ yaa ɔ.

⁵⁶A sin, Chisɔsi ni ta kaina miin gbɛɛ, a ni ma konko n na, a ni ma duu wa n na, chɛ ma, sɛnɛ n dɔ, mɔɛ n ni ta wan gbandi mɔɛ n na a tena. Machiti n bɛɛ ɔ, an ni a tan fan. An ni Chisɔsi disa wan, min mbe a ma, a ni a ma, gbandi mɔɛ chɛ n ni tu a 'a doma kai chen kana wɛɛ a. A sin, gbandi mɔɛ miin gbɛɛ tu‑a a a, an baun‑da wan.