Read Kono MAKI 7 Bible Online

MAKI 7 - Kono bible

MAKI 7

¹Chu mɔɛ dɔ nu, miin ni Fayisii n na, an bɛ Chu n 'na sawa kan mɔɛ dɔ n na, an na‑a ka wan Chuusaɛn duu ɔ. Mbɛ an na kan‑da Chisɔsi 'a tindanɛ.

²An na‑a a ɔ yen fan, mbɛ an woo mɔɛ n‑na kanɛ min to an boo ɔ, Chisɔsi fɛ denɛ dɔ n nii bea tena an kan chɛ fɛ. Koe min na mu, an fɛ den chɛ nu, an mbe ee an boo a ko a chia ma, yɔ kan chɛ‑a a fɔ buɛ min dɔ, mɔ e na daunɛ chɛ. (

³Koe min na mu, Fayisii nu, ni Chu mɔɛ tɔɛ nu, an mbe bea sawa chɛ n fan fɛ, an woo mɔɛ n‑na miin to an boo ɔ. An mbe ee fen kɔ fen daun, ni an ma an boo a ko ni, a chia ma.

⁴A sin, an gbu ee daun fen daun, ni an ka‑a machiti ɔ, mɔɔ ni an‑na an fandi ko pɛn. Sawa n ni kɔkoo, an na‑a miin ma sɔn, an sin ni bea wan an fɛ. Sawa nu, yɔ mɔɛ ɛ a boo a ko buɛ min dɔ, a chia ma. A yɛ to, kɔpu nu, da nu, pani kumusu nu, a basan sofa n bɛɛ ta sawa n na).

⁵Mbɛ Fayisii n bɛ sawa kan mɔɛ n na, an‑na Chisɔsi ɔ tisa, an dɔ, “Mmɔ woo mɔɛ n‑na kanɛ min to mmɔ boo ɔ, a nyin fan mɔ ɔ mɔ ko a. Chɛɛ i fɛ denɛ n‑na an fandi bɔ kan chɛ kɔɔ. Koe min na mu, an mbe ee an boo a ko a chia ma, yɔ kan chɛ‑a a fɔ buɛ min dɔ, mɔɛ e na daunɛ chɛ. I‑a chɛ yen ka ma?”

⁶Mbɛ Chisɔsi ɔ an ma, “Yataa 'a gbonka chɛ mɔɛ Aisaya na‑a min fɔ suun, a si wo ma, a teaen ni gba! Nɛnɛn fea ti mu wo a, yɔ a na‑a a nyɛn buɛ min dɔ, mbɛ, ‘Yataa ɔ te, a ɔ, wo e basɔmaya be dechee a ma wo da ɔ wan. A ɔ, chɛɛ a wakoe ee wo faa ɔ.

⁷Wo e samun gbama an chɛ a tena, koe min na mu, wo e mɔɛ n kan gbɛ wo ta kanɛ an na, wo e ta‑a a ma‑a, yɔ a 'a sawa‑a a fɔ ka wan.’ ”

⁸Chisɔsi ɔ, “Wo ta sin, wo e Yataa 'a sawa to wan, mbɛ wo bea‑a wo ta kanɛ fɛ.”

⁹A ɔ te to an ma, “Yiimatɛ chia ɛ wan wo boo ɔ, wo kunɛ bɔ koe a Yataa 'a sawa n kɔɔ, min mbe a ma, wo ni bea wo ta sawa n fɛ.

¹⁰Mosisi na‑a a fɔ wan, a ɔ, ‘Wo ni kooya be wo fa ma, a basan wo de a.’ A yɛ to, a ɔ, ‘Ni mɔ ɔ mɔ‑a bai yama sa a fa ma ni a de, wo ni an mɔɛ chɛ fa.’

¹¹Chɛɛ wo tana, wo e mɔɛ n kan fan, an ni chɛ fɔ an fa n ye, a basan an de n na. Mbɛ an toen ni, an ni fenɛ min be an ma, min ma gbɔsɔɛ ɛ an ma, an ban‑da a be‑a Yataa ma.”[12]

¹²A ɔ, “Wo e kafai be wan mɔɛ chɛ ma, a ma na koe chɛ a fa ye, chɛ ma, a de ye.

¹³Chia chɛ a mu, wo e kanɛ min chɛ mɔɛ n na, ɛ a ma mɔɛ n ni Yataa bai to, mbɛ an bea wo ta fɛ. Ko dɔ mende n sin mbe wan to nɔ, yɔ chɛ, wo e miin ma tena.”

¹⁴Mbɛ Chisɔsi‑a mɔ fanka chɛ n chee to a tena. A ɔ, “Wo gbɛɛ, wo wo too ma sɔ, n da a bai ma, wo ni a ɔ gbɛ.

¹⁵Mɔ gbu e min don i da a, an mbe ee a ma, i ma ni nyamui Yataa ya kɔɔ, fɔ e min‑na bɔ i da ɔ.”[13]

¹⁷A‑a mɔ fanka chɛ n to kɛn, mbɛ a don‑da chenɛ a, a fɛ denɛ n‑na a ɔ tisa wan, an dɔ, a ni a da a bai chɛ fasai an ye.

¹⁸Chisɔsi ɔ an ma, “Wo e ka n fɛ wan, chɛɛ chɛ gbɛɛ ɔ, wo yiima ma tɛ ni, a ni ben mɔɛ tɔɛ n ma. Wo ma chɛ ɔ gbɛ ni? Mɔ gbu e min don i da a, an mbe ee a ma, i ma ni nyamui Yataa ya kɔɔ, fɔ e min na bɔ i da ɔ.

¹⁹Koe min na mu, mɔ gbu ɛ fenɛ min daun, a ee ta a faa ɔ wan. Chɛɛ ɛ yii mɔ bu ɔ wan, mbɛ a ta‑a kumbai a kanɛ ɔ.” (Chisɔsi‑a a fɔ wan ka, mbɛ daun fenɛ kan kɔ kan nyin fan, a daun koe a).

²⁰Mbɛ a ɔ te to, “Fenɛ min mbe bɔ mɔ gbu faa ɔ, an mbe a ma, a ma ni nyamui Yataa ya kɔɔ.

²¹Koe min na mu, mɔ gbu bu ɔ mu, a faa ɔ, ko yama n mbe bɔ. Yiinachii yama nu, miin mbe mɔɛ sɔ ko tɛ ma, kanka chɛ, ni mɔ fa koe.

²²A ni ma waa ma basan koe an na mɔɛ a, mɔ ee fuu ɔ min na, bɛncha mu, a basan ko yama tɔɛ gbɛɛ a. Mɔɛ bun koe, kan baiya, toomaya, tɔ ɔ tɛ yama chɛ, yonka, wooya.

²³Ko yama chɛ n gbɛɛ, an mbe bɔ mɔ gbu faa an dɔ. An sin fan mbe a ma, mɔ gbu ma ni nyamui Yataa ya kɔɔ.”

²⁴Mbɛ Chisɔsi ka‑a nɔ, an bɛ a fɛ denɛ n na, mbɛ an ta‑a tanda ɔ, Taya duu wa a tindanɛ. A don‑da chenɛ a, a sin nii ma to ni, mɔ ɔ mɔ ni a ɔ sɔn, mbɛ ɛ wan nɔ. Chɛɛ a nii ma che ni to‑a an nun chɛ ɔ.

²⁵Mbɛ musu dɔndɔ, nyina yama ni min 'na den musuenɛ fɛ, a‑a Chisɔsi ma tɔɛ a min. Mbɛ a ya kɔɔɛ a, a na‑a a tena, mbɛ a bea‑a a chen kɔɔ.

²⁶Chu mɔ nii ma an musu chɛ a. A sin, a suun‑da Siyia chɛnyɛ ɔ wan, Fonisia tanda ɔ. A‑a Chisɔsi disa wan, nyina yama chɛ gbain koe a 'a den chɛ fɛ.

²⁷Chɛɛ Chisɔsi ɔ, “Den mɛsɛ n ni daunɛ chɛ pɛn. A ma nyin, mɔɛ ni den mɛsɛ n 'na daun fenɛ bɔ an da a, a ni a be wuu n ma.”

²⁸Chɛɛ musu chɛ ɔ, “Kai, wuu gbu wɛɛ ɛ ma si ɔ den mɛsɛ n baima, ni an da a pɛɛ bea‑a duu ma, an mbe a daun fan.”

²⁹Mbɛ Chisɔsi ɔ te gbɛ, “I da a bai chɛ ko a, yɛ i waa chenɛ a. I‑a a tan‑da wan, nyina yama chɛ kaenɛ ɛ gbɛ i 'a denɛ fɛ.”

³⁰Musu chɛ yɛ‑a a waa a, mbɛ a‑a a 'a denɛ tan sa ɔ sofa ma, nyina yama gbu nii to a fɛ.

³¹Mbɛ Chisɔsi bɔ‑a Taya duu baima, mbɛ a ben‑da Sidon duu bu ɔ. Mbɛ a ta‑a chɛnyɛ dɔndɔ ɔ, an ni min chee, an dɔ, Duu Tan. A don‑da a ɔ, mbɛ a che‑a Kadidi yii wa ma.

³²Mɔɛ dɔ n na‑a kaminɛ a, Chisɔsi tena, min too nii koe a min, a sin, a koɔ koe wɛɛ ni gbɛɛ. An na‑a Chisɔsi ma nande wan, an dɔ, a ni a boo bun a ma, a baun koe a.

³³Mbɛ Chisɔsi‑a mɔ kaima chɛ ya, a ka‑a a fanka chɛ baima. Mbɛ a‑a a boo don kamin chɛ too fea ɔ. Mbɛ a‑a a da yii a bɔ, mbɛ a tu‑a mumun chɛ nɛnɛnɛ a.

³⁴Mbɛ Chisɔsi‑a a ya a sɛ banda a. Mbɛ a kuun‑da dioo. Mbɛ a ɔ kamin chɛ ma, “A ɔ ni ka.”[14]

³⁵A ya kɔɔɛ a, kamin chɛ che‑a koe a min‑da. A yɛ to, a koɔ koe min ni gbɛɛ ka, a bun‑da koɔ‑a chɛndɛ chɛ.

³⁶Mbɛ Chisɔsi‑a a fɔ mɔɛ chɛ n ye, a ɔ, an ma a ɔ yian mɔ ɔ mɔ a. Chɛɛ a ni a fɔ buɛ min dɔ an ye, an ni ben ka wan a ɔ yian‑da mɔ dɔ gbɛɛ n na.

³⁷A sin, mɔɛ miin gbɛɛ na‑a a min, an da ɔ gbaa‑a wan gbechee. An dɔ, “Gba! A kosan a 'a wai chɛ‑a. Ɛ a ma wan too gbee tɔɛ wɛɛ ni koe a min, mumunɛ ni koɔ.”