Read Kono DUKU 1 Bible Online

DUKU 1 - Kono bible

DUKU 1

¹Koe miin ma‑a suun, mɔ sɛsɛ n ya‑a a ɔ yen fan, a ka a kuu sɔ tena. An mɔɛ chɛ n dɔ n sin, an‑na an koe n na ben fan nn tena. Koe min na mu, Yataa 'a sakana a ben mɔɛ ni an na. Mɔɛ dɔ nu, miin‑na koe chɛ n na min, an si‑a wan, an‑na a nyɛn gboo ɔ.

³N bɛɛ, n‑na an koe chɛ n ma mɛn fan chɛndɛ chɛ, a ka an kuu sɔ tena ma. Chɛ an‑na a ma, kai Tɛyɔfidɔsi, n sin mbe an bɔ tena a gbee ma gbɛ gbɛ, n ni a nyɛn i tena,

⁴min mbe a ma, i wɛɛ ni a ɔ gbɛ chɛndɛ chɛ. I ni a ɔ gbɛ, tea min mbe koe chɛ n gbaa, i kan‑da miin ma. N bɛɛ, n mbe ka gbɛ koe chɛ n fan nyɛn‑da i tena, n‑na koe miin kɔɔ gbɛngbɛn.

⁵Tima min na Ɛdɔdi[1] ni mansa a Chu chɛnyɛ gbɛɛ kun ma, mɔɛ ni wan nɔ, min ni Chu n tɛ ɔ Yataa a, a tɔ ni Sakaaya. A 'a wai chɛ dɔbɛnɛ tɔ ni Abicha dɔbɛnɛ. A 'a musu tɔ ni Disabɛti. A wɛɛ na‑a bɔ mɔ kuun chɛ n fan tɛ ɔ, miin ni Chu n tɛ mɔɛ n na Yataa a.

⁶Sakaaya tanden fan ni Yataa tena, an fea a 'a musu Disabɛti a. A sin an 'na fɔɛ gbɛɛ ɔ, an ni Mansa Yataa 'a sawa n gbɛɛ bia wan.

⁷An fea gbɛɛ chenanchaen fan ni gbɛ, chɛɛ den nii an boo ɔ, koe min na mu, Disabɛti gbandayaen fan ni.

⁸Tee dɔndɔ a, Sakaaya ni wan a 'a tɛ mɔ wai chɛ tena Yataa 'a kata[2] ɔ, an bɛ a bɔɛ n na, an fɛn ni Abicha wai chɛ bɛnɛ ɔ nɔ.

⁹Mɔ dɔndɔ an ni don Mansa Yataa 'a chenɛ a, fen kunyɛ a diama minda koe a tee ɔ tee a. A tee chɛ ma, yɔ an 'na manda‑a a fɔ buɛ min dɔ, a bɔɛ n boo bɛn‑da an ma, don koe a a minda‑a.

¹⁰Mɔ sɛsɛ ni wan baa ma samun chɛ‑a, kɛn Sakaaya ni fen kunyɛ a diama chɛ minda tena.

¹¹Mbɛ a ya kɔɔɛ a, Mansa Yataa 'a maeka bɔ‑a wan a ya a, ɛ sɔ ɔ gbengbe boo nyima ɔ, Sakaaya ni fen kunyɛ a diama chɛ minda tena min ma.

¹²Sakaaya‑a a yen kɛn, a kɔndɔ fii‑a wan kaka, mbɛ a chian‑da a ɔ benden ba a.

¹³Chɛɛ maeka chɛ ɔ, “Sakaaya, i ma chian, koe min na mu, Yataa‑a i 'a samunɛ a min. I 'a musu Disabɛti ɛ den kaienɛ suun‑da wan i ye. A tɔɛ ni ma Chɔn.

¹⁴Wo bu ɔ dia‑a wan kaka, ni den chɛ suun‑da. Mɔ sɛsɛ n bɛɛ bu ɔ dia‑a wan.

¹⁵Koe min na mu, ɛ ma‑a wan mɔ chenama a Mansa Yataa tena. A ma gbɛ kan kɔ kan min. A de e na to a suun‑da, Yataa Nyina ɛ ma‑a wan den chɛ fɛ gban.

¹⁶Ɛ a ma‑a wan Isɔɛɛ[3] mɔɛ sɛsɛ n ni yɛ an 'na Mansa Yataa chen kɔɔ.

¹⁷Yataa Nyina ɛ gbasaya be‑a wan a ma, yɔ a‑a a be buɛ min dɔ Idaicha ma, min ni a 'a gbonka chɛ mɔɛ a suun. Ɛ na‑a wan Mansa Yataa ya ɔ, mɔ sɛsɛ n sɔ koe a chia ma. Ɛ a ma‑a wan, denɛ n ni na kuiɛ a kanɛ ɔ, an bɛ an fa n na. Ɛ a ma‑a wan to, tooɔgbɛa tɔɛ n bɛɛ ni bea tea fɛ, yɔ mɔ tandenɛ nu.”

¹⁸Chɛɛ Sakaaya ɔ, “N mbe kun ka ma, n ni dan chɛ a? N chenancha buɛ chɛ, nn fea n 'na musu a.”

¹⁹Mbɛ maeka chɛ ɔ, “N fan mu Chebɛɛ a. Yataa baima sɔ mɔɛ mu n fan na, a 'a wai chɛ koe a. A sin, a wan‑na n sɔ koɔ koe a i tena, a 'a sakana bai chɛndɛ chɛ a ben koe a.

²⁰Chɛ an fɛ mu, i ma danɛ min chɛ ni ka n na, a yen ko gbɛ, ɛ ma‑a ka wan. A ka gbɛ sanche ma, e ma‑a mumuncha an dɔ, a che a tee chɛ ma, n 'na sakana bai chɛ ɛ bɔ‑a a a tima min na. A sin ko ɔ ko ma‑a wan, yɔ ɛ ma buɛ min dɔ, a ma tima ma.”

²¹A tima chɛ a, mɔɛ chɛ n ni wan Sakaaya ma kɔn tena baa ma. An ni wan an yiinachii a, fen mu ɛ mɛ tena ka Yataa 'a chen chɛ a.

²²A bɔ‑a kɛn, a ma che ni koɔ‑a an tena. A bun‑da koe siman‑da a boo a, chɛɛ a ma che ni bai dɔndɔ wɛɛ fɔ‑a. A tima a mu, mbɛ an‑na a ɔ sɔn, mbɛ a‑a kamaya koe an dɔ yen Yataa 'a chen chɛ a.

²³A‑a a ta tima ban Yataa 'a tɛ mɔ wai chɛ chɛ‑a, mbɛ a yɛ‑a a waa a.

²⁴Tima ɛnden gbakɔ, a 'a musu Disabɛti‑a bu ya wan. A ma bɔ ni chenɛ a aan kau duu, a ɔ,

²⁵“Mansa Yataa basan‑da gbɛ n ma, a danka a. A‑a fanka ɔ mau ka n ya a sanche, bu chɛ be koe a n ma.”

²⁶Disabɛti bu ma kau wɔdɔn bɔɛ ɔ, Yataa‑a maeka Chebɛɛ a na wan to Kadidi chɛnyɛ duu dɔndɔ ɔ, min tɔ ni Nasaɛti.

²⁷Sakana ni wan a boo ɔ, sunkun tɔngbɔ dɔndɔ ko a, min tɔ ni Mɛi. Mɛi chɛ nii ma kai ko ɔ sɔn. Tooɔdia chɛen ni a a kamin dɔndɔ an ko a, min tɔ ni Chosɛfi, a ma koe a a 'a musu a. Chosɛfi chɛ na‑a bɔ Mansa Defidi 'a dambi an dɔ.

²⁸Maeka chɛ na‑a wan Mɛi tena, mbɛ a‑a a kɔndɔn, mbɛ a ɔ, “Mansa Yataa ɛ i fɛ gban, mbɛ a sin‑na i dua a ɔ bendenɛ a.”

²⁹Mɛi kɔndɔ fii‑a wan maeka chɛ 'a bai chɛ a, mbɛ a bun‑da a yii na chii‑a a ma.

³⁰Mbɛ maeka chɛ ɔ, “Mɛi, i ma chian, koe min na mu, Yataa ɛ i dua tena wan.

³¹A yen ko, e na tena wan bu ya‑a, mbɛ i‑a den kaienɛ suun. A tɔɛ ni ma Chisɔsi.

³²Ɛ ma‑a wan mɔ chenama a, a sin, an mbe a chee‑a wan, an dɔ, Yataa Wa 'a Denɛ. Mansa Yataa ɛ a ma‑a wan mansa a, yɔ a bemba n ta bemba Defidi ni buɛ min dɔ.

³³A sin, ɛ ma‑a wan mansa a Isɔɛɛ mɔɛ n ko a kuɔ fɔ ko a, danka ee ma‑a a 'a mansaya ma.”

³⁴Mbɛ Mɛi ɔ, “Chɛɛ n ma kai ko ɔ sɔn kɛn bɛ, n mbe bu chɛ ya‑a ka ma gbɛ?”

³⁵Mbɛ maeka chɛ ɔ, “Yataa Nyina an mbe ma‑a i fɛ, mbɛ Yataa Wa 'a gbasaya, a‑a a ma, i‑a bu ya. Chɛ an fɛ mu, e denɛ min suun‑da, ɛ ma‑a tenchen Yataa 'a wai an na. A sin, an mbe a chee‑a wan, an dɔ, Yataa 'a denɛ.

³⁶I yii na chii wɛ i suun ma nyɔɛ Disabɛti ma. Mɔɛ n na‑a a fɔ wan, mbɛ gbanda musu mu a a, a ee denɛ suun‑da to kuɔ fɔ ko a. Chɛɛ a 'a chenan musuya chɛ gbɛɛ ɔ, a bu ma ɛ ka gbɛ kau wɔdɔ an ko a.

³⁷Ko ɔ ko kan kɔ kan mbe ee nɔ, Yataa ee che min ma‑a.”

³⁸Mbɛ Mɛi ɔ, “N mbe nɛ. N mu Mansa Yataa 'a yɔnɛ an na. Koe chɛ n gbɛɛ ni ma n na, yɔ i‑a a fɔ ka buɛ min dɔ.” Mbɛ maeka chɛ‑a a to, mbɛ a ta‑a.

³⁹Tima kundu ɛnden gbakɔ, Mɛi‑a a ma bɛn fan, mbɛ a ta‑a dɔndɔ gbe duu dɔndɔ ɔ, min sɔen ni kɔnkɔ kɔnkɔɛ n tɛ ɔ, Chudia chɛnyɛ ɔ.

⁴⁰A don‑da wan Sakaaya 'a chenɛ a, mbɛ a‑a Disabɛti kɔndɔn.

⁴¹Mɛi‑a Disabɛti kɔndɔn kɛn dechee, mbɛ denɛ min ni Disabɛti bu ɔ, a‑a a ma ma‑a wan gbasaya a. Mbɛ Yataa Nyina bea‑a Disabɛti fɛ gban,

⁴²mbɛ a koɔ‑a a kuiɛ ma sɛenɛ a, a ɔ, “I duaen mu kaka, a ben nn fan musu n gbɛɛ ma, a sin, dua ɛ ma‑a wan den chɛ ma, e na tena min suun‑da.

⁴³N mbe ee che dan‑da a a, mbɛ n 'na mansa de ɛ na wan n kɔndɔn‑da.

⁴⁴A mu min na, n‑na i 'a kɔndɔn chɛ kuiɛ a min kɛn dechee, denɛ min mbe n bu ɔ, a‑a a ma ma‑a wan buɔdia a.

⁴⁵Mansa Yataa‑a i dua, a mu min na, i dan‑da a a, mbɛ ɛ chɛ ma‑a wan i ye, yɔ a‑a a fɔ buɛ min dɔ a ma koe a i ye.”

⁴⁶Mbɛ Mɛi‑a a fɔ, a ɔ, “N‑na Mansa Yataa tando n faa gbɛɛ a.

⁴⁷N bu ɔ di Yataa ko a. An mu n baun mɔɛ a.

⁴⁸Koe min na mu, a‑a a yii na chii n na, a 'a yɔnɛ min dɔ ma koo. A yen ko gbɛ, a ka sanche ma aan kuɔ fɔ ko a, mɔɛ n gbɛɛ mbe n chee‑a wan, an dɔ, musu duaenɛ.

⁴⁹Koe min na mu, gbasaya gbɛɛ ɛ Yataa min boo ɔ, a basan‑da n ma a sɛmbɛnden na. A sin a kan nyɔ ee nɔ.

⁵⁰A 'a chinchimaya, ɛ ma‑a wan mɔɛ chɛ n ma, kuɔ fɔ ko a, mɔɛ miin chianden mu a ma.

⁵¹Yataa‑a a ɔ yian, mbɛ a gbasayaen mu kaka. A‑a a ma wan dɔ koa tɔɛ n ben‑da bui‑a.

⁵²A‑a mansa chenama n bɔ an 'na mansaya n dɔ, mbɛ mɔɛ miin dɔ nii ma koo, a‑a an na sɛ.

⁵³A‑a kɔnkɔ tɔɛ n bu fa gban, chɛɛ a‑a nyan tɔɛ n na yɛ an boo a senɛ a.

⁵⁴A‑a mmɔ Isɔɛɛ mɔɛ n deman fan, a kɔɔ mɔɛ nu. A ma nyina ni, chinchin koe a an ma,

⁵⁵yɔ a na‑a mmɔ bemba n too ɔ dia buɛ min dɔ, mbɛ a ee nyina‑a Ebeami ma, a basan a cheeya n na, kuɔ fɔ ko a.”

⁵⁶Mɛi ni wan Disabɛti 'a sondaya a kau sawa ko a, mbɛ a yɛ‑a a waa a.

⁵⁷Tima che‑a wan gbɛ Disabɛti suun koe a, mbɛ a‑a a suun den kaienɛ a.

⁵⁸A tanda ɔ si nyɔɛ nu, a basan a 'a mɔɛ n na, an‑na a a min Mansa Yataa chinchin‑da buɛ min dɔ a ma, mbɛ an gbɛɛ bu ɔ dia‑a a ko a.

⁵⁹Tee wɔnfean[4] bɔɛ ma, den chɛ suundenɛ gbakɔ, an na kan‑da Sakaaya waa a. An na‑a, an ni bɛn den chɛ a kamincha tena ɔ. An toen ni an ni a fa tɔɛ Sakaaya an si a kun ma.

⁶⁰Chɛɛ a de‑a kɔɔsa bia chɛ wan, a ɔ, “A an. A tɔ ni ma Chɔn.”

⁶¹Mbɛ an‑na a fɔ wan a ye, an dɔ, “Chɛɛ mɔ ɔ mɔ ee wo sima n dɔ min tɔ mu ka.”

⁶²Mbɛ an‑na a siman denɛ fa tena an boo a, ni a 'a denɛ tɔɛ ɛ ma‑a ka ma.

⁶³Mbɛ Sakaaya‑a an dɔ tisa fenɛ ko a, ɛ fenɛ nyɛn min ma, mbɛ a‑a a nyɛn, a ɔ, “A tɔɛ an nɛ Chɔn.” An gbɛɛ da ɔ gbaa‑a wan.

⁶⁴Mbɛ a ya kɔɔɛ a, a bɔ‑a a 'a mumuncha chɛ ɔ, a bun‑da koɔ‑a, ɛ ta‑a Yataa tando‑a.

⁶⁵An tanda ɔ si nyɔɛ chɛ n gbɛɛ, chiandia‑a an bia wan kaka. Koe chɛ fasan‑da wan an kɔnkɔ kɔnkɔ tanda chɛ gbɛɛ ɔ Chudia chɛnyɛ ɔ.

⁶⁶Mɔ ɔ mɔ miin‑na koe chɛ a min, a ma‑a wan an ma yiinachii a, mbɛ denɛ an nɛ, min 'na manɛ koo. Koe min na mu, a ɔ yenden fan ni gbɛ an boo ɔ, mbɛ Mansa Yataa ɛ wan den chɛ fɛ.

⁶⁷Mbɛ Yataa Nyina bea‑a wan Chɔn fa Sakaaya fɛ gban, mbɛ a‑a a kuu sɔ Yataa 'a sakana bai n dɔ yian‑da,

⁶⁸a ɔ, “Mmɔ Mansa Yataa tando, mmɔ Isɔɛɛ mɔɛ n 'na Yataa a. A na‑a basan koe a mmɔ ma, mbɛ a‑a mmɔ kun ka.

⁶⁹Gbasaya tɔ wa, Yataa‑a a a na, mmɔ baun koe a. Mɔɛ chɛ kaen mu, a 'a yɔnɛ Defidi 'a dambi an dɔ,

⁷⁰yɔ Yataa‑a a ma suun buɛ min dɔ, a 'a gbonka chɛ mɔɛ n na‑a a gbonka.

⁷¹An mɔɛ chɛ ɛ mmɔ bɔ‑a wan mmɔ chɛɛ ma nyɔɛ chɛ n boo ɔ, a basan mmɔ ko don ma nyɔɛ n na.

⁷²Yataa‑a chɛ ma, min mbe a ma, a ni chinchin mmɔ ma, yɔ a na‑a a fɔ buɛ min dɔ mmɔ bemba n ye. A sin ma nyina ni dɔbɛn chɛ ma, a‑a min chɛ an na.

⁷³A 'a kai chɛ, mmɔ bemba n ta bemba Ebeami tena,

⁷⁴mbɛ ɛ mmɔ bɔ‑a wan mmɔ chɛɛ ma nyɔɛ n boo ɔ, mbɛ a‑a a ma, mmɔ ni wai chɛ a ko a faachima ɔ.

⁷⁵Yataa ɛ a ma‑a wan to, mmɔ ni mmɔ wandi gbɛɛ be a ma, mbɛ mmɔ tan‑da a tena mmɔ fɔɛ gbɛɛ ɔ.

⁷⁶“N 'na den, i sin, an mbe i chee‑a wan Yataa Wa 'a gbonka chɛ mɔɛ a. I wan mbe a ma‑a mɔɛ n ni an ma bɛn chɛndɛ chɛ, Mansa Yataa na tima ya ɔ,

⁷⁷I wan mbe a ɔ yian mɔɛ n na, an mbe koe min ma, min mbe a ma, Yataa ni a boo bɔ an 'na ko yama n dɔ, mbɛ an‑na bauncha ma sɔn.

⁷⁸Chinchincha Yataa mu mmɔ 'a Yataa a. Ɛ mɔɛ a na‑a wan mmɔ baun koe a, yɔ ɛ tee kaienɛ a na buɛ min dɔ, manɛ be koe a mmɔ ma.

⁷⁹Mɔɛ miin mbe saya pimbi pimbi ɔ, ɛ an bɔ‑a wan a ɔ. Ɛ manɛ be‑a wan an ma, a ta faachima fɔɛ ɔ.”

⁸⁰Sakaaya 'a bai chɛ gbakɔ, an‑na den chɛ bɔ wan a ɔ gbɛ gbɛ, aan a koa‑a. Mbɛ Yataa wakoe a dia‑a a ye a ɔ benden ba a. A ni fuinɛ ma wan aan tima chɛ a, a bɔ‑a tima min na Isɔɛɛ mɔɛ n tena fanka ɔ.