Read Kono DUKU 10 Bible Online

DUKU 10 - Kono bible

DUKU 10

¹Koe chɛ n gbɛɛ maenɛ gbakɔ, Mansa Chisɔsi‑a a boo sɔ wan mɔ bi wɔnfea kun ma fea n[19] ma. Mbɛ a‑a an du fea fea a, a‑a an na ta a ya ɔ duu kan kɔ kan dɔ, a basan kaina kan kɔ kan na, a wandi ni ta tena kaina min nu.

²Mbɛ a‑a a fɔ an ye, a ɔ, “Chin fen chɛ a sɔndenɛ kaina dɔndɔɛ, a koo kaka. Chɛɛ a 'a sɔn mɔɛ n ma kɔkoo. Chɛ an‑na a fɔ, wo chin fen ti ɔ tisa, a ni wai chɛ mɔɛ n ma munda n na ta, chin fen chɛ a sɔn koe a.

³A yen ko, n mbe wo sɔ tena yɔ sa denɛ nu kui n tɛ ɔ. Wo ta gbɛ.

⁴Ni wo ma‑a ta‑a, wo ma ta kɔpɔ a wo boo ɔ, wo ma basachi bia wo boo ɔ, wo ma kɔɔwa fean bɔɛ ya, n mbe ee baa, wo ni sɔ chia a, kɔndɔn chɛ koe a.

⁵Ni wo don‑da chen kan kɔ kan na, wo a fɔ an ye chen chɛ a, wo ɔ, Yataa ni an gbɛɛ dua, an fɛn mbe an 'na chen chɛ a.

⁶Ni mɔ ɔ mɔ ɛ wan nɔ an chen chɛ a, min mu faachima tɔɛ a, ɛ a boo si‑a wan wo 'a dua chɛ kɔɔ. Ni a mɔɛ chɛ nyɔn sima ee nɔ, an mbe fo‑a wan dua chɛ a.

⁷Wo ma wo yia chenɛ saa saa an na aan, wo ni bɔ an duu chɛ ɔ. Wo ma wo yia chenɛ ma fea. An mbe fen kɔ fen min be‑a wo ma, a daun koe a, a basan a min koe a, wo a bia. A mu min na, a nyin wai chɛ mɔɛ ni a 'a pawa ma sɔn.

⁸Ni wo ta‑a duu kan kɔ kan dɔ, mbɛ an‑na an boo si wo kɔɔ, ni an‑na fen kɔ fen be wo ma, wo a daun.

⁹Wo gbandi mɔɛ n baun an duu chɛ ɔ, mbɛ wo a fɔ an ye, wo ɔ, ɛnden fan to‑a gbɛ, wo ɔ, mɔɛ n ni don Yataa 'a mansaya kɔɔ.

¹⁰Chɛɛ ni wo ta‑a duu kan kɔ kan dɔ, mbɛ an ma an boo si ni wo kɔɔ, wo ta chia kunɛ a, mbɛ wo‑a a fɔ an ye, wo ɔ,

¹¹fifii min bɛɛ to‑a wo chenɛ a, a ka an 'na duu ɔ, wo ɔ, wo‑a a a gbɔngbɔn, wo ɔ, min mbe ma‑a dasi a an tena, mbɛ an mbe ka a ma an na, wo ɔ, Yataa faa ni tɛ an ma. Wo ɔ, chɛ gbɛɛ ɔ, wo ɔ, an ma nyina, mbɛ ɛnden fan to‑a gbɛ, wo ɔ, an ni don Yataa 'a mansaya kɔɔ.

¹²N ni a ma din wo tena, mɔ yama chɛ nu suun Sɔdɔn duu ɔ, an mbe ee tɔɔya‑a, Yataa ɛ dunya gbɛmbo‑a tee min na, yɔ chɛ nu an duu chɛ ɔ, an mbe tɔɔya‑a buɛ min dɔ.”

¹³Chisɔsi ɔ, “Wo wan, wo wɛn mbe ka Koyasin duu ɔ, ni wo wɛn mbe Besaida, koe miin mbe wo tan‑da, an mbe yaua‑a gba wo ko a. N‑na kamaya koe sɛsɛ n ma wan wo 'a duu n dɔ. Mɔɛ miin mbe ka Taya duu ɔ, a basan Sidon[20] duu ɔ a, ni an na‑a ko bonda chɛ n dɔ yen fan, an nii ma‑a ka yɔ wo wan. An na‑a an kan kɔ sɔ an 'na ko yama n na suun gbɔɔ. An ni ma‑a gbɛ di chɛ an na an 'na ko yama n ko a.[21]

¹⁴Chɛɛ mɔ yama chɛ nu suun Taya duu ɔ, ni Sidon duu ɔ, an mbe ee tɔɔya‑a, yɔ wo e tɔɔya‑a buɛ min dɔ, Yataa ɛ dunya gbɛmbo‑a tee min na.

¹⁵Wo wɛn sin mbe ka Kapanaun duu ɔ, wo‑a wo wandi a sɛ banda a, chɛɛ Yataa ɛ wo a yii‑a wan duu ma.”

¹⁶Mbɛ Chisɔsi‑a a fɔ a fɛ denɛ n ye, a ɔ, “Ni mɔ ɔ mɔ‑a a too ma sɔ wo ma, a‑a a too ma sɔ ka n fan ma. Ni mɔ ɔ mɔ ban‑da wo ɔ, a ban‑da ka n fan dɔ. Chɛɛ a sin mɔɛ min mbe ban‑da n dɔ, a ban‑da ka Yataa an dɔ, min‑na n na na.”

¹⁷Chɛ gbakɔ, mɔ bi wɔnfea kun ma fea[22] chɛ n yɛ‑a wan Chisɔsi tena buɔdia wa ɔ. Mbɛ an dɔ, “Mansa, nyina yama n bɛɛ, an‑na nn da a kuiɛ n na min fan i tɔɛ ɔ.”

¹⁸Mbɛ Chisɔsi ɔ, “N‑na Sitana yen fan bea‑a a ka banda bu ɔ, yɔ banda manɛ.

¹⁹A yen ko, n‑na gbasaya be wo ma. Wo e tɛn‑da wan ka n ma, a basan chinchima n na, chɛɛ an mbe ee ko ɔ ko ma‑a wo a. N‑na gbasaya be wo ma, Sitana 'a gbasaya gbɛɛ kun ma, ko yama kan kɔ kan mbe ee ma‑a wo a.

²⁰Chɛɛ wo bu ɔ ma dia, koe min na mu, nyina yama n mbe wo da a kuiɛ n na min. Chɛɛ wo bu ɔ ni dia, a mu min na, wo tɔɛ n nyɛn‑da banda bu ɔ.”

²¹A tima chɛ a, Yataa Nyina‑a a ma Chisɔsi bu ɔ dia‑a, mbɛ a‑a a fɔ, a ɔ, “Fa, n‑na i wai bɔ, i wɛn mu mansa a banda bu ɔ ni dunya ɔ. A mu min na, i‑a koe chɛ n dɔ nun fan chɛ nu ma, ɛ miin ta yiima ɔ, mbɛ an dɔ sɔen mu. Chɛɛ i‑a an dɔ yian fan chɛ n na, miin‑na an fandi a yii i tena. Fa, n‑na i wai bɔ, koe min na mu, i toen ni a ni ma ka wan.”

²²Mbɛ a‑a a fɔ mɔɛ chɛ n ye, a ɔ, “Fa‑a gbasaya gbɛɛ be n ma, ko ɔ ko kun ma. Fa dɔndɔ gbe an‑na a ɔ sɔn chɛndɛ chɛ, mɔɛ min mu n na. N bɛɛ n dɔndɔ gbe an‑na a ɔ sɔn chɛndɛ chɛ, mɔɛ min mu Fa a. N‑na mɔɛ miin ya Fa sɔn koe a, an bɛɛ‑a a ɔ sɔn‑da wan chɛndɛ chɛ, mɔɛ min mu Fa a.”

²³Mbɛ a ɔ a fɛ denɛ n ma, an dechee a, a ɔ, “Mɔ ɔ mɔ min‑na koe chɛ n dɔ yen, wo‑a miin dɔ yen ka, a duaen mu.

²⁴N ni a ma din wo tena, mbɛ Yataa 'a gbonka chɛ mɔ sɛsɛ, a basan mansa sɛsɛ a, an toen ni an ni koe chɛ n dɔ yen, wo‑a miin dɔ yen ka, chɛɛ an ma an dɔ yen ni. An toen ni to an ni an na min, wo‑a miin‑na min ka, chɛɛ an ma an na min ni.”

²⁵Mbɛ Chu n 'na sawa kan mɔ dɔndɔ yen ko, a toen ni a ni Chisɔsi ɔ siman. A‑a a kɔɔ sɔ, a sɔ‑a, a ɔ, “Ticha, n mbe fen ma, min mbe a ma, n ni kuɔ fɔ fɔɛ ma sɔn?”

²⁶Mbɛ Chisɔsi ɔ, “Yataa 'a sawa‑a fen fɔ? E a fasai ka ma?”

²⁷Mbɛ kamin chɛ ɔ, “Yataa ɔ te, mmɔ ni to mmɔ 'a mansa Yataa a, mmɔ faa gbɛɛ a, mmɔ ni to a a, mmɔ fɔɛ gbɛɛ a, mmɔ ni to a a, mmɔ sɔɛ gbɛɛ a, mmɔ ni to a a, mmɔ yiima gbɛɛ a. Mbɛ a yɛ to, Yataa ɔ te, mmɔ ni to mmɔ 'a mɔɛ n na, yɔ mmɔ toen mu buɛ min dɔ mmɔ wandi a.”

²⁸Mbɛ Chisɔsi ɔ, “An nɛ, i ma a ma sa ni ɛnden bɛɛ a. Koe chɛ n gbɛɛ ma, e kuɔ fɔ fɔɛ ma sɔn‑da wan.”

²⁹Chɛɛ kamin chɛ nii ma to ni, a ni mau a bɔɛ n tena. Chɛ an fɛ ni, a‑a a fɔ to, a ɔ, “Nyɔn n gbu mu n 'na mɔɛ n na?”

³⁰Mbɛ Chisɔsi ɔ, “Tee dɔndɔ a, kamin dɔndɔ ni ka tena wan Chuusaɛn duu ɔ, a yii Chɛiko duu ɔ. Kanka n chɛ‑a a ma, mbɛ an‑na a ma bɔ, an‑na a gbasi yama yama, mbɛ an‑na a to sa ɔ, ɛ a ni ma tanka‑a.

³¹Mbɛ Yataa‑a a ma, mmɔ chɛnyɛ mɔ dɔndɔ, min ni mmɔ tɛ ɔ Yataa a, a ni ben tena wan an chia dɔndɔ gbe chɛ a. Chɛɛ kɛn a‑a mmɔ chɛnyɛ nyɔɛ chɛ yen sa ɔ, a‑a a ma sangba wan chia kaka dɔndɔɛ ma, a ta‑a.

³²Mbɛ mɔ dɔndɔ min bɛɛ ni mmɔ chɛnyɛ nyɔɛ a, a bɔ Difai dambi ɔ, a wɛɛ na‑a na wan, mbɛ a‑a kamin chɛ yen. Chɛɛ a wɛɛ‑a a ma sangba wan chia kaka dɔndɔɛ ma.

³³Chɛɛ sonda dɔndɔ, min ka‑a Samayia chɛnyɛ ɔ, a wɛɛ ni wan ben tena an chia chɛ a. A na‑a wan, a‑a kamin chɛ tan sa ɔ. A‑a a yen kɛn, a ma chinchin‑da wan a ye.

³⁴Mbɛ a ta‑a a tena. A ma gba tena chɛ nu, a‑a an na ko fo, mbɛ a‑a buii sa an na, mbɛ a‑a an na chii. A yɛ‑a wan to, mbɛ a‑a kamin chɛ a sɛ a wandi ta sofɛ kɔ, mbɛ a ta‑a a a sonda yia chenɛ a, a kun ma fɛn tena.

³⁵Mbɛ banda ɔ ka‑a, Samayia kaminɛ chɛ toen ni a ni ta. Mbɛ a‑a kɔpɔɛ ɛnden ya, mbɛ a‑a a be chen ti chɛ ma, a ɔ, ‘N dia nyɔɛ, i dimu, kamin chɛ danda n ye. Ni kɔpɔɛ chɛ ma a kun ni, n mbe ma‑a yɛ‑a to nɛ chia a, n mbe i ta a a yɛ‑a wan, e min sa‑a chɛ kun ma.’ ”

³⁶Mbɛ Chisɔsi ɔ te gbɛ a ma, a ɔ, “I ta yiima ɔ, mɔ sawa chɛ n tɛ ɔ, nyɔn ni kamin chɛ 'a mɔɛ a, kanka ni ka min fa‑a?”

³⁷Sawa kan mɔɛ chɛ ɔ, “Mɔɛ min chinchin‑da ka a ma.” Mbɛ Chisɔsi ɔ, “I wɛɛ ta, i ni sɔ kamin chɛ chen gba ɔ.”

³⁸Chisɔsi n ben‑da, an bɛ a fɛ denɛ n na, an ta‑a, mbɛ an che‑a duu dɔndɔ ɔ. Musu dɔndɔ ni wan nɔ, min tɔ ni Mata. Mbɛ a‑a Chisɔsi 'a sondaya bɔɔɛ dɛn a 'a chenɛ a.

³⁹A dɔ musuma ni wan nɔ, min tɔ ni Mɛi. Mɛi na‑a si wan Mansa Chisɔsi baima gbɛdɛn, ɛ a a min‑da, Chisɔsi ni bai miin fɔ tena.

⁴⁰Chɛɛ chen dɔ bɛnɛ min ni Mata ma, a na‑a a dɔndɔ gbe ya kɔɔ tawa wan. Chɛ ko a, a ta‑a wan, mbɛ a‑a Chisɔsi tan, a ɔ, “Fa, n dɔɛ chɛ yen ko, a‑a chen na wai gbɛɛ to n dɔndɔ gbe an kan na. Fen tea ɛ chɛ ɔ? A fɔ a ye, a ni na, a ni basan n ma.”

⁴¹Chɛɛ Mansa Chisɔsi ɔ, “Ee Mata, i 'a faagbaa sien mu ko sɛsɛ an fan ma,

⁴²chɛɛ ko dɔndɔ gbe an ma biaen mu a ma koe a. Mɛi ɛ ka sɔ chia gbu an ma, mɔ ɔ mɔ ee a bɔ an chia chɛ ma.”