Read Kono DUKU 13 Bible Online

DUKU 13 - Kono bible

DUKU 13

¹A tima dɔndɔ gbe chɛ a ni, mbɛ mɔɛ dɔ nu, miin bɛ ni Chisɔsi a, an‑na ko yama wa ɔ yian a a. Ko yama wa chɛ na‑a ma mɔɛ dɔ n fan na, miin na‑a ka Kadidi chɛnyɛ ɔ. An na‑a na Yataa 'a kata ɔ wan, min mbe a ma, an ni soe n minda, a be koe a Yataa ma an 'na yasi a. An to‑a yasi chɛ n fan bɔ‑a Yataa 'a kata chɛ ɔ, mbɛ Kɔfana Padeti‑a a ma, an‑na an fa. An faen chɛ a, an wii ɔ basan‑da wan soe chɛ n wii a, an na‑a miin bɔ ka yasi a.

²Mbɛ Chisɔsi ɔ, “Ɛ wo ta yiima ɔ, mbɛ an‑na Kadidi mɔɛ chɛ miin fa ka buɛ chɛ ɔ, mbɛ ko yama ma mɔ wa ni an na. A ma ma ka wo yii ma, mbɛ an benden ni Kadidi mɔɛ tɔɛ n gbɛɛ ma ko yama ma ɔ.

³N ni a ma din wo tena, a ee ka wan ɛnden bɛɛ a. A sin, ni wo ma wo kan kɔ sɔ ni wo 'a ko yama n na, wo wɛɛ, wo gbɛɛ ɛ kasaa‑a wan.

⁴A ka to chɛ ma, tima min na banda a chen chɛ na‑a bea Sidowan fɔnɛ ɔ, mɔ tan kun ma sɛi an fa‑a. Chɛɛ a ma ma wo yii ma, mbɛ a mɔɛ chɛ n ni yau a ben mɔɛ tɔɛ chɛ n gbɛɛ ma Chuusaɛn duu ɔ.

⁵N ni a ma din wo tena, mbɛ a ee ka ɛnden bɛɛ a. Ni wo sin ma wo kan kɔ sɔ ni wo 'a ko yama n na, wo wɛɛ gbɛɛ ɛ kasaa‑a wan.”

⁶Mbɛ Chisɔsi‑a tai chɛ tɛ an tena, a ɔ, “Kamin dɔndɔ ni wan nɔ, yadi ni min boo ɔ. Gbɔ kɔnɛ[26] ni wan nɔ an yadi chɛ ɔ. Mbɛ tee dɔndɔ a, yadi ti chɛ ta‑a wan kɔn chɛ gbɔɛ kai koe a. Chɛɛ a ma a gbɔ dɔndɔ wɛɛ tan ni a a.

⁷Mbɛ a‑a a fɔ a 'a yadi kun ma fɛn mɔɛ ye, a ɔ, ‘A yen ko san sawa ko a ka gbɛ, n mbe na yadi chɛ ɔ, gbɔ kɔn chɛ gbɔɛ kai koe a, chɛɛ tima ɔ tima n ni n na‑a, n mbe ee a gbɔ kan kɔ kan tan a a. Chɛ an‑na a fɔ, a tɛ, i ni a a bea. A ma nyin a ni duu gboo ma bia gbama a.’

⁸Chɛɛ yadi kun ma fɛn mɔɛ chɛ ɔ, ‘Fa, a to nɔ san dɔndɔ gbe chɛ ko a. N mbe sonɛ sin‑da wan a 'a tindanɛ, mbɛ n‑na sundu tui chɛ a kuu ma.

⁹Ni a gbɔ‑a yɛi, ɛ nyan‑da wan, chɛɛ ni a ma gbɔ ni, mbɛ a tima chɛ a, a tɛ‑a.’ ”

¹⁰Chu n 'na suin tee dɔndɔ ma, Chisɔsi ni wan kan chɛ tena an 'na samun chɛ chenɛ a.

¹¹Musu dɔndɔ ni wan nɔ, nyina yama ni min fɛ, min‑na a ma, a gbandienɛ ni san tan kun ma sɛi ko a. A ma bundenɛ ni, mbɛ a sin, a nii che a ɔ tan‑da ɛnden bɛɛ a.

¹²Chisɔsi‑a a yen kɛn, a‑a a chee, mbɛ a ɔ, “Bɔɔɛ, i baun‑da gbɛ i 'a gbandi chɛ ɔ sanche.”

¹³Mbɛ a‑a a boo bun musu chɛ ma. Mbɛ a ya kɔɔɛ a, musu chɛ sɔ‑a den, mbɛ a‑a tando be Yataa ma.

¹⁴Chɛɛ kun ti chɛ samun chɛ chen chɛ a, a faa tɛ‑a wan kaka, koe min na mu, Chisɔsi‑a mɔɛ baun suin tee ma. Chɛ ko a, a ɔ mɔɛ chɛ n ma, “Tee wɔdɔ an mbe mɔ gbu ko a wai chɛ koe a wichi kan kɔ kan dɔ. Chɛ an‑na a fɔ, wo na a tee wɔdɔɛ chɛ tɛ ɔ, an ni wo baun wo 'a gbandi n dɔ. Chɛɛ wo ma na suin tee ma.”

¹⁵Chɛɛ Mansa Chisɔsi ɔ, “Wo wan nɛnɛn fea ti nu, wo dɔndɔ wɛɛ ee nɛ, min 'na ninchi kanɛ a ɛ gbaa, a 'a sofɛ kanɛ a ni gbaa, suin tee wɛɛ ma a, ni a ee a fuin‑da, a ni ta a a yii da a, a ni a min. Ni wo e chɛ ma wan, mbɛ wo‑a wai an chɛ ka suin tee ma.

¹⁶Mbɛ sanche gbɛ wo a yen ko, mmɔ suun ma nyɔɛ dɔndɔ an nɛ musu chɛ a, mmɔ gbɛɛ bɔ‑a Ebeami 'a dambi dɔndɔ gbe chɛ an dɔ. Sitana‑a a chii wan, ɛ tɔɔya ɔ san tan kun ma sɛi ko a. Chia ɔ chia a, fɔ ni a fuin‑da wan, a ni ma suin tee wɛɛ ma a.”

¹⁷A 'a bai chɛ‑a a ma wan, mbɛ a chɛɛ ma nyɔɛ n gbɛɛ mau‑a an fandi ma. Chɛɛ mɔɛ tɔɛ n gbɛɛ‑a buɔdia bɔ wan, a si kamaya koe chɛ n gbɛɛ ma, Chisɔsi‑a miin ma.

¹⁸Mbɛ Chisɔsi ɔ, “Ka wɛ n mbe a ɔ yian wo a, Yataa 'a mansaya ɛ buɛ min dɔ. Ka wɛ n mbe a bɔ nyɔɛ yian wo a.

¹⁹Ɛ ka wan yɔ kamin dɔndɔ min‑na chin fen kuu dɔma ɛndenɛ ya, mbɛ a‑a a chin a 'a yadi ɔ. A fɛn‑da, mbɛ a ma‑a kɔn chenama wa a. Mbɛ konde n‑na an nyanɛ sa a bonɛ n dɔ.”

²⁰Mbɛ a ɔ te to, “Ka wɛ n mbe a ɔ yian to wo a, Yataa 'a mansaya bɔen mu to fenɛ min na.

²¹Ɛ ka wan to yɔ yisin denɛ, musu dɔndɔ‑a min ya, mbɛ a‑a a chɛ feawa funku wa ɔ, konko pani ɔ biidi nyan koe a. Yisin chɛ kun‑da wan feawa funku chɛ gbɛɛ ɔ, mbɛ feawa chɛ sɛ‑a.”

²²Mbɛ Chisɔsi bun‑da to a 'a tachɛ ma, a ta Chuusaɛn duu ɔ. A ta‑a wan mɔɛ n kan‑da duu chɛ n gbɛɛ ɔ, a‑a miin dɔ tandin.

²³A tima chɛ a, mɔ dɔndɔ ɔ, “Fa, Yataa ɛ kuɔ fɔ fɔɛ be‑a dechee mɔ kuundenɛ n fan ma?” Mbɛ Chisɔsi ɔ,

²⁴“Wo butuinɛ chɛ, wo ni ben an chen da a dɔɔyaen chɛ a, don koe a Yataa 'a mansaya kɔɔ. Koe min na mu, n ni a ma din wo tena, mbɛ mɔ sɛsɛ n mbe butuinɛ chɛ‑a wan tee dɔndɔɛ kɔɔ don koe a nɔ, chɛɛ an mbe ee na‑a kun‑da.

²⁵Tima ɛ che‑a wan, tima min na chen chɛ kun ti ɛ a kɔɔ sɔ‑a, mbɛ a‑a chen chɛ da a tɔn. A tima chɛ a gbɛ, ni wo e sɔ ɔ baa ma wan, wo e chen chɛ da tu‑a wan, wo ɔ, kun ti chɛ ni a ma wo ni don. Chɛɛ ɛ a fɔ‑a wan wo ye, a ɔ, a ma wo sɔn ɛnden bɛɛ a.

²⁶Wo wɛɛ, wo‑a a fɔ wan, wo ɔ, wo bɛ na‑a daunɛ chɛ wan kaina dɔndɔ tee. A yɛ to, wo ɔ, a na‑a kanɛ chɛ wan wo 'a duu n dɔ.

²⁷Chɛɛ ɛ a fɔ‑a wan to, a ɔ, a ma wo sɔn ɛnden bɛɛ a. A ɔ, ko yama ma mɔɛ mu wo a, a ɔ, wo ni ka a fɛ.

²⁸A tima chɛ a, wo e Ebeami yen‑da wan, wo ni Aisaki yen, mbɛ wo‑a Chekɔpi yen. Wo e Yataa 'a gbonka chɛ mɔɛ chɛ n gbɛɛ yen‑da wan. An gbɛɛ ɛ ma‑a wan Yataa 'a mansaya kɔɔ, wo sin mbe sɔ ɔ baa ma, wo ee che don‑da. Wo e ma‑a wan di chɛ‑a fiko fiko faayɔn ba ɔ, wo e ta‑a wo nyinɛ a daun‑da.

²⁹A sin, mɔɛ n mbe na‑a wan a ka dunya tɔnkɔnɛ gbɛɛ ɔ, mbɛ an si‑a daun chɛ tena, tima min na Yataa ɛ a 'a mansaya ɔ yian‑da.

³⁰A yen ko gbɛ, mɔɛ dɔ nu miin mbe gbaa, an mbe ma‑a wan ya ɔ sɔɛ n na, mbɛ ya ɔ sɔɛ dɔ n sin ma‑a gbaa mɔɛ n na.”

³¹A tima dɔndɔ gbe chɛ a, Chu mɔɛ dɔ nu, miin ni Fayisii n na, an na‑a wan Chisɔsi tena, mbɛ an dɔ, “Bɔ nɛ, i ni ta kaina dɔ mende, koe min na mu, Mansa Ɛdɔdi toen mu a ni i fa.”

³²Mbɛ Chisɔsi ɔ, “Wo ta, wo ni a fɔ an kamin yaaen chɛ ye, wo ɔ, n yen ko n mbe nyina yama n gbain‑da mɔɛ n fɛ, a yɛ to, n mbe gbandi mɔɛ n baun‑da tima kundu ɛnden ko a sanche wɛ. Ni a tima chɛ ban‑da, n mbe na‑a ban‑da wan gbɛ n 'na wai chɛ‑a.

³³Chɛ ni ma wɛɛ, n mbe ma‑a wan n ta chia ma tima ɛnden tɛ ɔ. A mu min na, Chuusaɛn an mu dechee duu a, a nyin an ni Yataa 'a gbonka chɛ mɔɛ ni a fii kaina.”

³⁴Mbɛ a‑a a fɔ to, a ɔ, “Wo wan Chuusaɛn mɔɛ nu, wo toen mu Yataa 'a gbonka chɛ mɔɛ n fa koe a. A yɛ to, wo toen mu Yataa 'a sɔ mɔɛ n bon koe a, ɛ miin na na wo tena. Tima sɛsɛ ko a, n toen ni, n ni wo a sɔn sɔn kaina dɔndɔɛ, yɔ tɛ kuinsa ɛ a 'a denɛ n don buɛ min dɔ a kambanɛ kɔɔ. Chɛɛ wo ma dɔn ni n ye.

³⁵A yen ko gbɛ, Yataa 'a chen chɛ a senɛ to‑a, a sin pombonɛ mu gbɛ. N ni a ma din wo tena, mbɛ a ka sanche ma, wo ee n yen‑da to, aan a ta tima chɛ ma, wo e a fɔ‑a tima min na, wo ɔ, Mansa Yataa ni mɔɛ chɛ dua, min mbe na‑a a tɔɛ ɔ.”