Read Kono DUKU 2 Bible Online

DUKU 2 - Kono bible

DUKU 2

¹A tima chɛ a, Domi kun ti wa ni wan nɔ, min tɔ ni Ɔkɔsɔsi. An ni mansa a Domi chɛnyɛ wa kun ma. A na‑a sawa a ben fan, mbɛ mɔɛ miin gbɛɛ mbe a 'a gbasaya kɔɔ, an ni an tɔɛ n be an dan koe a.

²Tima saa saa an nii nɛ mɔɛ n dan koe a, a sin Kuiniyɔsi an ni kɔfana a Siyia chɛnyɛ ɔ.

³Mɔ ɔ mɔ ta‑a wan a bemba n ta bemba n suun duu ɔ, a tɔɛ be koe a.

⁴Kamin chɛ min tɔ ni Chosɛfi, a na‑a bɔ Mansa Defidi 'a dambi ɔ wan. Chɛɛ a ni si ɔ Nasaɛti duu ɔ wan, Kadidi chɛnyɛ ɔ. Mbɛ a wɛɛ sɛ‑a wan Bɛtɛɛn duu ɔ, Chudia chɛnyɛ ɔ, a mu min na, Mansa Defidi suun‑da nɔ wan.

⁵An fea na‑a ta wan Mɛi a, tooɔdia chɛen ni min ma koe a a 'a musu a, an dan koe a. A bu ma ni.

⁶An to‑a Bɛtɛɛn fan, mbɛ Mɛi bu ɔ tɛ‑a.

⁷Mbɛ a‑a a saa denɛ suun, den kainɛ. A‑a koa n mɔndɔ mɔndɔ a, mbɛ a‑a a sa fenɛ ɔ, an ni daun fenɛ be min dɔ sɔ fenɛ n ma. Chɛ ma‑a koe min na, sa tena kan kɔ kan nii nɔ sonda yia chenɛ a.

⁸A su chɛ ɔ, sa kun ma fɛn mɔɛ dɔ n ni wan nɔ, an chɛnyɛ chɛ kaka dɔndɔ ma, an mbe an 'na sa n kun ma fɛn‑da, sa wɛɛ n dɔ.

⁹Mbɛ Mansa Yataa 'a maeka bɔ‑a an ya a. A sin, manɛ‑a an na bɛn fan, Mansa Yataa 'a manɛ. Mbɛ an chian‑da kaka.

¹⁰Chɛɛ maeka chɛ ɔ, “Wo ma chian. N yen ko na‑a sakana bai chɛndɛ a wo ko a, min mbe na‑a buɔdia wa a, mɔɛ n gbɛɛ tena.

¹¹Den toa suun‑da Mansa Defidi 'a duu ɔ bi tee chɛ a. An den toa chɛ, an mbe wo baun‑da. An mu kunka mansa a, tea Mansa.

¹²Wo e a ɔ sɔn‑da chɛ an ma. Ni wo ta‑a, wo e den toa tan‑da wan sa ɔ, koa mɔndɔ mɔndɔenɛ ɛ a a, ɛ sa ɔ fenɛ ɔ, an mbe daun fenɛ be min dɔ sɔ fenɛ n ma.”

¹³Mbɛ a ya kɔɔɛ a, maeka fanka fanka n bɔ‑a an ya a, a ka banda bu ɔ. Mbɛ an sɔ‑a maeka saa chɛ baima, an mbe ta‑a tando be‑a Yataa ma, an dɔ,

¹⁴“Tando ni be Yataa ma, min mbe banda bu ɔ pɔɔ, a sin, faachima ni ma mɔ gbu n ma dunya ɔ, Yataa ɛ ko chɛndɛ ma‑a miin na.”

¹⁵Mbɛ maeka chɛ n yɛ‑a banda bu ɔ. Chɛ gbakɔ, sa kun ma fɛn mɔɛ chɛ n‑na a fɔ an nyɔn ye, an dɔ, “Mmɔ ta taiya a pan Bɛtɛɛn duu chɛ ɔ, mmɔ ni koe chɛ ɔ yen, Mansa Yataa 'a maeka‑a min dɔ yian ka mmɔ a.”

¹⁶An‑na a a gbandia, mbɛ an ta‑a, an‑na an ya a kan. Mbɛ an‑na Mɛi yen, an fea den toa chɛ a, a basan Chosɛfi a. Den toa chɛ ni sa ɔ fen chɛ ɔ wan, an ni daun fenɛ be min dɔ sɔ fenɛ n ma.

¹⁷An‑na den toa chɛ yen kɛn, an si‑a wan ko ɔ ko ma, mbɛ an‑na a ɔ yian mɔɛ chɛ n gbɛɛ a nɔ, maeka chɛ na‑a koe min fɔ an ye a si den chɛ ma.

¹⁸Mɔɛ chɛ n gbɛɛ tɛnɛ‑a wan a a, an‑na bai min nyɔn sima a min, sa kun ma fɛn mɔɛ chɛ n da a.

¹⁹Chɛɛ Mɛi‑a koe chɛ n gbɛɛ sa wan a yii ma, ɛ ta‑a a tɛnsɛ‑a a yiima ɔ tima ɔ tima.

²⁰Mbɛ sa kun ma fɛn mɔɛ chɛ n yɛ‑a. An mbe kɛn yɛ‑a, an bun‑da Yataa tando‑a, an mbe ta‑a si sa‑a a tena. An bu ɔ ni di wan koe chɛ n ko a, an‑na miin na min, a basan chɛ a, an‑na min dɔ yen. A gbɛɛ ma‑a wan, yɔ maeka chɛ‑a a fɔ buɛ min dɔ an ye.

²¹A suun tee wɔnfean bɔɛ ma, an‑na a a kamincha wan, mbɛ an‑na a tɔɛ wɛɛ si, an dɔ, Chisɔsi. Maeka chɛ na‑a tɔɛ chɛ an yian a ko a, pɛn a de ni a bu ya.

²²Tima na‑a che wan gbɛ Mɛi ma koe a sɛdɛ Yataa tena, Yataa 'a kata ɔ, yɔ Mansa Yataa 'a sawa, a‑a min be Mosisi ma, a‑a a fɔ buɛ min dɔ, musu suundenɛ gbakɔ.[5] Chɛ an‑na a ma, Chosɛfi sɛ‑a Chuusaɛn duu ɔ, an fea Mɛi a. An ta‑a Yataa 'a kata ɔ, an ni an 'na yasi fenɛ be Chu n tɛ mɔɛ n ma Yataa a, a ni a bɔ Yataa tena Mɛi ko a. Ni yasi chɛ ma ma ni bugbɔ fea a, ɛ ma wan kangbo den fea a, yɔ sawa chɛ‑a a fɔ buɛ min dɔ. An nii ma Chisɔsi to ni gbaa, koe min na mu, an ni a konan fan Mansa Yataa ma. An na‑a chɛ ma, a mu min na, Mansa Yataa 'a sawa ɔ, “Ni musu 'a denɛ saa bɛn‑da den kaienɛ ma, ɛ a be wan Mansa Yataa ma.”

²³

²⁴

²⁵A tima chɛ a, kamin dɔndɔ ni wan Chuusaɛn duu ɔ, min tɔ ni Simiyɔn. Kamin chɛ tanden fan ni Yataa tena. A yɛ to, a Yataa koen ni kaka. A ni gbɛ tima an ma kɔn tena, tima min na, Yataa ɛ di ka‑a Isɔɛɛ mɔɛ n ya a. Yataa Nyina ni wan a fɛ.

²⁶Yataa Nyina chɛ sin na‑a a yiima dia wan, mbɛ a ee fa‑a, ni a ma kunka mansa yen ni, Mansa Yataa ɛ min sɔ‑a.

²⁷Tee min ma an ni na Chisɔsi a Yataa 'a kata ɔ, Yataa Nyina chɛ‑a a ma wan Simiyɔn ta‑a nɔ. Mbɛ Chisɔsi woo mɔɛ nu, a ma koe a, yɔ Yataa 'a sawa‑a min fɔ, an don‑da a a Yataa 'a kata chɛ ɔ.

²⁸Simiyɔn‑na den toa chɛ ya wan, a‑a a sa a nɔnkɔnɛ ɔ, mbɛ a‑a Yataa wai bɔ, a ɔ,

²⁹“Fa, i 'a yɔnɛ mu n na, n mbe ee ka gbɛ fa‑a faachima ɔ, koe min na mu, i ma i da a kuiɛ yɔn ni n tena.

³⁰N‑na i 'a mɔɛ yen gbɛ pɛnɛnɛ, min na‑a bauncha a.

³¹Dunya gbɛɛ sin mbe a yen‑da wan.

³²Manɛ mu a a, mɔɛ n gbɛɛ tena, miin ma i sɔn tee, an ni i sɔn. Ɛ a ma‑a wan, basɔmaya wa ni ma i 'a mɔɛ n ma, nn fan Isɔɛɛ mɔɛ nu.”

³³Den chɛ woo mɔɛ nu, an da a fa‑a wan bai chɛ n na, Simiyɔn‑na miin fɔ, a si an 'na den chɛ ma.

³⁴Mbɛ Simiyɔn‑na an dua, mbɛ a‑a a fɔ den chɛ de Mɛi ye, a ɔ, “Denɛ chɛ i boo ɔ, ɛ a ma‑a wan mmɔ Isɔɛɛ mɔɛ nu, Yataa ni mmɔ sɛsɛ kondon, mbɛ a yɛ‑a, a‑a mmɔ sɛsɛ a sɛ. An mbe a ma‑a, mmɔ Isɔɛɛ mɔɛ n ni tea a min. Chɛɛ mmɔ sɛsɛ ɛ ban‑da wan a ɔ.

³⁵Chɛ ɛ a ma‑a wan, mɔ sɛsɛ n faa n dɔ koe n dɔ ni sɔn. I sin, Mɛi, ɛ ma‑a wan i ma faayɔn ba dɛgbɛ a, koe chɛ n gbɛɛ ɛ ma‑a tima min na.”

³⁶A tima chɛ a, bɔɔɛ dɔndɔ wɛɛ ni wan nɔ, min ni Yataa 'a gbonka chɛ mɔɛ a. A tɔ ni Ana, kai Fanuɛɛ 'a denɛ. Kai Fanuɛɛ chɛ na‑a bɔ Asaa 'a dambi ɔ wan. Bɔɔɛ Ana ni kai chia a san wɔnfea gbe, mbɛ a chɛɛ fa‑a, a chɛɛ min na‑a koa chii a a. A chenanchaen ba ni gbɛ.

³⁷A to‑a fuinyaya chɛ an dɔ gbɛ, aan a sanɛ che‑a san bi sɛi kun ma naaninɛ ɔ. A nii bɔ Yataa 'a kata chɛ ɔ. Su ɔ ni tee a, ɛ Yataa fai wan nɔ, ɛ samunɛ chɛ, a basan sun[6] bia a.

³⁸A tima dɔndɔ gbe chɛ kɔɔ, a wɛɛ‑a Chisɔsi n tan fan, an bɛ a woo n na. Mbɛ a bun‑da Yataa wai bɔ‑a. A‑a bai sa wan, a si den chɛ ma, mɔɛ chɛ n gbɛɛ tena, mɔɛ miin ni Chuusaɛn kun ka koe ma kɔn tena.

³⁹Chosɛfi n fea Mɛi a, an ban‑da manda chɛ n gbɛɛ a tachɛ‑a, yɔ Mansa Yataa 'a sawa‑a min fɔ. Mbɛ an yɛ‑a an baa a, Nasaɛti duu ɔ, Kadidi chɛnyɛ ɔ.

⁴⁰Den chɛ koa‑a wan, mbɛ a ɔ gbɛa‑a. A yiima tɛen ni kaka, a sin Yataa 'a dua ni wan a fɛ.

⁴¹San kɔ san na, Chisɔsi woo mɔɛ n ni ta wan Chuusaɛn duu ɔ bɛn ba chɛ ko a, min ni Chu n 'na kun bɔ a ɔ bɛnɛ[7] a.

⁴²Chisɔsi ni kɛn san tan kun ma fea, an bɛ sɛ‑a wan bɛn chɛ ɔ, yɔ a woo mɔɛ n ni a ma buɛ min dɔ tee.

⁴³Bɛn chɛ ka‑a kɛn a a, an‑na chia bia wan yɛ koe a an baa a. Chɛɛ yatina, Chisɔsi to‑a wan gbaa Chuusaɛn. A woo mɔɛ n nii ma chɛ ɔ sɔn.

⁴⁴A ni an yii ma, mbɛ ɛ fanka fanka chɛ ɔ, miin ni ka yɛ tena an baa nu. An‑na tachɛ chɛ tee dɔndɔ, mbɛ an‑na a kuu sɔ an ya a kan‑da a a, an baa mɔɛ n tɛ ɔ, a basan an dia nyɔɛ n na.

⁴⁵Chɛɛ an ma a yen ni kɛn, an yɛ‑a to Chuusaɛn, an ya a kan‑da a a.

⁴⁶Tee sawan bɔɛ ma, an‑na a yen fan Yataa 'a kata ɔ. An bɛ an ni si ɔ, Chu n 'na sawa kan mɔɛ n na, a too ma sɔenɛ an ma, ɛ ta‑a an dɔ tisa‑a.

⁴⁷Mɔɛ miin gbɛɛ ni nɔ, an da ɔ gbaa‑a wan yiimatɛ a, min ni a 'a tisa yɛman buɛ ɔ.

⁴⁸A de n fea a fa a, an‑na a yen kɛn, an tɛnɛ‑a wan a a. Mbɛ a de ɔ, “N 'na den, fen mu i‑a nn tɔɔya ka? Nn mbe faagbaa wa an dɔ i ko a, nn‑na nn ya a kan fan i a, kan kɔ kan ka gbɛ, nn fea i fa a.”

⁴⁹Mbɛ Chisɔsi ɔ, “Fen ko a mu, wo ni n yan tena? Wo ni kun fan, wo ni a ɔ sɔn, mbɛ n mbe ma‑a wan nɛ Fa 'a kata chɛ ɔ. Wo nii n yan.”

⁵⁰Chɛɛ a woo mɔɛ n nii ma a da a bai chɛ ɔ gbɛ ni, a‑a min fɔ ka an ye.

⁵¹Chɛ gbakɔ, Chisɔsi yii‑a wan Nasaɛti duu ɔ, an bɛ an na, a sin‑na kooya be wan an ma. A de‑a koe chɛ n gbɛɛ sa wan a yii ma, ɛ an tɛnsɛ a yiima ɔ.

⁵²Chisɔsi koa‑a, mbɛ a 'a yiimatɛ da a koa‑a. Mɔɛ n toen fan ni a a, a sin Yataa wɛɛ toen ni ka wan to a a.