Read Kono DUKU 20 Bible Online

DUKU 20 - Kono bible

DUKU 20

¹Tee dɔndɔ a, Chisɔsi ni wan mɔɛ n kan‑da Yataa 'a kata ɔ, ɛ ta‑a Yataa 'a sakana bai chɛndɛ ɔ yian‑da an na. Mbɛ mɔɛ miin ni Chu n tɛ ɔ Yataa a, an 'na mansa nu, an na‑a a tena, an bɛ Chu n 'na sawa kan mɔɛ n na, a basan Chu gbakoo n na.

²Mbɛ an dɔ, “E koe miin ma ka, gbasaya minan mbe i boo ɔ, an ma koe a? An gbasaya chɛ sin, nyɔn‑na a be i ma?”

³Mbɛ Chisɔsi ɔ, “Ka wɛ, n mbe wo ɔ tisa, tisa dɔndɔ gbe a. Wo chɛ fɔ n ye.

⁴Chɔn ni yii chɛ wan mɔɛ n kunɛ ɔ, Yataa chia a. Yataa an fea mɔ gbu a, minan na‑a an gbasaya chɛ be a ma?”

⁵Mbɛ an‑na a kuu sɔ a tɛnsɛ‑a an nyɔn tɛ ɔ, an dɔ te, “Mmɔ ɛ fen fɔ kamin chɛ ye? Ni mmɔ‑a a fɔ, mbɛ Chɔn 'na gbasaya ka‑a Yataa an tena, ɛ a fɔ‑a wan, mbɛ fen na‑a a ma, mmɔ nii ma dan ni Chɔn na.

⁶Chɛɛ ni mmɔ sin‑na a fɔ to, mbɛ Chɔn 'na gbasaya ka‑a mɔ gbu an na, mɔ fanka fanka min mbe ka nɛ, an mbe mmɔ bon‑da wan. A mu min na, an gbɛɛ danden fan mu a a, mbɛ Chɔn ni Yataa 'a gbonka chɛ mɔɛ an na.”

⁷Chɛ ko a, an‑na a fɔ wan Chisɔsi ye, an dɔ, “Nn ma a ɔ sɔn, ni Chɔn na‑a a 'a gbasaya chɛ ma sɔn kaina.”

⁸Mbɛ a wɛɛ ɔ, “N bɛɛ n mbe ee a ɔ yian wo a, ni nyɔn 'na gbasaya ɔ mu, n mbe koe chɛ n ma tena.”

⁹Mbɛ Chisɔsi‑a tai chɛ tɛ gbɛ mɔɛ n gbɛɛ tena, a ɔ, “Kaminɛ ni wan nɔ, min‑na yadi sa, mbɛ a‑a mɔɛ n ya a kun ma fɛn koe a. Mbɛ a bɔ‑a wan a waa a, mbɛ a ta‑a tachɛ ɔ tima ɔ yansama ko a.

¹⁰Chin fen chɛ kai tima che‑a kɛn, yadi ti chɛ‑a a 'a bɔi denɛ dɔndɔ a ta wan yadi kun ma fɛn mɔɛ chɛ n tena. A toen ni an ni a ta chin fenɛ be a ma, mbɛ a na‑a a a a ye. Chɛɛ yadi kun ma fɛn mɔɛ chɛ n‑na bɔi denɛ chɛ a boan fan, mbɛ an‑na a a yɛ a boo a senɛ a.

¹¹Mbɛ yadi ti chɛ‑a a 'a bɔi denɛ dɔ mende a ta wan to a fean bɔɛ ɔ. Chɛɛ yadi kun ma fɛn mɔɛ chɛ n‑na a wɛɛ a boan fan to, mbɛ an‑na mauma koe n gbɛɛ sɛ a ma, mbɛ an‑na a wɛɛ a yɛ a boo a senɛ a.

¹²Mbɛ a to‑a wan to nɔ, mbɛ a‑a a 'a wai chɛ mɔɛ dɔ mende a ta to, a si tena sawan bɔɛ ɔ. Yadi kun ma fɛn mɔɛ chɛ n‑na a wɛɛ ma gba gba wan, mbɛ an‑na a a nyɔndɔn a bɔ yadi gbu ɔ.

¹³An‑na chɛ gbɛɛ ma kɛn, yadi ti chɛ‑a a fɔ wan, a ɔ, ‘N mbe fen ma gbɛ? Ka wɛ, n mbe n faa ma denɛ gbu a ta mɔɛ chɛ n tena. N danden mu a a, an mbe baa be‑a wan a nan ma.’

¹⁴Chɛɛ yadi kun ma fɛn mɔɛ chɛ n‑na a 'a den chɛ yen kɛn na‑a, an dɔ, ‘Yadi ti chɛ 'a denɛ wandi gbu an nɛ. Mmɔ a fa, min mbe a ma, boo fen chɛ gbɛɛ ni ma mmɔ ta a.’

¹⁵Mbɛ an bɔ‑a a a yadi gbu ɔ, mbɛ an‑na a fa.” Mbɛ Chisɔsi ɔ, “Wo ta yiima ɔ, yadi ti chɛ ɛ fen ma‑a yadi kun ma fɛn mɔɛ chɛ n na?

¹⁶Ɛ na‑a wan, mbɛ a‑a mɔɛ chɛ n fa, mbɛ a‑a yadi chɛ be a kun ma fɛn mɔ dɔ mende n ma.” Mɔɛ chɛ n‑na bai chɛ a min kɛn, an dɔ, “Gbuama sɛkɔ.”

¹⁷Chɛɛ Chisɔsi‑a mɔɛ chɛ n ma fɛn fan, mbɛ a ɔ, “Ni wo‑a a fɔ, wo ɔ, gbuama bai an nɛ, mbɛ fen mu a nyɛndenɛ ɛ Yataa 'a gboo ɔ, mbɛ ‘Chen sɔ mɔɛ n na‑a ban senɛ min dɔ, an dɔ, a ma nyin, an gbu ma‑a gbɛ senɛ kuu ba wandi a, chenɛ gbu ko a.’

¹⁸Ni mɔ ɔ mɔ kan kɔ kan bea‑a an sen chɛ ma, ɛ a ma kai‑a wan. A sin to, ni sen chɛ sin bea‑a mɔ ɔ mɔ ma, ɛ a mɔɛ chɛ ɔ funku funku‑a wan.”

¹⁹A tima chɛ a, Chu n 'na sawa kan mɔɛ chɛ nu, an bɛ Chu n tɛ ɔ mɔɛ n na Yataa a, an 'na mansa n na, an na‑a a ɔ sɔn fan, mbɛ Chisɔsi ni tai chɛ tɛ tena a si an fan ma. Chɛ‑a a ma wan, an toen ni, an ni a bia nɔ a gba chɛ ɔ. Chɛɛ an chian‑da wan mɔɛ n ma.

²⁰An nii ma chinɔ ni a a tɛ koe a, a basan chia yanɛ a, min mbe a ma, an ni a bia. Chɛ ko a, an‑na mɔɛ n na dɛ wan a ma, a ɔ tisa koe a yiima yiima tisa n na. An toen ni, a da a bai ni a wandi ma tachɛ an ma. Mbɛ an‑na a be chɛnyɛ kun ma kɔfana ma, chɛnyɛ sawa a tachɛ koe a.

²¹Mbɛ sɔ mɔɛ chɛ n na‑a, an dɔ, “Ticha, nn‑na a ɔ sɔn fan, mbɛ e bai miin gbɛɛ fɔ, tea mu. Nn‑na a ɔ sɔn fan, mbɛ ee i boo don mɔ gbu n tɛ ɔ, chɛɛ e mɔɛ n kan Yataa 'a bai miin gbɛɛ a, tea mu a a.

²²Chɛ an fɛ mu, a yen ko, mmɔ ɛ pawa chɛ tima ɔ tima Domi kun ti wa tena. I‑a pawa chɛ be koe yen ka ma, a nyin fan?”[31]

²³Chɛɛ Chisɔsi na‑a an 'na yaa kɔɔ sɔn fan, mbɛ a wɛɛ‑a a fɔ an ye, a ɔ,

²⁴“Wo kain gbɛnsɛn[32] dɔndɔ yian bɛ n na. Nyɔn ya kɔɔɛ ɛ ka a ma, a basan a tɔɛ a?” Mbɛ an dɔ, “Domi kun ti wa an nɛ.”

²⁵Mbɛ Chisɔsi ɔ, “Mbɛ fen chɛ nu, miin mu Domi kun ti wa boo fenɛ a, wo an be a ma. Mbɛ wo yɛ‑a, fen chɛ nu, miin mbe Yataa ko a, wo‑a an be Yataa ma.”

²⁶An tɛnɛ‑a wan a a, a‑a tisa n yɛman buɛ min dɔ. An ma chia kan kɔ kan sɔn ni, an mbe bɔ min na, an ni a bia. Mbɛ an‑na an ma maun.

²⁷Chɛ gbakɔ, Chu mɔɛ dɔ nu, miin ni Sadusii n na, an bɛɛ na‑a wan Chisɔsi tena. Sadusii n nii ma dan ni a a, mbɛ mɔ gbu ɛ a kɔɔ sɔ wan a ka saya ɔ. Mbɛ an‑na a fɔ a ye,

²⁸an dɔ, “Ticha, Mosisi‑a sawa chɛ an nyɛn mmɔ ko a, a ɔ te, ni mɔɛ suun ma nyɔɛ kaima fa‑a, a ɔ, mbɛ a‑a a 'a musu to, an fea ma den suun ni min na, a ɔ, a dinden fan mu a ma, a ɔ, a ni chenɛ da mun, a ni denɛ n suun a ma. A sin an mbe an den chɛ n ya wan, a suun ma nyɔɛ chɛ 'a denɛ n na.[33]

²⁹Tima dɔndɔ a, kaminɛ ni wan nɔ, an kai wɔnfea an de‑a an fɛn suun. Mbɛ a wɛn ni chenan ka an gbɛɛ ma, a‑a musu si. Chɛɛ a ma den suun ni musu chɛ ma, mbɛ a fa‑a.

³⁰Mbɛ denɛ kaima fean bɔɛ chɛ wɛɛ‑a musu dɔndɔ gbe chɛ si to musu a. Mbɛ a wɛɛ fa‑a ka wan.

³¹A sawan bɔɛ wɛɛ‑a a si ka wan to musu a. Mbɛ a wɛɛ fa‑a. Ko dɔndɔ gbe chɛ an ma‑a to suun ma nyɔ wɔnfea chɛ n gbɛɛ a. An gbɛɛ fa‑a ka wan an ma den kan kɔ kan suun ni musu chɛ ma.

³²A danka a, mbɛ musu chɛ wɛɛ gbu fa‑a.

³³A yen ko gbɛ, a ma‑a suun ma nyɔɛ wɔnfea chɛ n gbɛɛ 'a musu a, a e na to fa‑a. Ni tee che‑a, faa mɔɛ n gbɛɛ ni an kɔɔ sɔ a ka saya ɔ, ɛ ma‑a nyɔn 'na musu a gbɛ?”

³⁴Mbɛ Chisɔsi ɔ, “Musu si basan kai sɔnɛ a, ɛ nɛ wan dunya chɛ ɔ,

³⁵chɛɛ a ee an dunya nama chɛ ɔ, min mbe na tena. Yataa ɛ mɔɛ miin ya‑a mɔ chɛndɛ n na, an kɔɔ sɔ koe a a ka saya ɔ, an mbe ee musu si‑a, n mbe ee baa an ni kai sɔn.

³⁶An mbe ee fa‑a to, koe min na mu, an mbe ma‑a wan yɔ maeka nu. An mbe ma‑a wan Yataa 'a denɛ n na, koe min na mu, Yataa‑a an kɔɔ sɔ a ka saya ɔ.

³⁷Min sin sien mu mɔɛ n kɔɔ sɔ koe ma, a ka saya ɔ, Mosisi wandi‑a a ɔ yian fan gboo chɛ ɔ, a‑a min nyɛn, mbɛ ɛ ma‑a wan tea gbu a. A mu min na, a‑a a ɔ yian fan an gboo chɛ ɔ, Yataa bɔ‑a buɛ min dɔ a ya a kɔn den chɛ ɔ, ta ni min dɔ, chɛɛ a nii a minda. A‑a bai sa nɔ wan a si Mansa Yataa ma, a ɔ, Yataa mu a wan na Ebeami ko a, a basan Aisaki an fea Chekɔpi a. A ɔ, an mbe a wan fai.

³⁸Chɛ‑a a ɔ yian fan, mbɛ chɛndɛ ba n fan mbe Yataa fai. Mɔɛ min faen mu, a ee Yataa fai. Mɔ ɔ mɔ ɛ ma‑a wan fɔɛ ɔ tima ɔ tima Yataa tena.”

³⁹Mbɛ Chu n 'na sawa kan mɔɛ dɔ n‑na a fɔ, an dɔ, “Ticha, i‑a an 'na tisa yɛman fan chɛndɛ chɛ.”

⁴⁰Chɛ gbakɔ, kai nii ma to mɔ ɔ mɔ a, Chisɔsi ɔ tisa koe a tisa dɔ mende a.

⁴¹Mbɛ Chisɔsi‑a a fɔ an ye, a ɔ, “Mɔɛ n dɔ, kunka mansa ɛ bɔ‑a Mansa Defidi 'a dambi an dɔ. Fen mu chɛ ɛ ma?

⁴²A mu min na, Mansa Defidi wandi‑a a fɔ wan Yataa tando si gboo ɔ, a ɔ, ‘Mansa Yataa‑a a fɔ wan n 'na Mansa ye, a ɔ, “Si nɛ n boo nyima ɔ,

⁴³aan n ni i chɛɛ ma nyɔɛ n don i kɔɔ, n ni an popoya i ya kɔɔ.” ’

⁴⁴Defidi wandi gbu yen ko gbɛ, a ɔ, kunka mansa chɛ benden mu a ma. Chɛɛ mɔ kun ma kundi ee koa, a ni ben i ma. A fɔen mu gbɛ, mbɛ kunka mansa chɛ, a bɔ‑a Defidi 'a dambi an dɔ. Fen ko a chɛ ɛ ma?”

⁴⁵Mɔɛ n gbɛɛ too ma sɔenɛ ni Chisɔsi ma, mbɛ a‑a a fɔ a fɛ denɛ n ye, a ɔ,

⁴⁶“Wo wo kun ma fɛn Chu n 'na sawa kan mɔɛ chɛ n boo ɔ. An toen mu doma wa wa n don koe a, an mbe ben ben. Ni an ta‑a machiti an dɔ, an toen mu mɔɛ n ni basɔmaya kɔndɔnɛ chɛ an na. Ni an ta‑a mmɔ 'a samun chɛ chenɛ n bɛɛ a, an toen mu si tena ma bɛnden ba an na. Daun chɛ bɛnɛ wɛɛ ɔ, an toen mu si koe a gbakoo n fan tɛ.

⁴⁷An mbe fuinya musu n boo fenɛ n gbɛɛ daun fan, kafaya ɔ. An gba yama chɛ ma nun koe a, an mbe samun dɔ yansama an chɛ. Chɛ ko a, Yataa ɛ an tɔɔya‑a wan, a ni ben mɔɛ tɔɛ n gbɛɛ ma.”