Read Kono DUKU 21 Bible Online

DUKU 21 - Kono bible

DUKU 21

¹Mbɛ Chisɔsi‑a a kunɛ kɔɔ sɔ, a‑a nyan tɔɛ chɛ n yen Yataa 'a kata chɛ ɔ, an mbe an boo fenɛ n na bea‑a kɔpɔ sa kakaa chɛ ɔ.

²Mbɛ a yɛ‑a wan to, a‑a fuinya musu yɔnden dɔndɔ yen, ɛ kɔpɔ gbɛnsɛn den fea a bea‑a.

³Mbɛ a ɔ, “Tea a, n ni a ma din wo tena, mbɛ fuinya musu yɔnden chɛ, a‑a kɔpɔɛ min na bea ka, a benden mu mɔɛ tɔɛ chɛ n gbɛɛ‑a kɔpɔɛ miin na bea ka.

⁴A mu min na, chɛ n‑na min be ka, an‑na a ya a chenama an kun ma, chɛɛ musu chɛ ta kɔpɔɛ gbɛɛ an nɛ a boo ɔ. Kɔpɔ dɔ mende kan kɔ kan mbe ee to a boo ɔ.”

⁵Mɔɛ dɔ n ni wan Yataa 'a kata ma dia‑a tena. An dɔ, a ni nyin kaka, a nyanden mu sen nyima nyima n fan dɔ. A sin, mɔɛ n‑na an boo fenɛ siama be wan kata chɛ gbu a bonchen koe a. Chɛɛ Chisɔsi ɔ,

⁶“Wo e ka kawa‑a sanche fenɛ miin gbɛɛ ma, tima ɛ che‑a wan, an gbɛɛ ni yɔn. Ɛ te‑a wan, a sen kan kɔ kan mbe ee to‑a sa ɔ a nyɔn kundu a.”

⁷Mɔɛ dɔ n‑na a ɔ tisa wan, an dɔ, “Ticha, koe chɛ n mbe ma‑a sɔyɔ? Ni tima sin ma‑a che‑a, koe chɛ n mbe ma‑a tima min na, fen mbe ma‑a an tɔmɔsi a?”

⁸Mbɛ Chisɔsi ɔ, “Wo wo kun ma fɛn, an ma na wo woo. Koe min na mu, mɔ sɛsɛ mbe na‑a wan n tɔɛ ɔ, an mbe a fɔ‑a wan, an dɔ, an fan mu Chasi a, kunka mansa. Mbɛ an‑na a fɔ to, an dɔ, tima gbu, an che‑a ka. Chɛɛ wo ma bea an fɛ.

⁹Ni wo sin‑na chɛɛ n ma tɔɛ a min, a basan butuinɛ n bɛɛ a, wo ma chian. Koe min na mu, koe chɛ n pɛn pɛn fan mbe ma‑a. Chɛɛ chɛ an mbe ee a ɔ yian‑da, mbɛ tima gbu che‑a.”

¹⁰Mbɛ Chisɔsi‑a a fɔ to an ye, a ɔ, “Chɛnyɛ n mbe butuinɛ chɛ‑a wan an nyɔn na, mbɛ chɛnyɛ mɔɛ dɔndɔɛ n‑na chɛɛ chɛ an bɛ chɛnyɛ mɔ dɔ mende n na.

¹¹Duu gboo ɛ samba‑a wan a ma chianden ba a, dunya gbɛɛ ɔ dɔndɔ dɔndɔɛ a. Kɔnkɔ ma chianden ba ɛ ma‑a wan kaina sɛsɛ, a basan gbandi n na. Banda wɛɛ a, ko ma chiandenɛ n mbe ma‑a wan, a basan koe tɔmɔsi chenama dɔ mende n na.

¹²Chɛɛ koe chɛ n gbɛɛ mbe e na to ma‑a, an mbe wo bia‑a wan, mbɛ an‑na ko ma gbaaenɛ sa wo ma. An mbe ta‑a wan wo a, wo gbɛmbo koe a, mmɔ 'a samun chɛ chenɛ n na, mbɛ an‑na wo sa pimbi chenɛ a. An mbe na‑a wan wo a, mansa n chen kɔɔ, an bɛ kun ti n na. An mbe chɛ gbɛɛ si‑a wan wo a, a si n bakoe ma.

¹³Chɛɛ chɛ an mbe ma‑a tima a wo ko a, wo ni Yataa 'a sakana bai chɛndɛ ɔ yian mɔɛ chɛ n na.

¹⁴Wo wo yiima ɔ bɛn tima ya ɔ, min mbe a ma, wo ma na wo faa gbaa wo wandi ma fɔ koe a.

¹⁵Koe min na mu, n mbe bai n don‑da wan wo da a, mbɛ n‑na yiimatɛ be wo ma. Ni wo‑a bai kan kɔ kan fɔ, wo chɛɛ ma nyɔɛ n mbe ee che‑a kɔɔsa bia chɛ‑a a ma.

¹⁶Wo woo mɔɛ n fandi gbu, ni wo suun ma nyɔɛ nu, a basan wo baachenɛ n fandi gbu a, an fan bɛɛ gbu n mbe wo be‑a kun ti n ma. An mbe wo dɔ n sin fa‑a wan.

¹⁷Mɔɛ n gbɛɛ mbe too‑a wan wo a, a si n ma.

¹⁸Chɛɛ wo kundi dɔndɔ wɛɛ wo kun ma, a ee to‑a a ɔ.

¹⁹Ni wo sɔ‑a gban, wo e kun‑da wan wo ni kuɔ fɔ fɔɛ ma sɔn wo wandi ko a.”

²⁰Mbɛ Chisɔsi ɔ, “Ni wo‑a Chuusaɛn duu yen, soya n‑na a a tindan, a tima a mu wo e a ɔ sɔn‑da, mbɛ a ɔ ma yansan to a te koe a.

²¹A tima chɛ a, mɔɛ miin mbe ma‑a Chudia chɛnyɛ ɔ, an ni bui sa a a kɔnkɔɛ n dɔ. Miin mbe ma‑a nɛ Chuusaɛn duu chɛ ɔ, an ni bɔ nɛ. Mɔɛ miin mbe tanda n bɛɛ ɔ, an ma yɛ to nɛ.

²²A mu min na, a tee chɛ n ma, Yataa ɛ duu chɛ ɔ mɔɛ n tɔɔ‑a wan. A tima an na mu, koe miin gbɛɛ nyɛndenɛ ɛ Yataa 'a gboo ɔ a si an ma, an mbe bɔ‑a a a.

²³A tima chɛ a, koe n mbe yaua‑a gba, miin mbe bu ma musu n nan gbu tan‑da, a basan kuinsa n na. Faayɔn ba ɛ na‑a wan chɛnyɛ chɛ ɔ, a sin, Yataa ɛ mɔɛ chɛ n mɔnɛ‑a wan.

²⁴An chɛɛ ma nyɔɛ n mbe an dɔ n fa‑a wan, mbɛ an‑na an dɔ n ma yɔnɛ n na, chɛnyɛ dɔ mende tɔɛ chɛ n gbɛɛ ɔ. A sin, mɔɛ miin ma Chu mɔɛ n na, an mbe gbasaya din‑da wan Chuusaɛn mɔɛ n ma, aan an ta tima ni ban.”

²⁵Chisɔsi ɔ, “Da fii koe n mbe bun‑da wan ma‑a kau a, ni tee, a basan tɔmbuaka n na. Faayɔn ba basan kɔndɔfii wa a, an mbe ma‑a wan chɛnyɛ n dɔ, dunya ma. Chianɛ ɛ ma‑a wan mɔɛ n dɔ, a si yii wa n tu kuiɛ ma, a basan an fonfo yii kuiɛ a.

²⁶Mɔɛ n mbe bɔn‑da wan a ma chiandia a, ni an‑na an yii na chii koe chɛ n ma, miin mbe na tena ma‑a dunya ɔ. Koe min na mu, gbasaya fenɛ miin gbɛɛ ɛ banda a, an dɔ ɛ ma‑a wan a ka an gba n dɔ.

²⁷Mbɛ an mbe n yen‑da wan, n fan, Mɔ Gbu 'a Denɛ, n mbe ma‑a na‑a gbasaya wa ɔ dugbu ɔ. A yɛ to, n mbe ma‑a wan man‑da Yataa 'a manɛ a.

²⁸Ni koe chɛ n‑na a kuu sɔ ma‑a, wo wo faa bia, wo yiima diaenɛ ni ma. Koe min na mu, a ɔ ee yansan‑da to, mbɛ Yataa‑a wo kun ka.”

²⁹Mbɛ Chisɔsi‑a tai chɛ tɛ an tena, a ɔ, “Wo wo yii na chii wɛ foa kɔnɛ[34] ma, a basan kɔnɛ tɔɛ n na.

³⁰Ni wo‑a an yamba n yen, an mbe pɔmbɔ‑a, a ni ma gbɛ wo yii ma, mbɛ sama ɔ ma yansan to.

³¹A chia dɔndɔ gbe chɛ a mu, ni wo‑a koe chɛ n yen ma‑a, wo ni a ɔ sɔn, mbɛ tima ɔ ma yansan to, Yataa ni a 'a mansaya ɔ yian.

³²“N ni a ma din wo tena, mbɛ koe chɛ n gbɛɛ mbe ma‑a pɛn, wo nyɔn sima chɛ n mbe e na ban dunya ɔ.

³³Dunya gbɛɛ ɛ ban‑da wan, chɛɛ n da a bai ee ka‑a a gba ɔ kuɔ fɔ ko a.”

³⁴Chisɔsi ɔ, “Wo wo wandi kun ma fɛn. Wo ma daun chɛ ma wo ma gbɔsɔɛ a, a basan gbɛ a kɔɔen minɛ a. A yɛ to, wo ma dunya chɛ ɔ faagbaa n sa wo kun ma. Ni wo‑a chɛ ma, ni n 'na tima che‑a, koe chɛ n gbɛɛ, an mbe a ma wan, n ni wo tɛnɛ.

³⁵A mu min na, a tee chɛ, ɛ ma‑a mɔ gbu gbɛɛ ma dunya ɔ tɛnɛ ma koe an na.

³⁶Chɛ an‑na a fɔ, wo wo kun ma fɛn, a yɛ to, wo samunɛ chɛ tee ɔ tee a. Wo samunɛ chɛ, wo ni gbasaya ma sɔn koe chɛ n gbɛɛ ɔ bia koe a, miin mbe na tena wo tan‑da, mbɛ wo‑a an dɔ tandin. A yɛ to, wo samunɛ chɛ, wo ni che sɔ‑a n chen kɔɔ, wo kunɛ kɔɔ sɔenɛ a, n fan, Mɔ Gbu 'a Denɛ, n mbe na‑a tima min na.”

³⁷Chisɔsi ni kanɛ chɛ wan tee ɔ tee a Yataa 'a kata ɔ. Ni tee na‑a bea, a ni ta wan mbɛ a chi‑a duu dɔndɔ ɔ, Wodifi kɔnkɔɛ ɔ.

³⁸Ni banda ɔ ka‑a, mɔɛ n gbɛɛ ni na wan a tena Yataa 'a kata chɛ ɔ, sau ɔ sau ma an too ma sɔ koe a a ma.