Read Kono DUKU 3 Bible Online

DUKU 3 - Kono bible

DUKU 3

¹Chɛ ɔ mɛen gbakɔ, Sakaaya 'a denɛ Chɔn ni gbɛ fuinɛ ma wan, mbɛ Yataa koɔ‑a a tena. Chɛ ɛ ma‑a tima min na, Tibɛyɔsi ni a sanɛ tan kun ma duun bɔɛ an dɔ, Domi kun ti wa ya a. Pɔnchɔsi Padeti an ni kɔfana a Chudia chɛnyɛ ɔ. Kadidi chɛnyɛ sin dɔ kun ti tɔ ni Ɛdɔdi.[8] A kɔɔ Fiipi wɛɛ ni kun ti an na Ituyia chɛnyɛ kun ma, a basan Takonitisi a. Abidini chɛnyɛ kun ti ni Disanyasi an na. Chu n 'na tɛ mɔ wa nu Yataa tena, an ni Anasi n fea n na Kayafasi a.

³Yataa koɔ‑a kɛn Chɔn tena, a ta‑a wan tanda n dɔ, Chɔdan yii a sanɛ gbɛɛ. Ɛ ta‑a Yataa 'a sakana bai ɔ yian‑da mɔɛ n na, a ɔ, mɔɛ n ni an kan kɔ sɔ an 'na ko yama a. A ɔ, mbɛ a‑a yii chɛ an kunɛ ɔ, Yataa chia a, a ɔ, min mbe a ma, Yataa ni a boo bɔ an 'na ko yama ɔ.

⁴Chɛ ma‑a wan, yɔ Yataa 'a gbonka chɛ mɔɛ Aisaya na‑a a nyɛn suun buɛ min dɔ, a ɔ, “Mɔɛ yen ko gbonka chɛ‑a fuinɛ ma, a ɔ, mɔɛ n ni tan Yataa tena. A ɔ, an ni an fandi n dɔ bɛn Mansa Yataa ya ɔ, yɔ an mbe chia ɔ bɛn buɛ min dɔ, an 'na mansa n ya ɔ. A ɔ, an mbe a tan fan, mbɛ an‑na kaina ɔ yiienɛ n gbɛɛ a fa fa. A ɔ, mbɛ an‑na kɔnkɔ kɔnkɔɛ n te, mbɛ an yɛ‑a an‑na kaina gbukusa gbukusaenɛ n gbɛɛ a kan kan, a ɔ bɛn koe a.

⁶A ɔ, a sin, a tima chɛ a, mɔ ɔ mɔ‑a a ɔ yen‑da wan, Yataa ɛ mɔɛ n baun buɛ min dɔ.”

⁷Chɔn ni kɛn Chɔdan yii da a, mɔ fanka fanka ni na wan a tena, yii chɛ koe a an kunɛ ɔ, Yataa chia a. Mbɛ a ni a fɔ wan an ye, a ɔ, “Wo yauaen ba chɛ nu, yɔ ka. Wo ee che wo nun‑da Yataa 'a mɔnɛ ma, min mbe wo ko a.

⁸Wo chɛ chɛ wai n ni a ɔ yian, mbɛ wo‑a wo kan kɔ sɔ wo 'a ko yama n na. Wo ma bun kafai be‑a a fɔ koe a, mbɛ Ebeami cheeya mu wo a. A ni ma wo yii ma, mbɛ Yataa ɛ kun fan a ni sen chɛ n ya, a ni Ebeami cheeya n nyan an dɔ.

⁹Ni kɔnɛ ma gbɔ chɛndɛ be ni, mɔɛ ɛ a tɛ wan a suu ma, mbɛ a‑a a minda. Wo gbɛɛ wo maen fan mu yɔ kɔnɛ nu. Yataa 'a yende a saen fan mu wo dɔ n tɛ koe a wo suu ma, wo wɛn mbe ee ko chɛndɛ ma‑a.”

¹⁰Mbɛ mɔɛ dɔ nu mɔ fanka chɛ ɔ, an dɔ, “Nn mbe ma ka ma gbɛ?”

¹¹Mbɛ Chɔn dɔ an ma, “Doma fea ɛ mɔɛ min boo ɔ, a ni dɔndɔ be a bɔɛ ma, a ee min boo ɔ. Mbɛ mɔ ɔ mɔ daun fenɛ koo min boo ɔ, a ni a du an fea a bɔɛ a.”

¹²Pawa bia mɔɛ dɔ n bɛɛ na‑a wan Chɔn tena, yii chɛ koe a an kunɛ ɔ, Yataa chia a. Mbɛ an dɔ, “Ticha, nn mbe ma ka ma?”

¹³A ɔ, “Wo ma pawa bia mɔɛ n boo ɔ, sawa ma min fɔ ni.”

¹⁴Soya dɔ n bɛɛ na‑a wan, an dɔ, “Nn bɛɛ sin? Nn mbe ma ka ma?” Mbɛ a ɔ, “Wo ma kɔpɔɛ bia mɔ ɔ mɔ boo ɔ gbasaya a. A yɛ to, wo ma fania fɔ mɔ ɔ mɔ ma. Wo faa ni chima wo 'a pawa a.”

¹⁵A tima chɛ a, Chu mɔɛ n gbɛɛ ya mɛen fan ni gbɛ an kun ka mansa ya ɔ, min na koe ni a ɔ. An bun‑da an yii na chii‑a Chɔn na, an dɔ, kɔkɔɛ kunka mansa chɛ gbu an nɛ.

¹⁶Mbɛ Chɔn‑na a fɔ an gbɛɛ ye, a ɔ, “N fan, n mbe yii an chɛ wo kunɛ ɔ, chɛɛ mɔ dɔndɔ ɛ na tena n gbaa, a benden mu n ma kaka. N gbu sin mbe ee che a 'a kɔɔwa yuu wɛɛ fuin koe a. A tana, ɛ Yataa Nyina a na‑a wan ma koe a wo fɛ, wo wɛn mbe wo kan kɔ sɔ‑a wo 'a ko yama n na. Chɛɛ wo wɛn mbe ee wo kan kɔ sɔ‑a wo 'a ko yama n na, ɛ wo a ta‑a wan ta ɔ.

¹⁷Ɛ mɔ gbu gbɛɛ gbɛmbo‑a wan. Ɛ mɔ gbu chɛndɛ n bɔ‑a wan a yama n ya a, yɔ sɛnɛ sa mɔɛ ɛ fenɛ ɔ fɛ buɛ min dɔ, a pofe bɔ koe a a chɛndɛ ya a. Ɛ a pofe a dɛ‑a wan, mbɛ a‑a a chɛndɛ si tena ɔ bɛn. Ɛ mɔ yama n tɔɔya‑a wan kuɔ fɔ ta ɔ, yɔ mɔɛ ɛ a fonɛ minda buɛ min dɔ ta a.”

¹⁸Chɔn‑na mɔɛ chɛ n kan fan chia sɛsɛ a, sakana bai chɛndɛ chɛ a, a basan an boo si koe a a kɔɔ.

¹⁹Chɛɛ chɛ gbakɔ, Chɔn‑na tea fɔ wan Mansa Ɛdɔdi ye. A ɔ, a ma tea ko ma ni, a kɔɔ kaima 'a musu Ɛdɔdiyasi bɔ koe a a boo ɔ, a ni a ma a 'a musu a. Mansa chɛ 'a ko yama ma gba dɔ mende nu, a‑a an bɛɛ fɔ wan a ye.

²⁰A ka Mansa Ɛdɔdi 'a ko yama maenɛ saa chɛ n ma, a‑a a ma wan to, an‑na Chɔn bia, mbɛ an‑na a sa pimbi chenɛ a.

²¹Chɔn ni tima min na yii chɛ‑a mɔɛ n kunɛ ɔ, Yataa chia a, a‑a a chɛ wan Chisɔsi wɛɛ kunɛ ɔ. Chisɔsi bun‑da samunɛ chɛ‑a, mbɛ a ya kɔɔɛ a, banda da a ka‑a.

²²Mbɛ Yataa Nyina yii‑a, bugbɔya ɔ, mbɛ a si‑a a kun ma. Mbɛ kuiɛ ka‑a banda bu ɔ, a ɔ, “N 'na denɛ mu i a, i ko a di n ye kaka. N faa chimaen mu i ko a chɛndɛ chɛ.”

²³Chisɔsi‑a a kuu sɔ tima min na a 'a wai chɛ‑a, a sanɛ ni wan san bi sawa nyɔn sima. A fa tɔ ni Chosɛfi, yɔ a ni buɛ min dɔ mɔɛ n yii ma. Chosɛfi fa tɔ ni Edi,

²⁴Edi fa tɔ ni Matati, Matati fa tɔ ni Difai, Difai fa tɔ ni Mɛki, Mɛki fa tɔ ni Chanai, Chanai fa tɔ ni Chosɛfi,

²⁵Chosɛfi fa tɔ ni Matatiyasi, Matatiyasi fa tɔ ni Emɔsi, Emɔsi fa tɔ ni Naun, Naun fa tɔ ni Ɛsi, Ɛsi fa tɔ ni Nakai,

²⁶Nakai fa tɔ ni Maati, Maati fa tɔ ni Matatiyasi, Matatiyasi fa tɔ ni Sɛmɛyin, Sɛmɛyin fa tɔ ni Chosɛki, Chosɛki fa tɔ ni Choda,

²⁷Choda fa tɔ ni Chowanan, Chowanan fa tɔ ni Desa, Desa fa tɔ ni Sɔɔbabɛɛ, Sɔɔbabɛɛ fa tɔ ni Sadatiyɛ, Sadatiyɛ fa tɔ ni Neyi,

²⁸Neyi fa tɔ ni Mɛki, Mɛki fa tɔ ni Adi, Adi fa tɔ ni Kosan, Kosan fa tɔ ni Ɛmadan, Ɛmadan fa tɔ ni Ea,

²⁹Ea fa tɔ ni Chɔsowa, Chɔsowa fa tɔ ni Ɛdiyɛsa, Ɛdiyɛsa fa tɔ ni Choyin, Choyin fa tɔ ni Matati, Matati fa tɔ ni Difai,

³⁰Difai fa tɔ ni Simiyɔn, Simiyɔn fa tɔ ni Chuda, Chuda fa tɔ ni Chosɛfi, Chosɛfi fa tɔ ni Chonan, Chonan fa tɔ ni Ɛdiakin,

³¹Ɛdiakin fa tɔ ni Mɛdɛya, Mɛdɛya fa tɔ ni Mɛna, Mɛna fa tɔ ni Matata, Matata fa tɔ ni Natan, Natan fa tɔ ni Defidi,

³²Defidi fa tɔ ni Chɛsi, Chɛsi fa tɔ ni Wobɛdi, Wobɛdi fa tɔ ni Bowasi, Bowasi fa tɔ ni Samon, Samon fa to ni Naason,

³³Naason fa tɔ ni Aminadabi, Aminadabi fa tɔ ni Amin, Amin fa tɔ ni Ani, Ani fa tɔ ni Ɛson, Ɛson fa tɔ ni Pɛɛsi, Pɛɛsi fa tɔ ni Chuda,

³⁴Chuda fa tɔ ni Chekɔpi, Chekɔpi fa tɔ ni Aisaki, Aisaki fa tɔ ni Ebeami, Ebeami fa tɔ ni Tɛya, Tɛya fa tɔ ni Nawo,

³⁵Nawo fa tɔ ni Sɛyuku, Sɛyuku fa tɔ ni Du, Du fa tɔ ni Pɛdɛki, Pɛdɛki fa tɔ ni Ɛba, Ɛba fa tɔ ni Sɛda,

³⁶Sɛda fa tɔ ni Kainan, Kainan fa tɔ ni Afasadi, Afasadi fa tɔ ni Sɛn, Sɛn fa tɔ ni Nowa, Nowa fa tɔ ni Damɛki,

³⁷Damɛki fa tɔ ni Mɛtusɛda, Mɛtusɛda fa tɔ ni Ɛnoku, Ɛnoku fa tɔ ni Chayɛdi, Chayɛdi fa tɔ ni Maadadɛɛ, Maadadɛɛ fa tɔ ni Kainan,

³⁸Kainan fa tɔ ni Ɛnosi, Ɛnosi fa tɔ ni Sɛti, Sɛti fa tɔ ni Adami, min ni Yataa 'a denɛ a.