Read Kono DUKU 4 Bible Online

DUKU 4 - Kono bible

DUKU 4

¹Chisɔsi ɛ gbɛ ka‑a Chɔdan yii da a, Yataa Nyina ni wan a fɛ gban. A sin, Yataa Nyina chɛ‑a a a ya wan, mbɛ a ben ben‑da a a fuinɛ ɔ,

²tee bi naanin ni pimbi bi naanin ko a. A tima chɛ kɔɔ, Sitana ni wan sɔ ɔ a yiima yan‑da, ni ɛ ko yama ma‑a wan. Chisɔsi sin nii ma fen kɔ fen daun ni. Tee bi naanin ni pimbi bi naanin chɛ ban‑da kɛn, kɔnkɔɛ‑a a bia wan.

³Mbɛ Sitana ɔ, “Ni Yataa 'a denɛ gbu mu i a, a ma wɛ senɛ chɛ ni mun biidi a.”

⁴Chɛɛ Chisɔsi ɔ, “Yataa 'a gboo ɔ te, ‘Daun fenɛ dechee ma fenɛ a, min mbe a ma, mɔ gbu ni ma fɔɛ ɔ.’ ”

⁵Mbɛ Sitana sɛ‑a a a kɔnkɔ wa kun tɛ, mbɛ a‑a chɛnyɛ n gbɛɛ yian a a dunya chɛ ɔ, bui chɛ bui chɛ wandi a.

⁶Mbɛ Sitana ɔ, “N mbe gbasaya be‑a wan i ma chɛnyɛ chɛ gbɛɛ kun ma, a sin, nyan chɛ gbɛɛ dunya chɛ ɔ, ɛ ma‑a i ta an na. N fan ta mu gbɛ an gbɛɛ a, n sin mbe kun fan, n ni a be mɔ ɔ mɔ ma, n toen mu mɔɛ min na.

⁷Ni i‑a n fai dechee, chɛ gbɛɛ ɛ ma‑a i ta an na.”

⁸Chɛɛ Chisɔsi ɔ, “Yataa 'a gboo ɔ te, ‘Mɔ ɛ i 'a mansa Yataa dɔndɔ gbe an fai dechee, mbɛ i yɛ‑a, i‑a a ma wai chɛ.’ ”

⁹Mbɛ Sitana‑a a ya to, mbɛ a ta‑a gbɛ a a Chuusaɛn duu ɔ. Mbɛ a sɛ‑a a a Yataa 'a kata kun tɛ, kaina a yansama wa. Mbɛ a‑a a fɔ a ma, a ɔ, “Ni Yataa 'a denɛ gbu mu i a, tin bɛ duu ma a ka nɛ.

¹⁰Koe min na mu, Yataa 'a gboo ɔ te, a ɔ, ‘Yataa ɛ a fɔ‑a wan a 'a maeka n ye, an ni i kun ma fɛn chɛndɛ chɛ.

¹¹A ɔ, an mbe an boo si‑a wan i kɔɔ, min mbe a ma‑a, i chenɛ wɛɛ ee tu‑a senɛ a.’ ”

¹²Chɛɛ Chisɔsi ɔ, “Yataa 'a gboo‑a a fɔ wan, a ɔ, ‘I ma i 'a mansa Yataa ɔ siman.’ ”

¹³Sitana‑a a chɛ kɛn chia ɔ chia a, Chisɔsi yiima yan‑da, chɛɛ a ma kun ni, a‑a a to wan nɔ, aan tima dɔ gbɛɛ ko a.

¹⁴Mbɛ Chisɔsi yɛ‑a Kadidi chɛnyɛ ɔ, Yataa Nyina ɛ a fɛ, gbasaya be koe a a ma. Mɔɛ n‑na a ma tɔɛ a min fan Kadidi tanda gbɛɛ ɔ.

¹⁵A ni ben fan kan chɛ‑a Chu n 'na samun chɛ chenɛ[9] n na, a sin, mɔɛ n gbɛɛ ni a tando wan.

¹⁶Mbɛ Chisɔsi yɛ‑a Nasaɛti duu ɔ, a bɔ‑a a ɔ kaina. Chu n 'na suin tee ma, a ta‑a wan an 'na samun chɛ chenɛ a, yɔ a ni a ma tee buɛ min dɔ. Mbɛ a‑a a kɔɔ sɔ, a sɔ‑a Yataa 'a gboo kan koe a mɔɛ chɛ n tena.

¹⁷Mbɛ an‑na gboo be a ma a kan koe a, Yataa 'a gbonka chɛ mɔɛ Aisaya na‑a min nyɛn. Mbɛ Chisɔsi‑a gboo chɛ da a ka a kaka dɔndɔ tena. Mbɛ a kuiɛ ma sɛenɛ a, a‑a a kan, a ɔ,

¹⁸“Mansa Yataa Nyina ɛ n fɛ, koe min na mu, Mansa Yataa‑a a boo sɔ n ma, sakana bai chɛndɛ chɛ ɔ yian koe a yɔn tɔɛ n na. A‑a n sɔ a fɔ koe a mɔɛ n ye, miin mbe bia ɔ, mbɛ an mbe bɔ‑a wan a ɔ, mbɛ ya te tɔɛ chɛ n bɛɛ, an mbe kaina yen‑da wan to. A‑a n na na, chɛ n bɔ koe a mɔɛ chɛ n 'na gbasaya kɔɔ, miin mbe an yɔn bia chɛ tena.

¹⁹A ɔ, mbɛ n ni a fɔ mɔ gbu gbɛɛ ye, mbɛ tima che‑a, tima min na mu, Mansa Yataa ɛ a 'a koadia ɔ yian‑da a 'a mɔɛ n na.”

²⁰Mbɛ Chisɔsi‑a gboo chɛ da a tɔn, mbɛ a‑a a a yɛ chen kun ma fɛn mɔɛ chɛ ma. Mbɛ a yɛ‑a, a si‑a an kan koe a. Mɔɛ miin gbɛɛ ni ka samun chɛ chen chɛ a, an‑na an ya bɛn a ma.

²¹Mbɛ a‑a a fɔ, a ɔ, “Wo‑a min na min ka, n‑na a kan wo tena Yataa 'a gboo chɛ ɔ, wo e ka an dɔ yen‑da gbɛ bi chɛndɛ chɛ.”

²²An gbɛɛ bun‑da bai ma kawaenɛ n fɔ‑a, a si Chisɔsi ma. A sin, an tɛnɛ‑a wan a a, a koɔ‑a buɛ min dɔ chɛndɛ chɛ. Chɛɛ an yɛ‑a wan, an‑na a fɔ, an dɔ te, “N bɔ, ka wɛ, Chosɛfi 'a denɛ an nɛ.”

²³Mbɛ Chisɔsi ɔ, “N danden fan mu a a, mbɛ wo e tai chɛ tɛ‑a wan a si n ma, min‑na a fɔ, a ɔ, ‘Danda chɛ mɔɛ, i wandi baun.’ Wo e a fɔ‑a wan to n ye, wo ɔ, wo‑a a a min fan, n‑na min ma Kapanaun duu ɔ, wo ɔ, n ni a nyɔn sima ma wɛ nɛ wɛɛ, n ta suun duu gbu ɔ.

²⁴N ni a ma din wo tena, mbɛ an mbe ee dan Yataa 'a gbonka chɛ mɔɛ kan kɔ kan na, a wandi gbu ta suun duu ɔ.

²⁵“Wo wo too ma sɔ n ma. Tima na‑a che wan mmɔ 'a Isɔɛɛ chɛnyɛ chɛ ɔ, Yataa 'a gbonka chɛ mɔɛ Idaicha 'a tima a, sona nii ma na ni san sawa, ni kau wɔdɔ ko a. Kɔnkɔ wa na‑a wan a tima chɛ a chɛnyɛ chɛ gbu gbɛɛ ɔ. A sin to, fuinya musu n kɔ ni koo nɔ.

²⁶Chɛɛ Yataa nii ma Idaicha a ta ni fuinya musu chɛ n dɔndɔ wɛɛ tena basan koe a an ma. A na‑a a a ta dechee fuinya musu dɔndɔ an tena, min nii ma Isɔɛɛ mɔ a. An fuinya musu chɛ ni duu min dɔ, a tɔ ni Sayɛfati, min ni Sidon tanda ɔ.

²⁷A yɛ to, tima min na to, Yataa 'a gbonka chɛ mɔɛ Ɛdisa ta tima wɛɛ a to mmɔ 'a Isɔɛɛ chɛnyɛ chɛ ɔ, gbandi yama yama ni wan mɔ sɛsɛ gboo ma nɛ. Chɛɛ a nii ma an dɔndɔ wɛɛ a baun ni, mɔɔ dechee Naaman min na‑a ka Siyia chɛnyɛ ɔ, a‑a an baun.”

²⁸Mɔɛ chɛ n gbɛɛ samun chɛ chen chɛ a, an‑na Chisɔsi da a bai chɛ n na min kɛn, an gbɛɛ faa bɔ‑a wan.

²⁹Mbɛ an‑na an kɔɔ sɔ wan a tima chɛ a, mbɛ an‑na Chisɔsi konkon a bɔ an duu chɛ gbu ɔ. Mbɛ an ta‑a a a kɔnkɔ a yansama kun tɛ, an 'na duu chɛ gbu sɔen ni min ma. An toen ni, an ni a a nyɔndɔn, a bɔ kɔnkɔɛ chɛ gbu chechee tena.

³⁰Chɛɛ Chisɔsi bɔ‑a wan an tɛ ɔ, mbɛ a ta‑a a ta chia a.

³¹Mbɛ Chisɔsi yii‑a Kapanaun duu ɔ, Kadidi chɛnyɛ ɔ, a‑a mɔɛ n kan kaina Chu n 'na suin tee ma.

³²An gbɛɛ da a fa‑a wan, a na‑a Yataa bai sa buɛ min dɔ an tena. Koe min na mu, a da a kuiɛ ni gbasa.

³³Kamin dɔndɔ ni wan nɔ samun chɛ chen chɛ a, nyina yama ni min fɛ. Mbɛ a‑a yee tɛ gbankon, a ɔ,

³⁴“Ee, Chisɔsi, Nasaɛti mɔɛ, a nyin i ni nn to nɔ, yɔ i‑a nn yen buɛ min dɔ. I na‑a nn fa koe an na? N‑na a ɔ sɔn fan mɔɛ min nyɔn sima mu i a. Mɔɛ mu i a, min ka‑a Yataa tena, a 'a wai tenchenɛ chɛ koe a.”

³⁵Mbɛ Chisɔsi‑a a fɔ nyina yama chɛ ma, a ɔ, a ni a da a tɔn, mbɛ a sin ni ka kamin chɛ fɛ. Nyina yama chɛ‑a kamin chɛ a bea duu ma an gbɛɛ ya kɔɔ, mbɛ a ka‑a a fɛ, a sin nii ma ko yama kan kɔ kan ma ni a a.

³⁶Mɔɛ chɛ n gbɛɛ da a fa‑a wan a a, mbɛ an dɔ, “Kan chɛ buɛ nyɔn sima minan mbe nɛ? Ɛ gbasaya din fan nyina yama n bɛɛ ma, an ni ka mɔɛ fɛ. An sin mbe a da a kuiɛ a min fan, mbɛ an ka‑a an fɛ.”

³⁷Mbɛ mɔɛ n‑na a ma tɔɛ a min fan an tanda chɛ gbɛɛ ɔ.

³⁸Mbɛ Chisɔsi bɔ‑a samun chɛ chen chɛ a, a ta‑a Saimɔn 'na chenɛ a. A‑a a tan fan, chima yama bɔndenɛ ɛ Saimɔn 'na musu de ma. Mbɛ an‑na Chisɔsi ɔ tisa a danda koe a.

³⁹Mbɛ Chisɔsi ta‑a, a sɔ‑a a 'a sofa kaa a, mbɛ a‑a a fɔ, a ɔ, chima gbu ni bɔ musu gbu ɔ, mbɛ chima chɛ bɔ‑a a ɔ. Mbɛ a ya kɔɔɛ a, musu chɛ‑a a a kɔɔ sɔ, mbɛ a‑a daun fenɛ be an ma a daun koe a.

⁴⁰Tee bea‑a kɛn, mɔɛ n na‑a wan mɔ sɛsɛ a Chisɔsi tena, gbandi yama sɛsɛ ni miin ma. Mbɛ a‑a a boo bun buɛ min dɔ an gbɛɛ ma dɔndɔ dɔndɔɛ a, an baun‑da ka wan ta‑a gbɛɛ.

⁴¹A na‑a nyina yama n bɛɛ gbain fan to mɔ sɛsɛ fɛ. An sin ni kɛn ka tena mɔɛ chɛ n fɛ, an ni wan yee tɛ‑a, an dɔ, “Yataa 'a denɛ mu i a.” Chɛɛ Chisɔsi ɔ, an ni an da a tɔn. A sin nii ma dɔn ni an ni koɔ to, a mu min na, an na‑a a ɔ sɔn fan, mbɛ kunka mansa mu an na.

⁴²Banda ɔ ka da ma, Chisɔsi bɔ‑a wan duu ɔ, mbɛ a ta‑a kaina dɔndɔ, mɔ ɔ mɔ nii kaina. Mbɛ mɔɛ n‑na a kuu sɔ a yan‑da. An‑na a yen kɛn, an nii ma to ni to, a ni bɔ an 'na duu ɔ.

⁴³Chɛɛ Chisɔsi ɔ, “Yataa‑a n na na, min mbe a ma, n ni sakana bai chɛndɛ chɛ ɔ yian duu dɔ mende n bɛɛ ɔ, a si Yataa 'a mansaya ma. Chɛ an‑na a fɔ, a dinden fan mu n ma, n ni an wai chɛ chɛ.”

⁴⁴Chɛ ko a, a na‑a a a tun fan sakana bai chɛndɛ chɛ ɔ yianɛ a, Chu n 'na samun chɛ chen chɛ n gbɛɛ a, Chu chɛnyɛ gbɛɛ ɔ.