Read Kono DUKU 5 Bible Online

DUKU 5 - Kono bible

DUKU 5

¹Tee dɔndɔ a, Chisɔsi ni wan sɔ ɔ yii wa dɔndɔ tindi ma, min tɔ ni Kɛnesayɛti.[10] Mɔɛ n ni wan an nyɔn na nyɔndɔn‑da, min mbe a ma, an ni na, an ni an too ma sɔ Yataa 'a bai ma.

²Mbɛ Chisɔsi‑a a ɔ yen fan, mɔɛ n‑na dɛndɛ fea chii tindi ma. Chɛɛ nyɛ gbain mɔɛ chɛ n nii an dɔ, an ni an 'na yaa n na ko tena wan tindi ma.

³Mbɛ Chisɔsi sɛ‑a dɛndɛ chɛ dɔndɔ ɔ, min ni Saimɔn 'na dɛndɛ a, mbɛ a‑a a fɔ a ye, a ɔ, a ni dɛndɛ gbu tundun yii ɔ ɛnden na. Chisɔsi si‑a dɛndɛ gbu ɔ, mbɛ a bun‑da mɔɛ n kan‑da.

⁴A ban‑da kɛn koɔ‑a, a‑a a fɔ wan Saimɔn ye, a ɔ, “Dɛndɛ chɛ wii a ta yii chɛ ɔ yii tena, mbɛ wo‑a wo 'a yaa n na dɛ a ɔ, min mbe a ma, wo ni nyɛ n bia.”

⁵Chɛɛ Saimɔn dɔ, “Kan mɔ, nn chia nn ya a pii, nyɛ gbain chɛ an na, chɛɛ nn ma‑a nyɛ dɔndɔ wɛɛ bia ni. Chɛɛ ni i‑a a fɔ, i ɔ, nn ni nn 'na yaa n na dɛ to yii ɔ, nn mbe a ma‑a wan.”

⁶Mbɛ an‑na yaa chɛ n na dɛ yii ɔ, an‑na nyɛ n bia aan, ɛnden fan na‑a to yaa n gbu n na ni panda panda.

⁷Mbɛ an‑na an boo kai an bɔɛ n ma dɛndɛ dɔndɔ ɔ, min mbe a ma, an ni na, an ni basan an ma. Mbɛ an na‑a, an gbɛɛ‑a nyɛ n bɔ yaa chɛ n na aan, an‑na dɛndɛ fea n na fa‑a gban. Ɛnden fan na‑a to dɛndɛ n gbu ni tunɛ yii ɔ.

⁸Saimɔn Pita‑a chɛ an dɔ yen, mbɛ a bea‑a Chisɔsi chen na, a ɔ, “Fa, n to, i ni ta. Ko yama ma mɔɛ mu n na.”

⁹A‑a chɛ fɔ, a mu min na, an bɛ a bɔɛ n na, an gbɛɛ da ɔ gbaa‑a wan, a si nyɛ koaen bonda chɛ nyɔn sima ma, an‑na miin bia ka.

¹⁰Chimisi wɛɛ tɛnɛ‑a wan a a, an fea Chɔn na, kai Sɛbɛdi 'a denɛ nu. An bɛ gbɛɛ ni an bɛ Saimɔn na wai chɛ a. Mbɛ Chisɔsi‑a a fɔ Saimɔn ye, a ɔ, “I ma chian, a mu min na, a ka gbɛ bi ma, aan a ta a nyɔn na, e ma‑a na‑a mɔɛ n fan na n tena, yɔ e nyɛ n bia buɛ min dɔ tee.”

¹¹Chɛ fɔenɛ gbakɔ Saimɔn ye, an‑na an 'na dɛndɛ n chii wan tindi ma, mbɛ an‑na fen kɔ fen to, mbɛ an bea‑a Chisɔsi fɛ.

¹²Tima dɔndɔ a, Chisɔsi ni kɛn duu dɔndɔ ɔ, kamin dɔndɔ ni wan nɔ, gbandi yama bɔen ni min gboo gbɛɛ ma. A‑a Chisɔsi yen kɛn, a bea‑a wan a chen na, mbɛ a‑a a disa, a ɔ, “Fa, ni a a di i ye, e kun fan i ni n baun.”

¹³Mbɛ Chisɔsi‑a a boo a ta, mbɛ a tu‑a kamin chɛ a. Mbɛ a ɔ, “I baun koe a di n ye. Baun gbɛ sanche.” Mbɛ a ya kɔɔɛ a, gbandi chɛ baun‑da kamin chɛ ma.

¹⁴Mbɛ Chisɔsi‑a dasi gbau gbau be a ma, a ɔ, “I ma koe chɛ ɔ yian mɔ ɔ mɔ a, chɛɛ ta dɔndɔ gbe mɔɛ chɛ tena, min mbe mmɔ tɛ ɔ Yataa a, a ni i ma fɛn. Mbɛ i‑a yasi chɛ bɔ nɔ Yataa tena, yɔ sawa, Yataa‑a min be Mosisi ma, a‑a a fɔ buɛ min dɔ. Chɛ an mbe a ɔ yian‑da mɔ ɔ mɔ a, mbɛ i baun‑da.”

¹⁵Chɛɛ Chisɔsi ma tɔɛ ta‑a wan a tima gbu a kan kɔ kan. A sin, mɔ fanka fanka ni na wan Chisɔsi kuiɛ a min koe a, a basan an baun koe a an 'na gbandi n dɔ.

¹⁶Chɛɛ a ni an to wan tima dɔ n na, mbɛ a ta‑a kaina nu, mɔ ɔ mɔ nii kaina miin, mbɛ a‑a samunɛ chɛ.

¹⁷Tee dɔndɔ a, Chisɔsi ni kɛn kan chɛ tena, mɔɛ dɔ n ni wan nɔ si ɔ, miin ni Chu n 'na sawa kan mɔɛ n na, a basan Chu mɔɛ n na, miin ni Fayisii[11] n na. An ka‑a wan Chuusaɛn duu ɔ, a basan Chudia chɛnyɛ gbɛɛ ɔ a. An ka‑a wan duu kan kɔ kan dɔ Kadidi chɛnyɛ wɛɛ ɔ. A tee chɛ a, Chisɔsi ni wan mɔɛ n baun‑da an 'na gbandi n dɔ, Mansa Yataa 'a gbasaya ɔ.

¹⁸Yatina a tima chɛ a, kaminɛ n na‑a wan namaa tɔ dɔndɔ a, ɛ sa ɔ yaa ɔ. An toen ni an ni don kamin chɛ a chen chɛ a, Chisɔsi ni ka kaina, a sa koe a a chen kɔɔ.

¹⁹Chɛɛ an ma an don chia sɔn ni, a mu min na, fanka da a ni koo kaka. Chɛ ko a, an‑na kaminɛ gbu ya wan, mbɛ an sɛ‑a a a chenɛ gbu kan ma.[12] An‑na kaina ɛnden ma ka wan chen chɛ kun tɛ, mbɛ an‑na gbandi mɔɛ gbu a yii yaa ɔ chen chɛ tɛtɛ ma, Chisɔsi chen kɔɔɛ wandi gbu.

²⁰Chisɔsi‑a a ɔ yen kɛn danaya min nyɔn sima ni mɔɛ chɛ n dɔ, a‑a a fɔ wan gbandi mɔɛ chɛ ye, a ɔ, “N bɔ, n mbe a fɔ tena i ye, mbɛ n‑na n boo bɔ i 'a ko yama ɔ.”

²¹Chu n 'na sawa kan mɔɛ chɛ n‑na bai chɛ a min kɛn, an bɛ Fayisii n na, an bun‑da a fɔ‑a an yiima ɔ, an dɔ, “Kamin chɛ e na ma nyɔn na koɔ koe a ka buɛ chɛ ɔ. Ɛ ka Yataa an main‑da. Mɔ ɔ mɔ ee nɔ min mbe kun, a ni a boo bɔ mɔ gbu 'a ko yama ɔ, mɔɔ Yataa dɔndɔ gbe.”

²²Chɛɛ Chisɔsi na‑a an yii ma koe n dɔ sɔn fan, mbɛ a‑a a fɔ an ye, a ɔ, “Yiinachii chɛ ma ma wo ɔ, mbɛ n‑na bai min fɔ ka, a ma nyin a fɔ koe a.

²³A ɔ ma gbɛ a fɔ koe a namaa chɛ ye, mbɛ n‑na n boo bɔ a 'a ko yama ɔ. Chɛɛ a ɔ gbɛ wan a ma koe a, a ni a kɔɔ sɔ, a ni tachɛ chɛ.

²⁴N mbe a ɔ yian‑da wan gbɛ wo a, mbɛ gbasaya ɛ wan n fan, Mɔ Gbu 'a Denɛ boo ɔ dunya chɛ ɔ, n boo bɔ koe a ko yama ɔ.” Mbɛ a‑a a fɔ namaa chɛ ma, a ɔ, “N mbe a fɔ tena gbɛ i ye, mbɛ i ni i kɔɔ sɔ, i ni i 'a yaa ya, i ni ta i waa a.”

²⁵Mbɛ a ya kɔɔɛ a, kamin chɛ‑a a kɔɔ sɔ, a sɔ‑a. Mbɛ a‑a a 'a yaa ya, a ni ka sa ɔ min dɔ, an gbɛɛ ya kɔɔ, mbɛ a ta‑a a waa a, ɛ ta‑a Yataa tando‑a.

²⁶An gbɛɛ da ɔ gbaa‑a wan a ɔ benden ba a. Chiandia don‑da wan an gbɛɛ ɔ, mbɛ an bun‑da Yataa tando‑a, an dɔ, “Nn‑na kamaya koe n dɔ yen bi.”

²⁷Chɛ gbakɔ, Chisɔsi bɔ‑a wan baa ma. Mbɛ a‑a kamin dɔndɔ yen, min ni pawa kain mɔɛ a, a tɔ ni Difai. A ni si ɔ a 'a pawa kain chenɛ a wan, mbɛ Chisɔsi‑a a fɔ a ma, a ɔ, “Bea n fɛ.”

²⁸Mbɛ Difai‑a a kɔɔ sɔ, mbɛ a‑a a boo fenɛ n gbɛɛ to, mbɛ a bea‑a Chisɔsi fɛ.

²⁹Mbɛ Difai‑a daun chɛ bɛn ba ɔ bɛn fan a 'a chenɛ a, Chisɔsi ko a. Pawa kain mɔ sɛsɛ ni wan nɔ, ni mɔ dɔ mende nu, an bɛn chɛ ɔ, an gbɛɛ mbe si ɔ daun chɛ a, an bɛ Chisɔsi n na.

³⁰Mbɛ Chu mɔɛ dɔ nu miin ni Fayisii n na, an bɛ an 'na mɔɛ n na, miin ni Chu n 'na sawa kan, an bu ɔ nii ma dia ni. An gbonyɛ‑a wan Chisɔsi a, a fɛ denɛ n tena, an dɔ, “Wo kan mɔ ee ka ko chɛndɛ a. A ma nyin wo ni daunɛ chɛ kaina dɔndɔɛ, wo bɛ pawa kain mɔɛ chɛ n na, a basan mɔ dɔ gbɛɛ n bɛɛ a, miin mbe ee sɔ ɔ Yataa 'a chia ma.”

³¹Mbɛ Chisɔsi ɔ, “Danda chɛ mɔ ma gbɔsɔ ee gboo ɔ bɔ tɔ ma, mɔɔ dechee chɛ nu, miin gbandien mu.

³²Chɛ an fɛ mu, mɔɛ miin mu mɔ tandenɛ n na Yataa tena, n ma na ni an fan ko a. Chɛɛ mɔɛ miin mbe ee sɔ ɔ Yataa 'a chia ma, n na‑a an fan ko a, min mbe a ma, an ni an kan kɔ sɔ an 'na ko yama n na.”

³³Mbɛ an dɔ Chisɔsi ma, “Chɔn fɛ denɛ n mbe sunɛ bia wan tima ɔ tima, mbɛ an‑na samunɛ chɛ. Nn fan Fayisii n bɛɛ, nn fɛ denɛ n bɛɛ mbe a ma ka wan. Chɛɛ i ta fɛ denɛ n mbe daunɛ an chɛ tun, an mbe ee sun bia. Fen ko a mu, an mbe chɛ ma tena?”

³⁴Mbɛ Chisɔsi ɔ, “Ni mɔɛ‑a musu si bɛnɛ chee, mbɛ a bɔɛ n na kan‑da, daun chɛ koe a mu. An mbe ee to nɔ a chen kɔɔ an ni kɔnkɔɛ a dɛ an fandi ma.

³⁵Chɛɛ tima min na mɔɛ n mbe musu si kai chɛ ya‑a an tɛ, a tima a mu, an mbe sunɛ bia‑a.”

³⁶Mbɛ Chisɔsi‑a tai tɛ wan an tena, a ɔ, “Mɔ ɔ mɔ ee che i ni doma nama tɛ a a, doma kɔma dombo koe a. Ni mɔɛ‑a chɛ ma, a gba ma ee nyan‑da. Koe min na mu, woe an mbe to‑a doma nama chɛ ɔ. A sin, doma nama pisi chɛ ee na‑a bɛn‑da doma kɔma chɛ ya a.

³⁷A yɛ to, ni mɔ ma‑a gbɛ chɛ‑a gbɛ chɛ soe gboo[13] ɔ, e a chɛ tena soe gboo nama an dɔ, ɛ to kaina aan a a ni kɔɔ. Chɛɛ mɔ ee gbɛ nama chɛ gbɛ chɛ soe gboo kɔma ɔ, a a kɔɔ koe a, ɛ a te wan, mbɛ i fo‑a gbɛ a, a basan soe gboo a.

³⁸Mɔ ɛ min ma, e gbɛ nama chɛ soe gboo nama an dɔ.”

³⁹A ɔ te to, “Mɔ ɔ mɔ ee ka gbɛ kɔma min tena, mbɛ a bun‑da di chɛ‑a gbɛ nama wakoe a. Koe min na mu, ɛ a fɔ‑a wan, a ɔ, gbɛ kɔma nyin a ni ben gbɛ nama ma.”