Read Kono DUKU 8 Bible Online

DUKU 8 - Kono bible

DUKU 8

¹Tima ɛnden gbakɔ, Chisɔsi ben ben‑da wan duu n dɔ, ɛ ta‑a sakana bai chɛndɛ chɛ ɔ yian‑da mɔɛ n na, a si Yataa 'a mansaya ma. A fɛ den tan kun ma fea n bɛɛ ni wan a fɛ.

²Musu dɔ n bɛɛ ni wan a fɛ. An ni musu n fan na, Chisɔsi na‑a miin baun an 'na gbandi ɔ. An dɔ n sin, a na‑a nyina yama n fan gbain an fɛ. Musu chɛ n gbu sin tɛ ɔ, musu dɔndɔ ni wan nɔ, min tɔ ni Mɛi, min ka‑a Makadaa duu ɔ. Chisɔsi na‑a nyina yama wɔnfea gbain an fɛ.

³Chowana wɛɛ ni to an musu chɛ n dɔndɔ an na, min chɛɛ ni wai chɛ tena Mansa Ɛdɔdi ko a. Susana wɛɛ ni wan nɔ, a basan musu sɛsɛ dɔ gbɛɛ n na. Musu chɛ n ni an fandi ta boo fenɛ n be wan Chisɔsi ma, an bɛ a fɛ denɛ n na, an ta basamaya a.

⁴Mɔɛ n ni wan tun na‑a Chisɔsi tena, a ka duu sɛsɛ n dɔ, mbɛ fanka wa a kan‑da kɛn, Chisɔsi‑a tai chɛ an tɛ an tena.

⁵A ɔ, “Tee dɔndɔ a, kamin dɔndɔ ta‑a wan a 'a sɛnɛ ɔ, chin fen fasi tena. Ɛ a fasi chɛ an na, mbɛ dɔ bea‑a chia kuu a. Mbɛ dɔ n bɛɛ bea‑a faa gban duu gboo ma, dɔ n yɛ‑a an bea‑a wai duu gboo ma, mbɛ dɔ n sin bea‑a duu gboo chɛndɛ ma. Chin fen kuu miin bea‑a ka chia kuu a, mɔɛ n tɛn tɛn‑da wan a ɔ, mbɛ konde n bɛɛ‑a an sogban sogban fan. Miin sin bea‑a ka faa gban duu gboo chɛ ma, an fɛn‑da wan, chɛɛ an fa‑a wan. Koe min na mu, yii kan kɔ kan nii an duu gboo chɛ ɔ. Miin sin bea‑a ka wai duu gboo chɛ ma, an bɛɛ fɛn‑da wan, a basan wai chɛ a dɔndɔ a, chɛɛ wai chɛ n koa‑a wan a ben chin fen chɛ n ma. Chɛ‑a chin fen fɛn chɛ n na kɔnya wan, mbɛ an gbaa‑a. Miin bea‑a ka duu gboo chɛndɛ chɛ ma, an fɛn‑da wan, a danka a, an gbɔ‑a wan wɔsɔkɔɔ. An yii‑a wan gbaa chɛmɛ dɔndɔ ko a.” Chisɔsi ɔ te gbɛ, “Wo wɛn too ɛ koe a min, wo chɛ a min.”

⁶

⁷

⁸

⁹Chisɔsi fɛ denɛ n‑na a ɔ tisa wan, ni a‑a tai min tɛ ka a fasaien mu fen na.

¹⁰Mbɛ a ɔ, “Mɔɛ gbɛɛ nii ma min dɔ sɔn tee, a si Yataa 'a mansaya ma, a‑a an dɔ yian wo a. Chɛɛ mɔɛ tɔɛ chɛ nu, n mbe koɔ an tena tai an dɔ. Min mbe a ma, an ya a kaenɛ ɛ ma‑a wan, an ni kaina fɛn, chɛɛ an mbe ee ko ɔ ko ɔ yen‑da. Mbɛ an mbe an too ma sɔ‑a wan, chɛɛ an mbe ee ko ɔ ko ɔ gbɛ‑a.”

¹¹Chisɔsi ɔ, “Tai chɛ tɔmɔsi an nɛ. Chin fen kuu chɛ mu Yataa 'a bai an na.

¹²Mɔɛ dɔ n mbe wan yɔ chia a duu gboo chɛ, chin fen kuu n bea‑a min ma. Ni an‑na Yataa 'a sakana bai a min, Sitana ɛ na wan a ya kɔɔɛ a, mbɛ a‑a bai chɛ bɔ an yiima ɔ, min mbe a ma, an ma na dan sakana bai chɛndɛ chɛ a, mbɛ an‑na bauncha ma sɔn.

¹³Mɔɛ dɔ n sin mbe wan yɔ faa gban duu gboo chɛ, chin fen kuu n bea‑a min ma. Ni an‑na sakana bai chɛndɛ chɛ a min, an mbe an boo si wan a kɔɔ, buɔdia wandi gbu a. Chɛɛ Yataa 'a bai chɛ ee sa an yiima ɔ chɛndɛ chɛ, a ni tima ɔ yansama ya nɔ. An mbe dan dechee a a tima ɛnden fan ko a, chɛɛ ni koe ɔ gbɛa‑a an ma, mbɛ an‑na an boo bɔ a kɔɔ.

¹⁴Mɔɛ dɔ n sin mbe wan nɔ yɔ wai duu gboo chɛ, chin fen kuu chɛ n bea‑a ka min ma. An mbe sakana bai chɛndɛ chɛ a min fan, chɛɛ faagbaa ɛ wan an mɔɛ chɛ n ma, dunya chɛ ɔ nyanɛ ko a, a basan a ɔ buɔdia a. Ni chɛ ma‑a an yii ma, an mbe ee che an gbɔsɔ‑a Yataa 'a wai chɛ koe a.

¹⁵Mɔɛ dɔ n sin mbe wan yɔ duu gboo chɛndɛ chɛ, chin fen kuu n bea‑a ka min ma. Ni an‑na sakana bai chɛndɛ chɛ a min, an mbe a sa wan an yii ma chɛndɛ chɛ, mbɛ an‑na a ma, yɔ sakana bai chɛ‑a min fɔ an ye a ma koe a. A sin to, yakɔɔtawa kan kɔ kan ni an tan bɛɛ, an mbe ee sɛmbɛ dan koe a Yataa a.”

¹⁶Chisɔsi ɔ, “Ni mɔ ɔ mɔ‑a dambo a man, a ee samba bun a kun ma, chɛ ma, a ni a a don sofa kɔɔ. Chɛɛ ni mɔ‑a dambo a man, e a si kaina wan, min mbe a ma, ni mɔɛ n don‑da dechee i 'a chenɛ a, an mbe kun fan an ni kaina ɔ yen gbadan.

¹⁷“Koe min na mu, ko ɔ ko min dɔ nunden mu, ɛ bɔ‑a wan ya a ma. Koe min bɛɛ ma bunden mu, a wɛɛ ɛ bɔ‑a wan ya a ma tee dɔndɔ a.

¹⁸“Chɛ an‑na a fɔ, wo wo kun ma fɛn wo e wo too ma sɔ‑a buɛ min dɔ. A mu min na, miin mbe an too ma sɔ‑a chɛndɛ chɛ, Yataa ɛ an 'na yiimatɛ ma munda‑a wan. Chɛɛ mɔɛ miin mbe ee dɔn‑da an too ma sɔ‑a, yiimatɛ ɛnden chɛ wɛɛ min mbe ma‑a an dɔ, Yataa ɛ a ma‑a wan an ni fo a.”

¹⁹Mbɛ Chisɔsi de na‑a a tena, an bɛ a dɔ kaima n na. Chɛɛ an ma kun ni, an ni gbɛn a ma, a mu min na, fanka da a ni koo kaka a 'a tindanɛ.

²⁰Mbɛ mɔ dɔndɔ‑a a fɔ Chisɔsi ye, a ɔ, “I de yen ko sɔ ɔ baa ma, an bɛ i dɔ kaima n na. An toen mu an ni i yen.”

²¹Mbɛ Chisɔsi‑a a fɔ an gbɛɛ ye, a ɔ, “Mɔɛ miin mbe Yataa 'a bai a min‑da, mbɛ an‑na an boo si a kɔɔ, n de mu an fan na. N dɔ kaima n bɛɛ mu an mɔ dɔndɔ gbe chɛ n fan na.”

²²Tee dɔndɔ a, Chisɔsi sɛ‑a dɛndɛ dɔndɔ ɔ, an bɛ a fɛ denɛ n na. Mbɛ a ɔ, an ni yii wa chɛ tɛ tindi dɔndɔɛ ma. Mbɛ an bun‑da ta‑a dɛndɛ chɛ ɔ.

²³An to‑a ta an na yii chɛ a, mbɛ Chisɔsi chinɔ‑a a ye. Mbɛ fia wa‑a a kuu sɔ bɔ‑a, min‑na a ma, yii bun‑da chɛ‑a dɛndɛ gbu ɔ. A na‑a to ɛnden fan na, dɛndɛ gbu ni tunɛ an na yii ɔ.

²⁴Mbɛ a fɛ denɛ n bun‑da a a kunɛ‑a. An dɔ, “Kan mɔ, kan mɔ, mmɔ yen ko to‑a yii ɔ.” Mbɛ Chisɔsi‑a a kɔɔ sɔ, a‑a yii chɛ, min kɔnkɔɛ ni sɔ ka dengben, a ɔ ɛ gbasi, a fea fia min bɛɛ ni bɔ tena, a‑a an na gban. Mbɛ fia ɔ maun‑da don, mbɛ yii wɛɛ si‑a chidi.

²⁵Mbɛ a ɔ an ma, “Fen ko a mu, wo ma dan ni n na?” Chɛɛ an da ɔ gbaa‑a wan, a sin, an chian‑da wan, mbɛ an dɔ an nyɔn ma, “Fen kamin nyɔn sima mu chɛ a? Ɛ koe min fɔ fia wɛɛ yɛ, a basan yii a, an mbe ma.”

²⁶Chɛ gbakɔ, Chisɔsi n‑na a fo wan gbɛ yii wa chɛ tindi ma Kɛyasa chɛnyɛ ɔ, an bɛ a fɛ denɛ n na. Kɛyasa chɛnyɛ chɛ ni Kadidi chɛnyɛ ya teen ma wan.

²⁷An che‑a kɛn nɔ, Chisɔsi ɛ bɔ‑a dechee dɛndɛ chɛ ɔ a sɛ tindi ma, kamin dɔndɔ min bɔ‑a Kɛyasa duu ɔ, a na‑a wan, a‑a Chisɔsi tan. Kamin chɛ nyina yama n fan ni a fɛ. A na‑a tima ɔ yansama ya wan a ma senɛ ɛ, a sin nii ta chenɛ a. A ni chi fanɛ[17] a wan bɛnkuɛ ɔ.

²⁸Tima sɛsɛ ko a, nyina yama chɛ n ni a ma wan, kamin chɛ ni bui, a ni ta kaina mɔ ɔ mɔ ee kaina min. Mɔɛ n ni a chenɛ ɔ chii wɛɛ yɔɔɛ a, a basan a boo a, a ni yɔɔɛ chɛ ɔ tɛ tɛ wan, mbɛ nyina yama chɛ n‑na a ma, a ben‑da bui‑a. A‑a Chisɔsi yen kɛn dechee, a‑a yee tɛ wan gbankon, mbɛ a bea‑a a chen na. Mbɛ a‑a a fɔ a kuiɛ ma sɛenɛ a, a ɔ, “Chisɔsi, Yataa Wa 'a denɛ, i toen mu i ni fen ma n na? I dimu, i ma n mɔnɛ.” A‑a chɛ fɔ, a mu min na, Chisɔsi‑a a fɔ wan nyina yama chɛ n ye, a ɔ, an ni ka a fɛ.

²⁹

³⁰Mbɛ Chisɔsi ɔ, “I tɔɛ?” Mbɛ a ɔ, “N tɔ mu Fanka Wa.” A‑a chɛ fɔ, a mu min na, nyina yama sɛsɛ ni wan a fɛ.

³¹Nyina yama chɛ n yɛ‑a wan, an‑na Chisɔsi disa, min mbe a ma, a ma na an na ta ta ɔ tɔɔya koe a.

³²A tima chɛ a, kɔɛnya man sɛsɛ ni wan daun chɛ‑a an baima kɔnkɔɛ kaa fɛ. Nyina yama chɛ n‑na Chisɔsi disa wan, min mbe a ma, a ni dɔn an ye an ni bea kɔɛnya chɛ n fɛ. A dɔn‑da wan an da a kuiɛ ma.

³³Nyina yama chɛ n ka‑a wan kamin chɛ fɛ, mbɛ an bea‑a kɔɛnya chɛ n fɛ. Kɔɛnya man chɛ n ben‑da wan bui‑a, a ka kɔnkɔɛ chɛ kaa fɛ. An yii‑a wan an dɛ‑a yii ɔ, mbɛ an to‑a an yii gbu ɔ.

³⁴Mɔɛ chɛ nu, miin ni ka kɔɛnya chɛ n kun ma fɛn tena, an‑na a ɔ yen kɛn koe min ma‑a, an ben‑da wan bui chɛ‑a. Mbɛ an ta‑a, an‑na a ɔ yian mɔɛ n na duu ɔ, a basan konko mɛsɛ chɛ n dɔ a.

³⁵Mɔ sɛsɛ n na‑a wan, min mbe a ma, an ni a ɔ yen min ma‑a. An che‑a kɛn, nyina yama chɛ n ni ka kaminɛ min fɛ, an‑na a tan fan, ɛ si ɔ Chisɔsi chen kɔɔ. A ma chiienɛ ɛ, a sin a yiima tɛenɛ ɛ. Chɛ‑a a ma wan, an gbɛɛ chian‑da.

³⁶Mɔɛ miin ni ka nɔ ko ɔ ko ma‑a, an fan‑na a ɔ yian gbɛ an bɔ n na, Chisɔsi‑a nyina yama chɛ n gbain buɛ min dɔ kamin chɛ fɛ.

³⁷Mbɛ mɔɛ chɛ n gbɛɛ miin ka‑a ka Kɛyasa chɛnyɛ ɔ, an‑na Chisɔsi disa, an dɔ, a ni bɔ an 'na tanda ɔ. Koe min na mu, an chian‑da wan kaka. Mbɛ Chisɔsi sɛ‑a dɛndɛ ɔ yɛ koe a.

³⁸A tima chɛ a, kamin chɛ, Chisɔsi na‑a nyina yama chɛ n gbain ka min fɛ, a‑a disa chɛ wan, a ɔ, Chisɔsi ni a ma an bɛ ni ta. Chɛɛ Chisɔsi ɔ,

³⁹“Ta i 'a mɔɛ n tena. I ni a ɔ yian an na, Yataa‑a koe min chɛ i ye.” Kamin chɛ wɛɛ ta‑a wan, mbɛ a ben ben‑da duu chɛ ɔ gbɛɛ, ɛ a ɔ yian‑da, Chisɔsi‑a koe min chɛ a ye.

⁴⁰Mbɛ Chisɔsi yɛ‑a yii wa chɛ kaka dɔndɔɛ, a ka‑a kaina, an bɛ a fɛ denɛ n na. An‑na mɔ fanka tan a ma kɔn‑da, a sin mɔɛ chɛ n bu ɔ dia‑a wan an yen koe a.

⁴¹Mɔ chenama dɔndɔ Chu n 'na samun chɛ chenɛ a, min tɔ ni Chayɔsi, a na‑a wan, mbɛ a bea‑a Chisɔsi chen na. Mbɛ a‑a a disa, a ɔ, an ni ta a 'a chenɛ a.

⁴²Koe min na mu, a 'a den musuen dɔndɔ gbe, min sanɛ ni gbɛ san tan kun ma fea, a ni gbɛ a ni ma tanka an na dechee. Chisɔsi‑a a kuu sɔ kɛn ta‑a dechee, mɔɛ n findi findi‑a wan a ma, a ka kaka kan kɔ kan ma.

⁴³Musu dɔndɔ ni wan fanka chɛ tɛ ɔ, musu n 'na kau ma gbandi ni min ma, san tan kun ma fea ko a. A na‑a a boo fenɛ gbɛɛ ma tachɛ wan buii ti n ma, chɛɛ mɔ ɔ mɔ ma kun ni, a ni a 'a gbandi chɛ danda a ma.

⁴⁴A na‑a na wan fanka fanka chɛ ɔ Chisɔsi gbaa chia a, mbɛ a tu‑a Chisɔsi 'a doma kai chɛ da a. Mbɛ a 'a wii chɛ ɔ tɛ‑a a ma a ya kɔɔɛ a.

⁴⁵Mbɛ Chisɔsi ɔ, “Nyɔn tu‑a n na?” Mɔ ɔ mɔ‑a kɔɔsa bia chɛ wan tu koe a a a. Mbɛ Pita ɔ, “Kan mɔ, mɔɛ n mbe i a tindanɛ, an mbe tindi tindi‑a i ma, mbɛ i ni tisa chɛ to mɔɛ tu koe a i a?”

⁴⁶Chɛɛ Chisɔsi‑a a fɔ wan tun, a ɔ, “Mɔɛ an tu‑a n na, a mu min na, n‑na a ɔ sɔn fan, mbɛ gbasaya dɔ bɔ‑a n dɔ, danda chɛ koe a.”

⁴⁷Mbɛ musu chɛ‑a a ɔ yen fan, mbɛ a‑a min ma, a bɔ‑a ya a ma. Chɛ ko a, a na‑a wan, a ma samba sambaenɛ ɛ, mbɛ a bea‑a Chisɔsi chen na. A tima a, mɔɛ gbɛɛ ya kɔɔ, a‑a a ɔ yian Chisɔsi a, fen na‑a a ma a tu‑a a a. A sin to, a baun‑da buɛ min dɔ a ya kɔɔɛ a.

⁴⁸Mbɛ Chisɔsi ɔ, “Bɔɔɛ, ta i faa chimaenɛ a don. I 'a danaya‑a i baun.”

⁴⁹Chisɔsi to‑a koɔ tena wan musu chɛ tena, mbɛ sɔ mɔɛ na‑a a ka Chayɔsi 'a chenɛ a. Mbɛ a ɔ, a 'a den musuenɛ gbu fa‑a, a ma na sɔ to ticha tɔɔya‑a ta koe a nɔ.

⁵⁰Chɛɛ Chisɔsi na‑a bai chɛ a min fan, mbɛ a‑a a fɔ Chayɔsi ye, a ɔ, “I ma chian, dan dechee a a, mbɛ ɛ baun‑da wan.”

⁵¹A che‑a kɛn Chayɔsi 'a chenɛ a, a nii ma dɔn ni, mɔ dɔ mende kan kɔ kan ni don a san‑da, mɔɔ dechee Pita, Chɔn, Chimisi, den chɛ fa, a basan den chɛ de a.

⁵²Mɔɛ n gbɛɛ ni wan yee tɛ‑a, an mbe ta‑a di chɛ‑a den chɛ kun ma. Chisɔsi ɔ, “Wo sɛmbɛ di chɛ‑a, den chɛ ma fa ni, ɛ sa ɔ chinɔɛ ɔ wan dechee.”

⁵³A‑a bai chɛ fɔ kɛn, mɔɛ chɛ n gbɛɛ‑a a yɛn fan, a mu min na, an na‑a a ɔ sɔn fan, mbɛ den chɛ faen fan ni tea tea a.

⁵⁴Chɛɛ Chisɔsi‑a den chɛ ya wan a boo ma, mbɛ a‑a a chee banda a, a ɔ, “N 'na den, i kɔɔ sɔ.”

⁵⁵Mbɛ den chɛ ni yɛ‑a a ɔ, mbɛ a‑a a kɔɔ sɔ bui a. Mbɛ Chisɔsi‑a an sɔ, a ɔ, an ni daun fen den be a ma, a ni a daun.

⁵⁶A woo mɔɛ n da a fa‑a wan koe chɛ a. Chɛɛ Chisɔsi‑a an na si wan gbau gbau, mbɛ an ma a ɔ yian mɔ ɔ mɔ a, min ma‑a ka.