Read Kono CHƆN 10 Bible Online

CHƆN 10 - Kono bible

CHƆN 10

¹Mbɛ Chisɔsi‑a a fɔ, a ɔ, “Ka n mbe chɛ ma din wo tena. Mɔɛ min mbe ee don‑da sa kuii ɔ, a da 'a chia a, chɛɛ ɛ sɛ‑a chia dɔ mende a, a mɔɛ chɛ mu kanka kona wa an na.

²Mɔɛ min mbe don a da 'a chia a, an mu sa kun ma fɛn mɔɛ gbu a.

³Ni a na‑a sa kuii chɛ da a, mɔɛ min mbe ma nɔ, a kun ma fɛnɛ a, ɛ a da a ka wan a ye. Ni a sin don‑da, a ni bun a 'a sa n chee‑a an tɔɛ ma, an mbe a kuiɛ a min fan. Mbɛ a bɔ‑a an na kuii gbu ɔ.

⁴Ni a ban‑da bɔ‑a a ta sa chɛ n gbɛɛ a, ɛ sɔ wan an ya ɔ, mbɛ sa chɛ n‑na a sɔ a fɛ, a mu min na, an‑na a kuiɛ sɔn fan.

⁵Sa chɛ n mbe ee bea mɔ dɔ mende fɛ. Chɛɛ an mbe min ma, an mbe ben fan bui a, a ka mɔ dɔ mende baima. Koe min na mu, a mɔɛ chɛ kuiɛ ma bɔ ni an ti kuiɛ a.”

⁶Chisɔsi na‑a tai chɛ an tɛ, chɛɛ an nii ma a ɔ gbɛ ni, a ni min fɔ tena an ye.

⁷Chɛ‑a a ma wan, mbɛ Chisɔsi ɔ, “Ka n mbe chɛ ma din wo tena. N mbe wan dechee yɔ sa kuii chɛ da, sa chɛ n mbe don min na, an mbe bɔ.

⁸Chɛɛ mɔɛ tɔɛ n gbɛɛ, miin sɔ‑a n ya ɔ, miin na‑a a ma, yɔ an ni sa chɛ n kun ma fɛn tena wan, kanka kona wa mu an na. Chɛɛ sa chɛ n gbu ma an too wɛɛ ma sɔ ni an ma.

⁹N fan mu sa kuii chɛ da a. Ni mɔ ɔ mɔ ben‑da n tena chia a, a ni don, a mɔɛ chɛ ɛ kun ka ma sɔn‑da wan. Ɛ don‑da wan, a ni bɔ, a faa ma a. A sin mbe a daun fenɛ ma sɔn‑da wan.

¹⁰Kanka tana, ɛ na dechee kanka chɛ koe an na, fen fa koe a, a basan kasaa chɛ koe a. Chɛɛ n fan, n na‑a, min mbe a ma, n 'na sa n ni fɔɛ ma sɔn, kuɔ fɔ fɔɛ. An sin, an fɔɛ chɛ ɔ, an mbe n 'na dua gbɛɛ ma sɔn‑da wan.

¹¹“N mbe wan yɔ sa kun ma fɛn mɔɛ chɛndɛ, min ma bɛnden mu a fɔɛ be koe a, a 'a sa n ko a.

¹²Chɛɛ mɔɛ chɛ tana, an mbe min pawa sa chɛ n kun ma fɛn koe a, a ee chɛ ma. Ni a‑a kui yen na‑a, ɛ sa chɛ n to wan, mbɛ a ben‑da bui‑a, a mu min na, a wan ta ma an na. Chɛ ɛ a ma wan, kui chɛ ni chɛ dɔndɔ ma, mbɛ a tɔɛ n fasan‑da a ɔ.

¹³Mɔɛ min yaen mu ka, sa chɛ n kun ma fɛn koe a, ɛ ben fan bui‑a, koe min na mu, bɔi den gbama mu a a. A sin, a ma a gbɔsɔɛ ni sa chɛ n ko a.

¹⁴N fan mu sa kun ma fɛn mɔɛ chɛndɛ a. N‑na n ta sa n sɔn fan, a sin, n 'na sa n bɛɛ, an‑na n sɔn fan.

¹⁵Ɛ ka wan dechee, yɔ Fa‑a n sɔn buɛ min dɔ chɛndɛ chɛ, n bɛɛ, n‑na a sɔn ka wan. A sin, n ma bɛnden fan mu, n fandi be koe a, n 'na sa n na tɔnɔnɛ ko a.

¹⁶N 'na sa dɔ n mbe wan nɔ, miin mbe ee sa kuii chɛ ɔ. N mbe na tena wan an bɛɛ a. An bɛɛ, an mbe an too ma sɔ‑a wan n da a kuiɛ ma, a sin, an gbɛɛ, an mbe ma‑a wan sa dɔndɔɛ a, an kun ma fɛn mɔɛ dɔndɔɛ ko a.

¹⁷“Fa Yataa toen fan mu n na, koe min na mu, n ma bɛnden fan mu, n ni n fɔɛ be, min mbe a ma, n ni danka to ma‑a fɔɛ ɔ.

¹⁸Mɔ ɔ mɔ ee kun a ni n fɔɛ ya n sun da a. Chɛɛ n fandi gbu, n fan mbe n fɔɛ be‑a. Gbasaya been mu n fandi an ma, n fandi fɔɛ be koe a, an ni n fa. A gbasaya chɛ ɛ to n fandi an boo ɔ, a ma koe a to, n ni yɛ fɔɛ ɔ. Fa na‑a a fɔ ka wan n ye, a ma koe a.”

¹⁹Chisɔsi 'a bai chɛ n‑na a ma wan to, kuiɛ a fasanɛ don‑da to Chu mɔɛ chɛ n tɛ ɔ.

²⁰An sɛsɛ nu, an ni wan a fɔ‑a, an dɔ, “Nyina yama min mbe a fɛ, an‑na a woo ka. Wo e wo too ma sɔ a ma fen ko a?”

²¹Chɛɛ an dɔ nu, an ni wan a fɔ‑a, an dɔ, “Nyina yama ɛ ma mɔɛ min fɛ, a ee koɔ ka. Nyina yama ee che a ma‑a fion tɔɛ ya a ni ka.”

²²Chima tima dɔndɔ a, Chisɔsi ni wan Chuusaɛn. A sin, a tima chɛ a, Chu n 'na bɛn dɔndɔ ni wan nɔ, an ni min chee, an dɔ, Yataa 'a kata da a ka. An ni buɔdia wa an bɔ a tima chɛ a.

²³A tee chɛ ma, Chisɔsi ni wan Yataa 'a kata ɔ, ɛ sɛ ɛ yii an kaina chɛ, an ni min chee, an dɔ, Mansa Sɔɔmon 'na Pɛsa.

²⁴Mbɛ Chu mɔɛ n na sɔn sɔn‑da a 'a tindanɛ. Mbɛ an dɔ, “I ma a ma nn ni ma kɔndɔfii ɔ tima ɔ tima ko a, a si i wakoe ma. A ma gbu nn ni a ɔ sɔn, tea chɛndɛ chɛndɛ ko a, ni i wan mu kunka mansa chɛ a.”

²⁵Mbɛ Chisɔsi ɔ, “N banden fan mu gbɛ a fɔ‑a wo ye, chɛɛ wo ma to ni wo ni dan n na. Fa 'a gbasaya ɔ, n mbe kamaya koe miin ma, an fan mbe siiya bɔ n ko a.

²⁶Chɛɛ wo ma dan ni n na, koe min na mu, wo ma ma ni yɔ n 'na sa nu.

²⁷N 'na sa n mbe an too ma sɔ wan n da a bai ma, n mbe min fɔ. N‑na an sɔn, a sin, an mbe bea wan n fɛ.

²⁸N fɛ mɔɛ nu, n mbe kuɔ fɔ fɔɛ an be‑a an ma, min mbe a ma, an mbe ee fa‑a, an ni to saya ɔ. Mɔ ɔ mɔ ee che an bɔ‑a n boo ɔ.

²⁹Fa min‑na an be n ma, a 'a gbasaya benden mu fen kɔ fen ma.[28] A sin, mɔ ɔ mɔ ee che an bia‑a gbasaya a, an ni bɔ Fa boo ɔ.

³⁰Nn fea Fa a, mɔ dɔndɔɛ mu nn na.”

³¹Mbɛ Chu mɔɛ chɛ nu, an‑na senɛ ya to, a bon koe a fasa.

³²Chɛɛ Chisɔsi ɔ an ma, a ɔ, “Wo‑a wai chɛndɛ sɛsɛ yen fan, n‑na miin chɛ. Fa 'a gbasaya ɔ mu, n mbe kun tena wai chɛ n chɛ koe a. N ma a ɔ sɔn, an wai chɛndɛ chɛ nu, ni a minan ko a mu, wo toen mu wo ni n bon, n ni fa.”

³³Mbɛ Chu mɔɛ chɛ n dɔ, “I 'a wai chɛndɛ chɛ nu, an dɔndɔ wɛɛ ko a ma, nn toen mu nn ni i bon, i ni fa. Chɛɛ e baa bɔ tena buɛ min dɔ Yataa ma, an donden mu nn ma. I mɔ gbu gbama gbama, e i wandi ya‑a Yataa a.”

³⁴Chisɔsi ɔ, “A nyɛnden fan mu, wo wandi gbu 'a sawa gboo ɔ, mbɛ Yataa na‑a a fɔ wan, a ɔ, ‘Wo mu Yataa dɔma n fan na.’

³⁵Wo 'a a ɔ sɔn fan, mbɛ Yataa 'a gboo, ɛ bai miin fɔ, tea bai nu mu kuɔ fɔ ko a. A sin, Yataa wandi gbu, an na‑a mɔɛ chɛ n chee yataa dɔma n na. Mɔɛ chɛ nu, a wandi gbu, a ni a 'a sakana bai n na ben mɔɛ miin dɔ.

³⁶N tana, Fa an‑na n ya, a‑a n sɔ dunya chɛ ɔ. Chɛ an‑na a fɔ, wo ee kun, wo ni kunɛ si n kun ma, baa bɔ koe a a ma. Koe min na mu, n‑na a fɔ, n dɔ, a 'a denɛ mu n na.

³⁷Ni Fa‑a n sɔ wai miin chɛ koe a, n mbe ee an fan chɛ tena, wo ma dan n na.

³⁸Chɛɛ ni n mbe Fa 'a wai an chɛ tena, wo ma dan nin bɛɛ n na boo ɔ boo, a nyin wo ni dan n chɛ chɛ wai n nan gbu n na. Chɛ ɛ a ma‑a wan, wo ni a ɔ gbɛ fɛsɛ fɛsɛ, mbɛ nn fea Fa a, mɔ dɔndɔɛ mu nn na.”

³⁹A tima chɛ a to, Chu mɔɛ chɛ nu, an toen ni to, an ni Chisɔsi bia fɔin. Chɛɛ a bɔ‑a wan an boo ɔ yɛdɛn.

⁴⁰Mbɛ a yɛ‑a a gbaa chia a, a‑a Chɔdan yii chɛ tɛ to. A yɛ‑a kaina chɛ, Chɔn na‑a a kuu sɔ ka yii chɛ‑a kaina min mɔɛ n kunɛ ɔ, Yataa chia a.

⁴¹Mɔ sɛsɛ na‑a wan, an‑na Chisɔsi tan. Mbɛ an nyɔn tɛ ɔ, an dɔ, “Chɔn nii ma kamaya ko kan kɔ kan ma ni. Chɛɛ bai n gbɛɛ, a‑a miin fɔ, a si kamin chɛ ma, an ma‑a tea a.”

⁴²Mbɛ mɔ sɛsɛ, miin ni nɔ, an‑na an kai fa a a.