Read Kono CHƆN 13 Bible Online

CHƆN 13 - Kono bible

CHƆN 13

¹Tima ni gbɛ che koe an na, kun bɔ a ɔ bɛn chɛ kuu sɔ koe a. Chisɔsi na‑a a ɔ sɔn fan, mbɛ tima an ni ka gbɛ che‑a, a ni dunya chɛ to, a ni yɛ a fa tena. Mɔɛ miin ni a fɛ dunya chɛ ɔ, a na‑a to wan an na tima ɔ tima ko a. A sin, mmɔ ɛ na tena a ɔ yen‑da, a to‑a buɛ min dɔ an na, a da faenɛ ɔ gban.[29]

²Chisɔsi ni gbɛ yɛɛ ma daun fenɛ an ma kɔn tena, an bɛ a fɛ denɛ n na. A tima chɛ a, Sitana chɛen fan ni gbɛ Chudasi faa ɔ, Chisɔsi ma tachɛ koe a, chɛɛ ma nyɔnɛ n ma. Chudasi chɛ ni kai Saimɔn Isikayɔti 'a denɛ an na.

³Chisɔsi na‑a a ɔ sɔn fan, mbɛ a fa ban‑da gbasaya gbɛɛ be‑a a ma, ko ɔ ko ma koe a. A na‑a a ɔ sɔn fan to, mbɛ a ka‑a Yataa tena wan, a sin mbe yɛ tena to nɔ wan.

⁴Mbɛ Chisɔsi‑a a kɔɔ sɔ, doma kai min ni ka a ma, a‑a a bɔ, mbɛ a‑a tawa chii a bu tɛ.

⁵Chɛ gbakɔ, mbɛ a‑a yii chɛ feanka ɔ, mbɛ a bun‑da a fɛ den chɛ n chenɛ n ma ko‑a, dɔndɔ dɔndɔɛ a. A sin, ɛ ta‑a an chen chɛ n ma fian‑da a 'a tawa chɛ a a bu tɛ, aan an ma ɛ ta‑a gbaa gbechee.

⁶Mbɛ a che‑a Saimɔn Pita ma, min‑na a fɔ, a ɔ, “Mansa, i wan mbe na tena n chenɛ ma ko‑a. I wan to?”

⁷Mbɛ Chisɔsi ɔ, “N mbe ka koe min ma tena, e ee che a ɔ gbɛ‑a sanche chɛ ɔ. Chɛɛ e a ɔ gbɛ‑a wan ya ɔ ma.”

⁸Mbɛ Pita ɔ, “N mbe ee dɔn a ma, tima kan kɔ kan ko a, i ni n chenɛ ma ko.” Chɛɛ Chisɔsi ɔ, “Ni i sin ma dɔn ni, n ni i chen chɛ ma ko, mbɛ i ta ka‑a n bakoe ma.”

⁹Mbɛ Saimɔn Pita ɔ te gbɛ, a ɔ, “Mansa, mbɛ i ma n chen dechee ma ko, chɛɛ n boo n bɛɛ ma ko, mbɛ i‑a n kunɛ wɛɛ ɔ ko.”

¹⁰Chɛɛ Chisɔsi ɔ, “Ni mɔɛ‑a a ko fion, ɛ a chenɛ an ma ko gbɛ dechee, a mu min na, nɔɛ ee to a gboo tɔɛ gbɛɛ ma. A sin, wo koen fan mu gbɛ, chɛɛ wo dɔndɔ ma ko ni fion.”

¹¹Chisɔsi na‑a a ɔ sɔn fan gbɛ, mɔɛ min ni na tena a ma tachɛ‑a, chɛɛ ma nyɔnɛ n ma. Chɛ an‑na a ma, a na‑a a fɔ, a ɔ, an gbɛɛ koen fan mu gbɛ, chɛɛ an dɔndɔ ma ko ni fion.

¹²Chisɔsi ban‑da kɛn an chenɛ n ma ko‑a, mbɛ a 'a doma kai chɛ, a na‑a min bɔ ka, a‑a a don, mbɛ a si‑a to daun chɛ tena. Mbɛ a ɔ a fɛ den chɛ n ma, a ɔ, “Wo‑a koe chɛ ɔ gbɛ wan, n‑na min ma ka sanche wo tena?”

¹³A ɔ, “Wo e ma koɔ‑a n tena, tima dɔ n na, wo e n chee, wo ɔ, kan mɔ, dɔ n na, wo ɔ, mansa. A sin, wo e ma ka tea an fɔ‑a, koe min na mu, n fan nɛ.

¹⁴N fan, n fɛn mu wo 'a mansa a, ni wo kan mɔ, n‑na wo chenɛ n ma ko ka sanche. Chɛ ni a ma, wo wɛɛ, wo ni wo nyɔn chenɛ n ma ko.

¹⁵N‑na tɔmɔsi an yian ka wo a, min mbe a ma, wo ni a ma, yɔ n‑na a ma dechee buɛ min dɔ wo ko a.

¹⁶Ka n mbe chɛ ma din wo gbɛɛ tena, yɔnɛ ma ben ni a ti ma, a sin, sɔ mɔ kan kɔ kan ma ben ni mɔɛ ma, min‑na a sɔ.

¹⁷Wo‑a koe chɛ n dɔ sɔn ka buɛ min dɔ gbɛ, dua ɛ ma‑a wan wo ma kaka, ni wo‑a an koe chɛ n ma.

¹⁸“N mbe ee bai chɛ fɔ tena wo gbɛɛ an ko a. N‑na a ɔ sɔn fan, n‑na n boo sɔ mɔɛ miin sima ma, ma koe a n fɛ. Chɛɛ Yataa 'a gboo‑a min fɔ, ɛ bɔ‑a wan a a. A‑a a fɔ wan, a ɔ, ‘Nn fea mɔɛ min na, nn mbe n 'na daun fenɛ ɔ du, a bun‑da n chɛɛ‑a.’

¹⁹Koe min mbe na tena ma‑a, n mbe an dɔ yian tena wo a sanche, a e na to ma‑a. Min mbe a ma, ɛ ma‑a tima min na, wo ni dan a a, mbɛ n fan, kunka mansa mu n fan na.

²⁰N mbe chɛ ma din wo tena, mbɛ mɔ ɔ mɔ min mbe a boo si‑a mɔɛ kɔɔ, n‑na miin sɔ, a‑a a boo si ka n fandi wɛɛ an kɔɔ. A sin, mɔ ɔ mɔ min mbe a boo a si‑a n kɔɔ, ɛ ma‑a ka a boo a si‑a Yataa an kɔɔ, min‑na n sɔ.”

²¹Bai chɛ fɔenɛ gbakɔ Chisɔsi boo ɔ, a faa ni mɔnɛ tena wan kaka. Mbɛ a‑a a fɔ den a fɛ denɛ n ye, a ɔ, “N mbe chɛ ma din‑da wan wo tena, mbɛ wo dɔndɔ, ɛ na tena wan n ma tachɛ‑a, chɛɛ ma nyɔnɛ n ma.”

²²Bai chɛ‑a Chisɔsi fɛ den chɛ n gbɛɛ da a fa wan gban. Mbɛ an bun‑da an nyɔn ma fɛn‑da, an ma a ɔ sɔn ni a yii ni min ma an tɛ ɔ.

²³Chisɔsi fɛ den chɛ n dɔndɔ, min ko a ni di a ye kaka,[30] a ni wan Chisɔsi tɔnfɛ daun chɛ‑a.

²⁴Mbɛ Saimɔn Pita‑a a ya kai an fɛ den chɛ ma, a ɔ, a ni tisa chɛ ni Chisɔsi ɛ bai sa tena, a si nyɔn ma an tɛ ɔ.

²⁵Mbɛ an fɛ den chɛ, a‑a a da ma ta Chisɔsi too tena, mbɛ a ɔ, “Mansa, i yii mbe nyɔn na?”

²⁶Mbɛ Chisɔsi ɔ, “N mbe biidi sima tɛ‑a wan a a, mbɛ n‑na a don supu ɔ, mbɛ n‑na a be a mɔɛ chɛ ma.” A sin, a‑a biidi chɛ don kɛn supu chɛ ɔ, a‑a a be wan Chudasi ma, kai Saimɔn Isikayɔti 'a denɛ chɛ.

²⁷Chudasi ɛ biidi chɛ bia‑a dechee, mbɛ Sitana bea‑a a fɛ. Mbɛ Chisɔsi ɔ a ma, a ɔ, “I 'a wai i boo ɔ, a chɛ, a a gbandia.”

²⁸An fɛn gbɛɛ ni daun chɛ‑a, an dɔndɔ wɛɛ nii ma a ɔ gbɛ ni, koe min na‑a a ma, Chisɔsi‑a bai chɛ fɔ Chudasi ye.

²⁹A ni fɛ den chɛ n dɔ n yii ma, mbɛ Chisɔsi na‑a a sɔ wan ka, a ni ta daun fenɛ san, kun bɔ a ɔ bɛn chɛ ko a. Ni chɛ ma, a ni fen den be yɔn tɔɛ n ma. A yen ko, a wan Chudasi, an ni an 'na kɔpɔ sa tena ɔ bɛn mɔɛ a.

³⁰Chudasi‑a biidi kundu chɛ bia kɛn dechee, mbɛ a ya kɔɔɛ a, a bɔ‑a baa ma. A tima chɛ a, pimbi bundenɛ ni gbɛ.

³¹Chudasi bɔ‑a kɛn, a ta‑a. Mbɛ Chisɔsi ɔ, “A ɔ ma yansan to, mbɛ mɔɛ n‑na a ɔ yen, kamaya mɔɛ min mu n na, n fan, Mɔ Gbu 'a Denɛ. A ɔ ma yansan to, mbɛ n‑na a ma, Fa Yataa 'a kamaya ɔ ni yen chɛndɛ chɛ.

³²A sin, ni n‑na a ma, mɔɛ n ni Fa Yataa 'a kamaya ɔ yen, mbɛ a wɛɛ, ɛ a ma‑a wan, n fan, Mɔ Gbu 'a Denɛ wandi, mɔɛ n ni n 'na kamaya ɔ yen. A sin, ɛ na tena wan chɛ ma‑a, a ya kɔɔɛ a.

³³N 'na denɛ nu, n mbe ma tena gbɛ wo tɛ ɔ tima kunduenɛ an ko a. Wo e wo ya a kan‑da wan n na. Chɛɛ ka n mbe chɛ fɔ wo ye, n na‑a min fɔ Chu ya ɔ sɔɛ n ye, mbɛ n mbe ma‑a kaina min, an mbe ee na‑a che‑a nɔ. A ɛ ma‑a ka wan wo wɛɛ a.

³⁴A sin sanche, n yen ko sawa nama be‑a wo ma, n ma min be nin bɛ a kɔma a, mbɛ wo ni to wo nyɔn na. N to‑a buɛ min dɔ wo a, wo wɛɛ, wo to wo nyɔn na ka.

³⁵Ni wo toenɛ ma‑a wo nyɔn na, mbɛ mɔ ɔ mɔ‑a a ɔ gbɛ, mbɛ n fɛ denɛ n mu wo a.”

³⁶Mbɛ Saimɔn Pita ɔ, “Mansa, e na tena ta‑a mende?” Mbɛ Chisɔsi ɔ, “E ee che‑a a sɔ‑a n fɛ dɔndɔ a, n mbe ta tena kaina min, chɛɛ ni a ɔ mɛ‑a, e a sɔ‑a wan n fɛ.”

³⁷Mbɛ Pita ɔ, “Mansa, n mbe ee a sɔ i fɛ sanche, fen mu? I fa tena, n fa tena.”

³⁸Chisɔsi ɔ, “Tea ko a, i ma bɛndenɛ mu, i ni fa n ko a, ae? Ka n mbe chɛ ma din i tena, e na tena min ma‑a. Tɛ kɔnɛ e na konchee banda ɔ ka da ma, e a fɔ‑a wan, gba sawa ko a, mbɛ i ma n sɔn ɛnden bɛɛ a.”