Read Kono CHƆN 14 Bible Online

CHƆN 14 - Kono bible

CHƆN 14

¹Mbɛ Chisɔsi ɔ an ma, a ɔ, “Chɛ ma wo faa mɔnɛ. Wo a a tun wo kai fa koe a Yataa a, wo ni a a tun wo kai fa koe a n bɛɛ a.[31]

²Fa Yataa waa banda bu ɔ, sa tena kɔkoo nɔ kaka. N mbe chɛ fɔ tena wo ye, koe min na mu tea mu. A sin, n mbe ta tena wan kaina ɔ bɛn‑da wo ko a.

³A sin, ni n ta‑a, mbɛ n‑na kaina chɛ ɔ bɛn wo ko a, n mbe yɛ‑a wan to nɛ wo ya ɔ. Mbɛ n‑na a ma, mmɔ ta‑a, min mbe a ma‑a, n mbe ma‑a kaina min, wo wɛɛ, wo ni ma nɔ.

⁴A sin, wo‑a an chia chɛ sɔn fan, a ta an kaina chɛ, n mbe ta tena kaina min.”

⁵Mbɛ Tɔmɔsi ɔ, “Mansa, e ta tena kaina min, a yiima kan kɔ kan mbe ee nn ma. Nn mbe ee kun, nn ni chia sɔn ta koe a nɔ. Chɛ ɛ ma wan?”

⁶Mbɛ Chisɔsi ɔ, “N fan mu dechee chia a, tea ɔ sɔn koe a mɔɛ n boo ɔ, a si Fa Yataa ma, mbɛ an‑na fɔɛ ma sɔn, Fa ɛ min be. Mɔ ɔ mɔ ee che ta‑a Fa tena, mɔɔ ni a ben‑da n tena chia a.

⁷Ni wo na‑a a ɔ sɔn fan chɛndɛ chɛ, n mu mɔɛ min sima a, mbɛ wo ni Fa wɛɛ sɔn‑da wan. Chɛɛ a ka gbɛ sanche ma, aan a ta, wo‑a a sɔn gbɛ, a sin, wo ban‑da a yen‑da.”

⁸Mbɛ Fiipi ɔ, “Mansa, a ma nn ni i fa chɛ yen, mbɛ nn faa chima‑a.”

⁹Chɛɛ Chisɔsi ɔ, “Fiipi, mmɔ mɛ buɛ chɛ mmɔ bɛ, a ni nyan fan wo gbɛɛ ni n sɔn gbɛ. Mɔ ɔ mɔ min‑na n yen, a‑a Fa an yen ka. E ee kun to, i ni n dɔ tisa, n ni Fa yian wo a. Chɛ ɛ ma wan?

¹⁰A nyin i ni dan a a, mbɛ nn fea Fa a, mɔ dɔndɔɛ mu nn na. Bai chɛ nu, n‑na miin fɔ ka wo ye, an ma ka ni ka dechee n kun ma yiinachii an dɔ. Fa, nn fea mu min na mɔ dɔndɔɛ a, tima ɔ tima ko a, an mbe ma ka wai chɛ‑a.

¹¹N‑na a fɔɛ min chɛ, n dɔ, nn fea Fa a, n dɔ, mɔ dɔndɔɛ mu nn na, dan chɛ a. Ni chɛ ma, Fa ɛ a ma, n mbe wai miin bɛɛ chɛ, an mbe che wan a ma‑a, wo ni dan n na.

¹²N ni chɛ ma din wo tena, mbɛ mɔɛ miin mbe an kai fa‑a n na, an mɔɛ chɛ nu, an mbe wai bonda chɛ n chɛ‑a wan, n mbe miin chɛ. A sin gbu, an mɔɛ chɛ nu, an chɛ chɛ wai n mbe koa‑a wan. Koe min na mu, n mbe yɛ tena Fa tena, nn ni ma kaina dɔndɔɛ ɛ.

¹³A sin, n mbe ko ɔ ko chɛ‑a wan wo ye, wo e n dɔ tisa‑a min chɛ koe a, n tɔɛ ɔ. Chɛ ɛ a ma‑a wan, n ni a ma, mɔɛ n ni a ɔ yen, Fa kamayaen mu buɛ min dɔ.

¹⁴Ni wo‑a tisa chɛ ko ɔ ko ko a, n tɔɛ ɔ, n mbe a chɛ wan wo ye.”

¹⁵Mbɛ Chisɔsi ɔ a fɛ denɛ n ma, a ɔ, “Wo e koe chɛ n ma‑a wan, n‑na miin fɔ wo ye an ma koe a, ni wo toen fan mu n na.

¹⁶N mbe fa ɔ tisa‑a wan, a ni a ma, wo ni demanɛ dɔ mende ma sɔn. A sin, ɛ a Nyina a na‑a wan, a ni ma wo fɛ tima ɔ tima ko a.

¹⁷An Nyina chɛ, an mbe a ma, mɔɛ n ni tea ɔ sɔn a si Yataa ma. Chɛɛ Yataa wakoe ee mɔɛ miin faa ɔ, an mbe ee che an boo si‑a a kɔɔ. Koe min na mu, an mbe ee che a yen‑da, an sin ma a sɔn. Chɛɛ wo tana, wo‑a a sɔn fan, koe min na mu, wo bɛ mu sanche chɛ ɔ, a sin mbe ma‑a wan wo fɛ ya ɔ ma.

¹⁸“Ni n ta‑a, n mbe ee wo boo ka‑a. N mbe yɛ‑a wan wo tena.

¹⁹A ɔ ma yansan to, mbɛ Yataa wakoe ee mɔɛ miin faa ɔ dunya chɛ ɔ, an mbe ee n yen‑da to. Chɛɛ wo tana, wo e n yen‑da wan, koe min na mu, ni n yɛ‑a fɔɛ ɔ, wo wɛɛ, wo e ma‑a wan fɔɛ ɔ.

²⁰Ni a tima chɛ che‑a, wo e a ɔ gbɛ‑a wan, mbɛ nn fea Fa a, mɔ dɔndɔɛ mu nn na. A sin, wo wɛɛ, wo e ma‑a wan mɔ dɔndɔya ɔ n na, yɔ n bɛɛ, n mbe ma‑a buɛ min dɔ dechee mɔ dɔndɔya ɔ wo a.

²¹“Mɔɛ min mbe koe n ma‑a, n mbe miin fɔ an ma koe a, an mɔɛ chɛ an toen mu n na. A sin, an mɔɛ chɛ, a toen min chɛ‑a ka n na, Fa wɛɛ, a ɛ to‑a wan a a. N bɛɛ, n mbe to‑a wan a mɔɛ chɛ a, mbɛ n‑na a ma, a‑a n sɔn chɛndɛ chɛ.”

²²Chisɔsi fɛ denɛ dɔndɔɛ wɛɛ ni wan nɔ, min tɔ ni to Chudasi, Chudasi Isikayɔti nii ma o. Mbɛ an fɛ den chɛ ɔ, “Mansa, e a ma‑a nn fan ni i yen dechee, chɛɛ mɔɛ chɛ nu, Yataa wakoe ee miin faa ɔ dunya chɛ ɔ, an mbe ee i yen‑da. Fen mu chɛ ɛ ma‑a?”

²³Mbɛ Chisɔsi ɔ, “Mɔɛ min toen mu n na, ɛ koe chɛ n ma wan, n‑na miin fɔ a ye, an ma koe a. Fa ɛ to‑a wan a mɔɛ chɛ a. A sin, Fa ni ma, ni n fan, nn mbe na‑a wan a tena, mbɛ nn bɛ gbɛɛ ɛ ma‑a kaina dɔndɔ.

²⁴Mɔɛ min ma to ni n na, a ee che koe chɛ n ma‑a, n‑na miin fɔ a ye. A sin, n mbe bai chɛ miin gbɛɛ fɔ, n mbe ee an tɛ n fandi gboo an ma, chɛɛ Fa min‑na n sɔ, a 'a sakana bai nu mu, n mbe an na ben.

²⁵“N mbe bai chɛ n gbɛɛ fɔ tena wo ye, tima min na mu wɛ mmɔ bɛ ɛ.

²⁶Min mbe wo deman‑da, Yataa Nyina, Fa ɛ na‑a min na na‑a n gba ɔ, an mbe wo kan‑da ko ɔ ko ma, a si n 'na bai n ma. A sin mbe a ma‑a wan, n 'na bai chɛ n ni puin wo yii ma, n ni bai miin fɔ, mmɔ bɛ ni tima min na.

²⁷“N mbe wo to tena faachima an dɔ. Faachima min nyɔn sima ɛ n dɔ, n mbe an be tena wo ma. N ta faachima, n mbe min be, a ee ka yɔ dunya chɛ ɔ nɛnɛ. Wo ma ma faamɔnɛ ɔ, a sin to, wo ma chian, a si koe chɛ n ma, miin mbe ma‑a.

²⁸Wo‑a a a min fan, n‑na min fɔ wo ye, mbɛ n mbe na tena wan ta‑a, chɛɛ n mbe yɛ‑a wan to wo ya ɔ. Ni n ko a di wan wo ye, wo bu ɔ dia‑a wan, a si n yɛ koe ma Fa tena. Koe min na mu, a benden mu n ma.

²⁹N mbe chɛ gbɛɛ fɔ tena wan wo ye sanche, an mbe e na to ma‑a. Chɛ ɛ a ma‑a wan, an mbe ma‑a tima min na, wo e dan‑da wan n da a bai n na.

³⁰Mmɔ ee che to chia ɔ bɔ yansama chɛ‑a mmɔ bɛ, a mu min na, nyina yama min 'na gbasaya ɛ dunya chɛ ɔ mɔɛ n kun ma, ɛ chia a. Chɛɛ gbasaya ee a boo ɔ n kun ma.

³¹Chɛɛ a nyin dunya chɛ ɔ mɔɛ nu, an ni a ɔ sɔn, mbɛ n toen mu Fa a. Chɛ an fɛ mu, ko ɔ ko ɛ min fɔ, n mbe an ma a buɛ an dɔ. “Wo wo kɔɔ sɔ, mmɔ ni bɔ nɛ.”