Read Kono CHƆN 15 Bible Online

CHƆN 15 - Kono bible

CHƆN 15

¹Chisɔsi ɔ, “N fan mu kɔnɛ chɛndɛ chɛndɛ a, min mbe gbɔ chɛndɛ be. A sin, Fa an mu yadi ti a.

²N bonɛ kan kɔ kan, min mbe ee gbɔ chɛndɛ be, ɛ a ka wan a ma. N bonɛ min sin mbe ee gbɔ a tenden be, ɛ a tɛ‑a wan a a, min mbe a ma, a ni nyan chɛndɛ, mbɛ a gbɔ‑a wɔsɔkɔɔ.

³Bai chɛ nu, n‑na miin fɔ wo ye, an‑na a ma, wo bon chɛ n tɛ‑a wo ma, wo ni gbɔɛ be chɛndɛ chɛ.

⁴Mmɔ ma mɔ dɔndɔya ɔ, wo ma n boo ka, n bɛɛ, n mbe ee wo boo ka‑a. Kɔnɛ bonɛ ee kun a ni gbɔ be, ni a kaenɛ ma‑a kɔnɛ kuu ba ma. A chia dɔndɔ gbe chɛ a, wo wɛɛ, wo ee kun wo ni ko ɔ ko ma, mɔɔ ni mmɔ bɛ ma‑a mɔ dɔndɔya ɔ.

⁵“N fan mu kɔnɛ a, wo sin, n bonɛ n mu wo a. Nn mbe ma‑a mɔ dɔndɔya ɔ, mɔɛ min na, a ma n boo ka ni, n bɛɛ, n ma a boo ka ni, a mɔɛ chɛ ɛ gbɔ sɛsɛ be‑a wan. Koe min na mu, wo ee che ko ɔ ko ma‑a, wo kun ma a a, ni n mbe ee wo kɔ.

⁶Nn fea mɔɛ min na, nn mbe ee mɔ dɔndɔya ɔ, a mɔɛ chɛ ɛ ma‑a wan yɔ kɔnɛ bonɛ, ɛ tɛ‑a wan a a, mbɛ a gbaa‑a. Kɔn bonɛ gbaaenɛ bonda chɛ nu, mɔɛ n mbe an na sɔn‑da wan, an ni sa ta a, minda koe a sɔɛ a.

⁷Ni mmɔ bɛ ma‑a mɔ dɔndɔya ɔ, mbɛ wo‑a n 'na bai n sa wo yii ma gban, ɛ nyan‑da wan. Fen kɔ fen, wo toen mu min na, mbɛ wo‑a Fa Yataa ɔ tisa a ko a, ɛ a be‑a wan wo ma.

⁸Wo e ko chɛndɛ min ma‑a, ni an da a koa‑a, wo e ma‑a ka a ɔ yian fan na, mbɛ n fɛ denɛ mu wo a. An ko chɛndɛ chɛ n sin mbe a ɔ yian‑da wan to mɔɛ n na, Fa kamayaen mu buɛ min dɔ.

⁹N toen fan mu wo a, yɔ Fa wɛɛ toen mu buɛ min dɔ n na. Wo ma wo kan kɔ sɔ n 'na koadia a.

¹⁰Ni wo e koe chɛ n ma‑a, n mbe miin fɔ wo ye an ma koe a, wo ee na‑a wo kan kɔ sɔ‑a n 'na koadia a. N bɛɛ, n‑na koe chɛ n ma wan, Fa ɛ miin fɔ n ye, mbɛ n ma n kan kɔ sɔ ni a 'a koadia a.

¹¹“N mbe koe chɛ n fɔ tena wo ye, min mbe a ma, buɔdia min mbe n dɔ, a ni ma wo wɛɛ ɔ. An mbe a ma‑a wo 'a buɔdia da ni fa gban.

¹²N mbe chɛ an fɔ tena wo ye a ma koe a, mbɛ wo ni to wo nyɔn na, yɔ n toen mu buɛ min dɔ wo a.

¹³Ni mɔɛ fa‑a mɔɛ n ko a, a toen mu miin na, chia dɔ mende ee to nɔ, koadia ɔ yian koe a, a ni ben chɛ ma.

¹⁴A sin, wo e ma‑a wan mɔɛ n na, n toenɛ ɛ ma‑a miin na tima ɔ tima, ni wo‑a koe chɛ n ma, n mbe miin fɔ‑a wo ye.

¹⁵N mbe ee wo ya to n 'na bɔi den na, koe min na mu, bɔi den ma a kan mɔ yiima sɔn. N mbe min ma tena, n mbe wo ya tena gbɛ n bɔɛ n fan na. Koe min na mu, ko ɔ ko, Fa‑a min fɔ n ye, n‑na a gbɛɛ ɔ yian wo a.

¹⁶Wo wan ma n ya ni, ma koe a wo kan mɔ a, chɛɛ n fan‑na wo ya, ma koe a n fɛ mɔɛ n na. N fan‑na wo ya, mbɛ n‑na wai be wo ma, wo ni ta, wo chɛ chɛ wai ni koa. Wo chɛ chɛ wai chɛ n sin, an ni ma kuɔ fɔ wai n na. Ni wo‑a chɛ ma, Fa ɛ fen kɔ fen be‑a wan wo ma, wo e a ɔ tisa‑a min ko a, n tɔɛ ɔ.

¹⁷N mbe chɛ an fɔ tena wo ye, mbɛ wo ni to wo nyɔn na.

¹⁸“Mɔɛ miin ma to ni Yataa a dunya chɛ ɔ, ni an too‑a wo a, a ni ma wo yii ma, mbɛ an too‑a n pɛn na.

¹⁹Ni wo ni wan an 'na kuiɛ dɔndɔya ɔ dunya chɛ ɔ, an ni wo ya wan an sima a, mbɛ wo ko a dia‑a an ye. Chɛɛ n‑na wo bɔ wan an 'na dunya ɔ, a sin‑na a ma, wo bɛ ma to an na. Chɛ an fɛ mu, an tooenɛ ɛ wo a.

²⁰N da a bai chɛ ni to wo yii ma, n na‑a min fɔ wo ye, mbɛ bɔi den mbe ee nɔ, min benden mu a kan mɔ ma. Ni an‑na a ma wan n tɔɔ‑a, wo wɛɛ, an mbe a ma‑a ka wan wo ni tɔɔ. Chɛɛ ni an dɔ nu, an na‑a an too ma sɔ wan n da a kuiɛ ma, mbɛ an mbe an too ma sɔ‑a wan wo ta wɛɛ ma.

²¹Chɛɛ an mbe a ma‑a wan wo ni tɔɔ, n bakoe fɛ. An mbe chɛ ma‑a wan, koe min na mu, an ma Fa Yataa sɔn, min‑na n sɔ.

²²Ni n nii ma na ni, n ni koɔ an tena, a si Yataa wakoe ma, Yataa nii a tɛɛ si‑a an ma, ko yama ma koe a. Chɛɛ ɛ ka gbɛ buɛ min dɔ sanche, an mbe ee che to a fɔ‑a an nii ma an 'na ko yama n sɔn.

²³Mɔɛ min mbe too‑a n na, ɛ too‑a ka Fa an na.

²⁴Yataa nii a tɛɛ si‑a an ma, ko yama ma koe a, ni n nii ma koe n ma ni an tɛ ɔ. Kamaya koe chɛ nu, n‑na miin ma, mɔ ɔ mɔ ma miin ma nin bɛ an ya kɔɔɛ. Chɛɛ an ban‑da gbɛ kamaya koe chɛ n gbɛɛ yen‑da, n‑na miin ma. Chɛ gbɛɛ ɔ, an too‑a wan n na, a basan Fa wɛɛ a.

²⁵Chɛ ma‑a, min mbe a ma, min nyɛnden ni an 'na sawa n dɔ, a ni bɔ a a. A nyɛnden ni ka wan, ‘An too‑a wan n na dechee, n nii ma ko ɔ ko yɔn ni an ma.’

²⁶“Chɛɛ min mbe wo deman‑da, n mbe a sɔ‑a wan, a ka Fa tena. Fa Yataa Nyina chɛ, an mbe tea ɔ yian‑da wo a, a si a wandi ma. N mbe a ma‑a wan a ni ka Fa tena, a ni na wo tena. A sin, ɛ n bakoe ɔ yian‑da wan wo a.

²⁷A sin gbu, wo wɛɛ, wo e n bakoe ɔ yian‑da wan mɔɛ n na. Koe min na mu, kɛn n‑na a kuu sɔ kanɛ chɛ‑a, mmɔ bɛ an mbe ben ben tena.