Read Kono CHƆN 16 Bible Online

CHƆN 16 - Kono bible

CHƆN 16

¹“N mbe chɛ gbɛɛ ɔ yian tena wo a, min mbe a ma, wo ma na sɛmbɛ wo kai fa koe a n na.

²An mbe wo gbain‑da wan fɛsɛ fɛsɛ, a bɔ an 'na samun chɛ chenɛ a. A sin gbu, tima ɛ che‑a wan, mɔ ɔ mɔ min mbe wo dɔndɔ wɛɛ fa‑a, ɛ ma‑a wan a yii ma, mbɛ a‑a Yataa faa ma koe an ma ka.

³Mɔɛ n mbe koe chɛ n ma‑a wan wo a, koe min na mu, an ma Fa Yataa sɔn tee dɔndɔ wɛɛ, chɛ ma, n fandi gbu wɛɛ.

⁴Chɛɛ n mbe koe chɛ gbɛɛ ɔ yian tena wo a, a tima an ko a. Min mbe a ma, ni a che‑a, an ni koe chɛ n gbɛɛ ma wo a, n na‑a min gbɛɛ ɔ yian wo a, ɛ ma‑a wan wo yii ma. N nii ma koe chɛ n dɔ yian ni wo a, a ka wo bea tima chɛ gbɛɛ ma n fɛ. N‑na chɛ ma koe min na, mmɔ bɛ an ni chɛ gbɛɛ ɔ ben ben‑da.

⁵“Chɛɛ sanche chɛ ɔ, n mbe ta tena gbɛ Fa tena wan, min‑na n sɔ. Chɛ gbɛɛ ɔ, wo dɔndɔ wɛɛ ee n dɔ tisa tena, ni n mbe ta tena mende.

⁶A sin, n‑na a ɔ yian ka gbɛ buɛ min dɔ wo a sanche, faamɔnɛ koa‑a wo ma.

⁷Chɛɛ n mbe chɛ ma din tena wo tena, mbɛ a nyin fan wo ko a, n ni ta. Koe min na mu, ni n ma yɛ ni, Yataa Nyina min mbe wo deman‑da, a ee na‑a wo tena. Chɛɛ ni n yɛ‑a, n mbe a ma‑a wan, a ni na wo tena.

⁸Ni n sin‑na a ma a na‑a, ɛ a ma‑a wan, mɔɛ dɔ nu dunya chɛ ɔ, an ni a ɔ sɔn fen mu ko yama a. A yɛ to, an ni a ɔ sɔn, an mbe ma buɛ min dɔ an ni tan Yataa tena. Mbɛ a yɛ‑a to, a‑a a ɔ yian an na, Yataa ɛ kaa a tɛ‑a buɛ min dɔ.

⁹Yiima min mbe an dɔ, a si ko yama ma, tea yiinachii ma, koe min na mu, an ma an kai fa ni n na.

¹⁰An sin ma a ɔ sɔn to, koe min nyin a ma koe a, koe min na mu, n mbe yɛ tena Fa Yataa tena wan. A sin, wo ee a a tun‑da to n yen koe a.

¹¹An sin ma a ɔ sɔn, kaa chɛ a tɛ‑a buɛ min dɔ. Koe min na mu, Yataa ban‑da kaa a tɛ‑a Sitana wakoe ma, min mbe dunya chɛ kun ma.

¹²“Bai sɛsɛ ɛ wan n da a, a fɔ koe a wo ye, chɛɛ wo ee na‑a kun‑da, wo ni an gbɛɛ sa wo yii ma.

¹³Chɛɛ ni Yataa Nyina chɛ na‑a, min mbe tea ɔ yian a si Yataa ma, ɛ a ma‑a wan, wo ni tea gbɛɛ ɔ sɔn. A ee koɔ‑a wo tena a kun ma gbasaya n dɔ, chɛɛ ɛ min na min‑da Yataa a, ɛ an fɔ‑a wo ye. A sin, koe miin mbe na tena ma‑a, ɛ an fan dɔ yian‑da wo a.

¹⁴Ɛ a ɔ yian‑da wan wo a, n kamayaen mu buɛ min dɔ. Koe min na mu, n da a bai nu, ɛ an fan na ben‑da wo tena.

¹⁵Fen kɔ fen Fa ta mu min na, n fan ta mu a a. An fɛ mu, n‑na a fɔ, n dɔ, Yataa Nyina chɛ ɛ a too ma sɔ‑a wan n da a bai ma, mbɛ a‑a a ɔ yian wo a.”

¹⁶Mbɛ Chisɔsi ɔ, “A to‑a gbɛ fen den, mbɛ wo ee na‑a n yen‑da to, chɛɛ tima kundu ɛnden tɛ ɔ, wo e n yen‑da wan to.”

¹⁷Mbɛ a fɛ den chɛ dɔ nu, an bun‑da a tɛnsɛ‑a an nyɔn tɛ ɔ, an dɔ, “A yen ko, a ɔ, mmɔ ee na tena to a yen‑da, a ɔ, a ɔ ee mɛ tena to. Mbɛ a yɛ‑a to, a ɔ, mmɔ ɛ a yen‑da wan, a ɔ, a ɔ ee mɛ tena to. A ɔ te to, mbɛ mmɔ ee na‑a a yen‑da, a ɔ, koe min na mu, a ɔ, ɛ ta tena a fa tena wan. A e na ma ka fen fɔ‑a mmɔ ye?

¹⁸Mmɔ gbu an mbe ee che a ɔ gbɛ‑a, ɛ bai miin fɔ tena. Chɛ yen bɛ, ‘a ɔ ee mɛ tena to,’ mmɔ ɛ fen dɔ gbɛ chɛ ma?”

¹⁹Chisɔsi na‑a a ɔ sɔn fan, mbɛ an toen fan ni ka, an ni a ɔ tisa. Mbɛ a ɔ, “N dɔ, wo ee na tena to n yen‑da, n dɔ, a ɔ ee mɛ tena to. Mbɛ n dɔ te to, wo e n yen‑da wan, n dɔ, a ɔ ee mɛ tena to. N‑na a ɔ sɔn fan, mbɛ chɛ gbu an‑na wo kɔndɔ fii ka.

²⁰Ka n mbe chɛ ma din wo tena, mbɛ wo e di chɛ‑a wan gbafi gbafi, wo ya yii ni bɔn, a si koe chɛ n ma, miin mbe na tena n tan‑da. Chɛɛ mɔɛ chɛ n tana dunya ɔ, Yataa wakoe ee miin faa ɔ, an mbe ma‑a buɔdia an dɔ. Wo e ma‑a wan faamɔnɛ ɔ, chɛɛ wo 'a faamɔnɛ chɛ ɛ mun‑da buɔdia an na wo ma.

²¹Ɛ ma‑a wan dechee, yɔ ni musu bu ɔ tɛ‑a, faamɔnɛ min mbe ma a ma, koe min na mu, tɔɔya ɔ bia tima che‑a a boo ɔ. Chɛɛ ni a‑a den chɛ suun gbɛ dechee, kun na dia ɔ, mbɛ a nyina‑a a 'a tɔɔya ma. Ɛ ma gbɛ buɔdia an dɔ, koe min na mu, a‑a mɔ gbu ma sɔn dunya chɛ ɔ.

²²Wo wɛɛ, an mbe ka ma‑a wo a sanche chɛ ɔ. Wo e faayɔnɛ an dɔ, chɛɛ a ee mɛ‑a, n mbe wo yen‑da wan to. A sin, wo bu ɔ dia‑a wan kaka. An buɔdia chɛ nɛnɛ, mɔ ɔ mɔ ee che‑a a ma‑a to, wo ni fo a a.

²³“Ni an tee chɛ che‑a, wo ee n dɔ tisa‑a to a si ko ɔ ko ma. Ka n mbe chɛ ma din wo tena, mbɛ ni wo‑a Fa ɔ tisa fen kɔ fen ko a, n tɔɛ ɔ, ɛ a be‑a wan wo ma.

²⁴Chɛɛ mmɔ ɛ chɛ gbɛɛ ɔ aan sanche, wo ma tisa chɛ nin bɛ fen kɔ fen ko a, n tɔɛ ɔ. Wo tisa chɛ, mbɛ wo‑a fen chɛ ma sɔn, wo e min bakoe ɔ tisa‑a. Chɛ an mbe a ma‑a, wo 'a buɔdia da ni fa gban.

²⁵“N mbe ka sanche koe chɛ n gbɛɛ ɔ yian‑da wo a, tai n fan dɔ. Chɛɛ tima ɛ che‑a wan, mbɛ n‑na n boo bɔ tai a bɔɛ ɔ, mbɛ n koɔ‑a wo tena a si Fa ma, wo ni a ɔ gbɛ gbadan.

²⁶Ni a tee chɛ che‑a, wo e fa ɔ tisa‑a wan, n tɔɛ ɔ. Chɛɛ n mbe ee a fɔ tena, mbɛ fɔ ni, n bɛɛ, n‑na a disa wo ko a.

²⁷Koe min na mu, Fa wandi gbu, a toen fan mu wo a. Wo toenɛ min chɛ‑a n na, a wɛɛ, an‑na a to wo a. A sin, wo‑a wo kai fa to n na, mbɛ wo dan‑da a a, mbɛ n ka‑a Fa Yataa tena wan.

²⁸N sin gbu ka‑a Fa tena wan, mbɛ n na‑a nɛ dunya chɛ ɔ. A sin, sanche chɛ ɔ, n mbe bɔ tena wan dunya chɛ ɔ, mbɛ n yɛ‑a Fa tena.”

²⁹Mbɛ a fɛ den chɛ n dɔ, “Chɛ an nyin, i‑a tai tɛ boo ka gbɛ. I bun‑da a ma‑a gbɛ, nn mbe i da a kuiɛ ɔ gbɛ‑a gbadan.

³⁰Sanche mu gbɛ a boo‑a nn ma chɛndɛ chɛ, mbɛ nn yii ma koe gbɛɛ ɛ i boo faa a wan. I gbu an mbe ee mɔ ɔ mɔ ɔ tisa, ni fen mbe a yii ma, koe min na mu, i‑a mɔ gbu yii ma koe sɔn fan. Chɛ ko a, nn dan‑da gbɛ a a chɛndɛ chɛ, mbɛ i ka‑a Yataa tena wan.”

³¹Mbɛ Chisɔsi ɔ, “An nɛ, wo dan‑da gbɛ n na fo.

³²Chɛɛ tima ɛ che tena, a sin, an tima gbu che‑a, wo gbɛɛ, wo e na tena fasan‑da n ma tima min na. Dɔndɔ dɔndɔɛ a, wo e na tena ta‑a wo ta chia an na, mbɛ wo‑a n dɔndɔ gbe ma gbaaenɛ to. Chɛɛ chɛ gbɛɛ ɔ, n dɔndɔ gbe ee ma tena, koe min na mu, Fa ɛ n kɔ gban.

³³N mbe chɛ gbɛɛ fɔ tena wo ye, min mbe a ma, wo ni faachima sɔn. Koe min na mu, mɔ dɔndɔɛ mu mmɔ a, mmɔ gbɛɛ. Ko yawaenɛ n mbe wo tan‑da wan dunya chɛ ɔ. Chɛɛ wo wo faa sɔ, n kun‑da gbasaya ti ma dunya chɛ ɔ.”