Read Kono CHƆN 17 Bible Online

CHƆN 17 - Kono bible

CHƆN 17

¹Chisɔsi ban‑da kɛn bai chɛ n fɔ‑a a fɛ denɛ n ye, mbɛ a‑a a ya a si banda a, a‑a samunɛ chɛ, a ɔ, “Fa, tima gbu che‑a. A ma mɔɛ n ni a ɔ yen, n kamayaen mu buɛ min dɔ, mbɛ n bɛɛ, n‑na a ma, mɔɛ n‑na i ta kamaya wɛɛ ɔ yen.

²Koe min na mu, i‑a gbasaya be n ma, mɔ gbu n gbɛɛ kun ma dunya ɔ. Gbasaya min mbe a ma, n ni a ma, chɛ n gbɛɛ ni kuɔ fɔ fɔɛ ma sɔn, i‑a miin be n ma, ma koe a n fɛ.

³Mɔɛ n sin mbe kuɔ fɔ fɔɛ chɛ ma sɔn ka wan. An mbe i wan sɔn, tea Yataa dɔndɔɛ a, mbɛ an‑na n bɛɛ sɔn, i 'a denɛ Chisɔsi Chasi, i‑a n fɛn sɔ dunya chɛ ɔ.

⁴N ban‑da a ɔ yian‑da dunya ɔ, i kamayaen mu buɛ min dɔ. A yen ko, n‑na i 'a wai a ban, i‑a min be n ma a chɛ koe a.

⁵Fa Yataa, sanche gbɛ, a ma n ni ma basɔmaya chɛ ɔ, i waa a, yɔ n ni min nyɔn sima ɔ, dunya chɛ a e na to dan‑da.

⁶“I‑a mɔɛ dɔ n bɔ wan an bɔɛ n tɛ ɔ, nɛ dunya chɛ ɔ, mbɛ i‑a an be n ma, ma koe a n fɛ denɛ n na. A gbu sin, i wan ta ni an na, a sin to, i wan‑na an be n ma. N‑na i wakoe ɔ yian fan an na, an‑na i sɔn. An sin‑na an too ma sɔ wan i da a kuiɛ ma, chɛ gbɛɛ ɔ.

⁷Sanche chɛ sin dɔ gbɛ, an‑na a ɔ sɔn gbɛ chɛndɛ chɛ, mbɛ i na‑a fenɛ miin gbɛɛ be n ma, an ka‑a i wandi gbu an tena.

⁸I 'a sakana chɛ, i‑a min be n ma an ko a, n‑na a a ben fan an tena. A sin, an‑na an too ma sɔ wan a ma. Mbɛ an‑na an boo a chii a ma, mbɛ tea mu, mbɛ n ka‑a i tena wan. A sin, an danden fan mu to a a, mbɛ i wan‑na n sɔ.

⁹“I 'a mɔɛ n fan nɛ, i wan‑na an be n ma, n mbe samunɛ chɛ tena an ko a. N mbe ee samunɛ chɛ tena chɛ n fan ko a, i wakoe ee miin faa ɔ.

¹⁰Mɔɛ miin gbɛɛ n ko a, i wɛɛ, i 'a mɔɛ nu mu. Mɔɛ miin gbɛɛ, an mbe i ko a, n bɛɛ, n 'na mɔɛ nu mu. A sin, an mbe a ɔ yian tena wan, n kamayaen mu buɛ min dɔ.

¹¹Sanche chɛ ɔ gbɛ, n mbe chia an na, na koe a i tena. N tana, ɛ gbɛ buɛ min dɔ, n mbe ee ma tena to dunya chɛ ɔ. Chɛɛ an tana, an mbe wɛ nɛ chɛ a ɔ. Fa, i wɛn kan nyɔ ee, an kun ma fɛn, min mbe a ma, an ni ma mɔ dɔndɔɛ a an nyɔn tena, yɔ mɔ ɛ buɛ min dɔ. Chɛ ma i 'a gbasaya ɔ, i na‑a gbasaya min sima be n ma.

¹²Tima min na nn bɛ ni an na, n na‑a an kun ma fɛn fan chɛndɛ chɛ. N na‑a chɛ ma i 'a gbasaya ɔ wan, i na‑a gbasaya min be n ma. A sin, n ma fo nin bɛ an dɔndɔ wɛɛ a. Chɛɛ an dɔndɔ mu dechee, i na‑a min bakoe fɔ, mbɛ a tana ɛ na‑a wan a wandi nimisa‑a. Chɛ ɛ ma‑a wan, min mbe a ma, min nyɛnden mu i 'a gboo ɔ, a ni bɔ a a.

¹³A sin, sanche chɛ ɔ, n mbe gbɛ chia an na, na‑a i tena. Chɛɛ n mbe wɛ nɛ tima min na dunya chɛ ɔ, n mbe koe chɛ n gbɛɛ ɔ yian tena wan n fɛ den chɛ n na. Chɛ ɛ ma‑a wan, buɔdia min nyɔn sima ɛ n dɔ, an ni a buɔdia da faenɛ ma sɔn.

¹⁴I‑a sakana min be n ma an ko a, n‑na a ben fan an tena. An sin, an bɛ ee mɔɛ chɛ n na ko dɔndɔ ɔ, i wakoe ee miin faa ɔ. Chɛ ko a, an fɛn mbe i faa ma koe ma ka, an ko a ma di chɛ n ye, miin mbe ee i faa ma koe ma ka.

¹⁵N mbe ee samunɛ chɛ tena gbɛ, min mbe a ma, i ni an bɔ dunya chɛ ɔ. Chɛɛ n mbe a chɛ tena, i ni an kun ma fɛn Sitana boo ɔ, nyina yama chɛ.

¹⁶N mbe buɛ min dɔ dechee, nn bɛ mɔɛ chɛ n na, i wakoe ee miin faa ɔ, nn mbe ee ko dɔndɔ ɔ. N fɛ den chɛ n bɛɛ, an mbe dechee ka wan yɔ n fan, an bɛ an mɔɛ chɛ n na, an mbe ee ko dɔndɔ ɔ.

¹⁷I 'a bai an mu tea a. Chɛ an‑na a fɔ, a ma i 'a bai chɛ ni an ma, an ni ma i ko a tenchen.

¹⁸I na‑a n sɔ buɛ min dɔ dunya chɛ ɔ, n bɛɛ, n mbe ka wan an sɔ‑a gbɛɛ ben‑da a ɔ.

¹⁹A sin, an fan ko a mu, n mbe n fandi be tena, ma koe a tenchen i ko a. Chɛ ɛ a ma‑a wan, an bɛɛ, an ni ma tenchen i ko a.

²⁰“N mbe samunɛ min chɛ tena, n fɛ den chɛ n dechee an ko a ma. Chɛɛ mɔɛ chɛ n bɛɛ ko a, miin mbe an kai fa‑a n na, a mu min na, n fɛ den chɛ n koɔ‑a an tena a si n ma.

²¹N mbe samunɛ chɛ tena, an gbɛɛ ni ma mɔ dɔndɔya ɔ. Fa, a ma an ni ma mɔ dɔndɔya ɔ mɔ a, yɔ mɔ fea chɛ mɔɛ ɛ buɛ min dɔ mɔ dɔndɔya ɔ.

²²N‑na a ma an bɛɛ‑a basɔmaya ma sɔn, i na‑a basɔmaya min be n ma. N‑na chɛ ma, min mbe a ma, an ni ma mɔ dɔndɔya ɔ an nyɔn na, yɔ mɔ fea ɛ buɛ min dɔ.

²³Nn bɛ an na, mɔ dɔndɔɛ mu nn na, yɔ mɔ fea wɛɛ, mɔ ɛ buɛ min dɔ. Chɛ ni a ma, an mbe mɔ dɔndɔya min dɔ an nyɔn na, a da ni fa gban. Chɛ ɛ a ma‑a wan, i wakoe ee mɔɛ miin faa ɔ, an ni a ɔ sɔn, mbɛ i wan‑na n sɔ. A yɛ to, an mɔɛ chɛ n ni a ɔ gbɛ chɛndɛ chɛ, mbɛ i toen fan mu n fɛ den chɛ n na, yɔ i toen mu n na buɛ min dɔ.

²⁴“Fa, i ban‑da gbɛ an be‑a n ma. N toen mu, n mbe ma‑a kaina min, nn bɛ ni ma nɔ n fɛ den chɛ n na. Chɛ ɛ a ma‑a wan, an ni a ɔ yen n kamayaen mu buɛ min dɔ. A sin, i wan‑na an kamaya chɛ be n ma. I na‑a a be n ma, koe min na mu, i to‑a wan n na pɛn dunya chɛ a ni to dan‑da.

²⁵Fa, i wɛn tanden mu, i wakoe ee mɔɛ miin faa ɔ, kɛn gba an ma i sɔn. Chɛɛ n tana, n‑na i sɔn fan tima ɔ tima ko a. A sin, n fɛ den chɛ n bɛɛ gbu, an‑na a ɔ sɔn gbɛ, mbɛ i wan‑na n sɔ.

²⁶N‑na i wakoe ɔ yian fan an na, an‑na i sɔn. A sin, n gboo ɔ ee fa‑a a ɔ yian koe a an na. Chɛ ɛ a ma‑a wan, n ko a di ka buɛ min dɔ i ye, a nyɔn sima koadia ni ma an faa ɔ. Mbɛ a sin fan mbe a ma‑a, nn bɛ an na, nn ni ma mɔ dɔndɔɛ a.”