Read Kono CHƆN 18 Bible Online

CHƆN 18 - Kono bible

CHƆN 18

¹Chisɔsi ban‑da kɛn samunɛ chɛ chɛ‑a, mbɛ a bɔ‑a nɔ, an bɛ a fɛ denɛ n na. Mbɛ an‑na foo ɔ tandin, min tɔ ni Kidon foo. Foo chɛ kaka chɛ ma, kɔn nangbanɛ ni wan nɔ. Mbɛ Chisɔsi don‑da an nangbanɛ chɛ ɔ, an bɛ a fɛ denɛ chɛ n na.

²Chɛɛ a fɛ denɛ Chudasi, min ni na tena ka a ma tachɛ‑a a chɛɛ ma nyɔɛ nu ma, a na‑a an kaina chɛ sɔn fan. Koe min na mu, tima sɛsɛ ko a, Chisɔsi na‑a bɛn fan nɔ, an bɛ an na.

³Mbɛ Chudasi na‑a an kaina chɛ, ɛ na‑a an bɛ Domi chɛnyɛ ɔ soya kuunɛ n na. An bɛ ni poesi n na na‑a, miin ni Yataa 'a kata kun ma fɛn. Fayisii mɔɛ dɔ nu, an bɛ Chu n tɛ mɔɛ nu Yataa a, an 'na mansa nu, an fan na‑a an sɔ. Chɛɛ chɛ feanka n ni wan an boo ɔ, ni sanku manɛ, a basan dambo n na.

⁴Chisɔsi na‑a a ɔ sɔn fan chɛndɛ chɛ, an ni na tena koe miin gbɛɛ a ben‑da a a. Chɛ ko a, a wɛɛ ta‑a wan an ya ɔ, mbɛ a ɔ, “Wo e wo ya a kan tena nyɔn na?”

⁵Mbɛ an dɔ, “Nn mbe nn ya a kan tena Chisɔsi an na, min ka‑a Nasaɛti duu ɔ.” Mbɛ a ɔ, “N yen ko.” A tima chɛ a, Chudasi, min ni ka a ma tachɛ‑a, chɛɛ ma nyɔnɛ n ma, ɛ nɔ sɔ ɔ, an bɛ an mɔɛ chɛ n na.

⁶Chisɔsi‑a a fɔ kɛn, a ɔ, “N yen ko,” mbɛ an gbɛɛ yɛ‑a an kuu kɔ, an bea‑a duu ma.

⁷Mbɛ Chisɔsi‑a an dɔ tisa to, a ɔ, “Nyɔn gbu mu, wo e wo ya a kan tena min na?” Mbɛ an dɔ te to, “Chisɔsi, min ka‑a Nasaɛti duu ɔ.”

⁸Chɛ nɛnɛ ɔ, a ɔ, “N ban‑da a fɔ‑a wo ye, mbɛ Chisɔsi mu n fan na. Chɛ an fɛ mu, ni wo e wo ya a kan tena n fan na, mbɛ wo a ma, n fɛ mɔɛ chɛ n ni ta.”

⁹A‑a chɛ fɔ, min mbe a ma, a na‑a min fɔ, a ni bɔ a a. A na‑a a fɔ wan, a ɔ, “Fa, n ma fo ni mɔɛ chɛ n dɔndɔ wɛɛ a, i na‑a mɔɛ miin be n ma, an kun ma fɛn koe a.”

¹⁰Mbɛ a fɛ den chɛ n dɔndɔ, Saimɔn Pita, a‑a chɛɛ chɛ mɛ bɔ a sa ɔ. Mbɛ Chu n 'na tɛ mɔ wa Yataa tena, a 'a yɔnɛ, a‑a a too tɛ a a fau, a boo nyima ɔ. An yɔnɛ chɛ, a tɔ ni Makɔsi.

¹¹Mbɛ Chisɔsi ɔ Pita gbu ma, a ɔ, “I 'a chɛɛ chɛ mɛ a yɛ a sa ɔ. N mbe mɔnɛ chɛ bia wan, Fa‑a a fɔ, n ni min dɔ bia. Ɛ i yii ma, n mbe ee a ɔ bia‑a?”

¹²Mbɛ Domi soya mɔɛ nu, an bɛ an 'na mɔ chenama an na, a basan Yataa 'a kata kun ma fɛn poesi chɛ n na, an gbɛɛ‑a Chisɔsi bia. Mbɛ an‑na a chii.

¹³An ta‑a mɔɛ min pɛn tena, an nɛ kai Anasi a. Chu n 'na tɛ mɔ wa Yataa tena, an san chɛ a, a ni Kayafasi an na. Anasi chɛ, a 'a denɛ musuma, an ni a boo ɔ.

¹⁴Kayafasi chɛ ni, min na‑a Chu mɔɛ n ya ɔ sɔɛ n na si, mbɛ a fisa mɔ dɔndɔɛ ni fa mɔ gbu tɔɛ n ko a.

¹⁵Saimɔn Pita chɛ, an fea a bɔɛ fɛ den dɔ mende a, an ta‑a wan Chisɔsi san‑da. A wan Pita bɔɛ chɛ, Chu n 'na tɛ mɔ wa chɛ Yataa tena, a na‑a a sɔn fan chɛndɛ chɛ. Chɛ ko a, a tana, a don‑da wan an tɛ mɔ wa chɛ 'a kata ɔ.

¹⁶Chɛɛ Pita tana, a to‑a kata chɛ kɔ wan, a da tɔnfɛ. Mbɛ a bɔɛ chɛ bɔ‑a baa ma, mbɛ a koɔ‑a sunkun tɔngbɔɛ tena kata chɛ da a, mbɛ Pita don‑da an fea a bɔɛ chɛ a.

¹⁷Sunkun tɔngbɔɛ chɛ, min ni ka kata chɛ da a, a koɔ‑a Pita tena. A ɔ, “I wɛɛ, a ma ma, mbɛ i mu kamin chɛ fɛ denɛ dɔndɔ an na.” Chɛɛ Pita ɔ, “A an, a fɛ den ma n na.”

¹⁸Chima an ni na tena a tima chɛ a, min‑na a ma, tɛ mɔ wa chɛ 'a bɔi denɛ chɛ n dɔ nu, an bɛ Yataa 'a kata kun ma fɛn poesi chɛ n na, an‑na ta chɛ chɛmbu ɔ. A sin, an tindanden fan ni a a, an mbe an gbaa‑a. Mbɛ Pita wɛɛ na‑a an tena, a sɔ‑a, a bun‑da a gbaa‑a.

¹⁹Mbɛ tɛ mɔ wa chɛ‑a Chisɔsi ɔ tisa, a fɛ denɛ n bakoe a, a yɛ to, a si kanɛ ma, ɛ min chɛ.

²⁰Chɛɛ Chisɔsi ɔ, “N ma bai ɔ bai sa nin bɛ doee ɔ. Tima ɔ tima ko a, mɔɛ miin ni an too ma sɔ n ma, n ni koɔ wan an tena fanka ɔ den. Kanɛ gbɛɛ n ni min chɛ, n ni a chɛ wo 'a samun chɛ chenɛ n na wan, a basan Yataa 'a kata ɔ a, mɔɛ n gbɛɛ bɛn tena nu.

²¹Fen ko a gbɛ, e n dɔ tisa tena? Mɔɛ miin ni an too ma sɔ n ma, e an fan dɔ tisa. An dɔ tisa, an ni a ɔ yian i a, n ni min fɔ an ye, an‑na a gbɛɛ ɔ sɔn fan.”

²²Chisɔsi‑a chɛ fɔ kɛn dechee, poesi chɛ n dɔndɔ nɔ, a‑a a too ɔ gbasi. A ɔ, a wan Chisɔsi ee kun, a ɔ, a ni koɔ ka buɛ chɛ ɔ, an 'na tɛ mɔ wa tena.

²³Mbɛ Chisɔsi ɔ, “Fen mu e n gbasi tena? A ɔ yian bɛ mɔɛ chɛ n na nɛ, n‑na bai yama min fɔ. Chɛɛ ni n ma bai yama fɔ ni, i nii a ma ka.”

²⁴Chisɔsi boo ɔ chiienɛ chɛ to‑a ka wan, mbɛ Anasi‑a a ma, an ben‑da a a Kayafasi tena, Chu n 'na tɛ mɔ wa chɛ Yataa tena.

²⁵Saimɔn Pita ni wan sɔ ɔ tun mɔɛ chɛ n tɛ ɔ, ɛ a gbaa chɛ‑a. Mbɛ an‑na a ɔ tisa, an dɔ, “I wɛɛ, a ma ma, mbɛ i mu kamin chɛ fɛ denɛ dɔndɔ an na.” Chɛɛ Pita‑a kɔɔsa bia chɛ wan to, a ɔ, “A an, a fɛ den ma n na.”

²⁶Mbɛ tɛ mɔ wa chɛ 'a bɔi dɔndɔ wɛɛ ni wan nɔ. A suun ma nyɔɛ ni mɔna chɛ a, Pita na‑a min too tɛ ka a a. Mbɛ bɔi chɛ koɔ‑a, a ɔ, “N na‑a i yen fan kɔn nangbanɛ chɛ ɔ, wo fea ɛ Chisɔsi a, ae?”

²⁷Mbɛ a gba sawan bɔɛ chɛ wɛɛ ɔ, Pita ɔ, “A an.” A sin, a ya kɔɔɛ a, tɛ kɔnɛ konchee‑a wan.

²⁸Sau sau ma ni, mbɛ an bɔ‑a Chisɔsi a Kayafasi chen kɔɔ, an ta‑a a a. Mbɛ an na‑a Domi kun ti chen kɔɔ, min ni kɔfana a Chudia chɛnyɛ ɔ. Mɔ fanka min na‑a ka Chisɔsi a, an nii ma don ni kata chɛ ɔ, an to‑a a baa ma wan. Chu sawa ta fɛ chia a, an toen ni an ni an fandi bia chɛndɛ chɛ. Chɛ an mbe a ma, an ni daunɛ chɛ, kun bɔ a ɔ bɛnɛ chɛ kun ma, aan an ni ban.[32]

²⁹Chɛ ko a, Kɔfana Padeti bɔ‑a a 'a kata ɔ, a na‑a a tan. Mbɛ a ɔ, “Kamin chɛ‑a fen ko yɔn wo ma?”

³⁰Mbɛ an‑na a yɛman ka wan, an dɔ, “Ni mɔna chɛ ma ko yama kan kɔ kan ma ni, nn mbe ee kun nn ni na a a i chen kɔɔ.”

³¹Mbɛ Kɔfana Padeti ɔ, “Mbɛ wo wandi, wo ta a a, wo ni wo 'a sawa a tachɛ a a.” Chɛɛ an dɔ, “Wo wan Domi mɔɛ n ma a gbasaya chɛ be nin bɛ kɛn nn ma, kaa a tɛ koe a mɔɛ fa koe ma.”

³²An‑na bai min fɔ ka, a‑a a ɔ yian fan, mbɛ Chisɔsi na‑a min fɔ, a ɛ bɔ‑a wan a a. Chisɔsi na‑a a ɔ yian fan, an ni na tena a fa‑a buɛ min dɔ.

³³Mbɛ Kɔfana Padeti yɛ‑a a 'a kata bu ɔ, mbɛ a‑a a ma, an na‑a Chisɔsi a a tena. Mbɛ a ɔ, “I wan mu Chu mɔɛ n 'na mansa a?”

³⁴Chɛɛ Chisɔsi ɔ, “I wandi gbu ta tisa an nɛ, kɔ mɔɛ n fan‑na n ma don i tena?”

³⁵Mbɛ Kɔfana Padeti wɛɛ ɔ, “Chɛɛ a ma ma i yii ma, mbɛ Chu mɔɛ mu n na, i ɔ tisa koe a n kun ma a a. I wandi 'a mɔɛ n gbu, a basan Chu n tɛ mɔɛ nu Yataa a, an 'na mansa n na, an fan na‑a i a n chen kɔɔ. I‑a fen gbu ma?”

³⁶Mbɛ Chisɔsi ɔ, “Dunya chɛ ɔ mansa ma n na. Ni a ni n na, mbɛ n fɛ mɔɛ n ni butuinɛ chɛ‑a wan n ko a, mɔɛ n nii n be‑a ya ɔ sɔɛ chɛ n ma. A an, n 'na mansaya gbasaya ma bɔ ni dunya chɛ an dɔ.”

³⁷Chɛ‑a a ma wan, Kɔfana Padeti ɔ, “E ka a fɔ an na gbɛ n ye, mbɛ mansa mu i a?” Mbɛ Chisɔsi ɔ, “I wan‑na a fɔ, i ɔ, mansa mu n na. N na‑a dunya chɛ ɔ, mbɛ n suun‑da mɔgbuya ɔ. Chɛ ma‑a, ko dɔndɔ gbe chɛ an ko a, tea ɔ yian koe a mɔɛ n na. A sin, mɔ ɔ mɔ min toen mu an tea chɛ a, ɛ a too ma sɔ wan n da a kuiɛ ma.”

³⁸Mbɛ Kɔfana Padeti ɔ a ma, a ɔ, “Tea e na ma fen na?” Mbɛ Kɔfana Padeti bɔ‑a to mɔɛ chɛ n tena, a 'a kata baa ma. Mbɛ a ɔ, “N ma chia kan kɔ kan yen ni, kaa a tɛ koe a, mɔna chɛ fa koe ma.

³⁹Chɛɛ san kɔ san na, manda mu a a, mbɛ kun bɔ a ɔ bɛn chɛ kan kɔ kan kun ma, n mbe n boo ka wan mɔɛ dɔndɔ a wo ye, min mbe sa ɔ pimbi chenɛ a. Chɛ an‑na a fɔ gbɛ sanche, wo toen mu n ni n boo ka wo 'a mansa an na, ae?”

⁴⁰Chɛɛ chɛ ko a, an‑na yee tɛ wan, an dɔ, “A an, an ma. N toen mu i ni i boo ka Baabasi an na.” Baabasi chɛ ni mɔ yama wa an na.