Read Kono CHƆN 20 Bible Online

CHƆN 20 - Kono bible

CHƆN 20

¹Sau sau ma, Tɛnɛ kan kɔ dɔɛ ma, kaina a findenɛ ni wɛ tima min na, Mɛi min ka‑a Makadaa duu ɔ, a ta‑a Chisɔsi kamba chɛ tena. Mbɛ a‑a a ɔ yen, mbɛ senɛ min bundenɛ ni an fan chɛ da a, a su chɛ sa‑a ka kaina, mbɛ an senɛ chɛ ee to nɔ bun dɔ.

²Mbɛ a‑a bui sa a a Saimɔn Pita tena, an fea a bɔɛ fɛ denɛ dɔndɔɛ chɛ a, min ko a ni di ka gbeden Chisɔsi ye. Mbɛ an Mɛi chɛ‑a a fɔ an ye, a ɔ, “Mɔɛ n‑na mmɔ 'a mansa su bɔ kamba ɔ, a sin, nn ma a ɔ sɔn an taen mu a a kaina min.”

³Mbɛ Pita an fea a bɔɛ chɛ a, an ta‑a a kamba chɛ tena.

⁴An fea chɛ ni ta tena bui chɛ an na. Chɛɛ Pita bɔɛ chɛ na‑a a bui wan a kɔ gbɛaen ba a, min‑na a ma, a pɛn‑na a fo nɔ.

⁵Mbɛ a‑a a ma bun, a‑a a ya ma sa fan chɛ a, mbɛ a‑a fen gbɛ chɛ yen nɔ sa ɔ. Chɛɛ a nii ma don ni nɔ su sa fan chɛ a.

⁶Mbɛ Saimɔn Pita wɛɛ na‑a gbɛ a gbaa chia a. Chɛɛ a tana, a don‑da wan dɔndɔ gbe an fanɛ gbu a. Mbɛ a wɛɛ‑a fen gbɛ chɛ yen nɔ sa ɔ.

⁷A sin‑na koa chɛ wɛɛ yen fan to, min na‑a mɔndɔ mɔndɔ Chisɔsi kunɛ a. A nɛnɛ sin, a ɔ nii ma basan ni fen gbɛ tɔɛ chɛ a, chɛɛ a ni sa ɔ dɔi a ta kun ma a a.

⁸Mbɛ fɛ denɛ dɔndɔɛ chɛ, min pɛn na‑a che ka kamba chɛ ma, a wɛɛ don‑da nɔ. A don‑da kɛn nɔ, a‑a koa chɛ n yen nɔ sa ɔ, mbɛ a dan‑da a a, mbɛ Chisɔsi‑a a kɔɔ sɔ a ka saya ɔ.

⁹Chɛɛ a tima chɛ gbɛɛ ɔ, Yataa 'a gboo na‑a a fɔɛ min chɛ, mbɛ ɛ a kɔɔ sɔ‑a wan a ka saya ɔ, an nii ma a ɔ gbɛ nin bɛ.

¹⁰Mbɛ a fɛ den fea chɛ n yɛ‑a an baa chenɛ a.

¹¹Chɛɛ Mɛi tana, a sɔ‑a wan nɔ kamba chɛ baima, ɛ di chɛ‑a. Mbɛ a‑a a ma bun, a‑a a ya ma sa kamba chɛ a.

¹²Mbɛ a‑a maeka fea an yen nɔ, an ma bɛndenɛ ɛ koa gbɛ ɔ, an mbe si ɔ kaina chɛ, Chisɔsi su chɛ ni sa ɔ kaina min. Dɔndɔɛ ni si ɔ a sa tena chɛ kun kandɔɛ wan, dɔndɔɛ sin ni a chen den kɔɔɛ tena wan.

¹³Mbɛ an‑na tisa chɛ, an dɔ, “Bɔɔɛ, fen mu e di chɛ‑a?” Mbɛ a ɔ, “An‑na n 'na mansa su ya, an ta‑a a a. A sin, n ma a ɔ sɔn, an‑na a sa kaina min.”

¹⁴Mbɛ a‑a a ya a mun, mbɛ a‑a kaminɛ yen sɔ ɔ nɔ. Chisɔsi an nii nɛ, chɛɛ Mɛi nii ma a ɔ sɔn ni, mbɛ an nɛ.

¹⁵Mbɛ Chisɔsi gbu ɔ, “Bɔɔɛ, fen mu e di chɛ‑a? A yɛ to, e i ya a kan tena nyɔn na?” A ni Mɛi yii ma, mbɛ yadi gbu kun ma fɛn mɔɛ an nɛ. Chɛ‑a a ma wan, a ɔ, “Kai, ni i wan ta‑a a su a, a ɔ yian n na, i‑a a sa kaina min. Chɛ ɛ a ma‑a wan, n ni ta a bi, mbɛ n yɛ‑a a a nɛ.”

¹⁶Mbɛ Chisɔsi‑a a chee a tɔɛ ma, a ɔ, “Mɛi.” Mbɛ Mɛi‑a a kunɛ kɔɔ sɔ a tena, mbɛ a ɔ, “Ticha.”[34]

¹⁷Mbɛ Chisɔsi ɔ, “Sɛmbɛ n bia koe a, a mu min na, n ma sɛ nin bɛ banda bu ɔ Fa tena. Chɛɛ ta n fɛ denɛ n tena, mbɛ i‑a a ɔ yian an na, mbɛ n mbe yɛ tena Fa tena, min mu wo wɛɛ fa a. A yɛ to, n 'na Yataa mu a a, wo wɛɛ 'a Yataa mu a a.”

¹⁸Mbɛ Mɛi, min ka‑a Makadaa duu ɔ, a yɛ‑a Chisɔsi fɛ den chɛ n tena. A‑a a ɔ yian an na, mbɛ a‑a Mansa Chisɔsi yen. A yɛ‑a to, Chisɔsi na‑a min gbɛɛ fɔ a ye, a‑a a ɔ yian an na gbae.

¹⁹A Tɛnɛ kan kɔ dɔɛ chɛ ma, tee bea ma ni gbɛ nyɔ dɛɛ. A sin, Chisɔsi fɛ den chɛ n na‑a an nyɔn na kan fan chenɛ a, mbɛ an‑na a da a tɔn, an chiandenɛ ɛ Chu n ya ɔ sɔɛ n ma. Mbɛ Chisɔsi bɔ‑a a a, a sɔ‑a an tɛtɛ ma. Mbɛ a ɔ, “Yataa ni faachima be wo ma.”

²⁰Chɛ fɔenɛ gbakɔ a boo ɔ, mbɛ Chisɔsi‑a a boo n yian an na, a basan a kaa a fɛ chɛ a. An na‑a an 'na mansa yenɛ min chɛ ka, a na‑a a fɛ den chɛ n bu ɔ dia‑a wan gbeden.

²¹Mbɛ a ɔ to an ma, a ɔ, “Yataa ni faachima be wo ma. Fa‑a n na na buɛ min dɔ dunya chɛ ɔ, n bɛɛ, a chia dɔndɔ gbe chɛ a mu, n mbe wo a ta tena a ɔ.”

²²Mbɛ a‑a a fia fu an ma fuu, mbɛ a‑a a fɔ an ye, a ɔ, “Yataa Nyina ni ma wo fɛ.

²³Ni wo‑a wo boo bɔ mɔɛ n 'na ko yama n dɔ, an bɔ‑a an dɔ. Chɛɛ ni wo ma wo boo bɔ ni an dɔ, an mbe ee bɔ‑a an ko yama chɛ n dɔ.”

²⁴Tɔmɔsi, an ni min chee, an dɔ, Fɛn Kai, fɛ den tan kun ma fea chɛ n dɔndɔ ni a a. Chɛɛ a nii a bɔɛ chɛ n tɛ ɔ, Chisɔsi na‑a a wandi yian ka tima min na.

²⁵Chɛ ko a, Tɔmɔsi bɔɛ chɛ n‑na a ɔ yian fan a a, an dɔ, “Nn‑na mmɔ 'a mansa yen.” Chɛɛ a ɔ te an ma, a ɔ, “N mbe ee dan chɛ a. Mɔɔ ni n‑na a yen, n ni dɔntima paa chɛ n yen a boo kana n ma, n boo denɛ gbu ni tu an na, mbɛ n tu‑a a kaa a fɛ a.”

²⁶Wichi dɔndɔ bendenɛ gbakɔ, an na sɔn‑da wan to kaina dɔndɔ chenɛ a, mbɛ an‑na a da a tɔn. Tɔmɔsi chɛ wɛɛ ni wan nɔ an tɛ ɔ a tima chɛ nɛnɛ kɔɔ. Chen chɛ a tɔndenɛ ni wɛɛ ka, chɛɛ Chisɔsi bɔ‑a wan to, a sɔ‑a an tɛtɛ ma. Mbɛ a yɛ‑a to, a ɔ, “Yataa ni faachima be wo ma.”

²⁷Mbɛ a‑a a fɔ Tɔmɔsi gbu ma, a ɔ, “N boo kana n ma fɛn, i ni i boo din nɛ paa chɛ n dɔ. A yɛ to, i boo a na, i ni a din nɛ n kaa fɛ chɛ. Kɔɔsa bia chɛ gbɛɛ ni ban gbɛ i boo ɔ, i kai fa gbɛ n na.”

²⁸Mbɛ a wan Tɔmɔsi ɔ gbɛ, a ɔ, “I wan mu n 'na mansa a, i wan mu n 'na Yataa a.”

²⁹Mbɛ Chisɔsi ɔ a ma, a ɔ, “I‑a n yenɛ min chɛ, an‑na a ma dechee, i‑a i kai fa n na. Dua ni ma mɔɛ chɛ n ma, miin ma n yen ni, chɛɛ an‑na an kai fa‑a n na.”

³⁰Chisɔsi na‑a kamaya koe dɔ mende ma wan sɛsɛ, a fɛ den chɛ n ya kɔɔɛ ma. Chɛɛ an koe chɛ nɛnɛ nu, an ma nyɛn ni gboo chɛ ɔ.

³¹Chɛɛ miin nyɛndenɛ ɛ ka gboo chɛ ɔ, an nyɛn‑da, min mbe a ma, wo ni wo kai fa Chisɔsi a, mbɛ a wan mu kunka mansa a. A yɛ to, mbɛ Yataa 'a denɛ mu a a, a sin, ni wo‑a wo kai fa a a, wo e kuɔ fɔ fɔɛ ma sɔn‑da wan.