Read Kono CHƆN 21 Bible Online

CHƆN 21 - Kono bible

CHƆN 21

¹Chɛ gbakɔ, Chisɔsi‑a a wandi yian fan to a fɛ denɛ n na, Tibɛyasi[35] yii wa fɛ. A sin na‑a chɛ ka wan a ɔ.

²A fɛ den chɛ n fan ni nɔ. Saimɔn Pita, ni Tɔmɔsi, an ni min chee, Fɛn Kai, ni Natanɛɛ, min na‑a ka Kana, Kadidi chɛnyɛ ɔ, a basan kai Sɛbɛdi 'a denɛ kaima n na. Chisɔsi fɛ denɛ fea dɔ mende n ni wan to nɔ.

³Mbɛ Saimɔn Pita koɔ‑a a bɔɛ n tena, a ɔ, “N mbe ta‑a nyɛ gbain tena.” Mbɛ a bɔɛ chɛ n bɛɛ ɔ, “Mmɔ bɛ an mbe ta tena, nyɛ gbain tena chɛ.” Mbɛ an gbɛɛ chɛ‑a dɛndɛ dɔndɔɛ ɔ, an ta‑a. Chɛɛ a su chɛ gbɛɛ ɔ, an ma nyɛ dɔndɔ wɛɛ bia ni.

⁴Banda ɔ ka‑a chinɛn, mbɛ Chisɔsi sɔ‑a an yii chɛ tindi ma. Chɛɛ a fɛ den chɛ n nii ma a ɔ sɔn, mbɛ a wan mu.

⁵Mbɛ a‑a an dɔ tisa, a ɔ, “N bɔ nu, wo ma fen kɔ fen bia nin bɛ?” Mbɛ an dɔ, “Nn ma nyɛ dɔndɔ gbe bia nin bɛ.”

⁶Mbɛ a ɔ an ma, a ɔ, “Wo wo 'a nyɛ gbain yaa a dɛ wo boo nyima ɔ, dɛndɛ chɛ ɔ, wo e nyɛ dɔ bia‑a wan.” Mbɛ an‑na an 'na yaa a dɛ nɔ, a sin, nyɛ n chɛ‑a wan a ɔ. An nii ma che ni a sawan‑da, a sɛ dɛndɛ gbu ɔ, koe min na mu, nyɛ n faen fan ni a a gban.

⁷Mbɛ Chisɔsi fɛ denɛ dɔndɔɛ chɛ, min ko a ni di ka a ye gbeden, a‑a a fɔ Pita ye, a ɔ, “Mansa Chisɔsi an mbe ka sɔ ɔ tindi ma.” Pita‑a chɛ a min kɛn, mbɛ an 'na mansa an nɛ, mbɛ a na‑a a 'a doma min bɔ ka, ɛ nyɛ gbain chɛ‑a, mbɛ a‑a a chii fɔin a bu tɛ, mbɛ a dɛ‑a yii chɛ ɔ.

⁸A bɔɛ fɛ denɛ tɔɛ chɛ n to‑a wan dɛndɛ gbu ɔ, aan an na‑a tindi ma, an mbe yaa chɛ sawan‑da, min na faenɛ ni ka nyɛ n na. Tindi chɛ ma ɔ nii ma yansan an na. An tɛɛ ni ma wan yadi chɛmɛ dɔndɔ nyɔn na.

⁹An che‑a kɛn tindi ma, an bɔ‑a dɛndɛ chɛ ɔ, mbɛ an‑na ta a dɛndenɛ tan nɔ, nyɛ kua ɛ gbaa sa ɔ ta chɛ a. An na‑a biidi wɛɛ yen fan nɔ si ɔ.

¹⁰Mbɛ Chisɔsi a ɔ an ma, a ɔ, “Wo na nyɛ dɔ a, wo‑a miin bia ka sanche.”

¹¹Mbɛ Saimɔn Pita sɛ‑a, mbɛ an‑na yaa gbu sawan, an na‑a a a tindi ma, nyɛ gboso gboso n faenɛ a. An taen fan ni nyɛ chɛmɛ dɔndɔ, nyɛ bi duu n kun ma sawa. Nyɛ chɛ n kɔ ni koo wɛɛ ka boo ɔ boo, chɛɛ yaa chɛ a nii ma panda ni ɛnden bɛɛ a.

¹²Mbɛ Chisɔsi a ɔ an ma, a ɔ, “Wo na, wo ni daunɛ chɛ.” A fɛ den chɛ n dɔndɔ wɛɛ ma a faa sɔ ni tisa chɛ koe a, a ni a fɔ Chisɔsi ma, a ɔ, “Nyɔn mu i a?” An na‑a a ɔ sɔn fan chɛndɛ chɛ, mbɛ Mansa Chisɔsi an nii nɛ.

¹³Mbɛ Chisɔsi‑a a boo a ta, a‑a biidi chɛ ya, mbɛ a‑a a be an ma. A‑a chɛ an ma nyɛ chɛ wɛɛ a, min ni ta chɛ a.

¹⁴Chisɔsi kɔɔ sɔenɛ gbakɔ a ka saya ɔ, a gba sawan bɔɛ an nii nɛ, ɛ a wandi yian‑da a fɛ denɛ n na.

¹⁵An ban‑da kɛn daunɛ chɛ‑a, mbɛ Chisɔsi koɔ‑a Saimɔn Pita tena, a ɔ, “Kai Chɔn 'na denɛ Saimɔn, n ko a di wan i ye, i ni ben i bɔɛ chɛ n gbɛɛ ma?” Mbɛ Saimɔn dɔ, “Aa mansa, i‑a a ɔ sɔn fan, i ko a di buɛ min dɔ n ye.” Mbɛ Chisɔsi ɔ a ma, a ɔ, “Mbɛ n fɛ mɔɛ n kun ma fɛn, yɔ an mbe sa denɛ n kun ma fɛn buɛ min dɔ.”

¹⁶Mbɛ Chisɔsi‑a Saimɔn Pita ɔ tisa to, a gba fean bɔɛ ɔ, a ɔ, “Kai Chɔn 'na denɛ Saimɔn, n ko a di wan i ye?” Mbɛ Saimɔn dɔ te to, a ɔ, “Aa mansa, i‑a a ɔ sɔn fan, i ko a di buɛ min dɔ n ye.” Mbɛ Chisɔsi ɔ a ma, a ɔ, “N fɛ mɔɛ n kun ma fɛn, yɔ an mbe sa n kun ma fɛn buɛ min dɔ.”

¹⁷A gba sawan bɔɛ ɔ, a ɔ, “Kai Chɔn 'na denɛ Saimɔn, n ko a di wan i ye?” Chɛ nɛnɛ ɔ, Pita faa yɔn‑da wan, Chisɔsi ni sɔ ɔ tisa min chɛ‑a a a, ni a ko a di wan a ye. Chɛ ko a, mbɛ a ɔ, “Mansa, i‑a ko ɔ ko ɔ sɔn fan. I‑a a ɔ sɔn fan, i ko a di buɛ min dɔ n ye.” Mbɛ Chisɔsi ɔ, “N fɛ mɔɛ n kun ma fɛn, yɔ an mbe sa n kun ma fɛn buɛ min dɔ.”

¹⁸A ɔ te to, “Ka n mbe chɛ ma din i tena, mbɛ i ni tima min na i tɔngbɔ tɔɛ a, i ni i ma bɛn fan, mbɛ i ta‑a i faa ma kaina nu, mbɛ i‑a i faa ma koe n ma. Chɛɛ tima min na e chenancha‑a, e i boo ɔ sawan‑da wan, mbɛ an‑na i chii fɔin. Mbɛ an ta‑a i a kaina, i ma to ni i ni ta kaina min.”

¹⁹Chisɔsi da a bai chɛ, a ni ka a ɔ yian fan na, mbɛ Pita ni na tena fa‑a ka wan. A sin, a 'a saya chɛ ɛ na‑a wan a ma‑a mɔɛ n ni Yataa 'a kamaya ɔ yen. Mbɛ Chisɔsi ɔ gbɛ a ma, a ɔ, “A a tun ma koe n fɛ denɛ a.”

²⁰Mbɛ Pita‑a a ya a mun, mbɛ a‑a a bɔɛ chɛ yen na‑a gbaa a, a bɔɛ min ko a di ka an 'na mansa ye gbeden. A bɔɛ chɛ, an ni min dɔ daun chɛ tena yɛɛ ma tee a, an na‑a a da a ta Chisɔsi too baima, mbɛ a‑a a ɔ tisa, a ɔ, “Mansa, nyɔn gbu sin mbe na tena i ma tachɛ‑a, i chɛɛ ma nyɔnɛ n ma?”

²¹Mbɛ Pita‑a a yen kɛn, mbɛ a‑a Chisɔsi ɔ tisa, a ɔ, “Mansa, an mbe n bɔɛ chɛ nan sin bia ka ma?”

²²Mbɛ Chisɔsi ɔ, “Pita, i ta kuu? A ya mbɛ n gbu n‑na a fɔ, n dɔ, a fɔɛ ni to a sun da a, aan n ni yɛ to dunya chɛ ɔ. A a tun dechee ma koe a n fɛ denɛ a.”

²³Chɛ‑a a ma wan, bai fasan‑da a ɔ Chisɔsi fɛ mɔɛ n tɛ ɔ, mbɛ a fɛ den chɛ nɛnɛ ee fa‑a to. Chɛɛ Chisɔsi nii ma a fɔ ni, mbɛ a gbu ee fa‑a. A na‑a a fɔ wan dechee, a ɔ, “Pita, i ta kuu? A ya mbɛ n gbu n‑na a fɔ, n dɔ, a fɔɛ ɛ to‑a wan a sun da a, aan n ni yɛ to dunya chɛ ɔ.”

²⁴N fan mu an fɛ den chɛ a, n fan‑na koe chɛ n gbɛɛ ɔ yen, mbɛ n‑na an nyɛn nɛ n 'na gboo chɛ ɔ. A sin, mmɔ‑a a ɔ sɔn fan, mbɛ n‑na miin gbɛɛ fɔ, mbɛ tea bai nu mu an na.

²⁵Chisɔsi na‑a ko sɛsɛ dɔ mende n ma wan. Chɛɛ an koe chɛ n gbɛɛ nii ma nyɛn ni dɔndɔ dɔndɔɛ a. Ni an na‑a an gbɛɛ nyɛn, n mbe a ya tena, mbɛ dunya chɛ gbɛɛ ɔ kaina nii a kun‑da an gboo chɛ n gbɛɛ sa tena ko a.