Read Kono CHƆN 5 Bible Online

CHƆN 5 - Kono bible

CHƆN 5

¹Chɛ gbakɔ, Chisɔsi sɛ‑a wan to Chuusaɛn, Chu n 'na bɛnɛ dɔndɔ ko a to.

²Nɔ Chuusaɛn duu chɛ ɔ, ben chia ni wan nɔ sa n na, yii pai ɛ a baima. Ku ni bun dɔ duu an pai chɛ a tindanɛ ben‑da. Chu mɔɛ n ni an kaina chɛ chee, an dɔ, Betɛsɛda[16].

³Gbandi mɔɛ n sɛsɛ ni wan nɔ, an fanka wa, an mbe sa ɔ kuu chɛ n kɔɔ. Fion tɔɛ n ni wan nɔ, namaa n mbe nɔ, a basan chɛ n na, miin chenɛ faen ni an ma.[17]

⁴

⁵Kamin dɔndɔ ni wan nɔ, a tima chɛ a, min gbandienɛ ni san bi sawa kun ma sɛi ko a.

⁶Mbɛ Chisɔsi‑a a yen nɔ sa ɔ. A sin‑na a ɔ sɔn, mbɛ an kamin chɛ, ɛ ka gbɛ an gbandi chɛ ɔ, tima ɔ yansama an ko a. Chɛ ko a, mbɛ a ɔ, “I toen mu i ni baun gbandi chɛ ɔ?”

⁷Mbɛ gbandi mɔɛ chɛ ɔ, “Kai, mɔ ee n boo ɔ nɛ, min mbe dɛ n na yii chɛ ɔ, tima ɔ tima dechee ni a ɔ ma‑a. N mbe ma n gbɔ‑a, n ni dɛ a ɔ, mɔ dɔ mende ɛ dɛ wan a ɔ n ya ɔ.”

⁸Mbɛ Chisɔsi‑a a fɔ a ma, a ɔ, “I kɔɔ sɔ, i ni i 'a waa ya, mbɛ i ta‑a.”

⁹Mbɛ a ya kɔɔɛ a, kamin chɛ gbu baun‑da a 'a gbandi chɛ ɔ, a‑a a 'a waa ya, mbɛ a bun‑da ben ben‑da. Koe chɛ na‑a chɛ a ɔ Chu n 'na suin tee ma wan.

¹⁰Chɛ‑a a ma wan, Chu mɔɛ n ya ɔ sɔɛ nu, an‑na a fɔ kamin chɛ ye, an dɔ, “Suin tee mu bi a, a sin, mmɔ 'a sawa ma dɔn ni a ma, i ni ma ka ben ben‑da i 'a waa a.”[18]

¹¹Chɛɛ kamin chɛ ɔ, “Chɛɛ mɔɛ min‑na a ma n baun‑da, a na‑a a fɔ ka wan n ye, a ɔ, n ni n 'na waa ya, a ɔ, n ni ben ben.”

¹²Mbɛ an‑na a ɔ tisa, an dɔ, “Mɔɛ minan mu, min‑na chɛ fɔ i ye?”

¹³Chɛɛ kaminɛ chɛ min na‑a baun ka, a nii ma a ɔ sɔn, mɔɛ min na‑a a ma a baun‑da. Koe min na mu, fanka min ni nɔ a da a ni koo. Chɛ na‑a a ma wan Chisɔsi chen gba ɔ chɛ‑a an mɔɛ n tɛ ɔ.

¹⁴Chɛɛ chɛ gbakɔ, Chisɔsi‑a kamin chɛ yen fan Yataa 'a kata ɔ, mbɛ a‑a a fɔ a ma, a ɔ, “A yen ko, i baun‑da gbɛ sanche. Chɛ an fɛ mu, i ma ko yama ma to. Ni chɛ ma, tɔɔya min mbe i tan‑da gbɛ, ɛ yaua‑a a saa ma.”

¹⁵Mbɛ kamin chɛ ka‑a nɔ, a ta‑a, mbɛ a‑a Chu mɔɛ n ya ɔ sɔɛ chɛ n tan. A‑a a ɔ yian an na, mbɛ Chisɔsi an na‑a a baun gbandi chɛ ɔ.

¹⁶Chu mɔɛ chɛ nu, an ya ɔ sɔɛ chɛ n‑na chɛɛ ma nyɔncha bun fan Chisɔsi ma, kamin chɛ 'a baun koe a, an 'na suin tee chɛ ma.

¹⁷Mbɛ Chisɔsi ɔ, “Fa Yataa ɛ basan fan mɔɛ n ma, tima ɔ tima ko a. N bɛɛ, a nyin n ni a ma ka.”

¹⁸A 'a bai chɛ, a gbu‑a a ma gbɛ, Chu n ya ɔ sɔɛ chɛ n‑na an faa a kɔɔ gbɛ chɛndɛ chɛ, a fa koe a. An ma yiinachii chɛ chɛ ni, an 'na sawa chɛ dechee an yɔn koe ko a. Chɛɛ a‑a a fɔɛ min chɛ ka, mbɛ a fa an nɛ Yataa a. Mbɛ a chia chɛ a, a‑a a wandi ya wan ka, mbɛ an fea Yataa a, an na kanden fan mu.

¹⁹Mbɛ Chisɔsi ɔ an ma, a ɔ, “N ni chɛ ma din wo tena, mbɛ n fan, n fɛn mu ka Yataa 'a denɛ a, n mbe ee che ko ɔ ko ma‑a, n kun ma gbasaya a. N mbe koe chɛ n fan ma dechee, n mbe Fa yen miin ma‑a. N Fa, ɛ koe miin ma, n bɛɛ, n fɛn mu a 'a denɛ a, n mbe an fan ma.

²⁰Chɛ ɛ ma wan, koe min na mu, n ko a di Fa ye. A sin, ɛ koe miin gbɛɛ ma, ɛ an dɔ yian fan n na. A sin mbe kamaya koe n dɔ yian‑da wan n na, miin benden mu chɛ ma kaka, miin mbe wo gbɛɛ da n dɔ gbaa a.

²¹N Fa, ɛ mɔɛ n kɔɔ sɔ wan, a ka saya ɔ, ɛ fɔɛ be an ma. A chia dɔndɔ gbe chɛ a mu, n bɛɛ, n mbe fɔɛ be‑a chɛ n ma, n toen mu n ni a be miin ma.

²²A yɛ to, Fa wandi sin, a ee kaa a tɛ mɔ ɔ mɔ wakoe ma. Chɛɛ a‑a a nɛnɛ gbasaya gbɛɛ be n fan ma.

²³A‑a chɛ ma, min mbe a ma, mɔɛ n gbɛɛ ni basɔmaya be n ma, yɔ an mbe a be buɛ min dɔ Fa ma. Mɔ ɔ mɔ min ma basɔmaya be ni n ma, a mɔɛ chɛ ma a be ni ka Fa an ma, min‑na n sɔ.

²⁴“N mbe chɛ ma din tena wo tena, mbɛ mɔɛ min mbe n da a bai a min‑da, a ni a kai fa Fa Yataa a, min‑na n sɔ, a mɔɛ chɛ ɛ kuɔ fɔ fɔɛ ma sɔn‑da wan. A mɔɛ chɛ, kaa a ee tɛ‑a a wakoe ma, a ni tɔɔ. A ban‑da saya ɔ tandin‑da, a ta kuɔ fɔ fɔɛ ɔ.

²⁵Ka n mbe chɛ ma din wo tena, mbɛ tima ɛ che tena wan, a gbu sin che‑a, tima min na, mɔ faenɛ n mbe n kuiɛ a min‑da, n fan, Yataa 'a denɛ. An fɛn sin mbe an too ma sɔ‑a a ma, an mbe kuɔ fɔ fɔɛ ma sɔn‑da wan.

²⁶N Fa ɛ a ma wan, mɔɛ n mbe fɔɛ ma sɔn. A chia dɔndɔ gbe chɛ a, n bɛɛ, a 'a denɛ, a‑a a ma, n mbe fɔɛ be.

²⁷A sin‑na n si ka wan to a gbasaya chɛ ɔ, kaa a tɛ koe a. Koe min na mu a‑a chɛ ma, n fan mu Mɔ Gbu 'a Denɛ a.

²⁸Bai chɛ ma wo da ɔ gbaa, n mbe na tena min fɔ‑a. Tima ɛ che‑a wan, mɔɛ miin gbɛɛ faen mu, an ni n kuiɛ a min.

²⁹Mbɛ an bɔ‑a, a ka saya ɔ. Chɛ nu, miin na‑a ko chɛndɛ ma, an mbe ma‑a wan to fɔɛ ɔ. Chɛ n sin, miin na‑a ko yama ma, an mbe yɛ‑a wan to fɔɛ ɔ, mbɛ kaa a tɛ‑a an bakoe ma, tɔɔya sa‑a an ma.”

³⁰Chisɔsi ɔ, “N mbe ee ko ɔ ko ma n ta gbasaya ɔ. Fa Yataa ɛ a fɔ buɛ min dɔ n ye, n mbe kaa a tɛ ka wan. Chɛ an fɛ mu, n sin mbe tea kaa an na tɛ. Tea mu chɛ a, koe min na mu, n mbe koe miin ma, n fandi faa ma koe n ma. Chɛɛ n mbe koe miin ma dechee, an fan nɛ chɛ n na, min‑na n sɔ, a toen mu miin na.

³¹“Ni n ma‑a siiya a, n fandi ko a, mbɛ n mbe min fɔ‑a, fanka ee ma a.

³²Chɛɛ siiya ɛ bai sa tena wan, a si n bakoe ma. N sin‑na a ɔ sɔn fan, mbɛ a 'a siiya a si n ma, tea mu a a.

³³Wo na‑a mɔɛ n sɔ wan, an ta‑a Chɔn tena. A wɛɛ sin‑na tea fɔ wan, a si n ma.

³⁴N mbe ee chɛ ma tena, min mbe a ma, n ni mɔ gbu 'a siiya ma sɔn. N mbe Chɔn 'na siiya wakoe fɔ tena dechee, min mbe a ma, wo ni Yataa 'a bauncha ma sɔn.

³⁵Chɔn na‑a bai min sa, min ni yɔ manɛ wo tena, a na‑a a ma wan, wo bu ɔ dia‑a. Tima dɔ ko a, wo ma bɛnden fan ni a 'a bai a min koe a, min ni yɔ manɛ, a sin na‑a wo bu ɔ dia wan.

³⁶Chɛɛ siiya ɛ wan nɔ n ko a, n faen mu min na, a ben Chɔn ta siiya ma. N mbe koe miin ma, chɛ chɛ wai chɛ nu, Fa Yataa‑a n sɔ miin chɛ koe a, an fan mbe koɔ n ko a. N mbe an chɛ buɛ min dɔ, an fan mbe a ɔ yian, mbɛ Fa an‑na n sɔ.

³⁷A yɛ to, Fa min‑na n sɔ, a wɛɛ‑a tea ɔ yian fan mɔɛ n na, a si n ma. Chɛɛ wo ma a kuiɛ a min nin bɛ, tee dɔndɔ wɛɛ ko a, wo ma a yen nin bɛ wo ya a.

³⁸A sin, a 'a sakana bai ma si tena sɔn ni wo faa n dɔ. Koe min na mu, wo ma dan ni n na, a‑a n fɛn sɔ.[19]

³⁹Wo e Yataa 'a gboo kan fan chɛndɛ chɛ, koe min na mu, ɛ wo yii ma, an mbe a ma‑a, wo ni kuɔ fɔ fɔɛ ma sɔn. Bai miin gbu sin nyɛnden mu gboo chɛ ɔ, an sien mu n fan ma.

⁴⁰Chɛɛ chɛ gbɛɛ ɔ, wo ma to ni wo ni na n tena, min mbe a ma, wo gbu ni an fɔɛ chɛ ma sɔn.

⁴¹“Mɔ gbu 'a tando n ko a, n ma a yen ni fen kɔ fen na.

⁴²Chɛɛ a ka chɛ ma, n‑na a ɔ sɔn fan, mɔɛ min nyɔn sima mu wo a. A sin gbu, n‑na a ɔ sɔn fan, mbɛ koadia kan kɔ kan, a ee wo faa n dɔ Yataa ko a.

⁴³N fan mu mɔɛ a, Fa‑a min na na, ma koe a a ya a wo tɛ ɔ. Chɛɛ wo ma wo boo si ni n kɔɔ. Chɛɛ mɔɛ chɛ nu, miin mbe na dechee an fandi kun ye, wo e wo boo si an fan kɔɔ.

⁴⁴Wo bu ɔ dia‑a wan, wo e ma wo nyɔn bai‑a. Chɛɛ wo ee koe n ma, an ma buɛ n na, min mbe a ma, a wɛn mu dechee Yataa a, a ni wo bai. Mbɛ wo e che ka ma, wo ni dan n na?

⁴⁵Chɛ wɛɛ ni ma, a ma ma wo yii ma, mbɛ n fan mbe kun yama si‑a wo kun ma Fa tena. Chɛɛ Mosisi wandi gbu, wo yii sɔen mu min ma, sɔ koe a wo kɔ, an mbe an kun chɛ si‑a wo kun ma.

⁴⁶Ni wo na‑a dan fan gbu Mosisi a tea tea gbu a, wo ni dan‑da wan n na, a mu min na, a‑a gboo nyɛn a si n fan ma.

⁴⁷Chɛɛ ni wo ma dan ni bai chɛ a, a‑a min nyɛn, wo ee kun wo ni dan n da a bai a.”