Read Kono CHƆN 6 Bible Online

CHƆN 6 - Kono bible

CHƆN 6

¹Chɛ gbakɔ, mbɛ Chisɔsi‑a Kadidi yii wa chɛ tɛ, an bɛ a fɛ denɛ n na. Mɔɛ dɔ n ni an yii chɛ chee, an dɔ, Tibɛyasi.

²Mbɛ mɔ fanka wa n bea‑a a fɛ, koe min na mu, an na‑a a ɔ yen fan, a na‑a a ma buɛ min dɔ gbandi mɔɛ n baun‑da.

³Mbɛ Chisɔsi sɛ‑a kɔnkɔɛ a, mbɛ a si‑a nɔ, an bɛ a fɛ denɛ n na.

⁴A tima chɛ a, kun bɔ a ɔ bɛnɛ chɛ, a bia tima ma naen fan ni gbɛ.

⁵Chisɔsi‑a a ya a ta, mbɛ a‑a mɔ fanka wa chɛ yen, an mbe na‑a a tena. Chɛ ko a, mbɛ a ɔ Fiipi ma, a ɔ, “Mmɔ ɛ daun fenɛ san mende, min mbe kun mɔɛ chɛ n gbɛɛ ko a?”

⁶A na‑a chɛ fɔ, min mbe a ma dechee, a ni Fiipi yiima sɔn. Tea ni min na, a wan Chisɔsi na‑a a ɔ sɔn fan, ɛ koe min ma tena, a e na to tisa chɛ chɛ‑a.

⁷Mbɛ Fiipi ɔ, “Min mbe a ma mɔ ɔ mɔ ni daun fenɛ sima daun, a kɔpɔɛ chɛ, ɛ ta wan kau sɛi pawa ɔ,[20] daun fen chɛ san koe a.”

⁸A fɛ den chɛ n dɔndɔ, min tɔ ni Anduu, Saimɔn Pita dɔɛ, a koɔ‑a wan,

⁹a ɔ, “Kaienɛ yen ko nɛ, biidi[21] gbugbu duu, ɛ min boo ɔ, a basan nyɛ gbaa fea a. Chɛɛ chɛ gbu, ɛ fen bɔ mɔ bonda chɛ n ko a?”

¹⁰Mbɛ Chisɔsi ɔ a fɛ den chɛ n ma, a ɔ, “Wo a fɔ mɔɛ chɛ n ni si.” An kaina chɛ gbɛɛ yaen fan ni bin gbii a. Chɛ ko a, mɔɛ chɛ n gbɛɛ si‑a wan ta‑a. Mɔ kaima miin gbɛɛ ni nɔ, an taen fan ni mɔ wu duu ɔ.

¹¹Mbɛ Chisɔsi‑a biidi chɛ ya, a‑a Yataa wai bɔ, mbɛ a‑a a ma, a du‑a mɔɛ chɛ n gbɛɛ ma, miin ni ka nɔ si ɔ. A‑a ko dɔndɔ gbe chɛ an ma nyɛ chɛ wɛɛ a, mbɛ a‑a a ma, a wɛɛ du‑a mɔɛ chɛ n ma. A sin, an gbɛɛ, an‑na an bu fa daunɛ chɛ wan, yɔ an toen ni min na.

¹²An gbɛɛ bu fa‑a kɛn, mbɛ a‑a a fɔ a fɛ denɛ n ma, a ɔ, “Wo an da tɔɛ chɛ n na sɔn sɔn, mmɔ ma a pɛɛ ɛndenɛ wɛɛ yayi.”

¹³Mbɛ an‑na mɔɛ chɛ n da tɔɛ chɛ gbɛɛ a sɔn sɔn. A bɛn‑da samba fa tan kun ma fea an ma, biidi gbugbu duu chɛ.

¹⁴Mɔɛ chɛ n‑na kamaya koe chɛ ɔ yen kɛn, Chisɔsi‑a min ma, mbɛ an dɔ, “Tea ko a, kamin chɛ, Yataa 'a gbonka chɛ mɔɛ chɛ an nɛ. Mosisi na‑a chɛ an na koe kɔɔ fɔ dunya ɔ.”

¹⁵Chɛɛ Chisɔsi na‑a a ɔ sɔn kɛn, mbɛ an toen ni, an ni a bia gbasaya a, an ni a din a ma, ma koe a mansa a, a bɔ‑a wan an tɛ ɔ. Mbɛ a dɔndɔ gbe, a‑a a ma sɛ to kɔnkɔɛ ɔ.

¹⁶Yɛɛ ma tee che‑a kɛn, Chisɔsi fɛ denɛ n yii‑a wan yii wa da a.

¹⁷Fitii che‑a ka wan aan, Chisɔsi nii ma na nin bɛ an tena. Mbɛ an sɛ‑a dɛndɛ ɔ, an bun‑da yii chɛ tɛ‑a, an mbe yɛ‑a Kapanaun teen na.

¹⁸A tima chɛ a, fia‑a a kuu sɔ wan bɔ‑a gbasaya a, mbɛ yii wa chɛ yaua‑a, a tɛ koe a.

¹⁹Chisɔsi fɛ den chɛ nu, an na‑a dɛndɛ chɛ wii wan gbɛ mai sawa nyɔn ko a, chɛ ma, mai naanin, an mbe e na to a yen‑da, ɛ na‑a tachɛ chɛ‑a yii wa chɛ a, dɛndɛ chɛ baima. Mbɛ an gbɛɛ, chiandia‑a an gboo fa gban.

²⁰Mbɛ a ɔ an ma, a ɔ, “Wo ma chian, n fan mu.”

²¹Mbɛ an‑na an boo si Chisɔsi kɔɔ dɛndɛ chɛ ɔ, buɔdia a. Mbɛ a ya kɔɔɛ a ka, an 'na dɛndɛ chɛ gbu, a che‑a an na tindi ma, an ni ta tena kaina min.

²²Banda ɔ ka‑a kɛn, mɔ fanka chɛ nu, miin na‑a to nɔ yii chɛ kaka dɔndɔɛ chɛ ma, an na‑a a ɔ sɔn fan, mbɛ dɛndɛ dɔndɔɛ an ni nɔ. An na‑a a ɔ sɔn fan to, mbɛ Chisɔsi fɛ denɛ n ni ta tena tima min na, an bɛ an nii ma ta ni a a. Chɛɛ an na‑a a to an gbaa wan.

²³Chɛɛ dɛndɛ dɔ gbɛɛ nu, an na‑a wan, a ka Tibɛyasi duu ɔ. An na‑a an kaina chɛ baima, Mansa Chisɔsi na‑a Yataa wai bɔ kaina min, mbɛ mɔ fanka wa chɛ‑a biidi chɛ daun.

²⁴Mɔ fanka wa chɛ‑a a ɔ yen fan, mbɛ Chisɔsi nii nɔ, n mbe ee baa a fɛ denɛ n ma. Mbɛ mɔɛ chɛ n sɛ‑a dɛndɛ chɛ n dɔ, nɔ tindi chɛ ma, mbɛ an ta‑a Kapanaun, an mbe an ya a kan‑da Chisɔsi a.

²⁵An‑na a yen kɛn, yii chɛ kaka dɔndɔɛ ma, an dɔ, “Kan mɔ, i‑a a fo nɛ tima minan na?”

²⁶Chisɔsi ɔ, “N mbe chɛ ma din tena wo tena, koe min na mu, wo e n yan tena. Wo‑a biidi miin daun, wo bu fa‑a gban, an fɛ mu. Chɛɛ an ma a fɔ ni, mbɛ wo‑a kamaya koe chɛ n dɔ gbɛ wan, n‑na miin ma.

²⁷Chɛɛ wo ma butuinɛ chɛ daun fenɛ ko a, min mbe yɔn. Wo e min ma, wo butuinɛ chɛ daun fenɛ ko a, min mbe mɛ, min mu kuɔ fɔ fɔɛ a. Daun fen chɛ mu, n fan, Mɔ Gbu 'a Denɛ, n mbe a be‑a wo ma. Koe min na mu, Fa Yataa‑a a ɔ yian, mbɛ a boo ɛ wan n kɔɔ.”

²⁸Mbɛ an dɔ, “Nn mbe fen gbu n ma gbɛ, Yataa toen mu nn ni koe miin ma?”

²⁹Mbɛ Chisɔsi ɔ, “Yataa toen mu wo ni koe min ma, an nɛ wo dan koe a n na, a‑a n fɛn sɔ.”

³⁰Mbɛ an dɔ, “Mɔɔ ni i‑a kamaya koe ma, nn ni a ɔ yen, a ma koe a, nn ni dan i da a bai a. E fen ma‑a?

³¹Koe tɔmɔsi chɛ yen bɛ, mmɔ bemba n ta bemba nu, an‑na daun fenɛ daun fan suun fuinɛ ma, an ni min chee, an dɔ, mana. A na‑a ma wan dechee, yɔ a nyɛnden mu buɛ min dɔ Yataa 'a gboo ɔ, mbɛ a‑a daun fenɛ be wan an ma, a ka banda bu ɔ, a daun koe a.”

³²Chisɔsi ɔ, “N mbe chɛ ma din tena wo tena, mbɛ Mosisi an nii ma daun fen chɛ be ni wo ma, min ka‑a banda bu ɔ. Chɛɛ Fa Yataa, an mbe daun fenɛ chɛndɛ chɛndɛ be wo ma, a ka banda bu ɔ.

³³A mu min na, daun fen chɛ, Yataa‑a min be, a mu chɛ an na, min ka‑a banda bu ɔ, a yii‑a, a‑a fɔɛ be dunya ma.”

³⁴Mbɛ an dɔ, “Kai, an daun fen chɛ be nn ma, tima ɔ tima ko a.”

³⁵Mbɛ Chisɔsi ɔ, “N fan mu daun fen chɛ a, kuɔ fɔ fɔɛ be koe a. Ni mɔ ɔ mɔ na‑a n tena, mbɛ a‑a a kai fa n na, kɔnkɔ ee a mɔɛ chɛ bia‑a to kuɔ fɔ, a sin, a kanɛ wɛɛ a ee gbaa‑a to.

³⁶Chɛɛ n‑na a fɔ wan wo ye, mbɛ wo e n yen tena wɛɛ ka boo ɔ boo, wo ee wo kai fa‑a n na.

³⁷Chɛɛ chɛ gbɛɛ ɔ, Fa Yataa‑a miin be n ma, an mbe na‑a wan n tena. N sin, n mbe ee mɔ ɔ mɔ a yɛ‑a, min mbe na‑a n tena.

³⁸A mu min na, n yii‑a dunya ɔ, Fa Yataa faa ma koe an chɛ koe a, a wan‑na n sɔ. Chɛɛ n ma na ni n fandi ta faa ma koe an fan chɛ koe a.

³⁹A sin, a wɛn‑na n sɔ, a faa ma koe n fan nɛ. Mbɛ n ma fo a 'a mɔɛ chɛ n dɔndɔ wɛɛ a, mɔɛ chɛ nu, a‑a miin be n ma. Chɛɛ tee dankama ma, n ni a ma, an gbɛɛ kɔɔ ni sɔ, a yɛ fɔɛ ɔ.

⁴⁰A mu min na, Fa Yataa toen mu min na, an nɛ. Mɔ ɔ mɔ min mbe dɔn‑da a ma, mbɛ Yataa 'a denɛ mu n na, mbɛ a‑a a kai fa n na, n ni a ma, a ni kuɔ fɔ fɔɛ ma sɔn. A sin, n mbe an kɔɔ sɔ‑a wan, a ka saya ɔ tee dankama ma.”

⁴¹Mbɛ mɔɛ[22] chɛ n bun‑da gbonyɛ‑a an nyɔn tɛ ɔ, a si a ma. An dɔ, fen mu ɛ a fɔ, a ɔ, a wan mu daun fenɛ chɛ a, Yataa na‑a min na yii a ka banda bu ɔ.

⁴²Chɛ‑a a ma wan, an dɔ, “Mɔna chɛ an nɛ, Chisɔsi, Chosɛfi 'a den chɛ. An ma chɛ a? Mmɔ‑a a fa sɔn fan, an fea a de a. Ɛ ma ka ma gbɛ, a ni a fɔ to mmɔ ye, mbɛ a ka‑a banda bu ɔ wan, a yii‑a nɛ?”

⁴³Mbɛ Chisɔsi ɔ, “Wo sɛmbɛ wo kunɛ ma tɔɔ koe a.

⁴⁴Mɔ ɔ mɔ ee che na‑a n tena, mɔɔ ni Fa‑a a ma, a na‑a n tena. A sin, n mbe a ma‑a wan, a ni a kɔɔ sɔ saya ɔ tee dankama ma.

⁴⁵Yataa 'a gbonka chɛ mɔ dɔndɔ‑a a nyɛn fan a 'a gboo ɔ, a ɔ, ‘Yataa ɛ mɔ ɔ mɔ kan‑da wan.’ A sin, mɔ ɔ mɔ min mbe a too ma sɔ‑a Fa kuiɛ ma, a ni a 'a kanɛ sɔn, a mɔɛ chɛ ɛ na wan n tena.

⁴⁶Chɛ ma a ɔ yian ni, mbɛ mɔ ɔ mɔ ɛ wan nɔ, min‑na Fa Yataa yen bɛ, mɔɔ dechee mɔɛ chɛ, min ka‑a a tena, a dechee, an‑na a yen bɛ.

⁴⁷N mbe chɛ ma din tena wo tena, mbɛ mɔɛ min mbe a kai fa‑a n na, an mbe kuɔ fɔ fɔɛ ma sɔn‑da.

⁴⁸N fan mu daun fen chɛ a, fɔɛ be koe a.

⁴⁹Wo bemba n ta bemba nu, an‑na daun fen chɛ, an ni min chee, an dɔ, mana, an‑na a daun bɛɛ boo ɔ boo fuinɛ ma, an fa‑a wan chɛ gbakɔ.

⁵⁰Chɛɛ daun fen chɛ yen ko, min ka‑a banda bu ɔ, a ee ka, ni mɔ‑a a daun. A tana, ɛ a ma wan, mɔɛ ni kuɔ fɔ fɔɛ ma sɔn.

⁵¹N fan mu fɔɛ be daun fen chɛ a, min yii‑a a ka banda bu ɔ. Ni mɔ ɔ mɔ‑a daun fen chɛ daun, ɛ kuɔ fɔ fɔɛ ma sɔn‑da wan. N mbe daun fen chɛ min sin be‑a a ma, a mu n gboo an na. N mbe a be‑a wan, fɔɛ ko a dunya ɔ.”

⁵²Chɛ ko a, mbɛ mɔɛ[23] chɛ n bun‑da kɔɔsa bia wa chɛ‑a an nyɔn tɛ ɔ, an dɔ, “Mɔna chɛ ɛ kun ka ma, a ni a gboo be koe fɔ mmɔ ma, a daun koe a?”

⁵³Mbɛ Chisɔsi ɔ, “Ka n mbe a ma din to wo tena, mbɛ mɔɔ ni wo‑a n gboo daun, n fan Mɔ Gbu 'a Denɛ, wo ni n wii min, wo e na to ma‑a fɔɛ ɔ.

⁵⁴Chɛɛ mɔ ɔ mɔ min mbe n gboo daun‑da, mbɛ a‑a n wii min, kuɔ fɔ fɔɛ an mbe a ko a. A sin, n mbe a kɔɔ sɔ‑a wan saya ɔ, a yɛ to fɔɛ ɔ, tee dankama ma.

⁵⁵Koe min na mu, n gboo an mu daun fenɛ chɛndɛ chɛndɛ a, n wii wɛɛ mu min fenɛ chɛndɛ chɛndɛ a.

⁵⁶Mɔ ɔ mɔ min mbe n gboo daun‑da, a ni n wii min, nn fea a mɔɛ chɛ a, nn mbe ma‑a wan mɔ dɔndɔɛ a.

⁵⁷Fa min mbe fɔɛ be, an‑na n sɔ dunya chɛ ɔ, a sin fan‑na a ma to, n mbe fɔɛ ɔ. A chia dɔndɔ gbe chɛ a, mɔ ɔ mɔ min mbe n gboo daun‑da, n bɛɛ, n mbe a ma‑a ka wan, an ni ma fɔɛ ɔ.

⁵⁸Chɛ an‑na a fɔ, daun fen chɛ an yii‑a, a ka banda bu ɔ. Wo bemba n ta bemba n‑na daun fen chɛ daun fan, an ni min chee, an dɔ, mana, chɛɛ an fa‑a wan a gbakɔ. Chɛɛ chɛ tana, a ee ka. Mɔ ɔ mɔ min mbe daun fen chɛ daun‑da, ɛ a ma‑a wan, a ni kuɔ fɔ fɔɛ ma sɔn.”

⁵⁹Chisɔsi na‑a chɛ fɔ tima min na, a ni kan chɛ tena Kapanaun duu ɔ wan, Chu n 'na samun chɛ chenɛ a.

⁶⁰Chisɔsi fɛ denɛ n sɛsɛ, an fandi gbu na‑a a fɔ wan, an dɔ, “Kan chɛ nɛnɛ kɔ gbɛ. Nyɔn mbe che a too ma sɔ‑a chɛ ma?”

⁶¹Mɔ ɔ mɔ nii ma a fɔ ni a ye, chɛɛ Chisɔsi na‑a a ɔ sɔn fan, mbɛ an ni gbonyɛ tena a 'a kan chɛ an na. Chɛ ko a, a‑a a fɔ an ma, a ɔ, “Chɛ‑a a kun gbɛ, wo yiima mun koe a, ae?”

⁶²Mbɛ a ɔ, “Chɛ ɛ wo faa mun‑da wan gbɛ yama yama. Ni wo‑a a ya gbɛ, mbɛ wo‑a n yen, n fan Mɔ Gbu 'a Denɛ, n mbe sɛ‑a to kaina chɛ, n ka‑a kaina min.

⁶³Yataa Nyina, an mbe fɔɛ be, chɛɛ mɔ gbu ta gbasaya ma fen kɔ fen na ɛnden bɛɛ a. N‑na bai miin fɔ ka wo ye, an fan mbe na Yataa Nyina a, min mbe fɔɛ be.

⁶⁴Chɛɛ wo dɔ n ban‑da wo kai fa koe a n na.” Chisɔsi na‑a chɛ fɔ, koe min na mu, a na‑a a ɔ sɔn fan, a ka a fɛ denɛ n chee tima ma, an fɛn mbe ee na‑a an kai fa‑a a a. A yɛ to, an tɛ ɔ, min bɛɛ ɛ na‑a a ma tachɛ‑a, a chɛɛ ma nyɔɛ n ma.

⁶⁵Mbɛ a yɛ‑a to, a ɔ, “Kun chɛ gbu ko a mu, n‑na a fɔ wo ye, n dɔ, mɔ ɔ mɔ ee che na‑a n tena, mɔɔ ni Fa Yataa‑a gbasaya be a ma, a mɔɛ chɛ ma koe a n fɛ denɛ a.”

⁶⁶A ka gbɛ a tima chɛ ma, Chisɔsi fɛ denɛ n sɛsɛ yiima mun‑da, an ka‑a a fɛ.

⁶⁷Chɛ ko a, Chisɔsi‑a a fɛ den tan kun ma fea n dɔ tisa, a ɔ, “Wo wɛɛ to, wo e to‑a wan, wo ni ka n fɛ?”

⁶⁸Mbɛ Saimɔn Pita ɔ, “Mansa, nn mbe ta‑a gbɛ nyɔn tena? A yen ko, i da a bai, an mbe a ma kɛn, mɔ gbu ni kuɔ fɔ fɔɛ ma sɔn.

⁶⁹A sin yen ko gbɛ, nn‑na a ɔ sɔn, a sin, nn dan‑da a a, mbɛ i wan mu mɔɛ a tenchen Yataa 'a wai chɛ koe a, a‑a min sɔ.”

⁷⁰Chisɔsi ɔ, “N fan‑na n boo sɔ wo mɔ tan kun ma fea n chɛ n ma, ma koe a n fɛ, a ee ka wan? Chɛɛ Sitana faa an mbe wo dɔndɔ bu ɔ.”

⁷¹A da a bai chɛ sien ni ka Chudasi an ma, kai Saimɔn Isikayɔti 'a denɛ. Koe min na mu, Chudasi ni wɛɛ boo ɔ boo Chisɔsi fɛ den tan kun ma fea chɛ n dɔndɔ a, chɛɛ a wan ni danka tena Chisɔsi ma tachɛ‑a, chɛɛ ma nyɔɛ n ma.