Read Kono CHƆN 8 Bible Online

CHƆN 8 - Kono bible

CHƆN 8

¹Chɛɛ Chisɔsi tana, bɛn chɛ fasandenɛ gbakɔ, a sɛ‑a kɔnkɔɛ chɛ an dɔ, an ni min chee, an dɔ, Wodifi kɔnkɔɛ.

²Banda ka dɔndɔɛ ma, sayi ma, mbɛ a yɛ‑a to Yataa 'a kata chɛ ɔ. Mbɛ mɔɛ n gbɛɛ na‑a a 'a tindanɛ. A sin, a si‑a wan, mbɛ a bun‑da an kan‑da.

³Chu n 'na sawa kan mɔɛ nu, an bɛ Fayisii mɔɛ dɔ n na, an don‑da wan musu dɔndɔ a. An na‑a a bia, an dɔ, a‑a waa ma basan mɔ kaima a, min ma a fuu kai a. Mbɛ an‑na a ma, a sɔ‑a den, mɔɛ gbɛɛ ya kɔɔ.

⁴Mbɛ an dɔ, “Ticha, musu chɛ, nn‑na a bia tɔgbaa, ɛ waa ma basan‑da, an fea kai a, min ma a fuu kai a.

⁵Mmɔ 'a sawa n dɔ, Mosisi na‑a a fɔ wan, mbɛ musu bonda chɛ, mmɔ ɛ a bon fan senɛ a, a ni fa. Mmɔ ɛ fen ma gbɛ a a, sanche?”

⁶An‑na chɛ fɔ, min mbe a ma, an ni Chisɔsi bia a chen kɔ, a da a bai ɔ, mbɛ an‑na kun yama si a kun ma. Chɛɛ a‑a a kunɛ a bun fan, a bun‑da nyɛnɛ sa‑a gbangbanɛ ɔ, a boo denɛ a.

⁷An to‑a a ɔ tisa chɛ an na tun tun, mbɛ a‑a a kɔɔ sɔ. A‑a a tɛ ɔ sawan, mbɛ a ɔ, “A ma yau. Chɛɛ wo gbɛɛ tɛ ɔ, mɔ ɔ mɔ min ma ko yama kan kɔ kan ma nin bɛ, an mɔɛ chɛ, an ni senɛ saa saa bondan musu chɛ a fasa.”

⁸Mbɛ Chisɔsi‑a a ma bun to, mbɛ a bun‑da to nyɛnɛ sa‑a gbangbanɛ chɛ ɔ.

⁹A tima chɛ a gbɛ, mɔɛ chɛ miin gbɛɛ na‑a a da a bai chɛ a min, an bun‑da an fandi kanka‑a dɔndɔ dɔndɔɛ a. Chenanɛ n pɛn tuin‑da, mbɛ a tɔɛ n‑na a sɔ an fɛ. Chisɔsi ma gbaaenɛ to‑a nɔ, an fea an musu chɛ a sɔ ɔ tun.

¹⁰Chisɔsi‑a a kɔɔ sɔ to, a‑a a tɛ ɔ sawan, mbɛ a ɔ, “Bɔɔɛ, i 'a mɔɛ n gbɛɛ ta‑a mende? An dɔndɔ wɛɛ ma bɔ ni nɔ, a ni kaa a tɛ i wakoe ma?”

¹¹Mbɛ a ɔ, “Kai, an dɔndɔ wɛɛ ma a ma ni e.” Mbɛ Chisɔsi ɔ, “N bɛɛ, n fan mbe ee kaa a tɛ‑a, a si i ma. E ka gbɛ ta‑a. Chɛɛ a ka bi ma, i boo bɔ ko yama ma ɔ.”]

¹²Chisɔsi koɔ‑a wan to mɔɛ chɛ n tena, a ɔ, “N fan mu manɛ a dunya chɛ gbɛɛ ko a. Mɔ ɔ mɔ min mbe bea‑a n fɛ, ɛ manɛ ma sɔn‑da wan, min mbe a ma, mɔɛ ni ma fɔɛ ɔ. A yɛ to, a mɔɛ chɛ ee tachɛ‑a kuɔ fɔ ko a pimbi pimbi ɔ.”

¹³Mbɛ Fayisii mɔɛ n dɔ, “Sanche gbɛ, e ka i wandi an na siiya bɔ‑a. E bai miin gbɛɛ fɔ tena, an ma nn kun bia ni.”

¹⁴Chisɔsi ɔ, “A ee ka. Mmɔ a ya, mbɛ n mbe siiya an bɔ tena n fandi ko a. Chɛɛ n mbe bai miin fɔ tena, tea mu. Koe min na mu, n ka‑a kaina min, n‑na nɔ sɔn fan. A sin to, n‑na n ta tena sɔn fan. Chɛɛ wo tana, wo ma an kaina chɛ n dɔndɔ wɛɛ sɔn.

¹⁵Wo tana, wo e kaa a tɛ mɔɛ n bakoe ma mɔgbuya ta fɛ chia an na. Chɛɛ n tana, n mbe ee kaa a tɛ tena mɔ ɔ mɔ wako ma.

¹⁶Chɛɛ ni n‑na a ma wɛɛ ka, n mbe kaa min na tɛ‑a, ɛ ma‑a tea nɛnɛ an na. Koe min na mu, n dɔndɔ gbe an mbe ee na‑a a ma‑a n kun ma gbasaya a. Fa min‑na n sɔ, nn fea an mbe nn kun puin‑da kaina dɔndɔɛ.

¹⁷A nyɛnden fan mu wo 'a sawa gboo ɔ, mbɛ sii fea nu, ni an kuiɛ bɛn‑da kaina dɔndɔ an 'na siiya bɔɛ ɔ, mbɛ an da a kuiɛ mu tea an na.

¹⁸N mu siiya, n fandi ko a. Fa wɛɛ, min‑na n sɔ, a wɛɛ ɛ siiya bɔ tena wan, a si n ma.”

¹⁹Mbɛ an dɔ, “I fa chɛ gbu ɛ mende?” Mbɛ Chisɔsi ɔ, “Wo ma n sɔn buɛ min dɔ, wo ma Fa wɛɛ sɔn ka wan. Ni wo na‑a n sɔn fan, wo ni Fa wɛɛ sɔn‑da wan.”

²⁰Chisɔsi na‑a chɛ gbɛɛ fɔ tima min na, a ni Yataa 'a kata ɔ wan, ɛ mɔɛ n kan‑da. A ni kaina chɛ baima wan, kakaa chɛ n ni ka si ɔ kaina min, an ni boo fenɛ n be ka Yataa ma, kakaa miin dɔ. Mɔ ɔ mɔ nii ma a bia ni nɔ, a mu min na, a bia tima min yianden ni, a nii ma che nin bɛ.

²¹Mbɛ Chisɔsi‑a a fɔ to an ye, a ɔ, “N mbe na tena wan ta‑a, a sin, n yen sɔɛ ɛ wo bia‑a wan, wo ni wo ya a kan n na. Chɛɛ wo e fa‑a ka wan aan, Yataa ee a boo bɔ‑a wo 'a ko yama n dɔ. Wo ee kun‑da wo ni ta kaina chɛ, n mbe ma‑a kaina min.”

²²Mbɛ Chu mɔɛ chɛ n dɔ, “Mɔna chɛ yii e na ma ta‑a a wandi fa koe an dɔ? A yen ko, a ɛ a fɔ‑a, a ɔ, a ɛ ta‑a kaina min, mmɔ ee kun‑da mmɔ ni ta nɔ.”

²³Chisɔsi ɔ, “Wo tana, dunya chɛ nɛ, a ɔ mɔɛ n mu wo a. Chɛɛ n tana, n ka‑a pande wan, banda bu ɔ. Dunya chɛ ɔ mɔɛ mu wo a, chɛɛ a ɔ mɔɛ ma n nan sin na.

²⁴Chɛ an fɛ mu, n‑na a fɔ wo ye, n dɔ, wo e fa‑a ka wan, Yataa ee a boo bɔ‑a wo 'a ko yama n dɔ. Ni wo ma dan ni a a, mbɛ n fan mu mɔɛ chɛ a, n‑na a fɔ, n mu mɔɛ min na. Ni wo ma dan ni chɛ a, wo e fa‑a ka wan, Yataa ee a boo bɔ‑a wo 'a ko yama n dɔ.”

²⁵Mbɛ an dɔ, “Nyɔn gbu sin mu i a?” Mbɛ Chisɔsi ɔ, “N‑na a fɔ wan wo ye a saa saa, n mu mɔɛ min na. N mu mɔɛ chɛ chɛndɛ chɛndɛ an na, n‑na a fɔ wo ye sɛsɛ, n mu mɔɛ min na.

²⁶Bai kɔkoo n yii ma, a si wo ma, a kɔkoo kaa a tɛ koe a wo wakoe ma. Chɛɛ an sin gbu, n fan yiima ko ma an na. Min‑na n sɔ, a wan yii ma koe nu mu, a sin mbe tea an fɔ. Chɛ an‑na a fɔ, ɛ min fɔ n ye dechee, n mbe an na ben mɔ ɔ mɔ tena dunya chɛ ɔ.”

²⁷Chɛɛ an dɔndɔ wɛɛ nii ma a ɔ gbɛ ni, mbɛ Chisɔsi ni koɔ tena a si a Fa Yataa an ma.

²⁸Mbɛ a ɔ an ma, a ɔ, “Tima min na mu, wo e n na sɛ‑a kɔn gbengbandenɛ ma, n fan Mɔ Gbu 'a Denɛ, wo e n sɔn‑da a tima an na. Mbɛ n fan mu mɔɛ chɛ a, n fɛn mbe ka koɔ tena wo tena. Mbɛ wo‑a a ɔ sɔn to, mbɛ n mbe ee ko ɔ ko chɛ n kun ma a a. Chɛɛ Fa ɛ min fɔ n ye, a fɔ koe a, n mbe an fɔ dechee.

²⁹A sin, a wɛn‑na n sɔ, nn fea an mbe nn kun puin kaina dɔndɔɛ, a ee n dɔndɔ gbe boo ka tee dɔndɔ wɛɛ. Koe min na mu, a faa chima koe nu, n mbe an fan ma tima ɔ tima.”

³⁰Mɔ sɛsɛ nu, miin‑na Chisɔsi da a bai chɛ n na min, an‑na an kai fa wan a a.

³¹Mɔɛ chɛ nu,[27] miin dan‑da ka Chisɔsi a, a koɔ‑a an tena, a ɔ, “Ni wo‑a wo too ma sɔ n da a kuiɛ ma, wo e ma‑a n fɛ mɔɛ chɛndɛ chɛndɛ n fan na.

³²Wo e tea ɔ gbɛ‑a wan, a si Yataa ma, a sin fan mbe a ma‑a, wo kunɛ ni bɔ yɔncha ɔ.”

³³Chɛɛ an dɔ, “Nn tana, Ebeami dambi ɔ mɔɛ mu nn na. A sin, kɛn gba, nn ma don nin bɛ mɔ 'a yɔncha kɔɔ. E a fɔ‑a sanche, i ɔ, nn mbe bɔ‑a wan yɔncha ɔ. Fen mbe i yii ma?”

³⁴Chisɔsi ɔ, “Ka n mbe chɛ ma din wo tena, mbɛ mɔ ɔ mɔ min mbe ko yama ma, yɔnɛ mu a mɔɛ chɛ a, a 'a ko yama n boo ɔ.

³⁵Yɔnɛ ee to a yɔn fa 'a suunɛ ɔ kuɔ fɔ ko a. Chɛɛ an suun chɛ ɔ denɛ tana, ɛ to wan a ɔ kuɔ fɔ ko a.

³⁶Chɛ an fɛ mu, ni Yataa 'a denɛ‑a i kun bɔ yɔncha ɔ, mbɛ i kun bɔ‑a a ɔ chɛndɛ chɛ.

³⁷N‑na a ɔ sɔn fan, mbɛ Ebeami cheeya mu wo a. Chɛɛ chɛ gbɛɛ ɔ, wo toen mu wo ni n fa. Koe min na mu, n mbe wo kan tena bai miin na, wo ma to ni, wo ni wo boo si an kɔɔ.

³⁸Fa na‑a koe miin yian n na, n mbe koɔ tena a si an fan ma. Wo sin, wo fa na‑a koe miin fɔ wo ye, wo e an fan ma ka.”

³⁹Mbɛ an dɔ, “Nn bemba n ta bemba, a mu Ebeami an na.” Mbɛ Chisɔsi ɔ, “Ni Ebeami cheeya chɛndɛ chɛndɛ gbu ni wo a, wo chɛ chɛ wai n ni ma‑a ka wan dechee, yɔ a ta ni buɛ min dɔ.

⁴⁰Chɛɛ wo tana, wo ma bɛndenɛ min chɛen mu ka, n fa koe a, Ebeami nii ma a ma ni ka. N sɔnɛ gbɛɛ wɛ wo tena, an nɛ tea bai chɛ n na, miin kaen mu Yataa tena, n mbe miin fɔ.

⁴¹Chɛɛ wo sɔnɛ n mbe wan dechee, yɔ wo fa ta ni buɛ min dɔ.” Mbɛ an dɔ, “I ma chɛ fɔ nn ye. Nn tana, nn fa ɛ dɔndɔ gbe, a sin fan nɛ Yataa a. A 'a denɛ chɛndɛ chɛndɛ mu nn na.”

⁴²Mbɛ Chisɔsi ɔ, “Ni Yataa an ni wo fa a, wo nii too‑a n na. Koe min na mu, n ka‑a Yataa an tena, n na‑a nɛ chɛ. N fandi an ma si ni ka dechee, n ni na n kun ye, n kun ma gbasaya ɔ. Chɛɛ Yataa an‑na n sɔ.

⁴³N‑na a ɔ sɔn fan, koe min‑na a ma, wo ee n da a bai n dɔ gbɛ. Ko dɔ gbɛɛ ma, wo ma to ni, wo ni wo too ma sɔ n da a bai n ma.

⁴⁴Sitana wandi gbu, an mu wo fa a. A sin, wo e bea tena koe chɛ n fan fɛ, wo fa toen mu miin na. Suun gba wɛ, mɔ fa mɔɛ mu a a, a sin tima ee a boo ɔ tea ko a. Koe min na mu, tea ma bɔ nin bɛ a da ɔ tee dɔndɔɛ wɛɛ. Ni a ma‑a fania fɔ‑a tima ɔ tima, ɛ ma ka dɔn‑da a tɔɛ gbu an ma. Koe min na mu, fania fɔ mɔ dechee ma a a, chɛɛ fania fa mu a a.

⁴⁵Chɛɛ n tana, n mbe tea gbu an fɔ, a sin fan fɛ mu, wo ma dan ni n da a bai a.

⁴⁶Wo dɔndɔ wɛɛ ee nɛ, min mbe kun a ɔ yian‑da, mbɛ ko yama ma mɔɛ mu n na. N mbe tea an fɔ, a sin nyin fan wo ni dan n da a kuiɛ a.

⁴⁷Mɔ ɔ mɔ min mu Yataa 'a denɛ a, a bu ɔ di wan tima ɔ tima, a too ma sɔ koe a Yataa bai ma. Chɛɛ wo tana, a 'a denɛ ma wo a, an fɛ mu, wo e ban wo too ma sɔ koe a, a da a bai n ma.”

⁴⁸Mbɛ Chu mɔɛ chɛ n dɔ Chisɔsi ma, an dɔ, “I‑a a ɔ yen gbɛ, mbɛ nn‑na min fɔ, nn teaen fan mu. Nn‑na a fɔ wan, mbɛ Samayia mɔɛ mu i a, a sin, nyina yama an mbe i fɛ.”

⁴⁹Mbɛ Chisɔsi ɔ, “Nyina yama ee n fɛ. N mbe basɔmaya an be Fa ma, chɛɛ wo tana, wo e baa an bɔ n ma.

⁵⁰N mbe ee chia an yan tena, min mbe a ma, mɔɛ n ni baa be n ma. Min mbe chia chɛ yan tena, n ko a, ɛ nɔ. A sin, a wan mbe tea kaa a tɛ.

⁵¹N mbe chɛ ma din tena wo tena, mbɛ mɔ ɔ mɔ min mbe ma‑a a da a kuiɛ ma, a mɔɛ chɛ ee fa‑a.”

⁵²Mbɛ Chu mɔɛ chɛ n dɔ, “Nn‑na a ɔ sɔn gbɛ tea a, mbɛ nyina yama an mbe i fɛ. Ebeami wɛɛ gbu fa‑a wan, mbɛ Yataa 'a gbonka chɛ mɔɛ n bɛɛ fa‑a. Chɛɛ i tana, i ɔ, mɔ ɔ mɔ‑a a boo si kan chɛ kɔɔ, e min chɛ tena, a ee fa‑a kuɔ fɔ ko a.

⁵³Nn bɔ kɔnkɔɛ, Ebeami, a fa‑a wɛɛ, chɛɛ i ma i wandi ya, mbɛ i benden fan mu a ma, ɛnden bɛɛ a. A yɛ to, Yataa 'a gbonka chɛ mɔɛ n bɛɛ fa‑a wan. I‑a i wandi ya fen mɔ a?”

⁵⁴Chisɔsi ɔ, “Ni n gbu, n‑na basɔmaya be n fandi ma, an basɔmaya chɛ nɛnɛ, fen kɔ fen mbe ee a ɔ. Fa dechee, an mbe a ma tena, n mbe basɔmaya ma sɔn tena. Fa min ka, wo e a fɔ tena, wo ɔ, an mu wo 'a Yataa a.

⁵⁵Wo ma a sɔn bɛɛ boo ɔ boo, chɛɛ n tana, n‑na a sɔn fan. Ni n‑na a fɔ, n dɔ, n ma a sɔn, n mbe ma‑a ka fania an fɔ‑a, yɔ wo e fania fɔ tena buɛ min dɔ, a sɔn koe a. Chɛɛ n gbu sin‑na a sɔn fan, a sin, n mbe wan a da a kuiɛ ma.

⁵⁶Wo bɔ kɔnkɔɛ, Ebeami, a bu ɔ ni di wan, a ni tima min na tee chɛ ma kɔn‑da, n na koe a. A na‑a n yen fan, a sin, a bu ɔ dia‑a wan.”

⁵⁷Mbɛ an dɔ, “Chɛɛ i gbu suun sanɛ ni san bi duu bɔ pɛn, e na to Ebeami yen koe fɔ‑a.”

⁵⁸Mbɛ Chisɔsi ɔ, “N mbe chɛ ma din tena wo tena sanche, mbɛ Ebeami e na to ma‑a fɔɛ ɔ, n ni wan gbɛ fɔɛ ɔ.”

⁵⁹Chɛ ko a, mbɛ an‑na senɛ n ya, a bondan koe a Chisɔsi a, an ni a fa. Chɛɛ a bɔ‑a wan an tɛ ɔ, Yataa 'a kata chɛ ɔ, kai wɛɛ, a a ma tɛ ni a ma.