Read Kono CHƆN 9 Bible Online

CHƆN 9 - Kono bible

CHƆN 9

¹Chisɔsi to‑a ta an na, mbɛ a‑a kaminɛ yen, min suun‑da a fiondenɛ ɛ.

²Mbɛ Chisɔsi fɛ denɛ n‑na a ɔ tisa, an dɔ, “Kan mɔ, mɔ ma a ɔ sɔn, mɔɛ min 'na ko yama maenɛ‑a kamin chɛ fion buɛ chɛ ɔ. A e na ma a wandi ta an na ba, kɔ a woo mɔɛ nu?”

³Mbɛ Chisɔsi ɔ, “A 'a fioncha chɛ ma bɔ ni ko fea chɛ dɔndɔ wɛɛ ɔ, a wandi‑a ko yama maenɛ ma, a woo mɔɛ n ta ma. Chɛɛ a suun‑da ka buɛ chɛ ɔ, min mbe a ma, mɔɛ n ni a ɔ yen a ta chɛ kun ma, kamaya koe miin mbe ma, Yataa dɔndɔ gbe gbaa chia a.

⁴Tee ɛ wɛ nɔ tima min na, fɔ ni mmɔ‑a a tun wai chɛ n chɛ koe a, n sɔen mu miin chɛ koe a. Pimbi ɛ bun‑da tima min na, mɔ ɔ mɔ ee che‑a ko ɔ ko ma‑a.

⁵N mbe tima min na dunya chɛ ɔ, n fan mu manɛ a dunya ko a.”

⁶Chisɔsi‑a bai chɛ fɔ kɛn dechee, mbɛ a‑a a da yii fu gbangbanɛ ɔ. Mbɛ a‑a a ɔ ma ma, mbɛ a‑a boobo chɛ sin kamin chɛ ya gbingbii kɔɔ.

⁷Mbɛ a‑a a fɔ kamin chɛ ma, a ɔ, “Ta yii pai chɛ da a, an mbe min chee Sidowan, i ni i ya a ko” (Sidowan chɛ, a fasai an nɛ, an‑na min sɔ). Mbɛ kamin chɛ ta‑a, a‑a a ya chɛ a ko nɔ. Mbɛ a‑a kaina yen kɛn, a yɛ‑a a waa a.

⁸Mbɛ mɔɛ chɛ nu, an bɛ ɛ miin na fɔn dɔndɔɛ ɔ, an basan mɔɛ chɛ n na, miin ni a yen tee si ɔ fen fuinɛ a, a fiondenɛ ɛ, an na fii‑a. An dɔ, “Kou, kamin chɛ an mbe ma nɛ si ɔ fen fuinɛ a, an ya a ka‑a ka. An ma chɛ a?”

⁹An dɔ nu, an dɔ, “An nɛ ka.” Chɛɛ an dɔ nu, an dɔ, “An ma chɛ a o, a bɔen fan mu dechee a a.” Chɛɛ kamin chɛ wandi koɔ‑a, a ɔ, “N fan gbu e nɛ.”

¹⁰Chɛ ko a, an dɔ kamin chɛ ma, an dɔ, “I ma‑a ka ma gbɛ, i‑a kaina yen?”

¹¹Mbɛ a ɔ, “Kamin chɛ min tɔ mu ka Chisɔsi, an‑na a ma ka n baun‑da. A‑a boobo an dɔ fa, mbɛ a‑a a sin n ya gbingbii kɔɔ. A‑a a fɔ n ye, a ɔ, n ni ta n ya a ko yii pai chɛ ɔ, min tɔ mu ka Sidowan. Mbɛ n ta‑a, a sin, n‑na a ma kɛn dechee, n‑na kaina yen.”

¹²Mbɛ mɔɛ chɛ n dɔ, “A gbu ɛ mende?” Mbɛ a ɔ, “N bɛɛ n ma a ɔ sɔn.”

¹³Mbɛ kamin chɛ, min ya a ka‑a ka, mɔɛ chɛ n bɛ ta‑a an na Fayisii n chen kɔɔ.

¹⁴Koe min na mu, Chisɔsi na‑a boobo chɛ sin ka a ya a tee min ma, mbɛ a ya a ka‑a, Chu mɔɛ n 'na suin tee ni.

¹⁵Mbɛ an Fayisii chɛ n bɛɛ, an bun‑da kamin chɛ ɔ tisa‑a to, an dɔ, a ni a ɔ yian an bɛɛ a, a ya a ka‑a buɛ min dɔ. Mbɛ a ɔ, “A‑a boobo an sin n ya gbingbii kɔɔ, mbɛ n‑na n ya a ko yii ɔ. Chɛ an‑na a ma, n mbe kaina yen tena ka gbɛ.”

¹⁶Mbɛ Fayisii chɛ dɔ nu, an dɔ, “Mɔɛ min‑na chɛ ma, suin tee sawa yɔn koe a, an mɔɛ chɛ, Yataa an ma a sɔ ni a ma.” Chɛɛ an dɔ n sin, an dɔ, “Mɔ ɔ mɔ min mu ko yama ma mɔɛ a, a ee kamaya ko bonda chɛ sima ma.” Chɛ‑a a ɔ yian fan, mbɛ an kuiɛ a nii ma kan ni, a si Chisɔsi ma.

¹⁷Mbɛ a danka a, Fayisii chɛ n yɛ‑a to kamin chɛ tena, min ya a ka‑a ka. An dɔ, “A‑a i wan ya a ka. E che fen fɔ‑a, a si a ma?” Mbɛ kamin chɛ ɔ, “N ta yiima ɔ, Yataa 'a gbonka chɛ mɔɛ mu a a.”

¹⁸Chɛɛ chɛ gbɛɛ ɔ, Chu mɔɛ n ya ɔ sɔɛ chɛ nu, an nii ma to ni, an ni dan a a, mbɛ kamin chɛ fionden fan ni tee, chɛɛ a ya a ka‑a gbɛ sanche. Mbɛ an‑na an da a kuiɛ a ben, min mbe a ma, a woo mɔɛ n ni bɔ ya a ma.

¹⁹Mbɛ an‑na a woo mɔɛ n dɔ tisa, an dɔ, “Wo 'a denɛ an nɛ mɔna chɛ a? Wo‑a a fɔ kɛn, mbɛ wo‑a a fiondenɛ an suun, chɛɛ ɛ kaina yen gbɛ sanche. Chɛ ma‑a ka ma a ma‑a?”

²⁰Mbɛ a woo mɔɛ chɛ n dɔ, “Nn 'na denɛ chɛndɛ chɛndɛ an nɛ. A sin gbu, nn‑na a suun, a fiondenɛ ni.

²¹Chɛɛ nn ma a ɔ sɔn, a ma‑a buɛ min dɔ sanche ɛ kaina yen. Nn sin ma a gbu ɔ sɔn to, mɔɛ min‑na a ma, a ya a ka‑a. Musu si kai mu gbɛ a a, wo a ɔ tisa, ɛ che wan a ɔ yian‑da a wandi ko a.”

²²A woo mɔɛ chɛ n na‑a chɛ fɔ, ya ɔ sɔɛ chɛ n ma chianɛ an dɔ. Koe min na mu, a ɔ bɛnden fan ni, mbɛ mɔ ɔ mɔ min mbe a fɔ‑a den, mbɛ Chisɔsi an mu kunka mansa a, a ma nyin a ko a. A mɔɛ chɛ ka‑a mɔɛ tɔɛ n ma fɛsɛ fɛsɛ, na koe a an fan Chu n 'na samun chɛ chenɛ a.

²³Chɛ an‑na a ma, a woo mɔɛ chɛ nu, an dɔ, “Musu si kai mu gbɛ a a, wo a wandi ɔ tisa.”

²⁴Mbɛ an kamin chɛ, min fionden ni ka a kɔma a, an‑na a chee to, a gba fean bɔɛ ko a. Mbɛ an dɔ, “Yataa ɛ i yen tena wan i sɔ gba chɛ ɔ, tea fɔ wɛɛ nn ye, a tɔɛ ko a. Nn danden fan mu a a, mbɛ kamin chɛ, mbɛ ko yama ma mɔɛ mu a a.”

²⁵Mbɛ a ɔ, “A ni ma ko yama ma mɔ a, a ma ma a a, n mbe ee kun n ni a ɔ sɔn. N‑na koe min dɔ sɔn dechee, an nɛ chɛ a. N fionden fan ni tee, chɛɛ n mbe kaina yen fan gbɛ.”

²⁶Mbɛ an yɛ‑a to, an dɔ, “A na‑a fen ma i a, i baun koe a fioncha chɛ ɔ?”

²⁷Mbɛ kamin chɛ ɔ, “N ban‑da a ɔ yian‑da wo a, chɛɛ wo ma to ni, wo ni wo too ma sɔ a ma. Wo e n sɔ‑a to yɛ‑a n da a kuiɛ ɔ. Fen mu? N mbe ee che dan‑da a a, mbɛ wo wɛɛ, wo toen mu wo ni ma a fɛ mɔɛ n na.”

²⁸Mbɛ an‑na a main, an yɛ‑a to, an dɔ, “I wan mu mɔna chɛ fɛ mɔɛ a, chɛɛ nn tana, Mosisi fɛ mɔɛ mu nn na.

²⁹Nn‑na a ɔ sɔn fan, mbɛ Yataa wandi gbu, an na‑a koɔ Mosisi tena. Chɛɛ mɔna chɛ tana, Chisɔsi chɛ, nn gbu ma a ka tena wɛɛ gbu an sɔn.”

³⁰Mbɛ kamin chɛ ɔ, “N ma kamaya koe chɛ sima ɔ yen nin bɛ. Wo ma kamin chɛ ka tena sɔn, chɛɛ a yen ko, a‑a a ma, n‑na kaina yen.

³¹Mmɔ‑a a ɔ sɔn fan, mbɛ Yataa ee mɔɛ n 'na samunɛ a min, miin mbe ko yama ma. Chɛɛ ɛ mɔɛ chɛ n 'na samunɛ a min fan, miin mbe a tɔɛ fai, an mbe a faa ma koe n ma.

³²A ka dunya a dan tima ma, aan sanche, mɔ ɔ mɔ ma a a min nin bɛ, mbɛ mɔ ɔ mɔ‑a a ma wan, mɔɛ‑a kaina yen, min suun‑da a fiondenɛ ɛ.

³³Ni kamin chɛ nii ma ka ni Yataa tena wan, a nii kun‑da a ni n ya chɛ a ka.”

³⁴Chɛɛ ya ɔ sɔɛ chɛ n dɔ, “I wan, i suun‑da ko yama an dɔ. E ee kun i ni nn kan fen kɔ fen na.” Mbɛ an‑na a gbain nɔ fɛsɛ fɛsɛ, an 'na samun chɛ chen chɛ a.

³⁵Mbɛ Chisɔsi‑a a a min kɛn, koe min ma‑a, a‑a a ya a kan kamin chɛ a, an‑na min gbain ka. A‑a a yen kɛn, a ɔ, “I danden fan mu Mɔ Gbu 'a Denɛ a?”

³⁶Mbɛ kamin chɛ ɔ, “Kai, a wakoe ɔ yian bɛ n na, min mbe a ma, n ni n kai fa a a.”

³⁷Mbɛ Chisɔsi ɔ, “Chɛɛ i ban‑da gbɛ a yen‑da. A sin, n fan gbu mu a a, n fɛn mbe ka koɔ‑a i tena.”

³⁸Mbɛ kamin chɛ ɔ gbɛ, a ɔ, “Mansa, n‑na n kai fa i a.” Mbɛ a‑a a kumbai gbangban Chisɔsi chen kɔɔ, a‑a a fai.

³⁹Mbɛ Chisɔsi ɔ, “N na‑a dunya chɛ ɔ, n ni mɔɛ n 'na ko yama n na bɔ ya a ma. Min mbe a ma, mɔɛ miin fiondenɛ ɛ, an ya ni kaina yen. Miin sin, an ya ɛ kaina yen, an ni ma fion tɔɛ n na.”

⁴⁰A ni chɛ fɔ tena tima min na, Fayisii chɛ n dɔ n ni wan nɔ. Mbɛ an dɔ, “I ɔ fen? Nn ma dan ni a a, mbɛ i toen mu i ni a fɔ, mbɛ nn bɛɛ, nn fionden fan mu.”

⁴¹Mbɛ Chisɔsi ɔ, “Ni fion tɔɛ ni wo a, Yataa ni a ya ka‑a wan wo 'a ko yama n na. Chɛɛ wo e a fɔɛ min chɛ, wo ɔ, fion tɔ ma wo a, an fɛ mu, a ee a ya ka‑a wo 'a ko yama n na.”