Read Kono CHISƆSI 'A SƆ MƆƐ NU 1 Bible Online

CHISƆSI 'A SƆ MƆƐ NU 1 - Kono bible

CHISƆSI 'A SƆ MƆƐ NU 1

¹Kai Tɛyɔfidɔsi, N‑na a nyɛn fan n 'na gboo saa saa ɔ, Chisɔsi‑a miin gbɛɛ ma, ni a na‑a kanɛ min gbɛɛ chɛ. A ka a 'a wai kuu sɔɛ tee saa ma,

²aan a sɔ tee chɛ a, Yataa‑a a wan Chisɔsi ya min ma, a sɛ banda bu ɔ. A e na to ya‑a, a sɛ banda bu ɔ, a 'a sɔ mɔɛ nu, a na‑a a boo sɔ miin ma, a koɔ‑a pɛn an tena, Yataa Nyina 'a gbasaya ɔ.

³A ka Chisɔsi fa tee ma, aan tee bi naanin tɛ, chia sɛsɛ a, a‑a a wandi yian fan a 'a sɔ mɔɛ chɛ n na, tima sɛsɛ ko a. Chɛ ni a ma, an ni dan a a, mbɛ a ɛ wan to fɔɛ ɔ. A‑a a ma wan, mbɛ an‑na a ma gbɛ gbadan, a sin to, an‑na chia ɔ bɔɛ chɛ wan, a si Yataa 'a mansaya ma.

⁴An bɛ ni wan tima dɔndɔ a daun chɛ tena, mbɛ a‑a dasi be an ma, a ɔ, “Wo ma bɔ Chuusaɛn duu ɔ, chɛɛ wo fen chɛ ma kɔn, Fa Yataa‑a wo too ɔ dia min be koe a wo ma. N na‑a a wakoe ɔ yian fan wo a,

⁵mbɛ Chɔn ni yii an chɛ wo kunɛ ɔ, Yataa chia a. Chɛɛ tee kuunden tɛ ɔ, Yataa ɛ a ma‑a wan, a Nyina ni bea wo fɛ.”

⁶Mbɛ an na kan‑da kɛn kaina dɔndɔɛ, an‑na Chisɔsi ɔ tisa, an dɔ te, “Mansa, tima gbu an che‑a ka gbɛ i boo ɔ, Isɔɛɛ mɔɛ n 'na mansaya a yɛ koe a to an ma?”

⁷Mbɛ Chisɔsi ɔ te, “Fa Yataa dɔndɔ gbe an mbe kun a ni a ɔ bɛn, ni an koe chɛ n mbe ma tima miin na. A sin, wo ta ɔ ma chɛ a, a ɔ sɔn koe a, ni an mbe ma tena tima miin na.

⁸Chɛɛ wo e gbasaya ma sɔn‑da wan, ni Yataa Nyina chɛ bea‑a wo fɛ. A tima chɛ a, wo e a ɔ yian‑da wan mɔɛ n na, wo‑a min dɔ sɔn, a si n ma. Wo e a ɔ yian‑da wan mɔɛ n na Chuusaɛn duu ɔ, wo ni a ɔ yian Chudia chɛnyɛ tɔɛ gbu gbɛɛ ɔ, ni Samayia chɛnyɛ ɔ, a che kan kɔ kan dunya gbɛɛ ɔ.”

⁹Chɛ fɔenɛ gbakɔ, a 'a sɔ mɔɛ n ya to‑a wan a a, aan a ya‑a a sɛ banda bu ɔ. Mbɛ a don‑da dingbii ɔ, a tuin‑da an ya a.

¹⁰An ya a sien fan ni tun banda chɛ a, a taen chɛ gbakɔ. Mbɛ a yen ko, mɔ kaima fea n mbe sɔ ɔ an baima, an ma chiienɛ ɛ doma gbɛ wa ɔ.

¹¹Mbɛ mɔ fea chɛ n dɔ, “Kadidi mɔɛ nu, fen mu wo e sɔ ɔ banda a fɛn‑da tidan? Chisɔsi chɛ, Yataa sɛ‑a ka min na banda bu ɔ, ɛ na‑a wan to mɔya chɛ ɔ, yɔ wo‑a a yen ka buɛ min dɔ sɛ‑a banda bu ɔ.”

¹²Chisɔsi 'a sɔ mɔɛ chɛ n ni Wodifi kɔnkɔɛ ɔ wan, min nii ma che ni mai dɔndɔ tachɛ[1] ɔ a ta Chuusaɛn duu wa chɛ ɔ. Mbɛ an yɛ‑a Chuusaɛn gbu.

¹³Mbɛ an don‑da kɛn duu gbu bu ɔ, an na sɔn‑da wan banda a chen dɔndɔ dumu ɔ, an yia ni min na nɔ banda a. Pita ni wan nɔ, an fea Chɔn na, ni Chimisi an fea Anduu a. Fiipi wɛɛ, an fea Tɔmɔsi a, ni Batɔɔmiu an fea Matiu a. A yɛ to, Chimisi dɔndɔɛ wɛɛ, kai Afiɔsi 'a denɛ ni wan nɔ, ni Saimɔn min ni a 'a chɛnyɛ ma chɛɛ chɛ tena, ni Chudasi dɔndɔɛ wɛɛ, kai Chimisi 'a denɛ.

¹⁴An gbɛɛ ni wan kuiɛ dɔndɔya ɔ, samunɛ chɛ koe a tima ɔ tima ko a. An bɛ an ni ma musu chɛ n na, miin na‑a ta Chisɔsi san‑da. Chisɔsi de Mɛi wɛɛ, a ni ma wan nɔ, ni Chisɔsi suun ma nyɔɛ kaima nu.

¹⁵Tee kuunden gbakɔ, mɔɛ miin‑na an kai fa Chisɔsi Chasi a, an bɛn‑da wan kaina dɔndɔ. An danɛ taen fan ni mɔ chɛmɛ dɔndɔ, ni mɔ bi fea ɔ. Mbɛ Pita‑a a kɔɔ sɔ, koɔ koe a an tena.

¹⁶Mbɛ a‑a a fɔ, a ɔ, “N suun ma nyɔɛ nu Chasi ɔ, Yataa 'a gboo‑a min fɔ, a ni che wan a ni bɔ a a. Suun, Yataa Nyina‑a a ma wan, Mansa Defidi‑a koe chɛ kɔɔ fɔ, a si Chudasi ma, min ni na tena ma‑a. Chudasi chɛ ni mmɔ bɔɛ an na. Koe min na mu, Chisɔsi na‑a a boo sɔ wan a ma, wai chɛ chɛ koe a, mmɔ ɛ ka min na. A wan sɔ‑a mɔɛ n ya ɔ, miin ta‑a Chisɔsi bia.

¹⁸“Chudasi‑a Chisɔsi ma tachɛ kɛn dechee, a‑a an kɔpɔɛ an ya, a 'a ko yama ma kɔpɔɛ chɛ, mbɛ a‑a nangbanɛ san a a. Chɛɛ a bea‑a wan duu ma an nangban chɛ ɔ, mbɛ a bu te‑a pu, a nunɛ gbɛɛ bɔ‑a ya a ma.

¹⁹Mmɔ wɛn gbɛɛ sin ni nɛ Chuusaɛn, mmɔ‑a an koe chɛ a min fan. Chɛ an‑na a ma, an‑na an nangban chɛ chee, an dɔ, wii bɔn‑da nangbanɛ min dɔ.”[2]

²⁰Mbɛ Pita‑a a fɔ to, a ɔ, “Koe min na mu, a nyɛnden fan mu gboo chɛ ɔ, Yataa tando si gboo chɛ, mbɛ, ‘A 'a chenɛ n ni te, mɔ ɔ mɔ ma ma nɔ.’ A sin to, a ɔ, ‘A ni min chɛ tee, mɔ dɔ mende ni a chɛ.’

²¹“Chɛ an fɛ mu, ɛ nyan fan mmɔ ni mɔ dɔndɔ sa mmɔ kaa a, min mbe ma sii a, mbɛ tea mu Chisɔsi kɔɔ sɔ koe a, a ka saya ɔ. A mɔɛ chɛ ɛ ma mɔɛ an na, mmɔ bɛ ni tee min na tima gbɛɛ a, mmɔ bɛ ben ben‑da min kɔɔ Mansa Chisɔsi a. A ka tima chɛ ma, Chɔn na‑a yii chɛ tima min na Chisɔsi kunɛ ɔ, Yataa chia a. Aan a che tee chɛ ma, Chisɔsi ya‑a tee min na mmɔ tɛ ɔ, a sɛ banda bu ɔ.”

²³Mbɛ mɔɛ chɛ n‑na mɔ fea yian, an tɛ ɔ. An‑na Chosɛfi yian, an ni min chee, an dɔ Basabasi, (a tɔ ni to Chɔsitɔsi), ni mɔɛ dɔndɔɛ, Matiyasi.

²⁴Mbɛ an‑na samunɛ chɛ, an dɔ te, “Mansa Yataa, i wan‑na mɔ gbu gbɛɛ yii ma koe ɔ sɔn. Chɛ ko a, Fa, mɔ fea chɛ n tɛ ɔ, a ɔ yian nn na, ni i‑a i boo sɔ min ma,

²⁵i 'a sɔ mɔya wai chɛ chɛ koe a. Chudasi‑a a to gbɛ, ta koe a pan, a bɛnden mu kaina.”

²⁶Mbɛ an‑na chɛ fenɛ chɛ, min mbe a ma, an ni a ɔ sɔn, ni an mbe nyɔn ya an mɔ fea chɛ tɛ ɔ. Matiyasi tɔɛ an bɛn‑da chɛ fenɛ ma, a sin sa‑a wan Chisɔsi 'a sɔ mɔ tan kun ma dɔndɔɛ chɛ n kaa a.