Read Kono CHISƆSI 'A SƆ MƆƐ NU 10 Bible Online

CHISƆSI 'A SƆ MƆƐ NU 10 - Kono bible

CHISƆSI 'A SƆ MƆƐ NU 10

¹Kamin dɔndɔ ni wan nɔ Sisayea duu ɔ, min tɔ ni Kɔniyɔsi. A ni soya gbakoo dɔndɔ an na, Domi soya chɛmɛ dɔndɔ kun ma. Chɛ ni kaka dɔndɔ an na, soya chɛ n tɛ ɔ, an ni miin chee, an dɔ, Itadi mɔɛ n 'na soya nu.

²An kamin chɛ ni mɔɛ an na, min ni kooya be Yataa ma. A ni Yataa fai wan tima ɔ tima ko a, an bɛ a 'a chen 'na mɔɛ n gbɛɛ a. A boo fenɛ nii ma dɔɔ, a ni min be, basan koe a yɔn tɔɛ n ma. A gboo ɔ nii fa, samunɛ chɛ koe a.

³Tee kɔ kai ma ni, tee dɔndɔ a, mbɛ Kɔniyɔsi‑a koe ɔ yen, yɔ a ni cho ɔ wan. A‑a maeka yen fan pɛnɛnɛ a wandi ya a, a na‑a a tena, mbɛ a‑a a fɔ a ye, a ɔ, “Kɔniyɔsi!”

⁴A‑a maeka chɛ ma fɛn fan tidan, a chianden ba ɛ. Mbɛ a‑a a ɔ tisa, a ɔ, “Mansa, fen mu?” Mbɛ maeka chɛ ɔ, “Yataa‑a i 'a samunɛ n na min. A‑a a ɔ yen, e boo fenɛ miin be tena yɔn tɔɛ n ma. A sin, a ma bɛnden mu, a ni i 'a samunɛ a bia.

⁵A sin, sanche gbɛ, mɔɛ n na ta Chɔpa duu ɔ, kamin dɔndɔ chee koe a, min tɔ mu Saimɔn. A tɔɛ dɔndɔɛ an nɛ, Pita.

⁶Ɛ kamin dɔndɔ an 'na sondaya a, min tɔ mu Saimɔn. Kanche mu an kamin chɛ a, a sin, a 'a chenɛ ɛ kɔ yii kaa a wan.”

⁷Mbɛ maeka chɛ ban‑da kɛn koɔ‑a Kɔniyɔsi tena, a ta‑a gbae. Mbɛ Kɔniyɔsi‑a bɔi den fea n ya, miin ni wai chɛ tena a kɔɔ a 'a chenɛ a, ni soya mɔ dɔndɔ. An soya mɔɛ chɛ wɛɛ, a Yataa koen ni kaka, a sin fan ni Kɔniyɔsi fɛ basan koe a a ma.

⁸A‑a a ɔ yian fan an na, maeka chɛ na‑a bai min fɔ a ye, mbɛ a‑a an na ta Chɔpa duu ɔ.

⁹Mbɛ banda ɔ ka‑a kɛn, Kɔniyɔsi‑a mɔɛ miin sɔ ka, an che‑a wan Chɔpa baima, tee kun tɛ. Pita wɛɛ sɛ‑a wan chen chɛ kun tɛ, [12] a tima chɛ a, min mbe a ma, a ni samunɛ chɛ.

¹⁰Kɔnkɔɛ‑a Pita bia wan, daun fen daun sɔɛ ɛ a a. An ni daun fen nyan tena wan a ye, mbɛ a‑a koe ɔ yen, yɔ a ni cho ɔ wan.

¹¹A‑a banda bu ɔ yen fan a a ka‑a, mbɛ a‑a fenɛ yen yii‑a dunya ɔ, yɔ koa wa, a biaenɛ ɛ a tɔnkɔn naaninɛ ma.

¹²An koa chɛ ɔ, soe kan kɔ kan ni wan a ɔ, ni ka kan kɔ kan, a basan konde kan kɔ kan na.

¹³Mbɛ a‑a mɔɛ kuiɛ a min, a‑a a fɔ a ye, a ɔ, “Pita, i kɔɔ sɔ, i ni min kɔ min fa, i ni a daun.”

¹⁴Chɛɛ Pita‑a a fɔ wan, a ɔ, “Mansa, a ma ma ka. N ma fen kɔ fen daun nin bɛ, nn 'na Chu sawa ɛ min ma bɔ, mbɛ a ma nyamuien fan mu Yataa tena nn ko a, nn ni a daun.”

¹⁵Mbɛ mɔɛ chɛ kuiɛ chɛ‑a a fɔ to a ye, a ɔ, “Yataa ɛ a fɔ fenɛ min ma, a nyin, i ma a fɔ, mbɛ a ma nyamuienɛ mu.”

¹⁶Kuiɛ chɛ‑a bai chɛ fɔ si tena sawa, mbɛ a ya kɔɔɛ a, koa chɛ tuin‑da, a yɛ banda bu ɔ.

¹⁷Pita ni tun a yii na chii tena koe chɛ an ma, a‑a min dɔ yen ka, yɔ a ni cho ɔ wan. A toen ni a ni a ɔ sɔn, ni a sien mu fen ma. Mbɛ Kɔniyɔsi na‑a mɔɛ miin sɔ ka, an‑na a ɔ sɔn fan, a wan Saimɔn 'na chenɛ ni kaina min. An gbu sin ni gbɛ sɔ ɔ wan baa ma, an chen chɛ kata chɛ da a.

¹⁸Mbɛ an‑na chee chɛ, an dɔ, “Mɔ ɔ mɔ ɛ wan nɛ sondaya a, min tɔ mu Saimɔn Pita?”

¹⁹Pita ni tun yiinachii an dɔ, a tima chɛ a, an koe chɛ ɔ gbɛ koe a, min mbe ka yɔ cho. Yataa Nyina‑a a fɔ a ye, a ɔ, “A yen ko, mɔ kaima sawa n na‑a, an mbe an ya a kan‑da i a.

²⁰I kɔɔ sɔ, i ni yii, i ni an tan, mbɛ wo bɛ ta‑a an na. I ma sika, koe min na mu, n fan‑na an sɔ i tena.”

²¹Mbɛ Pita‑a a kɔɔ sɔ, a yii‑a an tena, mbɛ a‑a a fɔ mɔ sawa chɛ n ye, a ɔ, “Wo e ka wo ya a kan tena n fan na. Fen mu wo na‑a?”

²²Mbɛ an dɔ, “Kaminɛ min mbe soya chɛmɛ dɔndɔɛ chɛ n ya ɔ, an‑na nn sɔ. A tɔ mu Kɔniyɔsi. A ɛ kooya be wan Yataa ma, a sin tanden mu. A sin to, Chu mɔɛ n gbɛɛ‑a basɔmaya be wan a ma. Maeka an bɔ‑a Kɔniyɔsi chɛ ya a, mbɛ a‑a a fɔ a ye, a ɔ, a ni i chee a 'a chenɛ a. A ɔ, a ni i da a bai a min, e min fɔ‑a.”

²³Mbɛ Pita‑a kamin chɛ n chee a 'a chenɛ a, an yɛɛ chɛ ma, an ma‑a sonda n na a tena. A banda ɔ ka ma, an ta‑a wan, an bɛ mɔɛ chɛ n na. A sin, suun ma nyɔɛ chɛ dɔ nu Chasi ɔ, a ka Chɔpa duu ɔ, an bɛɛ‑a a sɔ wan an fɛ.

²⁴An che‑a wan Sisayea duu ɔ, tee dɔndɔɛ ma. Kɔniyɔsi ni wan a ma kɔn tena kaina. A sin na‑a a suun ma nyɔɛ n gbɛɛ a sɔn sɔn fan, an bɛ a dia nyɔɛ n na.

²⁵Pita‑a a kunɛ a don kɛn chen chɛ a, Kɔniyɔsi bea‑a wan a chen kɔɔ, a bun‑da a fai‑a.

²⁶Chɛɛ Pita‑a a ma wan, Kɔniyɔsi‑a a kɔɔ sɔ, a ɔ, “I kɔɔ sɔ, i ni sɔ. N bɛɛ mu dechee mɔ gbu an na.”

²⁷Pita to‑a wan koɔ‑a Kɔniyɔsi tena, aan an don‑da chen chɛ a, a‑a mɔ sɛsɛ n na sɔndenɛ tan kaina.

²⁸Mbɛ a‑a a fɔ an ye, a ɔ, “Wo wandi gbu, wo‑a a ɔ sɔn fan, mbɛ nn 'na Chu sawa‑a min fɔ. Mbɛ nn fan Chu mɔ kan kɔ kan, nn mbe ee ta mɔ ɔ mɔ dɔ gbɛɛ 'a chen na. Chɛ ma, nn ni gbɛn an ma, miin ma Chu mɔ a. Chɛɛ Yataa ban‑da a ɔ yian‑da n na, mbɛ n ma tɛ mɔ gbu kan kɔ kan dɔ, n gbu ma mɔ ma nyamui koe fɔ.

²⁹Chɛ an fɛ mu, i‑a mɔɛ n na ta kɛn n chee‑a, n ma n kun dɔ nyan ni, na koe a. A ɔ yian gbɛ n na, i‑a n chee fen ko a?”

³⁰Mbɛ Kɔniyɔsi ɔ, “Bi an‑na a ma gbɛ tee naanin, koe chɛ ma‑a. N ni wan samun chɛ‑a, tee kɔ kai ma, nɛ n 'na chenɛ a. Mbɛ a yen ko, n‑na mɔ kaima yen sɔ ɔ, a ma koa ɛ man‑da taun.

³¹Mbɛ a‑a a fɔ, a ɔ, ‘Kɔniyɔsi, Yataa‑a i 'a samunɛ a min. A sin, a‑a a ɔ yen, e boo fenɛ miin be yɔn tɔɛ n ma.

³²Chɛ an fɛ mu, mɔɛ a ta Chɔpa, kamin dɔndɔ chee koe a, min tɔ mu Saimɔn. A tɔɛ dɔndɔɛ an nɛ Pita. Ɛ kamin dɔndɔ an 'na sondaya a, min tɔ mu to Saimɔn. Saimɔn chɛ mu kanche an na, a sin, a 'a chenɛ ɛ kɔ yii kaa a wan.’

³³Mbɛ an‑na a ma, n‑na mɔɛ n sɔ i chee‑a bui chɛ a. I wɛɛ, i‑a ko chɛndɛ ma wan, i na koe a. Chɛ an fɛ mu, sanche gbɛ, mmɔ gbɛɛ a sɔn sɔn‑da nɛ Yataa chen kɔɔ. Nn gbɛɛ sin too ma sɔen mu ka gbɛ i wan ma, Mansa Yataa‑a bai min don i da a, nn ko a, nn ni an bai a min.”

³⁴Mbɛ Pita bun‑da koɔ‑a, a ɔ, “Sanche mu ka gbɛ, n‑na a ɔ sɔn, tea ko a, mbɛ Yataa ee mɔ gbu gbɛɛ tɛ bɔ.

³⁵Chɛɛ mɔ gbu kan kɔ kan dunya chɛ ɔ, i wɛn mbe chian Yataa ma, mbɛ i‑a a faa ma koe ma, ɛ a boo si‑a wan i mɔɛ chɛ kɔɔ.

³⁶Wo‑a a ɔ sɔn fan, Yataa‑a bai min na ta Isɔɛɛ mɔɛ n tena. A ni wan sakana bai chɛ ɔ yian‑da, mbɛ faachima ɛ sɔn fan Yataa a, Chisɔsi Chasi 'a gbasaya ɔ, min mu mɔ gbu gbɛɛ 'a mansa a.

³⁷Wo‑a a sɔn fan, min ma‑a Chu chɛnyɛ gbɛɛ ɔ. A kuu sɔ‑a Kadidi wan, Chɔn ban‑da kɛn a ɔ yian‑da mɔɛ n na, a si yii chɛ koe ma an kunɛ ɔ, Yataa chia a.

³⁸A yɛ to, wo‑a Chisɔsi wakoe ɔ sɔn fan, min ka‑a Nasaɛti duu ɔ. Yataa na‑a a Nyina be buɛ min dɔ a ma, a basan gbasaya a. Chisɔsi ben ben‑da wan a ɔ gbɛɛ, ɛ ta‑a ko chɛndɛ ma‑a mɔɛ n na, mbɛ a yɛ‑a, a‑a mɔɛ n gbɛɛ baun, miin ni Sitana 'a gbasaya kɔɔ. Koe min ni a ma, a ni chɛ ma, Yataa ni wan a fɛ.

³⁹Siiya mu nn fan na, a si koe chɛ n gbɛɛ ma, a‑a miin ma Chu mɔɛ n 'na chɛnyɛ ɔ, ni Chuusaɛn duu ɔ. An na‑a a gbangban fan kɔn gbengbandenɛ ma, a fa‑a nɔ.

⁴⁰Chɛɛ Yataa‑a a kɔɔ sɔ wan, a ka saya ɔ, tee sawan bɔɛ ma, mbɛ a‑a a ma, a bɔ‑a mɔɛ n ya a.

⁴¹Chisɔsi nii ma bɔ ni mɔɛ gbɛɛ an ya a, chɛɛ a bɔ‑a dechee nn fan ya a. Yataa na‑a a boo sɔ nn fɛn ma, ma koe a sii n na. Nn fan‑na daun dɔndɔɛ chɛ, nn‑na nn min kaina dɔndɔɛ, Chisɔsi a sɔenɛ gbakɔ saya ɔ.

⁴²A sin‑na a fɔ wan nn ye, a ɔ, nn ni Yataa bai sa mɔɛ n tena. Mbɛ nn‑na siiya bɔ, a si a wakoe ma. A ɔ yian koe a, mbɛ Yataa‑a a wan Chisɔsi an yian, kaa a tɛ koe a, chɛndɛ ba n ko a, an bɛ fuɛ n na.

⁴³Yataa 'a gbonka chɛ mɔɛ n gbɛɛ na‑a bai sa wan, a si Chisɔsi chɛ ma. An dɔ, mɔ ɔ mɔ min mbe an kai fa‑a Chisɔsi chɛ a, Yataa ɛ a boo bɔ‑a wan an mɔɛ chɛ a ko yama n dɔ, Chisɔsi ko a.”

⁴⁴Pita to‑a koɔ tena wan, mbɛ Yataa Nyina bea‑a mɔɛ n gbɛɛ fɛ, miin ni an too ma sɔ tena a 'a sakana bai chɛ ma.

⁴⁵Pita n bɛ na‑a wan Chɔpa duu ɔ, an bɛ Chu mɔɛ n na, miin na‑a an kai fa Chisɔsi a. An da ɔ gbaa‑a wan, koe chɛ ɔ yen koe a. Mbɛ Yataa ɛ kun fan, a ni a ma, a Nyina ni ma mɔɛ chɛ n bɛɛ fɛ, miin ma Chu mɔ a.

⁴⁶Koe min na mu, an‑na a a min fan, mɔɛ chɛ n mbe kamaya bai n fɔ‑a, mɔɛ n mbe ee miin dɔ gbɛ ka dechee,[13] an mbe ta‑a Yataa tando‑a. Mbɛ Pita‑a a fɔ, a ɔ,

⁴⁷“Yataa Nyina bea‑a ka wan mɔɛ chɛ n fɛ, yɔ a bea‑a buɛ min dɔ nn bɛɛ fɛ. Chɛ an fɛ mu gbɛ, mɔ ɔ mɔ ee to nɔ, min mbe an ka‑a yii chɛ koe a an kunɛ ɔ, Yataa chia a.”

⁴⁸Mbɛ a‑a a fɔ, a ɔ, an ni yii chɛ an kunɛ ɔ, Yataa chia a, Chisɔsi Chasi tɔɛ ɔ. Mbɛ an‑na a fɔ a ye, an dɔ, an ni ma nɔ an tɛ ɔ, tee kuunden ko a.