Read Kono CHISƆSI 'A SƆ MƆƐ NU 12 Bible Online

CHISƆSI 'A SƆ MƆƐ NU 12 - Kono bible

CHISƆSI 'A SƆ MƆƐ NU 12

¹Koe chɛ n gbɛɛ ni kɛn chɛ tena a ɔ, a tima dɔndɔ gbe chɛ a ni, Mansa Ɛdɔdi‑a[14] a kuu sɔ ko ma gbaaenɛ sa‑a chɔchi mɔɛ dɔ n ma.

²A‑a a ma wan, an‑na Chimisi fa chɛɛ chɛ mɛ a, Chɔn kɔɔ kaima.

³A sin, a‑a a ɔ yen kɛn, mbɛ a‑a Chu n faa ma koe an ma ka, a ma yɛ ni to kuu kɔ, a‑a Pita wɛɛ bia wan. Chɛ ma‑a tima chɛ an na, Chu mɔɛ n 'na biidi dɛnfɛ daun bɛn chɛ kun ma.

⁴A sin‑na a ma kɛn, Pita bia‑a, a‑a a sa wan pimbi chenɛ a. Pita be‑a pimbi chen kun ma fɛn mɔɛ kun naanin fan ma, a kun ma fɛn koe a. An ni naanin naaninɛ an ma. Mansa Ɛdɔdi toen ni, a ni Pita 'a bai sa fanka ɔ wan, ni an kun bɔ‑a ɔ bɛn chɛ ka‑a a a.

⁵Mbɛ an‑na Pita ma gban pimbi chenɛ a. Chɛɛ a tima chɛ a, chɔchi mɔɛ chɛ n ni wan Yataa fai‑a a ko a, an faa gbɛɛ a.

⁶Mbɛ Mansa Ɛdɔdi yiima ɔ, banda dɔndɔ ɔ ni ka wan, a ni Pita a bɔ pimbi chenɛ a, a 'a bai sa koe a fanka ɔ. An pimbi chɛ ɔ, Pita ni wan sa ɔ chinɔɛ ɔ, soya mɔ fea n tɛ. A chiien ni yɔɔ fea an na. A sin, pimbi chen kun ma fɛn mɔɛ n ni wan nɔ, pimbi chenɛ gbu da a, an mbe a kun ma fɛn‑da.

⁷Mbɛ a yen ko, Mansa Yataa 'a maeka bɔ‑a a pimbi chen chɛ a. Pimbi chenɛ gbu, a dumu bu ɔ, Pita ni kaina, maeka chɛ 'a manɛ‑a a ɔ ka wan. Mbɛ maeka chɛ‑a Pita tɔnfɛ ma gbasi, a‑a Pita a kunɛ, a ɔ, “I a sɔ bui chɛ a.” Mbɛ a ya kɔɔɛ a, yɔɔɛ min ni ka Pita boo ma, a fuin‑da, mbɛ a bea‑a.

⁸Mbɛ maeka chɛ‑a a fɔ a ye, a ɔ, “I ma bɛn, i ni i 'a kɔɔwa don i chenɛ a.” Mbɛ Pita wɛɛ‑a a ma ka. Mbɛ maeka chɛ‑a a fɔ to a ye, a ɔ, “I 'a doma don, i ni a sɔ n fɛ, mɔ ni ta.”

⁹Pita‑a a sɔ wan maeka chɛ fɛ, a bɔ pimbi chenɛ chɛ a. A gbu nii ma a ɔ gbɛ ni pɛnɛnɛ, maeka chɛ ni koe min ma tena. A ni wan a yii ma, mbɛ a ni ka cho an dɔ.

¹⁰Pita an fea maeka chɛ a, an ben‑da wan soya mɔɛ saa saa ma, a basan a fean bɔɛ a. Mbɛ a danka a, an che‑a pimbi chenɛ da chɛ ma, min nyandenɛ ni kundu a, duu wa chɛ teen na. Pimbi chenɛ chɛ da a ka‑a wan, a wandi kun ma a a, mbɛ an bɔ‑a. An ta‑a wan, mbɛ an‑na dani dɔndɔ ɔ tandin. Mbɛ a ya kɔɔɛ a, maeka chɛ‑a Pita to, a ta‑a.

¹¹Mbɛ a tima gbu a ni gbɛ, Pita‑a a wandi a tinsɔn. Mbɛ a ɔ, “Sanche mu gbɛ, n‑na a ɔ gbɛ, mbɛ n nii ka cho ɔ. Mansa Yataa an‑na a 'a maeka a na ka, n bɔ koe a Mansa Ɛdɔdi boo ɔ. A ni n bɔ koe gbɛɛ ɔ, miin ni Chu mɔɛ n 'na yiinachii ɔ, n ko a.”

¹²Pita ban‑da chɛ ɔ sɔn‑da kɛn, a ta‑a wan Mɛi 'a chenɛ a, min 'na denɛ tɔ ni Chɔn. A tɔ ni to Maki. Mɔ sɛsɛ a kanden fan ni an chen chɛ a, an mbe samun chɛ‑a.

¹³Mbɛ Pita‑a chenɛ kata da tu. A‑a a tu kɛn, yɔn musu dɔndɔ, min tɔ ni Doda, a dɔn‑da wan a bu ɔ.

¹⁴A‑a Pita kuiɛ ɔ gbɛ kɛn, a bu ɔ dia‑a wan, a ɔ benden ba a. Chɛ‑a a ma wan, a ma chenɛ da gbu a ka ni. Chɛɛ a yɛ‑a wan bui a, a‑a a fɔ mɔɛ chɛ n ye, mbɛ Pita ɛ sɔ ɔ chenɛ da a.

¹⁵Mbɛ mɔɛ chɛ n‑na a fɔ a ye, an dɔ, “I wooen fan mu.” Chɛɛ yɔn musu chɛ chii‑a wan a ma, mbɛ tea mu. Mbɛ an‑na a fɔ a ye, an dɔ, mbɛ Pita 'a maeka[15] an nɛ.

¹⁶Chɛɛ Pita ma sɛmbɛ ni, chen chɛ da tu koe a. An sin‑na chen chɛ da a ka kɛn, an‑na Pita yen fan, mbɛ an gbɛɛ da ɔ gbaa‑a gbechee.

¹⁷Chɛɛ Pita ni wan a boo kai‑a an ma, an ma na sɔnkɔɛ chɛ. Mbɛ a si‑a a gbɛɛ ma, a‑a a ɔ yian, Mansa Yataa‑a a ma buɛ min dɔ, a bɔ‑a pimbi chen chɛ a. Pita‑a a fɔ wan an ye, a ɔ, an ni a ɔ yian Chimisi a, a basan an suun ma nyɔɛ n na Chasi ɔ. Mbɛ a ka‑a nɔ, a ta‑a kaina dɔ mende.

¹⁸A banda ɔ ka ma, sau ma che‑a kɛn gbɛ, pimbi chen kun ma fɛn mɔɛ chɛ n 'na ma samba nii ma dɔɔ. An gbu nii ma a ɔ sɔn, koe min ma‑a Pita a.

¹⁹Mansa Ɛdɔdi‑a a ma kɛn, an‑na an ya a kan Pita a, chɛɛ an ma a yen ni, a faa tɛ‑a wan gbeden. Mbɛ a‑a pimbi chenɛ chɛ kun ma fɛn mɔɛ chɛ n dɔ tisa gbɛɛ ɛ. Mbɛ a‑a a fɔ, a ɔ, an ni an fa. Chɛ gbakɔ, Mansa Ɛdɔdi yii‑a wan, a ka Chudia chɛnyɛ ɔ, mbɛ a ta‑a Sisayea duu ɔ tima ɛnden ko a.

²⁰Mansa Ɛdɔdi faa tɛen fan ni gbɛ Taya duu ɔ mɔɛ n ma, an bɛ Sidon mɔɛ n na. A sin, an duu fea chɛ ɔ mɔɛ n na‑a wan kaina dɔndɔɛ. An‑na kai Basɔsi pɛn tan, min ni Mansa Ɛdɔdi 'a kata kun ma, ni a boo fenɛ gbɛɛ. An‑na a ɔ tisa wan, an dɔ, a ni an deman, an ni koɔ Mansa Ɛdɔdi tena. An toen ni, Mansa Ɛdɔdi faa ni chima an boo ɔ, koe min na mu, an 'na daun fenɛ ni ka nɔ, a 'a chɛnyɛ chɛ an dɔ.

²¹Tee chɛ ma, Mansa Ɛdɔdi‑a min yian ka an tɛ ɔ bai sa koe a, an bɛ an na, a‑a a ma chii wan a 'a mansa ma chii a. Mbɛ a si‑a, a 'a mansa sea a, koɔ koe a an tena, a ma kawaen ba ɔ.

²²A ni kɛn koɔ tena, mɔɛ chɛ n gbɛɛ‑a yee tɛ wan, an dɔ te, “Mɔ gbu ee koɔ ka. Yataa an mbe ka koɔ tena.”

²³A ya kɔɔɛ a, Mansa Yataa 'a maeka‑a a boo yii wan Mansa Ɛdɔdi a. Koe min na mu, a nii ma basɔmaya be ni Yataa ma. A sin, tɔnɛnɛ n fan‑na a daun, mbɛ a fa‑a.

²⁴Chɛɛ Yataa 'a sakana bai chɛndɛ chɛ tana, a fasan‑da wan a ɔ gbɛɛ ben‑da, mbɛ mɔ nama sɛsɛ‑a an kai fa Chisɔsi a.

²⁵Mbɛ Banabasi n fea Sɔɔ a, an ban‑da kɛn an 'na wai ma, an ta‑a min chɛ koe a Chuusaɛn, an yɛ‑a wan Andiɔki. An na‑a Chɔn dɔndɔ an na an boo a, min tɔ ni to Maki.