Read Kono CHISƆSI 'A SƆ MƆƐ NU 13 Bible Online

CHISƆSI 'A SƆ MƆƐ NU 13 - Kono bible

CHISƆSI 'A SƆ MƆƐ NU 13

¹Mɔɛ n ni wan nɔ Andiɔki duu ɔ, miin ni Yataa 'a gbonka chɛ mɔɛ n na, a basan a 'a kan chɛ mɔɛ n na. Banabasi ni an mɔɛ chɛ n dɔndɔ an na, ni Simiyɔn bɛɛ, an ni min chee, an dɔ, Simiyɔn finɛ. A yɛ to, Sɔɔ wɛɛ, ni Dusiɔsi, min ka‑a Sayini duu ɔ, an fea Manaɛn na, min bɔ‑a a ɔ chen dɔndɔɛ a, an fea Mansa Ɛdɔdi Andipasi a.

²Tee dɔndɔ a, an ni kɛn sun bia a, an mbe ta‑a Mansa Yataa fai‑a, Yataa Nyina‑a a fɔ wan an ye, a ɔ, “Wo a ma n ye, Banabasi, an fea Sɔɔ a, an ni ma tenchen wai chɛ ko a, n‑na an chee min chɛ koe a.”

³Mbɛ an ban‑da sun bia‑a, a basan samun chɛ a, an‑na an boo bun fan an ma, an‑na an dua, mbɛ an‑na an na ta.

⁴Mbɛ Yataa Nyina chɛ‑a Banabasi sɔ kɛn, an fea Sɔɔ a, ta koe a baa kɔ, an yii‑a wan Sɛdusia duu ɔ. An bɛ an ta‑a Chɔn Maki a, basan koe a an ma an 'na wai chɛ koe a. An ka‑a wan nɔ, mbɛ an‑na yii tɛ dɛndɛ ɔ Saipɔsi yii tinɛ ɔ. An che‑a wan Sadamisi duu ɔ, an don‑da Chu n na samun chɛ chenɛ a, mbɛ an‑na Yataa bai ɔ yian mɔɛ n na.

⁵

⁶An‑na an tinɛ chɛ gbɛɛ ɔ ban kɛn, benbenɛ a, aan a che Pafɔsi duu ɔ, an‑na nkofo kamin dɔndɔ tan fan. A tɔ ni Baa Chisɔsi. A ni Chu mɔɛ an na, min ni fania fɔɛ a, mbɛ Yataa 'a gbonka chɛ mɔɛ mu a a.

⁷An nkofo chɛ, a dia nyɔɛ an nii nɛ kɔfana a nɔ, an yii tin chɛ ɔ. An kɔfana chɛ tɔ ni Sachɔsi Pɔdɔsi, min yiima tɛen ni kaka. A‑a Banabasi chee wan, an fea Sɔɔ a, Yataa bai a min koe a an na.

⁸Chɛɛ nkofo chɛ, min tɔɛ dɔndɔɛ ni Ɛdimasi (a tɔɛ chɛ fɔɛ an nii nɛ, nkofo tɔɛ), a‑a Banabasi n kɔɔsa bia wan kaka. A nii ma to ni, kɔfana chɛ ni dan bai chɛ n na, an ni min fɔ tena a si Chisɔsi ma.

⁹Chɛɛ Yataa Nyina bea‑a wan Sɔɔ fɛ gban, min tɔɛ dɔndɔɛ ni Pɔɔ. A‑a a ya gbangban fan nkofo chɛ a,

¹⁰mbɛ a ɔ, “I wan, Sitana 'a denɛ. Ko chɛndɛ kan kɔ kan chɛɛ ma nyɔɛ mu i a. Chɛwɛɛ yama yama gbɛɛ ɛ i ɔ, mɔɛ n bun koe a. A sin, e butuin chɛ tena wan tima ɔ tima, i ni Mansa Yataa 'a tea mun fania a.

¹¹Mbɛ a yen ko gbɛ sanche, Mansa Yataa‑a a boo bun i ma. I ya a ɛ pimbi‑a wan tee kuunden ko a.” A ya kɔɔɛ a, mbɛ dingbii bun‑da Ɛdimasi ya a, a don‑da pimbi ɔ, mbɛ a bun‑da a boo mɛmɛ‑a. A toen ni, mɔɛ ni a bia a boo ma, a ni ta a a.

¹²Kɔfana chɛ‑a a ɔ yen kɛn koe min ma‑a, a‑a a kai fa wan Chisɔsi a. Koe min na mu, a da ɔ gbaa‑a wan kan chɛ a, a si Mansa Chisɔsi ma.

¹³Mbɛ Pɔɔ n bɛ a bɔɛ n na, an si‑a dɛndɛ ɔ, mbɛ an bɔ‑a Pafɔsi duu ɔ, an ta‑a Paaka duu ɔ, min ni Panfidia chɛnyɛ ɔ. An che‑a kɛn nɔ, Chɔn Maki‑a an to wan, mbɛ a yɛ‑a Chuusaɛn duu ɔ.

¹⁴Chɛɛ an‑na an 'na tachɛ a tun fan a ma, a ka Paaka, a ta Andiɔki duu dɔ mende ɔ, min ni Pisidia chɛnyɛ ɔ. A sin, Chu n 'na suin tee ma, an don‑da wan Chu n 'na samun chenɛ a, mbɛ an si‑a.

¹⁵Mbɛ mɔɛ ban‑da sawa gboo chɛ kan‑da, Mosisi na‑a min nyɛn, a basan bai n na, Yataa 'a gbonka chɛ mɔɛ na‑a min nyɛn. Mbɛ ya ɔ sɔɛ chɛ nu, Chu n 'na samun chɛ chen chɛ a, an‑na sakana a ta Pɔɔ n tena, an dɔ te, “Nn suun ma nyɔɛ nu, ni bai ɔ bai ɛ wan wo da a, a fɔ koe, min mbe mɔɛ n faa ma nande, wo e ka a fɔ‑a.”

¹⁶Mbɛ Pɔɔ‑a a kɔɔ sɔ, a‑a a boo a sɛ an too ma sɔ koe a, mbɛ a bun‑da koɔ‑a. A ɔ, “N bɔ Isɔɛɛ mɔɛ nu, wo wo too ma sɔ, wo wɛn bɛɛ ma Chu mɔ a, wo wo too ma sɔ n ma.

¹⁷Mmɔ wan Isɔɛɛ mɔɛ n mbe Yataa min fai, an‑na a boo sɔ nn bemba n ta bemba n ma, ma koe a a ta mɔɛ n na. Mbɛ a‑a a ma, an da a koa‑a, tima min na, an ni sondaya a Ichipi chɛnyɛ ɔ. Yataa 'a gbasaya, an‑na a ma to, an bɔ‑a Ichipi chɛnyɛ chɛ ɔ.

¹⁸Mbɛ a sin, san bi naanin chɛ gbɛɛ ko a, an ni tima min na fuinɛ ma, an 'na ko yama gbɛɛ bɛn‑da wan a ma.

¹⁹Yataa‑a chɛnyɛ mɔ kun wɔnfea n kasaa wan, Kenaan chɛnyɛ ɔ. Mbɛ a‑a a ma, a 'a mɔɛ nu, Kenaan chɛnyɛ chɛ ma‑a an ta a.

²⁰Koe chɛ n gbɛɛ ma‑a san chɛmɛ naanin, ni san bi duu an tɛ ɔ. “Chɛ gbakɔ, a‑a a ma wan, an‑na ya ɔ sɔɛ n ma sɔn, miin ni an kun ma fɛn, aan Yataa 'a gbonka chɛ mɔɛ Samɛɛ ta tima che‑a.

²¹Mbɛ an‑na Yataa ɔ tisa, min mbe a ma, a ni mansa be an ma. Yataa‑a Sɔɔ be wan an ma, min ni kai Kisi 'a denɛ a. A bɔ‑a Bɛnchamin 'na dambi an dɔ. A ni wan mansaya chɛ ɔ, san bi naanin ko a.

²²Yataa‑a Sɔɔ bɔ kɛn mansaya chɛ ma, a‑a a boo sɔ wan Defidi ma, ma koe a mansa a, Sɔɔ gba ɔ. Yataa‑a bai chɛ an fɔ a si Defidi ma, a ɔ, ‘Defidi wakoe‑a n ya fa, Chɛsi 'a den chɛ. Koe min na mu, n‑na a ɔ yen, mbɛ ɛ kun fan n faa ma koe ma‑a, yɔ n toen mu a a buɛ min dɔ.’

²³Defidi chɛ, a 'a dambi ɔ mu, Yataa‑a a ma, mmɔ‑a baun mɔɛ ma sɔn, min mu Chisɔsi a. A‑a Isɔɛɛ mɔɛ n too ɔ dia an na.

²⁴Chisɔsi e na to a 'a wai kuu sɔ‑a dunya chɛ ɔ, Chɔn‑na Yataa bai sa wan Isɔɛɛ mɔɛ n gbɛɛ tena, an kan kɔ sɔ koe a, an 'na ko yama n na, a ni yii chɛ an kunɛ ɔ, Yataa chia a.

²⁵A sin, Chɔn ni kɛn gbɛ a 'a wai a ban tena dunya chɛ ɔ, a‑a a fɔ wan, a ɔ, ‘Ɛ wo yii ma, mbɛ nyɔn mu n na? N fan ma mɔɛ chɛ a, wo yii na chiien mu min na. Chɛɛ wo wo too ma sɔ, a ɛ na tena n gbaa chia a. Kɔɔwa gbu wɛɛ a chenɛ a, n mbe ee che a yuu wɛɛ fuin koe a.’

²⁶“N suun ma nyɔɛ nu, wo wɛn mu Ebeami cheeya n na, ni wo wɛɛ, wo wɛn ma Chu mɔ a, chɛɛ wo wɛn mbe kooya be Yataa ma, wo chɛ a min. Sakana bai chɛ, min mbe na bauncha a, a naen mu mmɔ gbɛɛ an ko a.

²⁷Chɛɛ mɔɛ miin mbe Chuusaɛn duu ɔ, an bɛ an ya ɔ sɔɛ n na, an nii ma a wakoe ɔ gbɛ ni. An nii ma Yataa 'a gbonka chɛ mɔɛ chɛ n 'na bai n nan fan bɛɛ ɔ gbɛ ni, an ni min kan Chu n 'na samun chɛ chenɛ a, suin tee kan kɔ kan ma. Chɛɛ an‑na kaa a tɛ wan, a wakoe ma, a ni fa, Yataa 'a gbonka chɛ mɔɛ chɛ n da a kuiɛ bɔ koe a a.

²⁸An nii ma chia ɔ chia sɔn ni kaa a tɛ koe a, a fa koe ma. Chɛ gbɛɛ ɔ, an‑na Kɔfana Padeti ɔ tisa wan, a ni a ma, an ni a fa.

²⁹An sin ban‑da wan koe chɛ n gbɛɛ a tachɛ‑a Chisɔsi a, yɔ a na‑a a fɔ buɛ min dɔ, a si a ma Yataa 'a gboo ɔ. Mbɛ an‑na a a yii kɔn chɛ ma, an‑na a tɔn.

³⁰Chɛɛ Yataa‑a a kɔɔ sɔ wan, a ka saya ɔ,

³¹a sin, tee sɛsɛ ko a, a ni bɔ wan mɔɛ chɛ n ya a, an bɛ ni ta miin na chia a a ka Kadidi chɛnyɛ ɔ, a sɛ Chuusaɛn duu ɔ. An fan mu sanche sii n na, a wan Chisɔsi ko a, mɔɛ n tena.

³²A sin, nn mbe ka nɛ, min mbe a ma, nn ni sakana bai chɛndɛ chɛ ɔ yian wo a. Mbɛ Yataa na‑a tooɔdia min chɛ mmɔ bemba n ta bemba n na,

³³a‑a an chɛ ka mmɔ ye, mmɔ wɛn mu an cheeya n na. Koe min na mu, a‑a Chisɔsi kɔɔ sɔ wan, a ka saya ɔ. A‑a chɛ ma wan, yɔ a nyɛnden mu buɛ min dɔ si fean bɔɛ chɛ ɔ, Yataa tando si gboo ɔ. A‑a a fɔ wan a ɔ, a ɔ, ‘N 'na denɛ mu i a. N ma‑a i fa a bi.’

³⁴Yataa sin‑na Chisɔsi a sɔɛ min chɛ ka, a ka saya ɔ, a ee a ma‑a a gboo ni tui kuɔ fɔ ko a. Yataa na‑a a fɔ ka wan a 'a gboo ɔ, a ɔ, ‘Dua min mbe ee bea duu ma, n mbe a chɛ‑a wan wo a, n na‑a Mansa Defidi too ɔ dia min na.’

³⁵Chɛ an fɛ mu, a‑a a fɔ wan to si dɔ mende ɔ, Yataa tando si gboo chɛ ɔ, a ɔ, ‘E ee dɔn‑da i 'a wai chɛ mɔɛ chɛ, n fɛn‑na n fandi be i ma, n su ni tui kamba ɔ.’

³⁶Defidi tana, a ta tima a, a na‑a ban fan wai chɛ‑a Yataa ye, a chia ma yɔ a ɔ na‑a bɛn buɛ min dɔ. Mbɛ saya‑a a boo kana bia, a sin sa‑a a bemba n kaa a, mbɛ a gboo tui‑a kamba ɔ.

³⁷Chɛɛ chɛ nii ma ma ni mɔɛ chɛ a, Yataa‑a min na sɔ, a ka saya ɔ.

³⁸Chɛ an fɛ mu, n suun ma nyɔɛ nu, a nyin wo ni chɛ ɔ gbɛ. Mbɛ Chisɔsi chɛ an ko a mu, Yataa ɛ a boo bɔ mmɔ 'a ko yama n dɔ.

³⁹A sin, a wan ko a mu to, mɔ ɔ mɔ min mbe a kai fa‑a a a, Yataa ɛ a ya‑a wan mɔ tandenɛ a a tena. Ɛ a boo bɔ‑a wan an mɔɛ chɛ a ko yama gbɛɛ ɔ. Ko yama chɛ nu, an mɔɛ chɛ kun mbe ee che bɔ‑a miin dɔ, Mosisi 'a sawa kɔɔ.

⁴⁰Chɛ an fɛ mu, wo wo kun ma fɛn, min mbe a ma, Yataa 'a gbonka chɛ mɔɛ n na‑a bai min fɔ, a ma na wo tan. An na‑a a fɔ wan Yataa 'a gboo ɔ, an dɔ te,

⁴¹‘Wo a yen, bai yama sa mɔɛ nu, a si Yataa da a bai n ma. N mbe na tena wan koe ma‑a bi tee chɛ kɔɔ, wo ee dan‑da min na kuɔ fɔ, mɔɛ ni a ɔ yian bɛɛ wo a. Chɛ an fɛ mu, wo da a ɔ gbaa‑a wan, mbɛ wo fa‑a.’ ”

⁴²Pɔɔ n ni kɛn bɔ‑a Chu n 'na samun chɛ chen chɛ a, mɔɛ chɛ n‑na an disa wan. An dɔ, suin tee min ni na tena, an ni koe chɛ n dɔ yian to an na.

⁴³Mbɛ mɔɛ chɛ n gbɛɛ, an ban‑da bɔ‑a Chu n 'na samun chɛ chen chɛ a. Chɛɛ Chu mɔɛ nu, ni an sɛsɛ miin boo fea sien ni Chu n 'na Yataa fai chia kɔɔ, an sɛsɛ‑a a sɔ wan Pɔɔ fɛ, an fea Banabasi a. An koɔ‑a wan mɔɛ chɛ n tena, an‑na a ma din an tena, mbɛ an ma an kan kɔ sɔ to Yataa 'a koadia deman chɛ a.

⁴⁴Suin tee dɔndɔɛ chɛ che‑a kɛn, ɛnden fan to‑a, mɔɛ n gbɛɛ an duu chɛ ɔ, an ni kuɛn, na koe a, an too ma sɔ‑a Mansa Yataa 'a bai ma.

⁴⁵Chu mɔɛ chɛ nu, an‑na fanka wa chɛ yen kɛn, toomaya‑a an faa fa wan gban. Mbɛ an‑na Pɔɔ da a bai gbɛɛ kɔɔsa bia, an yɛ‑a to, an‑na a main.

⁴⁶Chɛɛ a tima gbu a ni gbɛ, Pɔɔ, an fea Banabasi a, an‑na bai sa faagbɛa a. An dɔ, “A ni nyin, nn ni Yataa da a bai chɛ ɔ yian wo pɛn na. Chɛɛ wo‑a wo boo sɔ wan a ya ɔ, wo‑a a ɔ yian wo sɔnɛ ɔ, mbɛ a ma nyin, wo ni kuɔ fɔ fɔɛ chɛ ma sɔn. A yen ko gbɛ, nn bɛɛ, nn‑na nn ya a yɛ chɛ n ma, miin ma Chu mɔ a.

⁴⁷Koe min na mu, Mansa Yataa‑a a fɔ ka wan nn ye, a ma koe a. A‑a a fɔ wan a 'a gboo ɔ, a ɔ, ‘N‑na wo ma manɛ a, chɛ n ko a, miin ma Chu mɔ a. Chɛ ni a ma, wo ni na bauncha a dunya tɔnkɔnɛ gbɛɛ ɔ.’ ”

⁴⁸A sin, mɔɛ chɛ nu, miin nii ma Chu mɔ a, an‑na bai chɛ a min kɛn, an bu ɔ dia‑a wan, an bun‑da Yataa tando‑a, a 'a bai ko a. Mɔ sɛsɛ sin, Yataa na‑a a boo sɔ miin ma, kuɔ fɔ fɔɛ ma sɔn koe a, an‑na an kai fa wan Chisɔsi a.

⁴⁹Mbɛ bai chɛ, a si Mansa Chisɔsi ma, a fasan‑da wan a ɔ gbɛɛ an tanda chɛ ɔ ben‑da.

⁵⁰Chɛɛ musu gbakoo nu an duu chɛ ɔ, miin ni kooya be Yataa ma, an bɛ nɔ mɔ kaima gbakoo n gbɛɛ a, Chu mɔɛ chɛ n‑na an gbɛɛ a sɛ wan Pɔɔ n ma. An‑na ko ma gbaaenɛ sa wan Pɔɔ ma, an fea Banabasi a, mbɛ an gbu‑a an gbain an tanda gbu ɔ.

⁵¹Chɛ ma‑a kɛn, Pɔɔ n‑na an chen 'na fifii a gbɔngbɔn fan an chenɛ a, ma koe a dasi a, an duu chɛ ɔ mɔɛ n ko a. Mbɛ an bɔ‑a nɔ, an ta‑a Ikoniɔn duu ɔ.

⁵²A sin, Chisɔsi fɛ mɔɛ chɛ n gbɛɛ nɔ, buɔdia koa‑a wan an dɔ, Yataa Nyina wɛɛ sin ni wan an fɛ gban.