Read Kono CHISƆSI 'A SƆ MƆƐ NU 15 Bible Online

CHISƆSI 'A SƆ MƆƐ NU 15 - Kono bible

CHISƆSI 'A SƆ MƆƐ NU 15

¹Chɛɛ mɔɛ dɔ n ka‑a wan Chudia chɛnyɛ ɔ, an na‑a Andiɔki duu chɛ ɔ. Mbɛ suun ma nyɔɛ chɛ nu Chasi ɔ, mɔɛ chɛ n‑na a kuu sɔ an kan‑da nɔ, an dɔ, “Yataa ee che wo baun‑da, mɔɔ ni an‑na wo a kamincha, yɔ Mosisi‑a mmɔ kan buɛ min dɔ.”

²Chɛ‑a a ma wan, koɛ basan kɔɔsa yama yama a, a don‑da mɔɛ chɛ n tɛ ɔ, an bɛ Pɔɔ an fea Banabasi a. Mbɛ Pɔɔ an fea Banabasi a, an bɛ mɔɛ dɔ n na, an‑na an yian fan, sɛ koe a Chuusaɛn duu ɔ. An dɔ, an ni Chisɔsi 'a sɔ mɔɛ chɛ n yen, an bɛ chɔchi gbakoo n na, a si an bai chɛ ma.

³Mbɛ chɔchi mɔɛ chɛ n‑na an ma saa kɛn, an ben‑da wan Fonisia chɛnyɛ ɔ, an fea Samayia chɛnyɛ a. An ni a ɔ yian fan mɔɛ n na, mbɛ mɔɛ miin ma ka Chu mɔ a, an‑na an kai fa buɛ min dɔ Chisɔsi a. An sin ma‑a wan buɔdia wa a, suun ma nyɔɛ chɛ n gbɛɛ tena, Chasi ɔ.

⁴An che‑a kɛn gbɛ Chuusaɛn, chɔchi mɔɛ n‑na an boo si wan an kɔɔ, an bɛ Chisɔsi 'a sɔ mɔɛ n na nɔ, ni gbakoo n gbɛɛ. A sin, Pɔɔ an fea Banabasi a, an si‑a wan ko ɔ ko ma, Yataa‑a min chɛ an ye, an‑na a ɔ yian.

⁵Chɛɛ mɔɛ miin kai faen ni ka Chisɔsi a, Chu mɔɛ dɔ n ni wan an tɛ ɔ, miin ni dɔbɛn chɛ ɔ, an ni min chee, an dɔ, Fayisii dɔbɛnɛ. An‑na an kɔɔ sɔ wan, mbɛ an dɔ, “A nyin fan mmɔ ni an na kamincha. A sin to, mmɔ ni a din an ma, an ni a sɔ sawa chɛ n gbɛɛ fɛ, Yataa‑a miin be Mosisi ma.”

⁶Mbɛ Chisɔsi 'a sɔ mɔɛ chɛ nu, an bɛ gbakoo n na, an bɛnden fan ni kaina dɔndɔɛ, an yii na chii koe a, bai chɛ ma.

⁷An‑na a tɛnsɛ kɛn pien, an nyɔn tɛ ɔ, mbɛ Pita‑a a kɔɔ sɔ. A ɔ, “N suun ma nyɔɛ nu Chasi ɔ, wo‑a a ɔ sɔn fan, Yataa‑a koe min ma. Mbɛ tima ɛnden ko a gbɛ, Yataa na‑a a boo sɔ wan n ma wo tɛ ɔ, n ni sakana bai chɛndɛ chɛ, a si Chisɔsi ma, a ɔ yian mɔɛ chɛ n na, miin ma Chu mɔ a. An ni an bai chɛ a min, mbɛ an‑na an kai fa Chisɔsi a.

⁸A sin, Yataa min‑na mɔ ɔ mɔ faa ɔ koe sɔn, a dɔn‑da wan an ma koe a ka. A‑a a ma wan, Yataa Nyina bea‑a an bɛɛ fɛ, yɔ a‑a a ma buɛ min dɔ mmɔ ko a.

⁹A sin ma tɛ bɔ kan kɔ kan yian ni mmɔ tɛ, mmɔ bɛ an na. Chɛɛ a‑a a ma wan, an faa ɔ gbɛ‑a, koe min na mu, an‑na an kai fa Chisɔsi a.

¹⁰Chɛ an fɛ mu gbɛ, wo ma suun feanka si mɔɛ chɛ n kun ma, feanka min mu mmɔ bɛ mmɔ bemba n ta bemba n na, mmɔ ee che min kɔɔ. Wo e ma‑a ka Yataa an dɔ siman‑da, ni wo‑a chɛ ma.

¹¹Chɛɛ mmɔ danden fan mu a a, mbɛ mmɔ ɛ bauncha ma sɔn‑da wan, koadia demanɛ 'a gbasaya ɔ, Mansa Chisɔsi ɛ min chɛ, yɔ an bɛɛ an mbe a ma sɔn‑da buɛ min dɔ.”

¹²Pita ban‑da kɛn koɔ‑a, mɔɛ miin gbɛɛ a kanden ni ka, an‑na a ɔ maun fan don. Mbɛ an‑na an too ma sɔ Banabasi ma, an fea Pɔɔ a. An‑na a ɔ yian fan gbɛɛ, Yataa na‑a a ma, an‑na kamaya ko wa miin ma, mɔɛ chɛ n tɛ ɔ, miin nii ma Chu mɔ a.

¹³An ban‑da kɛn koɔ‑a, Chimisi wɛɛ koɔ‑a wan, a ɔ te, “N suun ma nyɔɛ nu Chasi ɔ, wo wo too ma sɔ n ma.

¹⁴Saimɔn Pita ban‑da a ɔ yian‑da mmɔ a, Yataa na‑a a 'a koadia ɔ yian buɛ min dɔ, tima saa saa ko a, mɔɛ chɛ n na, miin nii ma Chu mɔ a. A na‑a a boo sɔ wan an dɔ n ma, ma koe a a ta mɔɛ n na.

¹⁵An koe chɛ sin, an fea bai chɛ a, Yataa 'a gbonka chɛ mɔɛ n na‑a min fɔ, bai dɔndɔɛ mu an na. Ɛ ka wan dechee yɔ Yataa 'a gboo‑a a fɔ buɛ min dɔ, a ɔ,

¹⁶‘Mansa Yataa ɔ te, a ɔ, “Chɛ gbakɔ, n mbe yɛ‑a wan to, mbɛ n‑na chen chɛ sɔ to, Mansa Defidi 'a chen chɛ min bea‑a tee. N mbe chen gbaa chɛ a yɛ‑a wan to mbɛ n‑na a sɔ to.

¹⁷A tima chɛ a mu, mɔɛ tɔɛ nu, an mbe an ya a mun‑da n ma, an bɛ mɔɛ chɛ n gbɛɛ a, miin ma Chu mɔ a, n‑na n boo sɔ miin ma, ma koe a n ta mɔɛ n na. N fan, Mansa Yataa, n fan‑na chɛ fɔ.

¹⁸N sin‑na koe chɛ n kɔɔ fɔ wan, kɛn suun tima a.” ’

¹⁹“Chɛ an fɛ mu, n ta yiima ɔ, n ma to ni mmɔ ni mɔɛ chɛ n tɔɔ, miin ma Chu mɔ a, miin mbe an ya a mun tena Yataa tena.

²⁰Chɛɛ mmɔ ɛ min ma, mmɔ gboo nyɛn an tena. Mmɔ ni a fɔ an ye, mbɛ an ma daun fɛnɛ daun, mɔɛ n‑na min bɔ yasi a, fen chɛ n tena, miin ma Yataa a. A yɛ to, an ma koe tɛ, an sin ma soe kan kɔ kan daun, min kanɛ a ma tɛ ni, an gbu ma wii daun.

²¹Koe min na mu, Yataa‑a sawa miin be Mosisi ma, a kanden fan mu gbɛ san chɛmɛ sɛsɛ ko a, Chu 'na samun chɛ chenɛ a, suin tee kan kɔ kan ma. A sin, Mosisi da a bai chɛ nu, an dɔ yianden fan mu gbɛ duu wa kan kɔ kan dɔ.”

²²Mbɛ Chisɔsi 'a sɔ mɔɛ chɛ nu, ni gbakoo nu, an bɛ chɔchi mɔɛ chɛ n gbɛɛ a, an‑na dɔbɛnɛ chɛ. An boo sɔ koe ma mɔɛ dɔ n ma an tɛ ɔ, an bɛ ni ta Pɔɔ an fea Banabasi a, Andiɔki duu ɔ. An‑na an boo sɔ wan mɔ fea n ma, basɔmaya ni miin ma mɔɛ chɛ n boo ɔ, miin‑na an kai fa ka Chisɔsi a. An mɔ fea chɛ n ni Chudasi an na, min tɔ ni to Basabasi, an fea Sidasi a.

²³An‑na gboo nyɛnden chɛ an be an ma. An‑na a nyɛn fan a ɔ, an dɔ te: Nn fan, Chisɔsi 'a sɔ mɔɛ chɛ nu, nn bɛ gbakoo n na, nn fɛn mu wo suun ma nyɔɛ n na Chasi ɔ, nn fan mbe ka gboo chɛ nyɛn tena. Nn mbe a nyɛn tena wo wan tena. Wo wan, wo wɛn ma Chu mɔ a, wo wɛn‑na wo kai fa Chisɔsi a. A yɛ to, wo wɛn mbe sanche Andiɔki duu ɔ, ni wo wɛn mbe Siyia chɛnyɛ tɔɛ ɔ, wo bɛ chɛ n na, miin mbe Sidisia chɛnyɛ ɔ. Nn‑na wo kɔndɔn.

²⁴Nn‑na a a min, mbɛ mɔɛ n dɔ n bɔ‑a wan nn tɛ ɔ, an ta‑a wo tena, an‑na wo kɔndɔ fii an 'na kanɛ a, an mbe min chɛ tena. An gbu sin mbe ka min ma‑a, nn fan ma an sɔ ni.

²⁵Nn gbɛɛ nn‑na chɛ an dɔ yen, nn dɔn‑da, mbɛ a nyin fan, nn boo sɔ koe a mɔɛ dɔ n ma, nn ni an sɔ wo tena. An bɛ an mbe na tena nn dia nyɔɛ Banabasi an fea Pɔɔ a.

²⁶Mɔ fea an fan nɛ, miin‑na an fɔɛ be, mmɔ 'a mansa Chisɔsi Chasi 'a wai ko a.

²⁷Chɛ an fɛ mu, nn‑na Chudasi wɛɛ sɔ wan, an fea Sidasi a, wo tena. An ni bai dɔndɔ gbe chɛ bɔ an da a, an ni a ɔ yian wo a, yɔ nn‑na a nyɛn buɛ min dɔ gboo chɛ ɔ.

²⁸Koe min na mu, nn‑na a ɔ yen fan, mbɛ a nyin fan nn tena, ni Yataa Nyina gbu wɛɛ tena, mbɛ yakɔɔtawa dɔ mende kan kɔ kan ma si to wo kun ma. Chɛɛ wo ni bea dechee sawa chɛ n fan fɛ, miin nyin wo ko a, yɔ chɛ nu.

²⁹Wo ma daun fenɛ daun, mɔɛ n‑na min bɔ yasi a, fen chɛ n tena, miin ma Yataa a. Wo ma soe kan kɔ kan daun, min kanɛ a ma tɛ ni, wo gbu sin ma wii daun. A yɛ to, wo ma koe tɛ. Ni wo ma wo boo chɛ ni to chɛ n dɔ, a nyin fan wo ko a. Wo mmɔ a gbɛ.

³⁰Mbɛ an‑na an boo ka kɛn ta koe a, an ta‑a wan Andiɔki duu ɔ. An sin‑na chɔchi mɔɛ chɛ n gbɛɛ a kan kɛn kaina dɔndɔ, mbɛ an‑na gboo chɛ be an ma.

³¹A sin, an‑na a kan kɛn, faamanande bai miin ni ka ɔ, a ma‑a wan an ma buɔdia wa a.

³²Chudasi, an fea Sidasi a, miin bɛɛ ni Yataa 'a gbonka chɛ mɔɛ n na, an bɛɛ‑a faamanande bai sɛsɛ sa wan an tena. Chɛ‑a an dɔ gbɛa wan, an kai fa koe a Chisɔsi a.

³³Suun ma nyɔɛ chɛ nu Chasi ɔ, an‑na tima ɛnden ya wan nɔ, mbɛ an‑na an du faachima ɔ, an bɛ an suun ma nyɔɛ chɛ n na Chasi ɔ, Andiɔki duu ɔ. Mbɛ an yɛ‑a suun ma nyɔɛ chɛ n tena, miin na‑a an sɔ.[18]

³⁴

³⁵Chɛɛ Pɔɔ an fea Banabasi a, an to‑a wan Andiɔki, mɔɛ n kan koe a, a basan bai ɔ yianɛ a, a si Mansa Chisɔsi ma. An bɛ ni wai chɛ ma, an bɛ mɔ sɛsɛ n fan na.

³⁶Tima ɛnden gbakɔ, mbɛ Pɔɔ‑a a fɔ Banabasi ye, a ɔ, “Na, mɔ ni ta ben ben mɔɛ n kun ma, duu chɛ n gbɛɛ ɔ, mɔ na‑a sakana bai chɛ sa miin tena, a si Mansa Chisɔsi ma. Mɔ ni a ɔ yen, ni an mbe buɛ min dɔ.”

³⁷Banabasi toen ni, an ni ta Chɔn na an fɛ, min tɔ ni to Maki,

³⁸chɛɛ Pɔɔ ta yiima ɔ, a nii ma nyin, ta koe a Maki chɛ a. Koe min na mu, a na‑a ka wan an fɛ Panfidia chɛnyɛ ɔ, mbɛ a yɛ‑a. A nii ma to ni an fɛ, an ni an 'na wai a ban.

³⁹Chɛ na‑a koɛ a an tɛ ɔ, min‑na a ma, an tɛ du‑a. Banabasi‑a Maki ya wan, an si‑a dɛndɛ ɔ, mbɛ an ta‑a Saipɔsi, yii tinɛ ɔ.

⁴⁰Chɛɛ Pɔɔ‑a Sidasi an ya, mbɛ an suun ma nyɔɛ nu Chasi ɔ, an‑na an konan Mansa Yataa ma. An dɔ, Mansa Chisɔsi 'a koadia demanɛ ni an kun ma fɛn.

⁴¹A sin ben‑da wan Siyia, an fea Sidisia chɛnyɛ ɔ a, ɛ ta‑a a ma‑a mɔɛ chɛ n dɔ ɛ gbɛa‑a chɔchi n dɔ, an 'na kaifaya ɔ.