Read Kono CHISƆSI 'A SƆ MƆƐ NU 16 Bible Online

CHISƆSI 'A SƆ MƆƐ NU 16 - Kono bible

CHISƆSI 'A SƆ MƆƐ NU 16

¹Pɔɔ an fea Sidasi a, an ta‑a pɛn Dabi duu ɔ, mbɛ an ben‑da Diisa duu ɔ chia a. An‑na Chisɔsi fɛ mɔ dɔndɔ tan fan nɔ, min tɔ ni Timoti. A de ni Chu mɔɛ an na, min na‑a a kai fa Chisɔsi a. Chɛɛ a fa ni Kiisi mɔɛ an na.

²Suun ma nyɔɛ n gbɛɛ Chasi ɔ, miin ni Diisa duu ɔ, an fea Ikoniɔn na, an‑na bai chɛndɛ sa wan, a si Timoti ma.

³Pɔɔ toen ni Timoti ni bea a fɛ, min‑na a ma, a‑a a a kamincha. A‑a chɛ ma koe min na, Chu mɔɛ n gbɛɛ an tanda chɛ n dɔ, an‑na a ɔ sɔn fan, mbɛ Timoti fa ni Kiisi mɔɛ an na.

⁴An ni ben ben tena kɛn duu wa chɛ n dɔ, an ni koe chɛ n dɔ yian fan mɔɛ chɛ n na, miin na‑a an kai fa Chisɔsi a, an ni an ma mɛn. Koe chɛ nu, an fan, Chisɔsi 'a sɔ mɔɛ nu, an bɛ gbakoo n na, an kuiɛ na‑a bɛn miin ma Chuusaɛn duu ɔ.

⁵Mbɛ chɔchi mɔɛ chɛ n gbɛɛ ɔ gbɛa‑a gbau, an 'na kaifaya ɔ Chisɔsi a, a sin, an ma ni mun‑da wan tee ɔ tee a.

⁶An ta‑a wan aan Fichiya chɛnyɛ gbɛɛ ɔ, a basan Kadesia chɛnyɛ ɔ a. Koe min na mu, Yataa Nyina nii ma dɔn ni, an ni Yataa bai sa Esia chɛnyɛ ɔ.

⁷An che‑a kɛn Misia chɛnyɛ bandoe ma, an‑na butuin chɛ wan, ta koe a Bitinia chɛnyɛ ɔ. Chɛɛ Chisɔsi Nyina nii ma dɔn ni, an ni ta nɔ.

⁸Mbɛ an bɛɛ‑a Misia chɛnyɛ ɔ tandin fan, an yii‑a Towasi duu ɔ.

⁹A yɛɛ chɛ ma, Yataa‑a koe ɔ yian fan Pɔɔ a, yɔ a ni cho an dɔ. A‑a mɔ kaima yen fan, min ka‑a Masidonia chɛnyɛ ɔ, a ɛ sɔ ɔ a disa‑a, a ɔ, “Na nɛ nn tena Masidonia, i ni nn deman.”

¹⁰Pɔɔ ban‑da kɛn dechee an koe chɛ ɔ yen‑da, a ya kɔɔɛ a, a wan Pɔɔ ni ma, ni nn fan,[19] nn bun‑da nn ma bɛn‑da, ta koe a Masidonia chɛnyɛ ɔ. Koe min na mu, nn‑na nn yii na chii wan, mbɛ Yataa an‑na nn chee ka, ta koe a nɔ. Chɛ ni a ma, nn ni sakana bai chɛndɛ chɛ ɔ yian nɔ mɔɛ n na, a si Chisɔsi ma.

¹¹Nn si‑a wan dɛndɛ wa dɛgbɛ ɔ, a ka Towasi duu ɔ, mbɛ nn‑na kɔ yii tɛ, a ta Samɔtesi yii tinɛ ɔ. Nn nii ma te ni a ma, nn ta tena. Mbɛ banda ɔ ka‑a kɛn, nn‑na kɔ yii tɛ wan to dɛndɛ ɔ, a ta Niapɔdisi duu ɔ.

¹²Nn ka‑a nɔ wan, mbɛ nn ta‑a Fiipai duu ɔ. An ni duu chenama wa a, a tɔɛ chɛ n gbɛɛ ma Masidonia chɛnyɛ ɔ. A ni to duu an na, Domi mɔɛ n na‑a min na tɛ. Nn‑na tee sɛsɛ ya wan nɔ.

¹³Suin tee che‑a kɛn, nn bɔ‑a wan an duu wa dɛgbɛ chɛ ɔ, mbɛ nn ta‑a yii a sanɛ. A ni wan nn yii ma, mbɛ Chu mɔɛ chɛ n na sɔndenɛ ɛ ma‑a wan nɔ, samun chɛ koe a. Nn‑na musu chɛ n tan fan nɔ, an na sɔndenɛ ɛ kaina dɔndɔɛ, mbɛ nn koɔ‑a an tena.

¹⁴Musu dɔndɔ an tɛ ɔ, min‑na a too ma sɔ nn ma, a tɔ ni Didia. A ka‑a Tiyatiya duu ɔ wan. A ni koa baa gbanden ba an ma tachɛ. Musu ni a a, min ni Yataa fai kaka. A ni kɛn a too ma sɔ tena nn ma, Mansa Yataa‑a a ma wan, a‑a a faa be bai chɛ ko a, Pɔɔ ni ka min fɔ‑a.

¹⁵Chɛ gbakɔ, Pɔɔ‑a yii chɛ wan a kunɛ ɔ, Yataa chia a, a basan a 'a chen 'na mɔɛ n na. Mbɛ Didia‑a a fɔ nn ye, a ɔ, “Ni wo‑a a fɔ, mbɛ n‑na n kai fa Mansa Chisɔsi a tea tea gbu a, mbɛ wo na, wo ni ma n 'na chenɛ a.” A sin‑na nn ma nande wan kaka, min‑na a ma, nn ta‑a a waa a.

¹⁶Tee dɔndɔ a, nn ni ta tena kɛn kaina chɛ, mɔɛ n ni ta samun chɛ koe a Yataa tena kaina, yɔnɛ den musuma dɔndɔ‑a nn tan fan. Nyina yama an ni a fɛ, min ni a ma, a ɛ mɔɛ n ma koe kɔɔ fɔ an ye, min mbe na tena an tan‑da. An yɔnɛ chɛ, a ni kɔpɔ sɛsɛ nyan fan a ti n ye, a 'a yawa gbasi chɛ ɔ.

¹⁷A bea‑a wan nn fɛ, nn bɛ Pɔɔ a, ɛ ta‑a yee tɛ‑a, a ɔ, “Kamin chɛ nu, Mansa Yataa Wa 'a wai chɛ mɔɛ n fan nɛ. An fan mbe a ɔ yian tena wo a, Yataa ɛ wo baun buɛ min dɔ.”

¹⁸A sin‑na chɛ ma wan tee sɛsɛ ko a, min‑na a ma, Pɔɔ faa tɛ‑a. Mbɛ a‑a a ya a mun an yɔnɛ chɛ ma, a‑a a fɔ nyina yama chɛ ma, a ɔ, “Chisɔsi Chasi tɔɛ ɔ, n mbe a fɔ tena i ye, mbɛ i ni ka den musuen chɛ fɛ.” A ya kɔɔɛ a, nyina yama chɛ ka‑a wan den den chɛ fɛ.

¹⁹Chɛɛ yɔnɛ chɛ ti n‑na a ɔ yen kɛn, mbɛ an 'na kɔpɔ sɔn chia den den chɛ a, a ban‑da, an dɛ‑a wan Pɔɔ ma, an fea Sidasi a. Mbɛ an‑na an konkon, a ta mansa n tena, kuti tongbo kɔɔ.

²⁰An na‑a an na, mansa chɛ n chen kɔɔ, an‑na a fɔ an ye, an dɔ, “Kamin fea chɛ nu, Chu mɔɛ n fan nɛ. An toen mu, an ni na gbunɛ a, duu wa chɛ ɔ.

²¹An mbe mmɔ 'a mɔɛ n kan tena manda n fan na, mmɔ ta sawa n ma min fɔ ni. Domi mɔɛ mu mmɔ a, mmɔ ee mmɔ boo si an kɔɔ, mmɔ sin mbe ee an na tachɛ.”

²²Mbɛ fanka fanka chɛ n bɛɛ‑a an kaa sa Pɔɔ ma koe a, an fea Sidasi a. Mbɛ mansa chɛ n‑na Pɔɔ n 'na doma a panda panda, an fea Sidasi a. Mbɛ an‑na a ma, an‑na an gbasi kɔnɛ a.

²³An‑na an faa ma gbasi chɛ kɛn an na, an‑na a ma wan an na dɛ‑a pimbi chenɛ a. Mbɛ an‑na a fɔ, pimbi chenɛ kun ma fɛn mɔɛ ye, an dɔ, a ni a da a tɔn gban.

²⁴Da a kuiɛ chɛ saen chɛ a an kun ma, pimbi chen kun ma fɛn mɔɛ chɛ, a‑a an na dɛ wan pimbi chenɛ tɛ tɛ ma dumu ɔ, mbɛ a‑a an chenɛ n don kɔnɛ a.

²⁵Chɛɛ su tɛ tɛ ma an to‑a, Pɔɔ an fea Sidasi a, an ni wan samun chɛ‑a, an mbe ta‑a si sa‑a Yataa tena. Pimbi chen na sa mɔɛ tɔɛ chɛ nu, an too ma sɔenɛ ɛ an ma.

²⁶Mbɛ a ya kɔɔɛ a, duu gboo samba‑a wan, a chenama wa a. Chɛ‑a a ma wan, pimbi chenɛ gbu gbɛɛ ɔ ma‑a ma‑a. Mbɛ pimbi chenɛ gbu da nu, an sa‑a a teen na gbasi. Mbɛ yɔɔɛ wɛɛ, miin chɛen ni pimbi chen na sa mɔɛ chɛ n boo ma, ni an chenɛ n bɛɛ ma, an gbɛɛ fuin‑da an ma.

²⁷Mbɛ pimbi chen kun ma fɛn mɔɛ chɛ kunɛ‑a, mbɛ a‑a pimbi chenɛ gbu da n na kaenɛ n yen. A‑a chɛ ɔ yen kɛn, a ni wan a yii ma gbɛ, mbɛ mɔɛ chɛ n gbɛɛ pimbi chen chɛ a, an ben‑da bui‑a. Mbɛ a‑a a 'a chɛɛ chɛ mɛ bɔ a sa a, a toen ni, a ni a wandi fa.

²⁸Chɛɛ Pɔɔ‑a yee tɛ wan a ma gbankon, a ɔ, “I ma i wandi fa gbama a, nn gbɛɛ yen ko nɛ.”

²⁹Mbɛ a‑a dambo ma chee, a don‑da nɔ. A sin, a ma samba sambaenɛ ɛ, a bea‑a wan Pɔɔ chen na, an fea Sidasi a.

³⁰Mbɛ a sɔ‑a an ya ɔ, a bɔ pimbi chen chɛ a. Mbɛ a ɔ, “Fa nu, n mbe fen ma gbɛ, bauncha ma sɔn koe a?”

³¹Mbɛ Pɔɔ an fea Sidasi a, an dɔ te, “I kai fa Mansa Chisɔsi a, mbɛ i‑a bauncha ma sɔn, a basan i 'a chen 'na mɔɛ n gbɛɛ a.”

³²Mbɛ sakana bai chɛ, a si mansa Chisɔsi ma, an‑na a sa a tena, a basan a 'a chen 'na mɔɛ n gbɛɛ a.

³³A tima dɔndɔ gbe chɛ kɔɔ yɛɛ chɛ ma, pimbi chen kun ma fɛn mɔɛ chɛ‑a an ya wan, mbɛ a‑a an ma gba tena n na ko fo. A sin, a ya kɔɔɛ a, Pɔɔ an fea Sidasi a, an‑na yii chɛ wan a kunɛ ɔ, Yataa chia a, a basan a 'a chen 'na mɔɛ n gbɛɛ a.

³⁴Mbɛ a sɛ‑a Pɔɔ, an fea Sidasi a, a waa chenɛ a, a‑a an da kɔ. Buɔdia wa ni wan a ɔ, a basan a 'a chen 'na mɔɛ n gbɛɛ a. Koe min na mu, an‑na an kai fa gbɛ Yataa a.

³⁵Banda ɔ ka‑a kɛn, Domi mansa chɛ n‑na poesi n na ta wan. An dɔ te, “Mɔɛ chɛ n boo ka, an ni ta.”

³⁶Mbɛ pimbi chen kun ma fɛn mɔɛ chɛ, a‑a bai chɛ ɔ yian Pɔɔ a, a ɔ, “Mansa n‑na sakana a na, mbɛ wo ni ta, wo fea Sidasi a. Chɛ an fɛ mu gbɛ, wo bɔ gbɛ, wo ni ta wo faa chimaenɛ a.”

³⁷Chɛɛ Pɔɔ‑a a fɔ wan an ye, a ɔ, “Nn ma ko kan kɔ kan yɔn ni, chɛɛ chɛ gbɛɛ ɔ, an‑na nn gbasi fanka ɔ den. Min gbu sin mu ka Domi mɔɛ tiki tiki mu nn na. Mbɛ an yɛ‑a to, an‑na nn na dɛ pimbi chenɛ a. Mbɛ sanche gbɛ an toen mu, an ni nn na bɔ pimbi chenɛ a, nun dɔ. Chɛ ee ma. Ɛ nyan fan, Domi mansa chɛ n fandi gbu, an ni na nn na bɔ.”

³⁸Mbɛ poesi mɔɛ chɛ n yɛ‑a wan, an‑na ko ɔ ko ɔ yian, Domi mansa chɛ n na. Mbɛ Domi mansa chɛ n chian‑da, an‑na bai chɛ a min kɛn, mbɛ Pɔɔ an fea Sidasi a, Domi mɔɛ nu mu.

³⁹Chɛ ko a, an ta‑a wan, mbɛ an koɔ‑a Pɔɔ n tena disa ɔ, an fea Sidasi a. Mbɛ an‑na a ma, an bɔ‑a pimbi chen chɛ a, an‑na an ma nande bɔ koe a, an duu chɛ ɔ.

⁴⁰Pɔɔ an fea Sidasi a, an bɔ‑a wan pimbi chen chɛ a, mbɛ an ta‑a wan Didia 'a chenɛ a. A sin, an suun ma nyɔɛ nu Chasi ɔ, an‑na an tan fan nɔ. An‑na an yen kɛn, an‑na an faa ma nande wan, mbɛ an bɔ‑a an duu chɛ ɔ, an ta‑a.