Read Kono CHISƆSI 'A SƆ MƆƐ NU 17 Bible Online

CHISƆSI 'A SƆ MƆƐ NU 17 - Kono bible

CHISƆSI 'A SƆ MƆƐ NU 17

¹Mbɛ Pɔɔ an fea Sidasi a, an ben‑da Anfipɔdisi duu ɔ chia a, an fea Apodonia duu a. Mbɛ an na‑a Tɛsadonika duu ɔ, Chu mɔɛ n 'na samun chɛ chenɛ ni kaina min.

²Mbɛ Pɔɔ don‑da nɔ, yɔ a ta manda ni buɛ min dɔ. A sin wichi sawa ko a, an bɛ an na, an ni koe n tɛnsɛ wan, an nyɔn tɛ ɔ, Yataa 'a gboo ɔ.

³A ni a ɔ yian fan chɛndɛ chɛ, an ni a ɔ gbɛ, mbɛ ɛ nyan‑da wan chɛ ni ma. Mbɛ kunka mansa chɛ ɛ tɔɔya ɔ bia‑a wan, a ni a kɔɔ sɔ a ka saya ɔ. Pɔɔ ni a fɔ wan, a ɔ, “Chisɔsi chɛ, n mbe min bakoe ɔ yian tena wo a, an mu kunka mansa a.”

⁴A sin, an dɔ n dan‑da wan a a, min‑na a ma, an bea‑a Pɔɔ fɛ, an fea Sidasi a. Kiisi mɔɛ n sɛsɛ wɛɛ, miin ni kooya be Yataa ma, an bɛɛ‑a a ma ka wan, an bɛ musu gbakoo sɛsɛ a.

⁵Chɛɛ toomaya faa chɛ‑a wan Chu mɔɛ n dɔ, min‑na a ma, an‑na tataya tɔɛ n na sɔn sɔn dani ma ben‑da, gbunɛ a bea koe a. An ben‑da wan duu ɔ yee tɛ‑a, mbɛ an‑na butuinɛ a bea kamin dɔndɔ 'a chenɛ a. Kamin chɛ tɔ ni Chason. A ni wan an yii ma, mbɛ Pɔɔ an fea Sidasi a, an ni an bɔ nɔ, mbɛ an ta‑a an 'na mɔɛ n tena baa ma.

⁶Chɛɛ an ma an yen ni kɛn, an bea‑a gbɛ Chason fan ma, mbɛ an‑na a konkon, a basan Chisianɛ dɔ n na. Mbɛ an na‑a an na duu ɔ gbakoo n tena, an dɔ, “Mɔɛ chɛ n fan‑na dunya gbɛɛ a mun mun ben‑da. Sanche gbɛ, an na‑a nɛ mmɔ 'a duu wɛɛ ɔ,

⁷Chason chɛ sin fan‑na a boo si an kɔɔ. An gbɛɛ sin, an mbe Domi kun ti wa 'a sawa n fan yɔn tena. An mbe a fɔ tena wan, mbɛ mansa dɔ mende ɛ wan nɔ, min benden mu a ma. An dɔ, a tɔ mu Chisɔsi.”

⁸Mɔɛ chɛ n gbɛɛ, an bɛ an 'na duu ɔ gbakoo chɛ n na, an faa bɔ‑a wan, bai chɛ a min koe a.

⁹Duu ɔ gbakoo chɛ n‑na Chason na bɔnɔ wan, an bɛ a bɔɛ n na, yɔ an 'na sawa‑a min fɔ, mbɛ an‑na an boo ka, an ta koe a.

¹⁰Pimbi ɛ bun‑da dechee, mbɛ mɔɛ miin‑na an kai fa Chisɔsi a, an‑na Pɔɔ a ta wan Bɛyia duu ɔ, an fea Sidasi a. An che‑a kɛn nɔ, an ta‑a wan Chu n 'na samun chɛ chenɛ a.

¹¹Mɔɛ miin ni Bɛyia, an ta mɔya kɔ ni gbɛ, a ben chɛ n ma, miin ni Tɛsadonika. Koe min na mu, a ma bɛndenɛ ni, an too ma sɔ koe a Yataa 'a bai ma. Pɔɔ ni ma koɔ‑a tee ɔ tee a, an ni Yataa 'a gboo ma mɛn fan, a ɔ sɔn koe a, ni tea mu.

¹²Chɛ ko a, Chu mɔɛ n sɛsɛ‑a an kai fa wan Chisɔsi a. A yɛ to, duu ɔ gbakoo n sɛsɛ, musu an bɛ kai n na, miin ni Kiisi mɔɛ n na, an bɛɛ‑a an kai fa wan a a.

¹³Chɛɛ Chu mɔɛ chɛ nu Tɛsadonika, an‑na a a min kɛn, mbɛ Pɔɔ ɛ Yataa bai sa‑a Bɛyia wɛɛ, an na‑a wan nɔ. Mbɛ an bun‑da mɔ fanka chɛ a sɛ‑a Pɔɔ ma, gbunɛ a bea koe a.

¹⁴A ya kɔɔɛ a, mɔɛ chɛ nu nɔ, miin‑na an kai fa ka Chisɔsi a, an‑na Pɔɔ a ta kɔ yii da a. Chɛɛ Sidasi an fea Timoti a, an to‑a wan Bɛyia.

¹⁵Mɔɛ miin ta‑a Pɔɔ ma sɔ‑a, an ta‑a wan a a, aan a che Atɛnsi duu ɔ. Mbɛ Pɔɔ‑a mɔɛ chɛ n na yɛ Bɛyia, sakana chɛ a, an boo ɔ. A ɔ, an ni a fɔ, Timoti an fea Sidasi a, an ni na a san‑da, bui chɛ bui chɛ a.

¹⁶Tima min na Pɔɔ n ni an ma kɔn tena, na koe a, a faa yɔn‑da wan yama yama. Koe min na mu, a‑a a ɔ yen fan, mbɛ Atɛnsi duu a faen fan ni fania yataa n na.

¹⁷Chɛ ko a, a ni ma wan Chu n 'na samun chen chɛ a. An bɛ an na, an ni koe n tɛnsɛ wan, an nyɔn tɛ ɔ. Mɔɛ chɛ n bɛɛ, miin ni kooya be Yataa ma, an ni ma wan nɔ. A yɛ to, Pɔɔ ni ta wan machiti ɔ tee ɔ tee a, mbɛ a‑a koe n tɛnsɛ chɛ n tena, miin ni che ma‑a nɔ.

¹⁸Kan chɛ mɔɛ dɔ nu to, miin ni kanɛ chɛ a si Ɛpikuyian koe ma, ni dɔ nu, miin ni kanɛ chɛ a si Sitoiki koe ma,[20] an bɛɛ‑a Pɔɔ kɔɔsa bia wan. An dɔ, “Gboo kaa ma chɛ ɛ ka fen fɔ tena?” Mbɛ dɔ n sin‑na a fɔ, an dɔ, “Mɔɛ ɛ a yen, yɔ ɛ ka bai sa tena, a si sonda yataa n fan ma.” An‑na chɛ fɔ koe min na, Pɔɔ ni Yataa bai sa tena, a si Chisɔsi an ma, ni a kɔɔ sɔ koe a, a ka saya ɔ.

¹⁹Mbɛ an‑na Pɔɔ ɔ tisa, an dɔ, a ni na duu gbakoo chɛ n tena, miin ni bɛn kɔnkɔɛ chɛ bu kɔɔ, an ni min chee, an dɔ, Ayiopakɔsi kɔnkɔɛ. Mbɛ an dɔ te, “Nn toen mu nn ni a ɔ sɔn, ni i 'a kan nama chɛ sien mu fenɛ min ma.

²⁰Koe min na mu, nn sɛsɛ ma bai chɛ n na min nin bɛ, e ka miin fɔ tena. Chɛ an fɛ mu, nn toen mu, i ni an fasai nn ye.”

²¹Koe min na mu, Atɛnsi mɔɛ nu, ni sonda n bɛɛ miin ni nɔ, an gbɛɛ nii an 'na tima yɔn koe dɔ mende kan kɔ kan ma. An ni ma dechee bai n fan dɔ yian‑da, an mbe ta‑a an too ma sɔ‑a ko nama ma, tima ɔ tima ko a.

²²Mbɛ Pɔɔ sɔ‑a duu ɔ gbakoo chɛ n ya kɔɔ, mbɛ a ɔ, “Atɛnsi mɔɛ nu, n‑na a ɔ yen, mbɛ chia ɔ chia a, wo toen mu kaka yataa sɛsɛ fai koe a.

²³Koe min na mu, n mbe ma ben ben‑da wo 'a duu chɛ ɔ, n mbe fenɛ n yen fan, wo e miin fai. A yɛ to, n‑na gbengbe yen fan, yasi bɔ koe a, a nyɛndenɛ ɛ min ma, a ɔ, ‘Yataa tena, nn ma min sɔn.’ An Yataa chɛ, wo e min fai ka, chɛɛ wo sin ma a sɔn, n mbe ka gbɛ an bakoe ɔ yian tena wo a.

²⁴Yataa, min‑na dunya a dan, a basan fen kɔ fen na, miin mbe a ɔ, an mu Mansa Yataa a dunya chɛ ɔ ni banda a. A sin mbe ee ma chenɛ a, mɔ gbu ɛ min sɔ a boo a.

²⁵A sin, mɔ gbu boo ee ko chɛ a ko a, ni a toen mu ko kan kɔ kan na. A wan Yataa, an mbe fɔɛ be mɔɛ gbɛɛ ma, an mbe fia chɛ mɔɛ ɔ, a wan mbe fen kɔ fen be mɔɛ ma.

²⁶A‑a mɔ gbu gbɛɛ nyan dunya chɛ ɔ, a bɔ mɔ kaima dɔndɔ gbe an dɔ. Mbɛ a‑a an na fasan dunya chɛ gbɛɛ ɔ ben‑da. A wandi gbu sin fan‑na a ɔ bɛn, mbɛ mɔ gbu n ni ma dunya gbɛɛ ɔ. Mɔɛ n sin mbe kaina min chee an 'na chɛnyɛ n na, a wan‑na a ɔ bɛn to an ma koe a nɔ, an tima chɛ kɔɔ.

²⁷A‑a chɛ ma, min mbe a ma, an ni an ya a kan a a. Kɔkɔɛ an mbe a yen‑da wan, ni an‑na an boo mɛmɛ mɛmɛ. Chɛɛ Yataa gbu tena ɔ ma yansan, mmɔ dɔndɔ wɛɛ a.

²⁸A ɛ wan dechee, yɔ mɔ dɔndɔ na‑a a fɔ buɛ min dɔ, a ɔ, ‘A 'a gbasaya ɔ mu mmɔ ɛ ben ben, a yɛ to, mmɔ ɛ ma fɔɛ chɛ ɔ.’ A ɛ wan, yɔ wo 'a gboo nyɛn mɔ wa dɔ n‑na a fɔ buɛ min dɔ, an dɔ te, ‘Mbɛ tea gbu ko a, a 'a denɛ n mu mmɔ gbɛɛ a.’

²⁹Mmɔ mu gbɛ buɛ min dɔ Yataa 'a denɛ n na, mmɔ ma mmɔ yii na chii a bɔ nyɔɛ dɔ mende wa koe a. Mbɛ a bɔen mu fenɛ an na, min nyanden mu sanu ɔ, chɛ ma, kain gbɛ ɔ, chɛ ma, senɛ ɔ. Mɔ gbu wandi 'a yiinachii, a‑a miin nyan.

³⁰Tima min na ni wo nii ma a ɔ sɔn, wo ni koe miin ma tena, Yataa‑a a ya ka a nɛnɛ a. Chɛɛ sanche gbɛ, ɛ a fɔ tena mɔ ɔ mɔ ye, dunya gbɛɛ ɔ, mbɛ an ni an kan kɔ sɔ an 'na ko yama n na.

³¹Koe min na mu, a‑a tee yian, ɛ tea gbɛmbo chɛ‑a mɔ gbu gbɛɛ a, dunya ɔ tee min ma. Ɛ a ma‑a wan, a na‑a a boo sɔ mɔɛ min ma, a ni mɔɛ n gbɛmbo. A sin‑na yiinatɛ be wan mmɔ ma, a‑a a ma kɛn, kamin chɛ‑a a kɔɔ sɔ, a ka saya ɔ.”

³²An‑na a a min kɛn gbɛ, Pɔɔ‑a bai sa, a si mɔ gbu kɔɔ sɔ koe ma, a ka saya ɔ, dɔ n‑na a ma yɛn fan. Chɛɛ dɔ n sin, an dɔ, “Nn mbe to‑a wan to, nn ni bai a min, a si koe chɛ ma.”

³³Mbɛ Pɔɔ bɔ‑a an bɛn chɛ ɔ.

³⁴Mɔɛ dɔ n sa‑a wan a kaa a, mbɛ an‑na an kai fa Chisɔsi a. An mɔɛ chɛ n tɛ ɔ, mɔɛ ni wan nɔ min tɔ ni Diɔnisiɔsi, a sin ni gbakoo dɔndɔ an na bɛn chɛ ɔ. Musu dɔndɔ wɛɛ‑a a kai fa wan Chisɔsi a, min tɔ ni Damayisi, ni mɔ dɔ mende nu.