Read Kono CHISƆSI 'A SƆ MƆƐ NU 18 Bible Online

CHISƆSI 'A SƆ MƆƐ NU 18 - Kono bible

CHISƆSI 'A SƆ MƆƐ NU 18

¹Chɛ gbakɔ, Pɔɔ bɔ‑a wan Atɛnsi duu ɔ, mbɛ a ta‑a Kɔyindi duu ɔ.

²Kɔyindi ni, a‑a Chu mɔ dɔndɔ tan, min tɔ ni Akuida, a sin suun‑da Pɔndɔsi chɛnyɛ ɔ wan. A na nama ni ka, a ka Itadi chɛnyɛ ɔ, an fea a 'a musu Pisida a. Koe min na mu, Domi kun ti wa chɛ, min tɔ ni Kaudiyɔsi, a na‑a sawa a ben fan, mbɛ Chu mɔɛ n gbɛɛ ni bɔ Domi duu ɔ. Pɔɔ ta‑a wan an yen koe a,

³mbɛ an bɛ ni wan an na. Koe min na mu, an bɛ ni wai dɔndɔ gbe an chɛ. Pɔɔ ni a 'a daun fenɛ ma sɔn tɛndi nyan wai an dɔ, yɔ Akuida wɛɛ, an fea a 'a musu a.

⁴Suin tee kan kɔ kan ma, a ni koe tɛnsɛ wan mɔɛ chɛ n tena, Chu n 'na samun chɛ chen chɛ a. A sin, a ni butuin chɛ tena wan, Chu mɔɛ nu, an bɛ Kiisi mɔɛ n na, an yiima ni mun Chisɔsi tena.

⁵Sidasi an fea Timoti a, an na‑a kɛn a ka Masidonia chɛnyɛ ɔ, Pɔɔ‑a a 'a tima gbɛɛ be Yataa bai sa koe an na. A ni wan a fɔ tena Chu mɔɛ n ye, Chisɔsi an mu kunka mansa a.

⁶An‑na a kɔɔsa bia wan, mbɛ an‑na bai yama gbɛɛ sa a ma. An‑na chɛ ma kɛn, Pɔɔ‑a a 'a doma ɔ gbɔngbɔn fan, ma koe a dasi a an tena. Mbɛ a‑a a fɔ an ye, a ɔ, “Ni wo ma bauncha ma sɔn ni, wo ee wo tɛɛ si‑a to n ma. Wo e wo tɛɛ si‑a gbɛ wo wandi an ma. A ka gbɛ sanche ma, n mbe Yataa bai sa‑a gbɛ chɛ n fan tena, miin ma Chu mɔ a.”

⁷Mbɛ a bɔ‑a an tɛ ɔ, a ta‑a kamin dɔndɔ 'a chenɛ a, min nii ma Chu mɔ a. A tɔ ni Titiyɔsi Chɔsitɔsi, min ni Yataa fai mɔɛ a. A 'a chenɛ ni Chu n 'na samun chɛ chen chɛ baima wan.

⁸Chɛ gbɛɛ ɔ, Kisipɔsi, ni a 'a chen 'na mɔɛ n gbɛɛ, an‑na an kai fa wan gbɛ Mansa Chisɔsi a. Kisipɔsi chɛ ni ya ɔ sɔɛ an na, Chu n 'na samun chɛ chenɛ a. Mɔ sɛsɛ nu Kɔyindi duu ɔ, an‑na sakana bai chɛ a min kɛn Pɔɔ a, an dan‑da wan a a, mbɛ yii chɛ‑a an kunɛ ɔ, Yataa chia a.

⁹Yɛɛ dɔndɔ ma, Mansa Yataa‑a koe ɔ yian fan Pɔɔ a, yɔ a ni cho an dɔ. Yataa‑a a fɔ wan Pɔɔ ye, a ɔ, “Pɔɔ, i ma chian, koe min na mu, n mbe i fɛ. Mɔ ɔ mɔ ee che ko yama ma‑a i a. E Yataa bai sa min na, a a tun, i ma sɛmbɛ. Koe min na mu, mɔ sɛsɛ n mbe wan nɛ duu chɛ ɔ, miin mu n 'na mɔɛ n na.”

¹¹Chɛ ko a, Pɔɔ ni wan Kɔyindi duu ɔ, san dɔndɔ ni a tɔ, ɛ nɔ mɔɛ n kan‑da Yataa 'a bai n na.

¹²Chɛɛ an‑na Kadio ma tima min na kɔfana a, Akaya chɛnyɛ kun ma, Chu n‑na kuiɛ a kanɛ chɛ Pɔɔ ma, mbɛ an‑na a bia, an na‑a a a kɔfana chɛ 'a kuti ɔ.

¹³Mbɛ an dɔ, “Kamin chɛ toen mu, a ni a ma mmɔ 'a mɔɛ n yiima ni mun, Yataa fai gbee dɔ mende ma, mmɔ 'a sawa ma dɔn ni min ma.”

¹⁴Chɛɛ Pɔɔ toen ni kɛn a ni koɔ, Kadio‑a a fɔ wan Chu chɛ n ye, a ɔ, “Wo wan Chu nu, a ni nyan‑da wan, n ni n too ma sɔ wo ma. Ni kamin chɛ na‑a sawa an yɔn, chɛ ma, a ni ko yama wa ma.

¹⁵Chɛɛ a sien mu ka buɛ min dɔ kɔɔsa bia ma, bai n dɔ, a basan tɔɛ n na, ni wo ta Chu sawa nu, wo wandi an mbe bai chɛ nɛnɛ sa tena. N fan mbe ee kaa a tɛ tena, a si ko bonda chɛ n ma.”

¹⁶Mbɛ a‑a an gbain, an kuti gbu ɔ.

¹⁷Mbɛ an gbɛɛ bea‑a Sositɛnesi ma gbasi a, min ni ya ɔ sɔɛ a, Chu n 'na samun chɛ chenɛ kun ma. An‑na a gbasi wan, kuti chenɛ gbu ya kɔɔ. Chɛɛ Kadio‑a a ka wan a too kɔ.

¹⁸Koe chɛ maenɛ gbakɔ, Pɔɔ ni wan Kɔyindi tee kuun ko a. Mbɛ a‑a a saa suun ma nyɔɛ chɛ n na nɔ Chasi ɔ, a si‑a dɛndɛ ɔ, an bɛ Pisida an fea a chɛɛ Akuida a, ta koe a Siyia chɛnyɛ ɔ. An mbe e na to si‑a dɛndɛ ɔ, a ka Sɛnkea duu ɔ, an‑na a kunɛ gbanan fan. Koe min na mu, a na‑a a kai wan tee a kɔma a, Yataa tena.

¹⁹An che‑a kɛn Ɛfisɔsi duu ɔ, Pɔɔ n tɛ du‑a wan Pisida, an fea a chɛɛ Akuida a. A ta‑a wan Chu n 'na samun chɛ chen chɛ a, koe n tɛnsɛ koe a, an bɛ Chu mɔɛ chɛ n na nɔ Ɛfisɔsi.

²⁰An‑na a ɔ tisa kɛn, a ma koe a nɔ tima ɔ yansama ko a, a nii ma dɔn ni.

²¹Chɛɛ a ni kɛn a saa an na, a‑a bai chɛ an fɔ an ye, a ɔ, “Ni Yataa dɔn‑da, n mbe yɛ‑a wan to wo tena.” Mbɛ a si‑a dɛndɛ ɔ, a ka Ɛfisɔsi, mbɛ a ta‑a.

²²A che‑a kɛn Sisayea duu ɔ, a bɔ‑a wan dɛndɛ ɔ, mbɛ a sɛ‑a Chuusaɛn. A che‑a kɛn nɔ, a‑a chɔchi mɔɛ n kɔndɔn fan, mbɛ a ben‑da, a ta Andiɔki duu ɔ.

²³A‑a tima ɛnden ya kɛn nɔ wɛɛ, a bɔ‑a wan nɔ, mbɛ a ta‑a Kadesia an fea Fichiya chɛnyɛ ɔ a. A ta‑a wan duu sɛsɛ ɔ, an chɛnyɛ chɛ n dɔ. A ni wan a ma tena, Chisɔsi fɛ mɔɛ n gbɛɛ, an dɔ ɛ gbɛa‑a.

²⁴A tima chɛ a, Chu mɔ dɔndɔ, min tɔ ni Apɔdɔsi, min suun‑da Adɛsandia duu ɔ, a na‑a wan Ɛfisɔsi duu ɔ. A ni kosan kaka bai sa a, a sin to, a‑a Yataa 'a gboo ɔ gbɛ wan chɛndɛ chɛ.

²⁵A kanden fan ni gbɛ, chia chɛ ma, Mansa Chisɔsi‑a min yian. A sin ni bai sa wan a si Chisɔsi ma, a sɔɛ gbɛɛ a, paa ee a ma. A‑a chɛ ma wɛɛ, chɛɛ a‑a koe chɛ an dɔ gbɛ dechee, min sien ni yii chɛ ma mɔɛ n kunɛ ɔ, Yataa chia a, Chɔn na‑a min fɔ.

²⁶A‑a a kuu sɔ wan koɔ‑a, faagbɛa a, Chu n 'na samun chɛ chen chɛ a. Chɛɛ Pisida an fea a chɛɛ Akuida a, an‑na a da a bai chɛ a min kɛn, an‑na a ya wan, an ta‑a a a an 'na chenɛ a. Mbɛ an‑na chia chɛ wakoe ɔ yian a a chɛndɛ chɛ, Yataa‑a min yian.

²⁷Chɛ gbakɔ, a toen ni kɛn a ni ben Akaya chɛnyɛ ɔ, suun ma nyɔɛ chɛ nu Chasi ɔ, an‑na a faa ma nande wan. Mbɛ an‑na gboo nyɛn an suun ma nyɔɛ chɛ n tena Akaya, an dɔ, an ni an boo si a kɔɔ chɛndɛ chɛ. A che‑a kɛn Akaya, a basan‑da wan mɔɛ chɛ n ma kaka, miin na‑a an kai fa Chisɔsi a, koadia demanɛ 'a gbasaya ɔ, Yataa ɛ min chɛ.

²⁸Koe min na mu, a ni ma koe n tɛnsɛ‑a, Chu mɔɛ n nii sɔ a a ɛnden bɛɛ a. A‑a a ɔ yian fan an na, a ka Yataa 'a gboo ɔ, mbɛ kunka mansa mu Chisɔsi an na.