Read Kono CHISƆSI 'A SƆ MƆƐ NU 20 Bible Online

CHISƆSI 'A SƆ MƆƐ NU 20 - Kono bible

CHISƆSI 'A SƆ MƆƐ NU 20

¹An gbun chɛ ɔ chima‑a kɛn, mbɛ Pɔɔ‑a Chisɔsi fɛ mɔɛ chɛ n chee kaina dɔndɔ. A ban‑da kɛn an faa chima bai fɔ‑a an ye, a‑a a saa wan an na. Mbɛ a‑a an to, a ta‑a Masidonia chɛnyɛ ɔ.

²A ben ben‑da wan Masidonia chɛnyɛ chɛ gbɛɛ ɔ, ɛ ta‑a nɔ mɔɛ chɛ n faa ma nande‑a bai sɛsɛ a. Mbɛ a ka‑a nɔ, a ta‑a Kiisi chɛnyɛ ɔ,

³a ni kaina kau sawa ko a. A ɛ gbɛ a ma bɛn tena wan, ta koe a Siyia chɛnyɛ ɔ dɛndɛ ɔ, mbɛ a‑a a ɔ gbɛ, mbɛ Chu mɔɛ n ni dɔbɛnɛ an dɔ, a fa koe a. A wɛɛ‑a a yiima mun fan, mbɛ a yɛ‑a to Masidonia.

⁴Kai Piyɔsi 'a den kaienɛ Sopata, min ka‑a Bɛyia duu ɔ, a bea‑a wan Pɔɔ fɛ, mbɛ an fea ta‑a a a. Mɔ dɔ mende nu, miin bɛɛ bea‑a a fɛ, an fan nii nɛ, Ayisitakɔsi a, an fea Sɛkundɔsi a, miin ka‑a Tɛsadonika duu ɔ. A yɛ to, ni Kayɔsi, min ka‑a Dabi duu ɔ, an fea Tikikɔsi a, ni Tɔfimɔsi miin ka‑a Esia chɛnyɛ n dɔ. Mɔɛ dankama ni Timoti an na.

⁵An fan ta‑a nn ya ɔ, mbɛ an‑na nn ma kɔn Towasi duu ɔ.

⁶Chɛɛ biidi dɛnfɛ daun bɛn ba chɛ ben‑da kɛn, nn si‑a wan dɛndɛ ɔ, a ka Fiipai duu ɔ. Tee duu gbakɔ, nn‑na an tan fan Towasi, nn ni kaina tɛn sɔngbɔ dɔndɔ ko a.

⁷Tɛnɛ kan kɔ dɔɛ ma, nn bɛn‑da wan kaina dɔndɔɛ, daun chɛ koe a.[23] Pɔɔ‑a Yataa bai sa wan mɔɛ chɛ n tena. A toen ni ben koe an na, a banda ka. Chɛ an fɛ mu, a koɔ‑a wan an tena, aan su ta‑a a tɛ ma.

⁸Dambo sɛsɛ a manden fan ni, banda a chen chɛ a, nn ni ka kaina bɛnɛ chɛ ɔ.

⁹A tima chɛ a, kamin tɔngbɔ dɔndɔ ni wan nɔ, min tɔ ni Yutikɔsi. Pɔɔ ni koɛ chɛ gbɛɛ chɛ tena tima min na, a ni si ɔ wunda a wan, a gbu chinɔenɛ ɛ. Mbɛ Pɔɔ che‑a kaina wan, Yutikɔsi boo tɛ‑a wunda chɛ a, mbɛ a bea‑a duu ma, a bɔ chenɛ chɛ si tena sawa chɛ ɔ. An mbe gbɛ a ya‑a, a faenɛ ni don.

¹⁰Chɛɛ Pɔɔ yii‑a wan nɔ duu ma, mbɛ a‑a a ma bun su chɛ kun ma. Mbɛ a‑a su chɛ bia a boo fea a, a ɔ, “Wo ma wo faa gbaa, a ɛ fɔɛ ɔ.”

¹¹Mbɛ a sɛ‑a to banda a chen chɛ a, a‑a biidi tɛ kai, mbɛ an bɛ gbɛɛ‑a a daun kaina dɔndɔ. A to‑a wan koɔ‑a an tena, aan banda ɔ ka‑a, mbɛ a ta‑a.

¹²Pɔɔ ta‑a kɛn, mɔɛ chɛ n‑na kamin tɔngbɔɛ chɛ ya wan, a chɛndɛ chen, an ta‑a a ma sɔ‑a a waa a. Chɛ‑a an bu ɔ dia wan, a ɔ benden ba a.

¹³Pɔɔ na‑a dɔbɛnɛ chɛ wan nn na, mbɛ a ɛ ta‑a nn ya ɔ, a chenɛ ma, Asɔsi duu ɔ. A ɔ, nn sin tana, nn ni si dɛndɛ ɔ, a ta Asɔsi, a ya ɔ. A ɔ, a ɛ nn tan‑da nɔ wan, mbɛ nn ta‑a a ya ɔ.

¹⁴A‑a nn tan kɛn Asɔsi duu ɔ, a sɛ‑a wan dɛndɛ ɔ nn kun ma, mbɛ nn bɛ ta‑a Mitidene duu ɔ.

¹⁵Nn ka‑a wan nɔ dɛndɛ ɔ, mbɛ nn ta‑a Kiɔsi ya teen ma, tee dɔndɔɛ ma. Tee dɔndɔ gbakɔ to, nn che‑a wan dɛndɛ ɔ Samɔsi yii tinɛ ɔ. Nn chi‑a nɔ wan. Mbɛ banda ɔ ka‑a kɛn, nn che‑a wan gbɛ Midetɔsi duu ɔ.

¹⁶Pɔɔ yiima ɔ bɛnden fan ni, a ni Ɛfisɔsi ma sangba. Koe min na mu, a nii ma to ni tima kan kɔ kan yayi koe a Esia chɛnyɛ ɔ. A toen ni tachɛ a gbandi ma an chɛ koe a. Ni a ni bɛn fan, a ni che Chuusaɛn duu ɔ, tee chɛ ma, an ni min chee Pɛndekɔsi.

¹⁷Pɔɔ to‑a Midetɔsi wan, mbɛ a‑a sakana a ta Ɛfisɔsi chɔchi gbakoo n tena, an na koe a, a tan‑da.

¹⁸An che‑a kɛn Pɔɔ ma, a‑a a fɔ wan an ye, a ɔ, “Wo‑a a ɔ yen fan, n ni buɛ min dɔ wo tɛ ɔ, tima ɔ tima ko a. A ka n 'na tee saa saa ma Esia chɛnyɛ chɛ ɔ, aan a sɔ n ka tee ma nɔ.

¹⁹Chu mɔɛ n‑na kun puinɛ chɛ wan, a yama boo a, a si n ma. Chɛɛ n‑na n fandi ma yii wan, n‑na wai chɛ wan Mansa Chisɔsi ko a, di ni wɛɛ n ya a, n faa wɛɛ yɔndenɛ ɛ, a si ko ma gbaaen chɛ n ma, Chu mɔɛ n‑na min sa n ma.

²⁰Wo‑a a ɔ sɔn fan to, mbɛ n ma ko ɔ ko ɔ nun ni wo ma, n ni ma Yataa bai sa‑a wo tena. Chɛɛ fanka ɔ den, a basan wo 'a chenɛ n bɛɛ a, n‑na wo kan fan koe n na, miin mu demanɛ a wo tena.

²¹N‑na dasi gbau gbau be wan Chu mɔɛ n ma, ni miin bɛɛ ma Chu mɔ a, a si an kan kɔ sɔ koe a, an 'na ko yama n na, an ni an ya a mun Yataa ma. A yɛ to, a si an kai fa koe ma mmɔ 'a mansa Chisɔsi a.

²²Sanche gbɛ sin, n yen ko, n mbe ee che Yataa Nyina da a kuiɛ bɔ a ɔ, n mbe ka ta‑a Chuusaɛn duu ɔ wan. N gbu ma a ɔ sɔn, koe min mbe n tan‑da nɔ.

²³Mɔɔ dechee Yataa Nyina ɛ min fɔ tena n ye, duu kan kɔ kan dɔ, n mbe ta min dɔ. Mbɛ tɔɔya sɛsɛ, a basan pimbi chenɛ a sa a, ɛ wan n ya ɔ.

²⁴Chɛɛ ni n 'na wai chɛ koe mu, n ma n ta fɔɛ chɛ ya ni fen kɔ fen na. Wai chɛ, Mansa Chisɔsi‑a min be n ma, n ni a a ban koe mu. N ni sakana bai chɛndɛ chɛ ɔ yian mɔɛ n na, a si Yataa 'a koadia demanɛ ma.

²⁵“A sin, a yen ko gbɛ, n‑na chɛ ɔ sɔn. Mbɛ n ben ben‑da wo wɛn gbɛɛ tɛ ɔ, n mbe ta‑a koɔ‑a wo tena, a si Yataa 'a mansaya ma, wo dɔndɔ wɛɛ ee na‑a n yen‑da to.

²⁶Chɛ an fɛ mu gbɛ, n mbe chɛ ma din tena wo tena bi. Mbɛ ni wo dɔndɔ wɛɛ nɛ, wo ma bauncha ma sɔn ni, wo ee na‑a wo tɛɛ si‑a n ma.

²⁷Koe min na mu, n ma ko kan kɔ kan dɔ nun ni wo ma, a si koe n gbɛɛ ma, miin mbe Yataa yii ma, an ma koe a.

²⁸Wo wo wandi kun ma fɛn, ni mɔɛ chɛ n gbɛɛ, Yataa Nyina‑a miin kai fa wo a. Wo Yataa 'a chɔchi mɔɛ n kun ma fɛn. Yataa gbɔgbɔɔ denɛ, Chisɔsi, a ta wii min bɔn‑da, a fa tima a, an‑na a ma, chɔchi mɔɛ chɛ n ma‑a a wan Yataa ta mɔɛ n na.

²⁹N‑na a ɔ sɔn fan, mbɛ ni n ta‑a, fania kan chɛ mɔɛ n mbe na‑a wan n gbaa. An mbe ma‑a wan, yɔ nya fenɛ nu wo tɛ ɔ, a sin, an mbe ee sai bɔ‑a, wo 'a mɔɛ n na.

³⁰A sin, tima ɛ che‑a wan, mɔɛ dɔ n ni bɔ wo wandi gbu tɛ ɔ, miin mbe bai n fɔ‑a, miin mbe ee a chia ma. An mbe chɛ ma‑a wan, mɔɛ dɔ n ka koe a Chisɔsi 'a chia ma, an ni bea an fɛ.

³¹Chɛ an fɛ mu, wo wo wandi kun ma fɛn, mɔ bonda chɛ n boo ɔ. Wo wo yii na chii, mbɛ su ɔ tee a, n ni wo a si wan. N‑na chɛ ma wan san sawa ko a, di a n ya a.

³²“Sanche gbɛ, n mbe wo kai fa tena Yataa an na. Wo a a tun dan koe a sakana bai chɛ a, a si Yataa 'a koadia demanɛ chɛ ma wo tena. Ɛ kun fan, a ni a ma, wo 'a danaya n dɔ ni gbɛa. A yɛ to, ɛ kun fan, a ni dua chɛ be wo ma, min mbe Yataa boo ɔ, a 'a mɔɛ n gbɛɛ ko a.

³³N nii ma to ni, mɔ ɔ mɔ ta boo fen kan kɔ kan na.

³⁴Wo wandi gbu‑a a ɔ sɔn fan, mbɛ n fandi gbu 'a taa sende, n mbe an daun, nn bɛ chɛ n na, miin mbe n fɛ.

³⁵N‑na a ɔ yian fan wo a, chia ɔ chia a, mɔɛ ɛ wai chɛ buɛ min dɔ a boo a, basan koe a mɔɛ n ma, boo ee miin ma, an ma koe chɛ koe a. Mmɔ yii ɛ ma‑a wan bai chɛ kɔ, Mansa Chisɔsi na‑a min fɔ, a ɔ, ‘Dua ɛ fenɛ be mɔɛ ma kaka, a ni ben a bia mɔɛ ma.’ ”

³⁶Pɔɔ ban‑da kɛn koɔ‑a ka mɔɛ chɛ n tena, a‑a a kumbai gbangban fan, an bɛ gbɛɛ an na, mbɛ an‑na samunɛ chɛ Yataa tena.

³⁷A sin, an ni kɛn an saa a a, an gbɛɛ gbaun‑da wan di a, an bea‑a a kaa ɔ, koadia wa ɔ.

³⁸Pɔɔ‑a bai min fɔ an ye, an gbu‑a an faa mɔnɛ kaka. A‑a a fɔɛ min chɛ, a ɔ, an mbe ee na‑a an nyɔn yen‑da to. Mbɛ an ta‑a a ma sɔ‑a, dɛndɛ tena, an kɔ yii da a.