Read Kono CHISƆSI 'A SƆ MƆƐ NU 22 Bible Online

CHISƆSI 'A SƆ MƆƐ NU 22 - Kono bible

CHISƆSI 'A SƆ MƆƐ NU 22

¹A ɔ, “Fa nu, n suun ma nyɔɛ n gbɛɛ, wo wɛn na sɔndenɛ ɛ nɛ bi, wo wo too ma sɔ n ma, n mbe koɔ n fandi ko a.”

²An‑na a min kɛn, ɛ koɔ‑a an fandi ta chɛnyɛ koɛ ɔ, an‑na a ɔ maun fan gbɛ don. Mbɛ Pɔɔ‑a a 'a bai sa a tun an tena, a ɔ,

³“Chu mɔɛ mu n na. N suun‑da Tasɔsi wan, Sidisia chɛnyɛ ɔ. Chɛɛ n bɔ‑a a ɔ nɛ wan, Chuusaɛn chɛ. Kamadiɛɛ 'a kan denɛ ni n na. A‑a n kan fan chɛndɛ chɛ, mmɔ bemba n ta bemba n ta sawa bia koe a gbau gbau gbu a. A sin, n‑na n fandi be wan, Yataa 'a wai chɛ koe a, n faa gbɛɛ a, n sɔɛ a. N bankan‑da wan, Yataa 'a wai chɛ koe a, yɔ wo wɛɛ, wo wɛn mbe ka bi nɛ.

⁴N‑na mɔnɛ sɛsɛ sa wan mɔɛ chɛ n ma, miin na‑a a sɔ chia chɛ fɛ, Chisɔsi‑a chia min yian, a sɔ koe a a fɛ. N‑na a ma wan, an‑na saya ma sɔn. N‑na an bia wan, kai nu, an bɛ musu n na, n‑na an sa pimbi chenɛ a.

⁵Chu n tɛ mɔ wa Yataa a, ni Chu kuti wa ɔ mɔɛ n gbɛɛ, an mbe kun fan an ni siiya bɔ chɛ ma. N‑na gboo nyɛndenɛ ma sɔn, a ka an fan na, ta koe a mmɔ suun ma nyɔɛ n tena, Damasikɔsi duu ɔ. A sin, n ni ta tena nɔ, chɛ n bɛɛ bia koe an na, n ni na an na, an chiienɛ ɛ, Chuusaɛn duu ɔ, an tɔɔya koe a.

⁶“N to‑a ben ben‑da an tachɛ ɔ, mbɛ n che‑a Damasikɔsi baima. Tee cheenɛ ni a kun tɛ, a sin, man ba sɔ‑a wan, a‑a n na bɛn a ka banda a.

⁷A sin, n bea‑a wan duu ma, mbɛ n‑na mɔɛ kuiɛ a min, ɛ a fɔ‑a n ye, a ɔ, ‘Sɔɔ, Sɔɔ, fen mu e ko ma gbaaenɛ sa tena ka n ma?’

⁸“Mbɛ n‑na a fɔ, n dɔ te, ‘Nyɔn mu chɛ a?’ “Mbɛ a ɔ te n ma, ‘N fan mu, n fan Chisɔsi, min ka‑a Nasaɛti duu ɔ, e ko ma gbaaenɛ sa tena ka min ma.’

⁹Nn bɛ ni mɔɛ miin na, an‑na man chɛ yen fan gbɛ, chɛɛ mɔɛ chɛ min ni koɔ tena n tena, an nii ma a kuiɛ chɛ ɔ gbɛ ni ɛnden bɛɛ a.

¹⁰“Mbɛ n‑na dɔ tisa chɛ wan, n dɔ te, ‘Mansa, n mbe fen ma gbɛ?’ “Mbɛ Mansa Chisɔsi ɔ te n ma, ‘I kɔɔ sɔ, i ni don Damasikɔsi duu ɔ. E ma‑a nɔ wan, mbɛ ko ɔ ko ɔ yian‑da i a, Yataa‑a koe min dɔ bɛn i ko a, a ma koe a.’

¹¹Man ba chɛ‑a a ma wan, n nii che to kaina yen‑da. Chɛ‑a a ma wan, nn bɛ ni ka mɔɛ miin na, an‑na n boo bia wan, an don‑da n na Damasikɔsi duu ɔ.

¹²“Damasikɔsi duu chɛ ɔ, kamin dɔndɔ ni wan nɔ, min tɔ ni Ananiyasi. A ni mɔɛ an na, min ni Yataa fai a faa gbɛɛ a, a sin ni koe chɛ n gbɛɛ ma wan, Chu n 'na sawa‑a miin fɔ. Chu mɔɛ n gbɛɛ Damasikɔsi, an mbe basɔmaya be wan a ma, a sɛmbɛnden na.

¹³Mbɛ an Ananiyasi chɛ, a na‑a wan n tena, mbɛ a sɔ‑a n baima. Mbɛ a‑a a fɔ n ye, a ɔ, ‘N suun ma nyɔɛ Sɔɔ, i ya a ni ka.’ Mbɛ a ya kɔɔɛ a, bai chɛ fɔ tima kɔɔ, n ya a ka‑a, mbɛ n‑na a yen.

¹⁴Mbɛ a ɔ, ‘Yataa, mmɔ bemba n ta bemba n ni min fai, an‑na a boo sɔ bi i ma, i ni a faa ma koe ɔ sɔn. Chɛ ni a ma, i ni mɔɛ chɛ yen, min tanden mu Yataa tena gbeden, a yɛ to, i ni bai a min, min mbe bɔ‑a a da ɔ.

¹⁵Koe min na mu, a toen mu i ni ma siiya a a ko a, mɔɛ gbɛɛ tena dunya ɔ, a si koe chɛ ma, i‑a min dɔ yen, a basan chɛ a, i‑a min na min.

¹⁶A sin, e gbɛ fen ma kɔnun tena? I kɔɔ sɔ, i ni Mansa Chisɔsi chee basan koe a i ma, mbɛ yii chɛ‑a i kunɛ ɔ, Yataa chia a, i ni ko fion, a bɔ i 'a ko yama n dɔ.’

¹⁷“N yɛ‑a kɛn Chuusaɛn duu ɔ, mbɛ n bun‑da samunɛ chɛ‑a, Yataa 'a kata ɔ. Mbɛ a ma‑a, yɔ n ni cho ɔ wan,

¹⁸mbɛ n‑na Mansa Chisɔsi yen. A ni wan a fɔ tena n ye, a ɔ, ‘A a gbandia, i ni bɔ dɔndɔ gbe nɛ chɛ Chuusaɛn duu ɔ. Koe min na mu, an mbe ee an boo si‑a bai chɛ kɔɔ, e miin fɔ‑a, a si n ma.’

¹⁹“Mbɛ n dɔ te, ‘Mansa, an‑na a ɔ sɔn fan tea gbu a, n ni koe miin si i 'a mɔɛ n na. Nn 'na samun chɛ chenɛ kan kɔ kan na, n ni ta kaina, n ni an gbasi wan, n mbe yɛ, n mbe an sa pimbi chenɛ a, a si kaifa ma, an mbe min chɛ i a.

²⁰A sin, an ni kɛn Sitibin wii a bɔn‑da, min ni koɔ ka mɔɛ n tena a si i ma, n fandi gbu ni nɔ wan sɔ ɔ. N ni wan n kunɛ ɔ dondon‑da, a fa koe ma. A sin mɔɛ miin ni ka a fa tena, n ni wan an 'na doma n kun ma fɛn‑da.’

²¹“Mbɛ Mansa Chisɔsi‑a a fɔ n ye, a ɔ, ‘Ta, koe min na mu, n mbe i sɔ tena kaina ɔ yansama wan, pande, mɔɛ chɛ n tena, miin ma Chu mɔ a.’ ”

²²Mɔɛ chɛ nu, an‑na an too ma sɔ wan Pɔɔ ma, aan a che‑a bai chɛ kaina chɛ ma. Mbɛ an‑na yee tɛ, an dɔ, “Wo mɔ bonda chɛ ka dunya ɔ ka! Koe min na mu, a ma nyin, a ni ma fɔɛ chɛ ɔ!”

²³An‑na yee tɛ buɛ min dɔ, an ni an 'na doma n na meche meche ka wan banda a, mbɛ an yɛ‑a, an‑na gbangbanɛ a sɛ banda a, faatɛ ɔ Pɔɔ ma.

²⁴Mbɛ Domi mɔɛ soya n kun ti chɛ, a‑a a fɔ a 'a mɔɛ n ye, a ɔ, an ni ta Pɔɔ a baachi ɔ. A‑a a fɔ wan to an ye, a ɔ, an ni a gbasi pien bosa a, mbɛ an yɛ‑a, an‑na a ɔ tisa, ni fen‑na a ma, mɔɛ n mbe yee bonda chɛ tɛ tena ka a ma.

²⁵Chɛɛ an‑na a kuu sɔ kɛn a chii‑a yuu a, a gbasi koe a, mbɛ soya gbakoo chɛ, min ni ka nɔ sɔ ɔ, Pɔɔ‑a a ɔ tisa. A ɔ, “Mmɔ 'a sawa dɔnden fan mu a ma, Domi mɔɛ gbasi koe a bosa a pien, kaa a ma tɛ nin bɛ min ma, ko yama ma koe a?”

²⁶Soya gbakoo chɛ‑a bai chɛ a min kɛn, a ta‑a wan an kun ti tena, mbɛ a ɔ, “E fen ma‑a gbɛ? A yen ko, kamin chɛ mu Domi mɔɛ an na.”

²⁷Mbɛ soya n kun ti chɛ, a ta‑a Pɔɔ tena, mbɛ a ɔ, “Domi mɔɛ mu i a? A fɔ wɛ n ye, tea gbu a?” Mbɛ Pɔɔ‑a a fɔ, a ɔ, “Tea a, Domi mɔɛ mu n na.”

²⁸Mbɛ soya n kun ti chɛ, a‑a a fɔ Pɔɔ ye, a ɔ, “N tana, n‑na kɔpɔ chenama wa an be, ma koe a Domi mɔɛ a.” Pɔɔ sin dɔ te, “Chɛɛ n tana, Domi mɔɛ tiki tiki mu n na.”

²⁹Mbɛ a ya kɔɔɛ a, mɔɛ miin ma bɛndenɛ ni ka Pɔɔ ɔ tisa koe a, an gbɛɛ‑a an ma yɛ kuu kɔ, an ka‑a a baima. A sin, soya n kun ti chɛ wɛɛ, a chian‑da wan. Koe min na mu, a‑a a ɔ sɔn fan gbɛ, mbɛ a‑a yɔɔɛ chɛ Pɔɔ min ma, mbɛ Domi mɔɛ chɛndɛ chɛndɛ mu.

³⁰Chɛɛ an ban‑da ɔ ka dɔndɔɛ ma, soya n kun ti chɛ, a toen ni kɛn a ni a ɔ sɔn, koe min gbu na‑a a ma, Chu mɔɛ n‑na kunɛ si Pɔɔ kun ma, a‑a a fuin. Mbɛ Chu n tɛ mɔɛ nu Yataa a, an 'na mansa nu, a‑a a fɔ an ye, an bɛ Chu kuti wa ɔ mɔɛ n na, a ɔ, an ni na, an ni bɛn. An bɛn‑da kɛn, a yii‑a wan Pɔɔ a, a‑a a sɔ an chen kɔɔ.