Read Kono CHISƆSI 'A SƆ MƆƐ NU 28 Bible Online

CHISƆSI 'A SƆ MƆƐ NU 28 - Kono bible

CHISƆSI 'A SƆ MƆƐ NU 28

¹Nn kun bɔ‑a kɛn a ɔ, mbɛ nn‑na a ɔ gbɛ, mbɛ an yii tinɛ chɛ, an ni a chee, an dɔ, Mata.

²Mɔɛ miin sin ni nɔ an kaina chɛ, an‑na ko chɛndɛ min ma nn na, a ɔ gbɛ, an nyɔn sima a ɔ yen koe a. Koe min na mu, an‑na ta a dɛn fan, mbɛ an‑na an boo si nn gbɛɛ kɔɔ, buɔdia ɔ. Sona an ni na tena, a sin, kaina chimaen fan ni kaka.

³Pɔɔ‑a sɔ chii kai wan, a bun‑da a chɛ‑a ta chɛ a. Pɔɔ ni kɛn sɔɛ chɛ chɛ‑a ta chɛ a, mbɛ win chɛ‑a a ma, ka yama bɔ‑a, mbɛ a dɛn‑da a boo a.

⁴Duenɛ chɛ nu, an‑na ka chɛ yen kɛn, dɛn dɔ Pɔɔ boo a, an dɔ an nyɔn ma, an dɔ, “Mɔ fa mɔɛ an nɛ kamin chɛ a. Kɔɔsa bia ee chɛ ma. A bɔ‑a wɛɛ boo ɔ boo yii chɛ ɔ, a fɔɛ ɛ a sun da a, chɛɛ mmɔ 'a musu yataa, min mbe tea kaa a tɛ, a‑a a pawa. A kun mbe ee bɔ tena chɛ nɛnɛ ɔ.”

⁵Chɛɛ chɛ gbɛɛ ɔ, Pɔɔ‑a ka chɛ a fasi wan ta a. Ka chɛ kona ma ko ɔ ko ma ni a a.

⁶Mbɛ an bun‑da a ma kɔn‑da. A ni an yii ma, mbɛ a gboo ɛ fa fa‑a wan, chɛ ma, a ni bea duu ma, mbɛ a fa‑a. Chɛɛ an‑na a ma kɔn fan, tima ɔ yansama ko a, an nii ma a yen ni, ko yama kan kɔ kan ni Pɔɔ tan. Mbɛ an dɔ, yataa dɔndɔ mu a a.

⁷Mɔɛ min ni nɔ mansa a, an yii tin chɛ ɔ, a tɔ ni Pubiɔsi. Sɛnɛ wa ni wan a boo ɔ nɔ, nn baima tanda chɛ ɔ. A bu ɔ dia‑a kaka, a‑a nn yen kɛn. Nn ni wan a 'a sondaya a, tee sawa ko a, a sin‑na nn bia wan chɛndɛ chɛ.

⁸A tima chɛ a, nn‑na a wan Pubiɔsi fa tan fan sa ɔ gbandi ɔ. Chima an na‑a bɔn a ma, a basan wii chɛ a. A sin, Pɔɔ ta‑a wan a kɔndɔn‑da, mbɛ a‑a samunɛ chɛ a ma. A sin‑na a boo bun kɛn dechee Pubiɔsi fa gbandien chɛ ma, a gbu baun‑da.

⁹Chɛ sin ma‑a kɛn dechee, gbandi mɔɛ tɔɛ chɛ n gbɛɛ, an yii tin chɛ ɔ, an na‑a wan Pɔɔ tena, an sin baun‑da wan.

¹⁰An‑na boo fenɛ sɛsɛ be wan nn ma. A sin, nn 'na dɛndɛ ni ka tena nɔ tima min na, an‑na fen kɔ fen chɛ wan nn 'na dɛndɛ ɔ, nn toen ni miin na.

¹¹Kau sawa gbakɔ, nn bɔ‑a wan Mata, dɛndɛ ɔ, mbɛ nn ta‑a. An dɛndɛ chɛ, a na‑a ka Adɛsandia wan. An dɛndɛ chɛ sin, a tɔ ni Banda Bu Ɔ Fɛnɛ Nu. Dɛndɛ chɛ‑a chima tima gbɛɛ ya Mata wan, yii tinɛ chɛ ɔ.

¹²Nn che‑a wan duu dɔndɔ ɔ, min tɔ ni Siyakusi, mbɛ nn si‑a nɔ tee sawa ko a.

¹³Nn ka‑a Siyakusi kɛn, mbɛ nn che‑a Dekiɔn duu ɔ. Nn‑na tee dɔndɔɛ ben kɛn nɔ, fia bun‑da bɔ‑a, a ka tee bɔ boo nyima ɔ. Mbɛ tee fean bɔɛ ma, nn na‑a Putiɔdi duu ɔ.

¹⁴Suun ma nyɔɛ dɔ nu Chasi ɔ, nn‑na an tan fan nɔ, a sin, an‑na nn dɔ bia wan, ma koe a an 'na sondaya a, tɛn sɔngbɔ dɔndɔ ko a. Mbɛ nn danka‑a gbɛ na‑a Domi duu ɔ.

¹⁵A sin, suun ma nyɔɛ nu nɔ, Chasi ɔ, an‑na nn ma tɔɛ a min kɛn, an‑na nn tan. An na‑a wan nn ya ɔ, aan a che machiti chɛ ɔ, an mbe min chee, an dɔ, Apiyɔsi Machiti. An dɔ n sin, an na‑a wan, aan a che kaina chɛ, an mbe min chee, an dɔ, Sonda Yia Chen Sawa. Pɔɔ‑a an yen kɛn, a ma‑a wan a ma faachima a, mbɛ a‑a Yataa wai bɔ.

¹⁶A sin, nn che‑a kɛn Domi duu ɔ, an‑na a ma wan, Pɔɔ ma‑a a kun ma chenɛ a. Chɛɛ soya mɔɛ ya gba ni wan a fɛ.

¹⁷Tee sawa gbakɔ, Pɔɔ‑a Chu mɔɛ n kun ti n chee wan, miin ni Domi bɛnɛ ɔ. An bɛn‑da kɛn, mbɛ a‑a a fɔ an ye, a ɔ, “N suun ma nyɔɛ nu, n ma ko yama kan kɔ kan ma ni, mmɔ 'a mɔɛ n na, n ma mmɔ fa n 'na manda yɔn ni. Chɛɛ chɛ gbɛɛ ɔ, an‑na n ma wan pimbi chenɛ a sa mɔɛ a Chuusaɛn duu ɔ, mbɛ an‑na n be Domi mɔɛ n ma.

¹⁸An ban‑da kɛn n bakoe kɔɔ gbɛngbɛn‑da, an toen ni, an ni n boo ka. Koe min na mu, an nii ma chia kan kɔ kan yen ni, kaa a tɛ koe a, n ni saya ma sɔn.

¹⁹Chɛɛ Chu n‑na kɔɔsa bia chɛ kɛn chɛ ma, chɛ an‑na a ma, n bɛɛ, chia dɔ gbɛɛ nii n ye, fɔ n 'na bai a ta koe Domi kun ti wa tena. Chɛ ma‑a wɛɛ boo ɔ boo, chɛɛ chɛ ma a ɔ yian ni, mbɛ koe an ni n yii ma, n 'na mɔɛ n ko a.

²⁰Chɛ an fɛ mu gbɛ, n‑na wo chee, wo yen koe a, n ni koɔ wo tena. Koe min na mu, n boo ɔ chiien mu ka yɔɔɛ a, a si an koe chɛ an ma, Isɔɛɛ mɔɛ n yii na tɛen mu min ma.”

²¹Mbɛ an dɔ a ma, an dɔ, “Nn ma‑a gboo nyɛnden kan kɔ kan ma sɔn ni, a ka Chudia chɛnyɛ ɔ, a si i ma. A yɛ to, mmɔ suun ma nyɔ kan kɔ kan, a ma ka ni nɔ, a ni na i 'a siibia a, chɛ ma, a ni bai yama ɔ yian, a si i ma.

²²Chɛɛ chɛ gbɛɛ ɔ, nn toen mu, nn ni i wandi kanɛ ɔ kuiɛ a min, nn ni i ta yiima sɔn. Koe min na mu, koe min sien mu Chisian dɔbɛn chɛ ma, nn‑na a ɔ sɔn fan, mbɛ kan kɔ kan, mɔɛ n mbe a ma nyin fan.”

²³Mbɛ an‑na tee yian Pɔɔ a, an mbe bɛn tee min ma, a yia chenɛ a. An tee chɛ che‑a kɛn, an na‑a wan a tena, an da a koaen ba. Mbɛ a ka sau ma ma, aan yɛɛ ma tee a, Pɔɔ si‑a wan ko ɔ ko ma, a‑a a ɔ yian mɔɛ chɛ n na. Pɔɔ‑a bai ɔ yian fan, a si Yataa 'a mansaya ma, an yiima mun koe a Chisɔsi tena. A‑a bai chɛ bɔ sawa chɛ an dɔ, Yataa‑a miin be Mosisi ma, a basan gboo chɛ ɔ a, Yataa 'a gbonka chɛ mɔɛ n 'na gboo chɛ.

²⁴A sin, a 'a bai chɛ‑a a ma wan, an dɔ n yiima mun‑da Chisɔsi ma, chɛɛ dɔ n sin, an nii ma dan ni a da a kuiɛ chɛ a.

²⁵An mbe e na to bɔ‑a an bɛn chɛ ɔ, Pɔɔ danka‑a bai chɛ an ma an tena, a ɔ, “Yataa Nyina‑a tea an fɔ. A‑a chɛ fɔ wo bemba n ta bemba n fan ye, a‑a bai don kɛn Yataa 'a gbonka chɛ mɔɛ Aisaya da ɔ. Aisaya‑a a fɔ wan Yataa 'a gboo ɔ, a ɔ, ‘Ta Chu mɔɛ chɛ n tena, i ni a fɔ, i ɔ te, “Wo too gbu, ɛ koe a min‑da wan, chɛɛ wo ee ko ɔ ko ɔ gbɛ a, a sin, wo ya gbu, ɛ kaina yen‑da wan, chɛɛ wo ee ko ɔ ko ɔ gbɛ a. Koe min na mu, wo yiima a faen mu, wo too n sin sɔsɔenɛ mu, koe a min koe a, wo ya sin, wo‑a an na chii. Ni chɛ ma, wo ya n ni kaina ɔ yen‑da wan, wo too n ni koe a min, wo yiima ni koe ɔ gbɛ, a sin, wo e wo ya a mun‑da wan n ma, n sin, n fan Yataa, n mbe wo baun‑da wan.” ’ ” Mbɛ Pɔɔ ɔ te gbɛ, a ɔ, “A nyin wo ni a ɔ sɔn gbɛ, mbɛ Yataa 'a bauncha chɛ, a‑a a a che gbɛ mɔɛ chɛ n bɛɛ ma, miin ma Chu mɔ a. An sin mbe an too ma sɔ‑a wan.”[27] Mbɛ an bɔ‑a kɛn an bɛn chɛ ɔ, an gbɛɛ ni wan an nyɔn kɔɔsa bia‑a, mbɛ an ta‑a an baa (...)

³⁰San fea ko a, Pɔɔ ni wan nɔ Domi duu ɔ, an chen chɛ a, a wandi kun ma a a. A sin, a ni a boo si wan mɔɛ gbɛɛ kɔɔ, miin ni na a tena.

³¹A ni bai sa wan an tena, a si Yataa 'a mansaya ma. A yɛ to, a ni mɔɛ n kan fan, a si Mansa Chisɔsi Chasi ma. A nii chɛ ma nun dɔ, mɔ ɔ mɔ sin nii a a gban.