Read Kono CHISƆSI 'A SƆ MƆƐ NU 3 Bible Online

CHISƆSI 'A SƆ MƆƐ NU 3 - Kono bible

CHISƆSI 'A SƆ MƆƐ NU 3

¹Tee dɔndɔ a, Pita, an fea Chɔn na, an ta‑a wan Yataa 'a kata ɔ tee kɔ kai dɔndɔ ma, min ni Chu n 'na samun chɛ tima a.

²An che‑a kɛn nɔ kata chɛ ɔ, an ta‑a wan don koe a a da dɔndɔɛ a, an ni min chee, an dɔ, Kata Da Nyima. An kata chɛ da a, kamin dɔndɔ ni wan nɔ si ɔ. A namaaenɛ ni, a ka a suun tima ma. An ni ta wan an kamin chɛ a tee ɔ tee a kata chɛ da a, fenɛ fuin koe a mɔɛ n ma, miin ni na Yataa 'a kata chɛ ɔ, samun chɛ koe a.

³A‑a Pita yen kɛn don‑da, an fea Chɔn na, a‑a an disa wan, a ɔ, an ni fen den be a ma.

⁴Mbɛ an‑na an ya sɔ kamin chɛ a paden, mbɛ Pita ɔ, “Nn ma fɛn.”

⁵Mbɛ a‑a an ma fɛn. A ni wan a yii ma, mbɛ an mbe fen den be tena wan a ma.

⁶Chɛɛ Pita ɔ, “Kɔpɔ kan kɔ kan mbe ee n boo ɔ, a be koe i ma. Chɛɛ fenɛ min nɛnɛ ɛ n boo ɔ, n mbe a be‑a wan i ma. Chisɔsi Chasi min ka‑a Nasaɛti duu ɔ, a 'a gbasaya ɔ mu, n mbe a fɔ tena i ye, mbɛ i ni i kɔɔ sɔ, i ni tachɛ chɛ.”

⁷Mbɛ Pita‑a namaa tɔɛ chɛ ya, a boo nyima ma, mbɛ a basan‑da a ma, a sɔ koe a. A ya kɔɔɛ a, kamin chɛ samaa, an fea a chen kana n na, an dɔ gbɛa gbɛa‑a.

⁸Mbɛ a tin tin‑da, a sɔ‑a a wandi kun ma a a, mbɛ a bun‑da tachɛ chɛ‑a ben‑da. Mbɛ an bɛ don‑da Pita a, an fea Chɔn n na, Yataa 'a kata chɛ ɔ, ɛ ta ta‑a tin tin‑da, ɛ tachɛ‑a, ɛ ta‑a Yataa tando‑a.

⁹Mɔɛ miin gbɛɛ ni ka nɔ Yataa 'a kata chɛ ɔ, an‑na kamin chɛ yen fan tachɛ chɛ‑a, ɛ ta ta‑a Yataa tando‑a.

¹⁰Mbɛ an‑na a ma gbɛ, mbɛ kamin chɛ an nii nɛ, min ni si ka fen fuin tena Yataa 'a kata chɛ da a, an ni min chee ka, an dɔ, Kata Da Nyima. An gbɛɛ tɛnɛ‑a wan a a, mbɛ an da ɔ gbaa‑a, a si ko bonda chɛ ma, min ma‑a ka kamin chɛ a.

¹¹Kamin chɛ min baun‑da ka, a boo ni wan tun Pita a, an fea Chɔn n na. Mbɛ an che‑a kaina chɛ Yataa 'a kata ɔ, an ni min chee, an dɔ, Mansa Sɔɔmon 'na Pɛsa. Mɔɛ chɛ n gbɛɛ‑a bui sa wan a a an tena, an na fiienɛ ɛ.

¹²Pita‑a mɔɛ chɛ n yen kɛn an na tindanɛ, a‑a a fɔ an ye, a ɔ, “N bɔ Isɔɛɛ mɔɛ nu, kamin chɛ baun koe ma wo kɔndɔ fii. Wo ma nn ma fɛn ya dɔ mende a. A ma ma wo yii ma, mbɛ nn 'na gbasaya ɔ mu, nn‑na chɛ ma. An ma a fɔ ni, nn mbe a ma wan, Yataa faa ni chima kaka, min‑na a ma, nn‑na a ma kamin chɛ‑a tachɛ chɛ.

¹³Ebeami ni Yataa min fai, Aisaki ni min fai, Chekɔpi wɛɛ ni min fai, mmɔ bemba n ta bemba n bɛɛ n‑na Yataa min fai, an‑na basɔmaya wa chɛ be a 'a wai chɛ mɔɛ Chisɔsi ma. Chɛɛ wo to‑a wan nɔ, wo‑a a bia, mbɛ wo‑a a be ya ɔ sɔɛ n ma. Mbɛ wo yɛ‑a, Kɔfana Padeti chen kɔɔ, a ni a yii na chii tena kɛn Chisɔsi chɛ boo ka koe a, wo‑a kɔɔsa bia chɛ wan a wakoe ma.

¹⁴A ni tenchen Yataa 'a wai an ko a, a sin, a tanden fan ni Yataa tena. Chɛɛ chɛ gbɛɛ ɔ, wo ban‑da wan a ɔ, mbɛ wo‑a Kɔfana Padeti disa, wo ɔ, a ni a boo ka mɔ fa mɔɛ a wo ye.

¹⁵A sin, wo‑a Chisɔsi fa wan, gbasaya ɛ min boo ɔ, kuɔ fɔ fɔɛ be koe a. Chɛɛ Yataa‑a Chisɔsi gbu kɔɔ sɔ wan, a ka saya ɔ. Nn sin mbe siiya bɔ tena wan chɛ ma.

¹⁶Kaifa chɛ sin Chisɔsi a, an‑na a ma, namaa chɛ baun‑da ka. Wo kamin chɛ ma fɛn, wo gbɛɛ‑a a sɔn fan. Kaifa Chisɔsi a, an‑na a ma ka, kamin chɛ baun‑da fɛsɛ fɛsɛ, yɔ wo gbɛɛ‑a a ɔ yen buɛ min dɔ.

¹⁷“N suun ma nyɔɛ nu, n‑na a ɔ sɔn fan gbɛ, mbɛ ko ɔ gbɛ waiya an‑na a ma, wo‑a chɛ ma Chisɔsi a. An‑na a ma, wo 'a ya ɔ sɔɛ n bɛɛ‑a a ma.

¹⁸Chɛɛ Yataa wandi na‑a min fɔ suun, an bɔ‑a ka a a. A na‑a a don fan a 'a gbonka chɛ mɔɛ n gbɛɛ da ɔ, mbɛ a 'a kunka mansa ɛ mɔnɛ ɔ bia‑a wan.

¹⁹Chɛ an fɛ mu, wo wo kan kɔ sɔ wo 'a ko yama n na, mbɛ wo‑a wo ya a mun Yataa ma, min mbe a ma, a ni a boo bɔ wo 'a ko yama n dɔ.

²⁰Ni wo‑a chɛ ma, Mansa Yataa ɛ wo faa ma nande‑a wan, mbɛ a‑a Chisɔsi a na to wo tena, a na‑a a boo sɔ kunka mansa min ma, na koe a, a ni wo baun.

²¹Chisɔsi chɛ ɛ to‑a banda bu ɔ wan, aan tima ni che, tima min na Yataa ɛ fen kɔ fen nyan‑da to a nama a. Ɛ ma‑a wan, yɔ a 'a gbonka chɛ mɔɛ chɛ nu, miin ni tenchen a ko a, an‑na a gbonka buɛ min dɔ suun.

²²Mosisi wɛɛ na‑a a fɔ wan suun, a ɔ, ‘Wo 'a mansa Yataa, ɛ a 'a gbonka chɛ mɔɛ a na‑a wan wo tena, yɔ a‑a n na na buɛ min dɔ, wo tɛ ɔ. A sin mbe ma‑a wo chɛnyɛ nyɔɛ an na. Wo wo too ma sɔ koe gbɛɛ ma, ɛ miin fɔ‑a wo ye.

²³Ni mɔ ɔ mɔ sin ma an gbonka chɛ mɔɛ chɛ da a kuiɛ a min ni, Yataa ɛ a mɔɛ chɛ bɔ‑a wan a 'a mɔɛ n tɛ ɔ, mbɛ a‑a a mɔɛ chɛ kasaa.’ ”

²⁴Mbɛ Pita‑a a fɔ to, a ɔ, “A ka Samɛɛ ma, aan a ta, Yataa 'a gbonka chɛ mɔɛ tɔɛ n gbɛɛ na‑a bai sa wan, a si koe chɛ n ma, miin mbe ka bi ma tena sanche.

²⁵Yataa‑a wo too ɔ dia koe miin na, a 'a gbonka chɛ mɔɛ chɛ n da ɔ, an gbɛɛ n mbe wo wan ko a. Yataa‑a dɔbɛnɛ min bɛɛ chɛ, wo bemba n ta bemba n na, a wɛɛ ɛ wo wan ko a. A nyɛnden fan mu Yataa 'a gboo ɔ, mbɛ a na‑a a fɔ wan Ebeami ye, a ɔ, ‘I cheeya ɔ mu, n mbe mɔɛ n gbɛɛ dua‑a dunya chɛ ɔ.’

²⁶Yataa‑a a 'a wai chɛ mɔɛ Chisɔsi a na kɛn, a‑a a sɔ wo pɛn pɛn tena, wo wan Isɔɛɛ mɔɛ nu. Yataa‑a chɛ ma, min mbe a ma, a ni wo dua, wo ni wo kan kɔ sɔ wo 'a faamagbaa koe n na.”