Read Kono CHISƆSI 'A SƆ MƆƐ NU 6 Bible Online

CHISƆSI 'A SƆ MƆƐ NU 6 - Kono bible

CHISƆSI 'A SƆ MƆƐ NU 6

¹Tima ɛnden benden gbakɔ, Chisɔsi fɛ denɛ n‑na a kuu sɔ wan kɔkoa‑a. Mbɛ koɛ bun‑da a kuu sɔ‑a an tɛ ɔ. Chu mɔɛ miin ka‑a Kiisi chɛnyɛ ɔ, an ni wan gbonyɛ‑a, mbɛ Chu mɔɛ miin suun‑da Chuusaɛn duu ɔ, an dɔ, an mbe ma fenɛ ɔ du‑a tee ɔ tee a, an mbe ee fen chɛ n be fuinya musu chɛ n ma, miin ka‑a ka Kiisi chɛnyɛ ɔ.

²Chɛ ko a, Chisɔsi 'a sɔ mɔ tan kun ma fea chɛ n‑na mɔɛ chɛ n gbɛɛ a kan kaina dɔndɔ, miin na‑a an kai fa ka Chisɔsi a, mbɛ an‑na a fɔ an ye, an dɔ te, “A ma ee bia‑a nn ni nn boo ka Yataa 'a bai sa a, min mbe a ma dechee, nn ni fen chɛ n du mɔɛ n ma.

³Chɛ an fɛ mu, nn suun ma nyɔɛ nu Chasi ɔ, wo mɔ wɔnfea ya wo tɛ, basɔmaya ɛ wo boo ɔ miin ko a. Yataa Nyina ɛ miin fɛ, a yɛ to, miin yiima tɛen mu, min mbe a ma, nn ni wai chɛ nɛnɛ be an ma.

⁴Mbɛ nn tana sin, nn ma gbɔsɔɛ ɛ ma‑a dechee samun chɛ an na, ni Yataa 'a bai sa koe a.”

⁵Bai chɛ‑a mɔɛ chɛ n gbɛɛ faa chima wan. Chɛ‑a a ma wan, an‑na an boo sɔ mɔ kuun chɛ n ma, an tɛ ɔ. Mɔɛ saa ni Sitibin fan na, danaya tɔɛ ni min na, a sin Yataa Nyina ni wan a fɛ. A tɔɛ n fan nii nɛ Fiipi a, Pɔkɔyɔsi, Nikanɔ, Timɔn, Pamɛnasi, ni Nikodasi. Nikodasi chɛ Chu mɔ nii ma a a, a sin na‑a ka Andiɔki duu ɔ wan. Chɛɛ a na‑a yɛ wan gbɛ Chu n 'na Yataa fai gbee ma.

⁶Mbɛ mɔɛ chɛ n gbɛɛ, an na‑a mɔ wɔnfea chɛ n na Chisɔsi 'a sɔ mɔɛ chɛ n tena. Sɔ mɔɛ chɛ n‑na an boo bun fan an mɔ wɔnfea chɛ n ma, mbɛ an‑na samunɛ chɛ an ko a.

⁷Mbɛ a ka gbɛ a tima chɛ ma, Yataa 'a bai a fasan‑da wan a ɔ gbɛɛ ɛ. Chisɔsi fɛ denɛ n da a koa‑a wan gbeden Chuusaɛn duu ɔ, mbɛ Chu n tɛ mɔɛ nu Yataa a, an sɛsɛ‑a an boo si sakana bai chɛndɛ chɛ kɔɔ.

⁸Sitibin ni mɔɛ an na, Yataa na‑a min dua a sɛmbɛnden na. A sin, Yataa Nyina ni wan a fɛ, min‑na a ma, a ni kun kamaya ko sɛsɛ ma koe a, miin ni a ɔ yian, mbɛ sakana bai chɛ ka‑a Yataa tena wan.

⁹Chɛɛ tee dɔndɔ a, mɔɛ dɔ n ka‑a wan Chu n 'na samun chɛ chenɛ a, an ni min chee, an dɔ, Chu miin bɔ‑a yɔncha ɔ, an 'na samun chɛ chenɛ. Mbɛ an bun‑da bai tɛnsɛ‑a an nyɔn tɛ, an bɛ Sitibin na. Chu mɔɛ n ni an mɔɛ chɛ n na, miin ka‑a Sayini duu ɔ, a basan Adɛsandia duu ɔ a. A yɛ to, Chu mɔ dɔ mende nu, miin ka‑a Sidisia, an fea Esia chɛnyɛ ɔ a, an ni wan nɔ.

¹⁰Chɛɛ an nii kun an ni sɔ Sitibin 'na yiimatɛ a, koe min na mu, Yataa Nyina ni bai n don fan a da a, a fɔ koe a.

¹¹Mbɛ an don‑da mɔɛ n too ɔ, min mbe a ma, an ni a fɔ, mbɛ an‑na a a min fan Sitibin mbe bai yama sa‑a, a si Mosisi n fea ma Yataa a.

¹²Bai chɛ‑a a ma wan, mɔɛ n gbɛɛ a kan‑da, an bɛ basan Chu gbakoo n na, ni Chu n 'na sawa kan mɔɛ nu. Mbɛ an gbɛɛ faa tɛ‑a Sitibin ma, min‑na a ma, an‑na a bia, mbɛ an na‑a a a Chu kuti wa ɔ.

¹³Mbɛ an na‑a mɔɛ n na, fania siiya chɛ koe a, a si Sitibin ma. Mbɛ an mɔɛ chɛ n‑na a fɔ, an dɔ te, “Tima ɔ tima kamin chɛ ɛ bai yama n fan fɔ, a si Yataa 'a kata chɛ ma, min mbe tenchen a ko a. Ɛ a fɔ to, a si sawa chɛ n ma, Yataa‑a miin be Mosisi ma.

¹⁴Nn‑na a a min fan to, a‑a a fɔ, mbɛ Chisɔsi chɛ, min ka‑a Nasaɛti duu ɔ, ɛ Yataa 'a kata chɛ te‑a wan. A yɛ to, a ɔ, ɛ mmɔ 'a manda n gbɛɛ, Mosisi‑a miin be mmɔ ma, ɛ an ka‑a wan chia ma.”

¹⁵Mɔɛ miin gbɛɛ ni ka si ɔ an Chu kuti wa ɔ, an ya to‑a ka wan Sitibin na, mbɛ an‑na a ya kɔɔɛ yen, yɔ maeka ta ɛ buɛ min dɔ.