Read Kono CHISƆSI 'A SƆ MƆƐ NU 7 Bible Online

CHISƆSI 'A SƆ MƆƐ NU 7 - Kono bible

CHISƆSI 'A SƆ MƆƐ NU 7

¹Mbɛ Chu n 'na tɛ mɔ wa chɛ Yataa tena, a‑a Sitibin dɔ tisa, a ɔ, “An‑na kunɛ miin gbɛɛ si ka i kun ma, tea mu an na?”

²Mbɛ Sitibin dɔ, “N suun ma nyɔɛ nu, fa nu, wo wo too ma sɔ n ma. Mmɔ bemba Ebeami na‑a ka wan Mɛsɔpotemia, a ta‑a Ayan duu ɔ. Chɛɛ a e na to ta‑a, Yataa min benden mu fen kɔ fen ma, a bɔ‑a wan a ya a,

³mbɛ a‑a a fɔ a ye, a ɔ, ‘Ka i 'a mɔɛ n kun ma, bɔ i 'a chɛnyɛ ɔ, i ni ta chɛnyɛ dɔ mende ɔ, n mbe min yian‑da i a.’

⁴A sin bɔ‑a wan a waa a, Kadia chɛnyɛ ɔ, mbɛ a ta‑a si Ayan. Mbɛ Ebeami fa fa‑a kɛn, Yataa‑a a ma wan Ebeami bɔ‑a Ayan. Mbɛ a na‑a a a chɛnyɛ chɛ ɔ, wo e ka gbɛ kaina, min mu Isɔɛɛ chɛnyɛ chɛ a.

⁵Chɛɛ Yataa nii ma an duu gboo chɛ kan kɔ kan be ni a ma, ma koe a a ta a a, duu gboo chen ya dɔndɔɛ wɛɛ nii ma be ni a ma. Chɛɛ Yataa‑a a too ɔ dia wan, chɛnyɛ chɛ gbɛɛ ma koe a a ta a, an bɛ a cheeya n na. Tooɔdia chɛ ni chɛ tena ka tima min na, den nii wɛ Ebeami boo ɔ.

⁶Chɛɛ Yataa‑a a fɔ wan a ye, a ɔ, ‘I cheeya n mbe ma‑a wan sonda n na, chɛnyɛ dɔ mende ɔ. An sin mbe ma‑a wan nɔ yɔnɛ n na, an mbe an na mɔnɛ‑a, san chɛmɛ naanin ko a.’

⁷Mbɛ Yataa‑a a fɔ to, a ɔ, ‘Chɛɛ an chɛnyɛ chɛ ɔ mɔɛ nu, an mbe ma‑a miin kɔɔ yɔncha ɔ, n mbe kaa a tɛ‑a wan an bakoe ma, n ni an tɔɔ. Mbɛ chɛ gbakɔ, n‑na a ma, i cheeya n ni bɔ an chɛnyɛ chɛ ɔ. An sin mbe na‑a wan nɛ, mbɛ an‑na n fai.’

⁸Yataa‑a ko dɔndɔ fɔ gbɛ Ebeami ye, a ma koe a, min mbe a ɔ yian, mbɛ an dɔn‑da an dɔbɛn chɛ ma. Yataa ɔ, Ebeami ni a wandi a kamincha, a ni yɛ, a cheeya kan kɔ kan na ni kamincha. Chɛ‑a a ma wan, a 'a denɛ Aisaki suun‑da tee sɛi gbe, Ebeami‑a a a kamincha. Mbɛ Chekɔpi wɛɛ suun tee che‑a kɛn tee sɛi ɔ, Aisaki wɛɛ‑a a a kamincha wan. Chekɔpi wɛɛ, a 'a den kaien tan kun ma fea chɛ n bɛɛ, mmɔ bemba n ta bemba nu, a‑a an na kamincha wan. An fan‑na dambi tan kun ma fea chɛ kuu sɔ, Isɔɛɛ chɛnyɛ ɔ.

⁹“Chekɔpi 'a den chɛ nu, an too‑a wan an dɔɛ Chosɛfi a, mbɛ an‑na a ma tachɛ mɔɛ n ma, miin ta‑a a a Ichipi chɛnyɛ ɔ. An mɔɛ chɛ n bɛɛ, an‑na Chosɛfi ma tachɛ wan yɔncha ɔ. Chɛɛ Yataa nii ma ka ni a fɛ,

¹⁰a sin ni basan fan a ma tima ɔ tima, ni ko yawaenɛ‑a a tan. An ta‑a wan Chosɛfi a mansa chen kɔɔ, Ichipi chɛnyɛ ɔ. Chɛɛ Yataa na‑a sɔn chɛndɛ be wan a ma, a basan yiimatɛ a. Chɛ‑a a ma wan, Chosɛfi wakoe a dia‑a Ichipi mansa chɛ ye. A sin, a‑a Chosɛfi ma wan kɔfana a Ichipi chɛnyɛ gbɛɛ kun ma. A yɛ to, Chosɛfi an ni to ya ɔ sɔɛ a, mansa chɛ 'a chenɛ n gbɛɛ kun ma.

¹¹Mbɛ mansa chɛ‑a chɛ ma kɛn, tima che‑a wan gbɛ, mbɛ kɔnkɔ wa na‑a Ichipi chɛnyɛ gbɛɛ ɔ, a basan Kenaan na. Kɔnkɔɛ chɛ‑a mmɔ bemba n ta bemba n tɔɔ wan, an nii kun daun fenɛ ma kan kɔ kan, a daun koe a.

¹²Mbɛ Chekɔpi‑a a a min, mbɛ daun fenɛ ma ɛ sɔn fan Ichipi chɛnyɛ ɔ. A‑a chɛ a min kɛn, a 'a denɛ kaima nu, mmɔ bemba n ta bemba n nu, a‑a an na ta wan tima saa saa ko a Ichipi.

¹³Chekɔpi‑a an na ta kɛn to, a fean bɔɛ ɔ, Chosɛfi‑a a wandi wakoe ɔ yian fan a suun ma nyɔɛ chɛ n na. An tima chɛ a ni, mansa chɛ wɛɛ‑a Chosɛfi a mɔɛ n bakoe ɔ sɔn.

¹⁴Mbɛ chɛ ma‑a kɛn, Chosɛfi‑a sakana a ta wan a fa tena, a ɔ, a ni na a tan. A ɔ, an bɛ a wan Chekɔpi 'a mɔɛ n gbɛɛ a, miin danɛ taen ni mɔ bi wɔnfea, kun ma duu ɔ.

¹⁵Mbɛ Chekɔpi n yii‑a Ichipi, a to‑a kaina, an bɛ mmɔ bemba n ta bemba n na, aan an gbɛɛ fa‑a a nyɔn na.

¹⁶An ta‑a wan an su n na Sɛkɛn duu ɔ. An‑na an tɔn fan kamba chɛ ɔ, Ebeami na‑a min san Amɔ 'a denɛ n ma, kɔpɔ ɛnden na.

¹⁷“Tima ni gbɛ kɛn gbɛn tena a ma, tooɔdia chɛ bɔ koe ma a a, Yataa na‑a min chɛ Ebeami a. A tima chɛ a, mmɔ 'a mɔɛ n da a ni koo wan gbɛ gbeden, Ichipi chɛnyɛ ɔ.

¹⁸Mbɛ a tima chɛ a gbɛ, mansa dɔ mende si‑a wan Ichipi chɛnyɛ ɔ. An mansa chɛ nii ma ko ɔ ko ɔ sɔn, a si Chosɛfi ma.

¹⁹A‑a yaa a ben fan mmɔ 'a mɔɛ n na, mbɛ a yɛ‑a to, a‑a ko ma gbaaenɛ n sa an ma. Mbɛ a yɛ‑a wan to, a‑a a din an ma, kɔ an ni an 'na denɛ n na dɛ fia ɔ, min mbe a ma, an ni fa.

²⁰A tima chɛ a ni Mosisi suun‑da. Den ma kawaen ba ni a a. A de‑a a bɔ wan a ɔ, kau sawa ko a, a 'a chenɛ a.

²¹Chɛ gbakɔ, a de‑a a a dɛ wan. Mbɛ mansa chɛ 'a den musuma, a‑a Mosisi gbu ya, mbɛ a‑a a bɔ a ɔ, a ta denɛ a.

²²Mansa 'a den musuma chɛ‑a a ma wan, an‑na Mosisi kan yiimatɛ wa chɛ gbɛɛ a, Ichipi mɔɛ n dɔ. A sin, a kosan‑da wan koɔ‑a kaka, a yɛ to, a chɛ chɛ wai ni nyin.

²³“Mosisi suun sanɛ che‑a kɛn san bi naaninɛ ɔ, a‑a a yii na chii wan, ta koe a a bɔɛ Isɔɛɛ mɔɛ n bakoe ɔ gbɛ a.

²⁴A‑a a ɔ yen fan, Ichipi mɔ dɔndɔ ɛ Isɔɛɛ mɔ dɔndɔ bia‑a yama. Chɛ‑a a ma wan, Mosisi‑a a yii na chii Isɔɛɛ mɔɛ chɛ ta a yɛ koe a. A‑a Ichipi mɔɛ chɛ fa wan.

²⁵A ni wan Mosisi yii ma, mbɛ a 'a mɔɛ n ni ko dɔndɔ ɔ gbɛ‑a wan. Mbɛ Yataa ni na tena wan a ma‑a, a wan Mosisi ni an kun bɔ an 'na yɔncha chɛ ɔ. Chɛɛ an nii ma chɛ a ɔ gbɛ ni.

²⁶Mbɛ banda ɔ ka‑a tee dɔndɔɛ ma, a‑a a tan fan, a 'a mɔɛ n mbe butuin chɛ‑a, an mɔ fea. Mbɛ a‑a a yii na chii bai sa koe a an tɛ ɔ. Mbɛ a‑a a fɔ an ye, a ɔ, ‘Wo wo too ma sɔ, wo mu suun ma nyɔn dɔndɔɛ n fan na. Wo ma wo nyɔn bia yama yama.’

²⁷Chɛɛ kaminɛ dɔndɔɛ min ni ka a bɔɛ chɛ gbasi tena, a‑a Mosisi a nyɔndɔn fan, a bɔ an tɛ ɔ. Mbɛ a‑a a fɔ Mosisi ye, a ɔ, ‘Nyɔn‑na i ma mansa a, kaa a tɛ koe a nn tɛ ɔ?

²⁸I toen mu i ni n bɛɛ fa, yɔ i‑a Ichipi mɔɛ chɛ fa buɛ min dɔ kunun, ae?’

²⁹Mosisi‑a bai chɛ a min kɛn, a‑a a nun fan, a bɔ Ichipi chɛnyɛ chɛ ɔ. Mbɛ a ta‑a, ma koe a Midia chɛnyɛ ɔ. A to‑a nɔ wan, aan a‑a den kaien fea suun.

³⁰“San bi naaninɛ bendenɛ gbakɔ, maeka bɔ‑a wan Mosisi ya a. Maeka chɛ ni wan, yɔ ta manɛ ɛ ma kɔn denɛ ɔ fuinɛ ma. Chɛ ma‑a Saina kɔnkɔɛ baima wan.

³¹A‑a an koe chɛ ɔ yen kɛn, Mosisi a fii‑a wan. Mbɛ a‑a a ma ta an kɔn den chɛ baima, min mbe a ma, a ni koe chɛ ɔ gbɛ chɛndɛ chɛ. Chɛɛ a‑a Mansa Yataa kuiɛ a min fan, a ɔ,

³²‘N fan mu Yataa a, wo bemba n ta bemba n‑na min fai. Ebeami na‑a n fai wan, Aisaki‑a n fai, Chekɔpi wɛɛ‑a n fai.’ Mbɛ Mosisi‑a bai chɛ a min kɛn, chiandia dɛ‑a wan a ɔ, mbɛ a bun‑da samba‑a. Chɛ‑a a ma wan, a nii che to an kaina gbu ma fɛn‑da.

³³Mbɛ Mansa Yataa‑a a fɔ a ye, a ɔ, ‘I 'a kɔɔwa bɔ i chenɛ a. Koe min na mu, e ka sɔ ɔ kaina min, ɛ tenchen n fan ko a.

³⁴N‑na a ɔ yen, Ichipi mɔɛ nu, an mbe n 'na mɔɛ n tɔɔya tena buɛ min dɔ, a yama yama boo a. N‑na an di chɛ kuiɛ a min. An fɛ mu, n fandi gbu, n yii‑a a ka banda bu ɔ, n ni an baun. Chɛ an‑na a fɔ, n mbe i a yɛ tena gbɛ Ichipi chɛnyɛ chɛ ɔ.’

³⁵“Mosisi chɛ ni, Isɔɛɛ mɔɛ n ban‑da min dɔ. An‑na a ɔ tisa wan, an dɔ te, ‘Nyɔn‑na i ma mansa a, kaa a tɛ koe a nn tɛ ɔ?’ A sin fan mu mɔɛ a, Yataa‑a min na na, ma koe a ya ɔ sɔɛ a, Isɔɛɛ mɔɛ n kun ka koe a. Yataa‑a chɛ sin ma maeka chɛ an 'na gbasaya ɔ, min na‑a bɔ a ya a yɔ ta manɛ, kɔn den chɛ ɔ.

³⁶Kamaya ko wa sɛsɛ, miin ni a ɔ yian, mbɛ Yataa ni wan an kɔ, Mosisi‑a an ma wan. A‑a an ma wan Ichipi chɛnyɛ ɔ, ni kɔ yii wa chɛ ɔ, an mbe min chee, an dɔ, Yii Yawa. A‑a a a tun fan an kamaya koe chɛ n ma‑a, san bi naanin chɛ gbɛɛ ɔ, an ni min dɔ fuinɛ chɛ ma.

³⁷Mosisi an‑na a fɔ Isɔɛɛ mɔɛ n ye, a ɔ, ‘Yataa ɛ a 'a gbonka chɛ mɔɛ a na‑a wan wo tena, yɔ a‑a n na na buɛ min dɔ wo tena. A sin mbe ma‑a wo 'a mɔɛ gbu an na.’

³⁸Mosisi chɛ sin ni wan Isɔɛɛ mɔɛ n tɛ ɔ, an na sɔndenɛ ni tima min na fuinɛ ma. An bɛ ni nɔ mmɔ bemba n ta bemba n na, ni maeka chɛ wɛɛ, min koɔ‑a a tena Saina kɔnkɔɛ ɔ. A sin‑na Yataa 'a sakana bai ma sɔn fan, min mbe fɔɛ be, a a ben koe a mmɔ tena.

³⁹“Chɛɛ mmɔ bemba n ta bemba n ma dɔn ni, an ni an too ma sɔ Mosisi chɛ ma. An na‑a a a yɛ wan an boo kɔ, mbɛ an‑na an yii na chii yɛ koe a Ichipi chɛnyɛ ɔ.

⁴⁰Mbɛ an‑na a fɔ Eyɔn[8] ye, an dɔ te, ‘Yataa dɔ mende n nyan nn ye, miin mbe kun sɔ‑a nn ya ɔ. Koe min na mu, nn ma a ɔ sɔn fen ma‑a Mosisi chɛ a, min bɔ‑a nn na, a ka Ichipi chɛnyɛ ɔ.’

⁴¹A tima a ni gbɛ, mbɛ an‑na fenɛ nyan yɔ ninchi, a fai koe a, mbɛ an‑na yasi fenɛ bɔ a ma. Mbɛ an yɛ‑a, an‑na daun fen daun buɔdia bɔ, an fen chɛ ko a, an fandi‑a min nyan ka an boo a.

⁴²Mbɛ Yataa wɛɛ‑a a kan kɔ sɔ an na, a‑a a boo ka an na, an ni bun tee fai‑a, ni kau basan tɔmbuaka n na banda a. Chɛ ma‑a wan, yɔ a nyɛnden mu buɛ min dɔ, gboo chɛ ɔ Yataa 'a gbonka chɛ mɔɛ n‑na min nyɛn. Yataa‑a a fɔ wan, a ɔ, ‘Wo wan Isɔɛɛ mɔɛ nu, san bi naanin chɛ gbɛɛ ko a, wo ni tima min na fuin chɛ ma, wo ni soe miin gbɛɛ fa ka, a basan yasi gbɛɛ a, wo ni miin bɔ ka, n fan ko a nii ma.

⁴³Wo na‑a ku chɛ ya wan wo kun ma, fania yataa chɛ, an ni min chee ka Mɔdɔki, a ni min kɔɔ, ni tɔmbuaka chɛ, min bɔen ni ka wo 'a fen chɛ a, Defan, wo e min fai ka. An gbɛɛ ni fenɛ n fan na, wo‑a miin nyan wo wandi, an fai koe a. A sin fan fɛ mu, n mbe a ma‑a, an ni bɔ wo a wo ta chɛnyɛ ɔ, mbɛ an ta‑a wo a Babidon duu gbaa chia a.’

⁴⁴“Mmɔ bemba n ta bemba nu, tima min na an ni fuinɛ ma, tɛndi an ni an boo ɔ, min ni a ɔ yian, mbɛ Yataa ɛ an tɛ. Yataa‑a tɛndi chɛ nyan buɛ ɔ yian fan Mosisi a. An sin gbu‑a a nyan fan, yɔ Yataa wandi gbu‑a a nyan buɛ ɔ yian buɛ min dɔ.

⁴⁵Chɛ gbakɔ, mmɔ bemba n ta bemba nu, an ta‑a wan Yataa 'a tɛndi chɛ a, an ta fa nu, an na‑a min be ka an ma. An ta‑a wan an tɛndi chɛ a, tima min na an ni ta tena, an bɛ Chɔsowa n na. Mbɛ an‑na chɛnyɛ chɛ bia wan a tima chɛ a, Yataa‑a mɔ dɔ mende n gbain kaina an ya ɔ. An tɛndi chɛ sin to‑a nɔ wan an boo ɔ, aan Defidi ma‑a mansa a.

⁴⁶Yataa faa chimaen fan ni Mansa Defidi a. Mbɛ a wan Defidi‑a Yataa ɔ tisa, a ɛ koe min ma. A ɔ, Yataa ni a ma, a wan Defidi ni chenɛ sɔ a wan Yataa chɛ ye, Chekɔpi ni min fai.

⁴⁷Chɛɛ Sɔɔmon fan‑na chenɛ sɔ Yataa ye.

⁴⁸“Chɛɛ Yataa Wa ee ma chen na, mɔ gbu n mbe min sɔ. Ɛ wan yɔ Yataa 'a gbonka chɛ mɔɛ n 'na gboo‑a a fɔ buɛ min dɔ, a ɔ,

⁴⁹‘Mansa Yataa‑a a fɔ wan, a ɔ, “N tena, banda bu ɔ mu n 'na mansa sea an na. Dunya gbɛɛ sin mu fen denɛ an na, n mbe n chenɛ sɔ min ma. Chɛ an fɛ mu, chenɛ minan nyɔn sima mu, wo toen mu wo ni min sɔ n ye? Kaina gbu ɛ mende, n mbe kun n suin‑da kaina min?

⁵⁰N fan‑na fen chɛ n gbɛɛ gbu nyan.” ’ ”

⁵¹Mbɛ Sitibin n dɔ te gbɛ, a ɔ, “Wo too ɔ gbɛ kaka. Wo faa n dɔ ɛ wan dechee yɔ mɔɛ chɛ nu, miin ban‑da Yataa ɔ. Wo too gbee‑a, Yataa bai a min koe a. Wo e wan dechee yɔ wo bemba n ta bemba nu. Wo ee dɔn tima ɔ tima ko a, wo too ma sɔ koe a Yataa Nyina ma.

⁵²Yataa 'a gbonka chɛ mɔ kan kɔ kan nii nɔ, ni wo bemba n ta bemba n ma ko ma gbaaenɛ sa ni min ma. An‑na Yataa 'a gbonka chɛ mɔɛ chɛ n fa wan, miin na‑a a gbonka suun, a si Yataa 'a wai chɛ mɔɛ ma. Mbɛ an wai chɛ mɔɛ chɛ, min tanden mu a chen kɔɔ, ɛ na‑a wan. Chɛɛ wo gbu‑a a ma tachɛ gbɛ, mbɛ wo‑a a fa.

⁵³Wo wan mu mɔɛ n na, Yataa na‑a a 'a sawa be miin ma. Maeka n fan na‑a na sawa chɛ a wo tena. Chɛɛ wo ma dɔn ni, wo ni don sawa chɛ kɔɔ.”

⁵⁴An‑na bai chɛ a min kɛn, an faa tɛ‑a wan gbeden Sitibin da a bai chɛ ma. Mbɛ an bun‑da an nyinɛ a daun‑da mɔnɛ ɔ, a si a ma.

⁵⁵Chɛɛ Yataa Nyina ni wan Sitibin fɛ gban. Mbɛ a‑a a ya a sɛ banda a, a‑a Yataa 'a manɛ yen ɛ man‑da. A yɛ to, a‑a Chisɔsi wɛɛ yen, ɛ sɔ ɔ Yataa boo nyima ɔ.

⁵⁶Mbɛ a‑a a fɔ, a ɔ, “A yen ko, n‑na banda bu ɔ yen, a da a kaenɛ ɛ. A sin, an ni min chee, an dɔ, Mɔ Gbu 'a Denɛ, ɛ sɔ ɔ Yataa boo nyima ɔ.”

⁵⁷Chɛɛ an‑na yee tɛ wan, mbɛ an‑na an boo don an too ɔ, an ma na a da a kuiɛ chɛ a min to. Mbɛ a ya kɔɔɛ a, an sawan‑da Sitibin ma,

⁵⁸mbɛ an‑na a konkon a bɔ an duu chɛ ɔ. Mbɛ an bun‑da a ma bon bon‑da, a fa koe a. Miin ni ka sii n na, an 'na doma kun ma doma nu, an‑na an bɔ wan, mbɛ an‑na an to kamin tɔngbɔ dɔndɔ boo ɔ, min tɔ ni Sɔɔ.

⁵⁹An sin ni kɛn a ma bon bon tena, Sitibin‑na samunɛ chɛ wan, a ɔ, “Mansa Chisɔsi, n‑na n fɔɛ be i ma. A sa tena ɔ bɛn n ye.”

⁶⁰Mbɛ a‑a a kumbai gbangban duu ma, mbɛ a‑a samunɛ chɛ, a kuiɛ ma sɛenɛ a. A ɔ, “Mansa, i boo bɔ mɔɛ chɛ n 'na ko yama chɛ n dɔ, an mbe ka min ma‑a n na.” A ban‑da kɛn samun chɛ chɛ‑a, mbɛ a fa‑a.